Yoanɛ 4
4
Yezo na mbanga wali kɔi mɛ zo ti Samaria
1Afarizeo ama ndo ya, azi mɛ ati ava Yezo, la ala mu batisimɔ ko, ala ndo ma wo ma aɔ ava Yoanɛ. 2(Ti biani ko, ta Yezo nvɛni ndohɛ̃ ndo azi batisimɔ ma, ava lo ndo la ndohɛ̃ azi batisimɔ.) 3Ngoi mɛ Yezo ĩ ma tɛnɛ ni ko, lo zia sese ti Yudea, lo diri ka sese ti Galilea. 4Ti lo gwengɔ kai ko, ale lo ɔ ti sese ti Samaria, wa lo si kai.
5Lo nɔ ngbĩi lo doli na mbanga kɔdɔrɔ ti Samaria mɛ ili ni la Sikarɛ. Kɔdɔrɔ ni ndo ndũ na yaka mɛ ndo Yakobo ahɛ̃ nyi lo Yozɛfu. 6Ndo mɛ ndo nga Yakobo agɛ̃ ngu da la. Yezo anzɛ̃ ndo na lo ti nɔ mɛ lo nɔ, la lo ko, lo du so ndo nyɔ ngu ni. Lá ati ndo nga ma ge tɛ be kɔmbitɛ.
7Mbanga wali kɔi mɛ zo ti Samaria aga so tɔ̃ngɔ ngu, la Yezo apa hɛ̃ lo ya: “Zo wali, tɔ̃ hɛ̃ mbi ngu mbi nyɔ.” 8(Ava Yezo azia ndo Yezo so ndo ko, agwe ka lɛ kɔdɔrɔ so vɔ̃ngɔ tɛ.) 9Wali ko agbinya hɛ̃ Yezo ya: “Ee! Mɔ wa Yuda, mbi tɛ mbi wa Samaria, ko kɔde mɛ mɔ yɔ ngu ti mbi ya, mbi hɛ̃ mɔ, mɔ nyɔ sia?” (Lo tɛnɛ ndo nga so, ta sanga ma, ta Ayuda na awa Samaria ndomangbi ma.) 10Yezo agbinya hɛ̃ wali ko ya: “Se adu ya, mɔ hĩnga ye mɛ Nzapa ndohɛ̃ zo, bere mɔ hĩnga zo mɛ ndoyɔ ngu ti mɔ ko, ale mɔ la mɔ lengbi ti yɔngɔ ngu ti lo, wa lo hɛ̃ mɔ ngu mɛ alengbi ti hɛ̃ngɔ mɔ beta du.” 11Wali ko apa hɛ̃ lo ya: “Gbia, omɛ ta mɔ na ta ma, wa omɛ nga du ngu ni lipi lipi ko, kɔdɛ mɛ mɔ lengbi ti tɔ̃ngɔ ngu ni, hɛ̃ngɔ hɛ̃ zo ya lo nyɔ, wa lo lua beta du sia? 12Kotara e Yakobo ndo la azia du ngu olo hɛ̃ e, lo nvɛni lo nyɔ ndo ngu ni. Aya lo, na asa tɛ lo zu anyɔ ndo nga ni. Ko mɔ da be mɔ ya, mɔ ɔ kotara e Yakobo?” 13Yezo agbinya hɛ̃ lo ya: “Azi zu mɛ ndonyɔ ngu olo ko, gwɛ̃ ngu na gbɔ̃ngɔ la fani mɛ ndɛ̃. 14Kanda zo ko la anyɔ ngu mɛ mbi na hɛ̃ngɔ lo ko, ta gwɛ̃ ngu ti gbɔ̃ gbanda lo fani mɛ ndɛ̃ bɛ gbɔ ma. Ngu mɛ mbi na hɛ̃ngɔ lo, na dungɔ ka ya tɛrɛ lo nga ma li ngu mɛ ndosi tiri tiri, ko na hɛ̃ngɔ lo du ti kaka.”
15Wali ko agbinya hɛ̃ lo ya: “Gbia, hɛ̃ mbi ngu ni ko mbi nyɔ, wadila ta gwɛ̃ ngu ti gbɔ̃ mbi ma, ko mbi zia gangɔ ge, tɔ̃ngɔ ngu.”
16Yezo apa hɛ̃ lo ya: “Gwe mɔ ili kɔ mɔ, ĩ na lo ĩ ga.” 17Wali ko agbinya hɛ̃ lo ya: “Ta kɔ mbi da ma.” La Yezo apa hɛ̃ lo ya: “Mɔ li nzɔ̃ni la mɔ pa ya, ta kɔ mɔ da ma. 18Ta sanga ma, mɔ du ndo na akɔli kɔ̃, ko kɔli mɛ ĩ na lo ĩ ndodu na olo ko, ta lo kɔ mɔ ma. Beta tɛnɛ la mɔ tɛnɛ hɛ̃ mbi.” 19Wali ko apa hɛ̃ Yezo ya: “Gbia, mbi hĩnga ya, mɔ wa pangɔ nyɔ Nzapa. 20Wa ba ndo hɔtɔ mɛ ndo akotara e awa Samaria ndovɔrɔ na Nzapa da lo mɛ. Kanda tɛ ĩ Ayuda ko, ĩ pa ya, ndo mɛ ale azi avɔrɔ na Nzapa da la ka Yeruzalɛmɛ.”
