Yoanɛ 10
10
Matɔ tɛ nzɔ̃ wa batangɔ angasã ngbaga
1Yezo apa ya: “Mbi pa hɛ̃ ĩ ti bɛta tɛnɛ ya, zo ko la ta ali ka ya gbágbá tɛ angasã ngbaga ti nyɔ gbágbá nvɛni ma, kanda lo ma ti ndo gbágbá, ti lege mɛ ndɛ̃ ko, lo wa nzĩ. 2Wa zo ko la ali ti nyɔ gbágbá nvɛni ko, lo la wa batangɔ angasã ngbaga. 3Wa batangɔ nyɔ gbágbá azi nyɔ gbágbá hɛ̃ lo. Lo ili angasã ngbaga kɔi kɔi na ili la, ala ma legɔ̃ lo, wa lo si na la ka gegi. 4Ngoi mɛ lo si na la zu we ko, lo dɛ li ni, ko ala dɛ pɛko lo, na lo mɛ ya, ala hĩnga legɔ̃ lo. 5Wa zo ko la ta angasã ngbaga ahĩnga legɔ̃ lo ma ko, ta ala dɛ nga pɛko lo ma. Kanda ala na kpɛlɛngɔ lo, gwengɔ yɔngɔrɔni, na lo mɛ ya, ta ala hĩnga legɔ̃ lo ma.” 6Yezo ato ndo matɔ ni ko hɛ̃ la, kanda ta ala hĩnga ndo nda tɛnɛ mɛ lo tɛnɛ hɛ̃ la ma.
Yezo nga ma nzɔ̃ wa batangɔ angasã ngbaga
7Yezo apa nga ya: “Mbi pa hɛ̃ ĩ ti bɛ ta tɛnɛ ya, mbi nga ma nyɔ gbágbá tɛ angasã ngbaga. 8Azi zu mɛ ndo aga uzu tɛ mbi ko, ala ndo awa nzĩ, ko ta angasã ngbaga ama ndo la ma. 9Mbi nga ma nyɔ gbágbá. Zo ko aɔ ti ndo mbi, lo li ya gbágbá ko, lo na songɔ kwá. Lo na lingɔ, singɔ, nga ma se mɛ bɛ lo aye, lo nga na luangɔ tɛ ti tɛngɔ. 10Wa nzĩ ndoga tɛ lo bo so nzĩngɔ ye, gbɛ̃ngɔ ye, kpɔngɔ asa. Kanda mbi ga tɛ mbi ya, azi alua du mɛ nzɔ̃ni buai.
11“Mbi nga ma nzɔ̃ wa batangɔ angasã ngbaga. Nzɔ̃ wa batangɔ angasã ngbaga ndoka tɛrɛ lo so angasã ngbaga tɛ lo. 12Zo ko ndoli kwa ti batangɔ angasã ngbaga bo na lo ti luangɔ faranga ko, ta lo bɛta wa batangɔ angasã ngbaga ma, ta angasã ngbaga ni nga ti lo ma. Ngoi mɛ se lo hũ zɛ̃ so ndoga ko, lo dɔ angasã ngbaga vakpa, lo zia, lo kpɛ, lo ɔ. Se zɛ̃ aga ko, agbɔ̃nɔ ambanga, agundu nga ya atanga ni. 13Lo kpɛ, na lo mɛ ya, lo ndoli tɛ lo kwa bo na lo ti luangɔ faranga, ko ta ló tɛ angasã ngbaga ndosɔ bɛ lo ma. 14-15Mbi nga ma nzɔ̃ wa batangɔ angasã ngbaga. Nga ma se ko la To mbi ahĩnga mbi, mbi hĩnga nga lo ko, se mɛ nga mbi hĩnga na angasã ngbaga tɛ mbi, ko angasã ngbaga tɛ mbi ahĩnga nga mbi la. Mbi ka tɛrɛ mbi so la. 16Mbi na angasã ngbaga mɛ ndɛ̃, ta ala so ya gbágbá olo ma. Ale mbi bombi nga angasã ngbaga ni ko, ala ma nyɔ mbi, wa ala ti nga angasã ngbaga ti ya gbágbá kɔi, ko wa batangɔ la adu nga kɔi.
17“Be To mbi aye mbi, ta sanga ma, mbi ka tɛrɛ mbi ya, mbi ti lua ni. 18Ta zo kɔi alengbi ti hongɔ mbi na nguru tɛ lo ma, mbi nvɛni la mbi ka tɛrɛ mbi na se bɛ mbi. Mbi lengbi ti kangɔ tɛrɛ mbi, mbi lengbi nga ti luangɔ ni na pɛ kwá. Se nyɔ mɛ ndo To mbi ahɛ̃ mbi la.”