21Yezo agbinya hɛ̃ lo ya: “Zo wali, ye tɛnɛ mɛ mbi ndotɛnɛ hɛ̃ mɔ. Mbanga lá kɔi gbanda ko, ta azi ti vɔrɔ gbanda To mbi Nzapa so ndo hɔtɔ olo, bere ka Yeruzalɛmɛ ma. 22Ĩ awa Samaria, ta ĩ hĩnga Zo mɛ ĩ ndovɔrɔ lo ma, kanda e Ayuda la e hĩnga Zo mɛ e ndovɔrɔ lo, ta sanga ma, Wa songɔ azi alo gbanda ka popo tɛ Ayuda. 23Ngoi ni na lengbingɔ, ko alengbi wɛ, abɛta awa vɔrɔngɔ To mbi Nzapa na vɔrɔngɔ lo na nguru tɛ Tɔrɔ Santo, ala nga na vɔrɔngɔ lo na Seni nvɛni. Ta sanga ma, se mɛ To mbi aye ya, azi avɔrɔ na ni la. 24Nzapa lo Tɔrɔ, ko ale azi avɔrɔ lo na nguru tɛ Tɔrɔ Santo, avɔrɔ nga lo na seni nvɛni.”
25La wali ko apa hɛ̃ lo ya: “Mbi hĩnga ya Mɛsia na gangɔ gbanda. (Mɛsia ni alengbi ya, Kristo.) Ngoi mɛ gbanda lo ga, wa lo tɔndɔ hɛ̃ e nda ye zu.” 26Yezo agbinya hɛ̃ lo ya: “Ba mbi Mɛsia ni lo mbi ndotɛnɛ tɛnɛ hɛ̃ mɔ.”
27Ngoi mɛ Yezo na wali ko so ndotɛnɛ tɛnɛ, la ava lo alo ka ndo mɛ fɛrɛ ala nɔ da adiri. Ala ĩ hũ Yezo na wali ko so ndotɛnɛ tɛnɛ ko, ala bema sĩ. Ko ta zo kɔi ti hũnda Yezo ya: “Ye mɛ mɔ ndohũnda ti wali olo nɛ? Bere nda mɛ ĩ na lo ĩ ndotɛnɛ tɛnɛ nɛ?” ma.
28La wali ko azia ta ngu tɛ lo so ndo ko, adiri anɔ ka lɛ kɔdɔrɔ. Lo ĩ si kai ko, lo pa hɛ̃ azi ya: 29“Ĩ ga ĩ ba mbanga kɔli kɔi lo ge, lo kambisa aye zu mɛ ndo mbi li. Bere ka Mɛsia mɛ ndo e ma ya lo na gangɔ la?” 30Azi ĩ ma so ko, ala lo ka ya kɔdɔrɔ, ako kuu, anɔ atã Yezo.
31Ngoi mɛ wali ko ĩ gwe ko, ava Yezo apere Yezo ya: “Wa hangɔ lo tɛ Nzapa, tɛ ye hĩ!” 32La Yezo apa hɛ̃ la ya: “Mbi na tɛ tɛ mbi ti tɛngɔ da, ko ta ĩ hĩnga ni ma.” 33Ava lo ahũndangbi tɛrɛ la ya: “Mbanga zo ka ga fɛrɛ na tɛ hɛ̃ lo wɛ?” 34Yezo apa hɛ̃ la ya: “Tɛ mɛ mbi lengbi ti tɛngɔ la, ale mbi li ye na se nyɔ wa tongɔ mbi, mbi li nga kwa mɛ ndo lo hɛ̃ mbi, ngbĩi mbi kɔ nda ni kpɛkɛlɛ. 35Tɛ ĩ ko, ĩ ndoto matɔ ya: ‘Angbã’ nzɛ̃ siɔ, ko azi akɔ tɛ ka yaka.’ Kanda mbi pa tɛ mbi hɛ̃ ĩ ya, ĩ ba yaka olo zu hĩ. Tɛ ni avuru we, ko ngoi ti kɔngɔ ni alengbi nga we. 36Zo ko ndokɔ tɛ ko, lo lua mbana gɛrɛ lo ti kwa tɛ lo wɛ, ko lo ndobombi tɛ ni na lo ti du ti kaka. Na lo ni ko, wa lungɔ tɛ na wa kɔngɔ tɛ ndosaba ndoni kɔi. 37Ta sanga ma, matɔ ko azi ndoto ya: ‘Wa lungɔ tɛ ndɛ̃, wa kɔngɔ ni nga ndɛ̃’ ko, adu biani. 38Mbi to ndo ĩ ya, ĩ kɔ tɛ ka le yaka mɛ ta ĩ la ĩ li kwa ni ma. Azi mɛ ndɛ̃ ndo la ali kwa ni, ko ĩ ndodu nzɔ̃ni na lo kwa mɛ ndo azi mɛ ndɛ̃ ali.”
39Awa Samaria ma wo ma ti kɔdɔrɔ ko aye lo tɛ Yezo, na lo mɛ ya, wali ko apa ndo hɛ̃ la ya, Yezo akambisa hɛ̃ ni aye zu mɛ ndo ni li. 40Na lo ni la, ngoi mɛ awa Samaria ĩ ga ĩ tã Yezo ko, ala gbɔ̃ gɛrɛ lo ya, lo ngbã so tɛ ani, la Yezo ala so tɛ la bi se. 41Awa Samaria mɛ ndɛ̃ ma wo ma aye lo tɛ Yezo na lo ti tɛnɛ mɛ lo nvɛni lo tɛnɛ. 42La ala pa hɛ̃ wali ko ya: “Ta mɔ da bɛ mɔ ya, e ma bo tɛnɛ mɛ mɔ tɛnɛ na lo tɛ Yezo, la e ye lo tɛ lo ma. Kanda na olo ko, e ye lo tɛ lo, na lo mɛ ya, e nvɛni e ma nga lo na ma e, ko e hĩnga ya, lo Wa songɔ azi ti lɛ sese biani.”
Yezo asara nyingambi tɛ kota wa kwa tɛ leta
43Yezo ĩ la so ndo ko bi sɛ ko, lo hã nɔ, lo gwe ka Galilea. 44Ta sanga ma, lo nvɛni lo pa ndo ya: “Ta azi ndotɔndɔ wa pangɔ nyɔ Nzapa so ya kɔdɔrɔ tɛ lo nvɛni ma.” 45Ngoi mɛ lo ĩ si ka sese ti Galilea ko, awa Galilea ayamba lo nzɔ̃ni, ta sanga ma, ala nvɛni anɔ ndo yenga ti Lipandasi mɛ ati ka Yeruzalɛmɛ, ala hũ ndo nga aye zu mɛ lo li na lá ti yenga ni.
46So pɛni, lo diri ka sese ti Galilea, ka kɔdɔrɔ ti Kana mɛ ndo lo gbinya ngu da, ati vinɔ. Mbanga kota wa kwa tɛ leta ndodu ndo ka Kapɛrnaumɛ, ko tɛrɛ nyi lo ndosɔ ndo. 47Ngoi mɛ wa kwa ko ĩ ma ya, Yezo alo ka sese ti Yudea aga, asi ka Galilea ko, lo nɔ lo tã Yezo, lo dema tɛrɛ lo hɛ̃ lo ya: “Nyi mbi ndotiri kwá ka Kapɛrnaumɛ, ga e nɔ kai, mɔ sara lo.” 48La Yezo apa hɛ̃ lo ya: “Se ta ĩ hũ, mbi li aye ti kpɛnɛ na akukuna ye ma ko, ta ĩ lengbi ti yengɔ lo tɛ mbi ma.” 49Wa kwa tɛ leta ko apa hɛ̃ lo ya: “Gbia, ga é nɔ ka tɛ mbi, so nyi mbi apia akpi.” 50Yezo apa hɛ̃ lo ya: “Diri mɔ gwe, nyi mɔ aso wɛ.” Kɔli ko aye tɛnɛ mɛ Yezo atɛnɛ hɛ̃ lo, la lo diri lo gwe. 51Na diringɔ lo ka tɛ lo ko, lo tengbi na awa kwa tɛ lo so lege, ko ala pa hɛ̃ lo ya: “Nyi mɔ aso wɛ!” 52Ko lo hũnda la ya: “Lo ma nzɔ̃ni biri na saa ti kɛ̃?” Awa kwa agbinya hɛ̃ lo ya: “Biri na saa kɔi ti pɛ bɛ kɔmbitɛ, la terɛ lo ko ndogbi gambu gambu ade le le le.” 53La to nyingambi ko ahĩnga ya, bo ngoi mɛ biri Yezo apa hɛ̃ ni ya, nyi ni na songɔ la. So pɛni, lo na nda se wa tɛ lo zu aye lo tɛ Yezo.
54Ĩ ba ye ti kpɛnɛ ti sɛ mɛ ndo Yezo ali na ngoi mɛ lo lo ka sese ti Yudea, lo diri ka sese ti Galilea la.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yoanɛ 4: NGB87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