19Ayuda ĩ ma tɛnɛ ko lo ĩ tɛne ko, popo tɛ la ati kangbi sɛ. 20Ambanga ma wo ma apa ya: “Lo na siɔ tɔrɔ ya tɛrɛ lo! Lo wa nyingɔ! Nda mɛ ĩ ndoma tɛnɛ mɛ lo ndotɛnɛ nɛ?” 21Ambanga mɛ ndɛ̃ ya: “Ta zo mɛ na siɔ tɔrɔ ya tɛrɛ lo ndotɛnɛ tɛnɛ nga so ma. Ta siɔ tɔrɔ na nguru ti sarangɔ le awa ziba ma.”
Ayuda akɛ̃ Yezo
22Ndo na li buru na ngoi ti de, la yenga ti dangɔ bɛ na lá mɛ ndo asunu na kota da Nzapa ati ka Yeruzalɛmɛ. 23Ko Yezo so ndolɔlɔ gɛrɛ lo so gbe gofa ka ya gbágbá ti kota da Nzapa. Andoili gofa ni ko ya “Gofa tɛ Salomɔ.” 24Ko Ayuda aga, aka lo kɛrɛrɛ, ahũnda lo ya: “Bɛ e angbã ngbũ na lo tɛ mɔ, mɔ zu gbanda na bɛ e ni lá wa? Se mɔ du Mɛsia biani ko, pa yango hɛ̃ e.” 25La Yezo agbinya hɛ̃ la ya: “Mbi pa ndo hɛ̃ ĩ gã, ko ta ĩ ndoye lo ni ma. Akwa mɛ mbi ndoli na ili To mbi la adu temwɛ tɛ mbi. 26Kanda ta ĩ ndoye lo tɛ mbi ma, na lo mɛ ya, ta ĩ na li nɔ tɛ angasã ngbaga tɛ mbi ma. 27Mbi hĩnga angasã ngbaga tɛ mbi, ala ndoma nyɔ mbi, ko ala ndoɔ pɛ mbi. 28Mbi hɛ̃ la du ti kaka, ta ala kpili gbanda bɛ gbɔ ma, ta zo kɔi akpata nga gbanda la na ti mbi ma. 29To mbi mɛ wa hɛ̃ngɔ la hɛ̃ mbi aɔ azi zu na nguru, ko ta zo kɔi alengbi ti kpatangɔ la na ti To mbi ma. 30Mbi e na To mbi bo kɔi.”
31Ayuda ĩ ma so ko, ala ti lɔ tɛ́nɛ ya, ani boroka na lo, ani ho lo. 32La Yezo apa hɛ̃ la ya: “Mbi li ndo anzɔ̃ kwa ma wo ma na nguru tɛ To mbi, ĩ hũ. Na popo ti akwa ni ko, omɛ ĩ ye borokangɔ mbi, hongɔ na lo ni wa?” 33Ayuda agbinya hɛ̃ lo ya: “Ta e ye borokangɔ mɔ, hongɔ na lo nzɔ̃ kwa mɛ mɔ li ma. Kanda e ye borokangɔ mɔ hongɔ, na lo mɛ ya, mɔ guru Nzapa. Mɔ zo gɛgɛrɛ, ko mɔ mu tɛrɛ mɔ ya mɔ Nzapa!” 34Yezo agbinya hɛ̃ la ya: “Ka ya buku ti ndia tɛ ĩ ko, Nzapa apa hɛ̃ azi ya: ‘Ĩ anzapa.’ 35Ko e hĩnga ya, tɛnɛ ko la asu ka ya Buku tɛ Nzapa ko, ale angbã bo nga ma se mɛ asu na ni. Singa na azi ko ndo Nzapa atɛnɛ tɛne hɛ̃ la, aili la ya ‘anzapa’, 36o singa na mbi mɛ Nzapa asara mbi akpa, ato mbi ge lɛ sese ma! Ko kɔdɛ mɛ ĩ pa ya, mbi guru Nzapa sia? Ĩ pa so, na lo ko la mbi pa ya, mbi Nyi lo? 37Se ta mbi li kwa tɛ To mbi ma ko, ĩ kɛ̃ yengɔ lo tɛ mbi. 38Wa oko mbi ndoli kwa tɛ To mbi, bɛ se ta ĩ ye lo tɛ mbi ma ko, ale ĩ ye bɛ lo kwa mɛ mbi ndoli, wadila ĩ hĩnga ti buai ya, mbi na To mbi e bo kɔi.” 39Ayuda ti gi ndo lege ti gbɔ̃ngɔ lo, ko lo lo so popo tɛ la lo ɔ.
40Yezo ti nɔ ka mbage ngu ti Yurdɛnɛ, lo ngbã kai. Adu ndo mɛ ndo Yoanɛ ahɛ̃ azi batisimɔ da uzu. 41Azi ma wo ma anɔ ka tɛ lo, ala pa ya: “Ta Yoanɛ ali ndo ye ti kpɛnɛ kɔi ma, kanda tɛnɛ zu mɛ ndo lo tenɛ na lo tɛ kɔli olo adu gi biani.” 42La azi ma wo ma aye lo tɛ Yezo ka ndo ni ko.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yoanɛ 10: NGB87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
