Yn. 10
10
Lukano lwo mwaayi
1Yesu aloma ali, “Ndikho muboolela bung'ali, omundu ocha mu siiko sie kamakheese mala se engilila mu silibwa tawe ne kakhali abirira abuundu aandi osi osi, oyo ali omwifwi lundi omunuuli. 2Omundu owingilila mu silibwa ali omwaayi we kamakheese. 3Omuliindi owe silibwa amwikulilangayo, kamakheese kaulilanga kumumilo kwewe nga nalaanganga kamasina kaako buli sia lilala mala akarangirira akarusia enje. 4Enyuma we khukareera enje, akarangirira mala kamuloondakho, sikila kamanyile kumumilo kwewe. 5Se kanyala kaloonda khu mundu okundi busa tawe, kamwilukha, sikila se kamanyile kumumilo kwewe tawe.”
6Yesu ababoolela lukano luno ne se bamanyilisia nisio abakho tawe.
Yesu omwaayi ooli omulayi
7Nio Yesu aboola lundi ali, “Ndikho muboolela bung'ali, Ese niise silibwa sie kamakheese. 8Babaandi boosi babeecha khale ebweeni wase bali babefwi lundi banuuli, ne kakhali kamakheese se kabarekeeresia nibo tawe. 9Ese niise silibwa. Yesi yesi obirira mwise alaonisibwa; alengila mukari ne khurura enje mala alanyoola kamaayilwe. 10Omwifwi echanga khukhwiba, khukhwira ne khukhwonaka khwong'ene. Ese nechile nio mwole khuba ne bulamu mu bwichufu.
11“Ese niise omwaayi omulayi. Omwaayi Omulayi erusia khufwa khulwe kamakheese. 12Omukholi busa okhali omwaayi omwene makheese tawe, nabona sisuuche ne siicha elukha, alekha kamakheese nio sisuuche sitiila kamakheese ne khukasalanisia. 13Omukholi elukha sikila ali busa omuandike ne sabala kamakheese ne kali siindu khu niye tawe. 14Ese niise omwaayi omulayi. Manyile baali babaase ne babaase bamanyile ese. 15#Mat. 11.27; Lk. 10.22 Nga Paapa ne nase ne khumanyaane, mu ngila ng'eneyo sesi manyile kamakheese kase ne kosi kamanyile. Ese fukiilila khuaana bulamu bwase fwe, sikila niko. 16Kamakheese kase kakaandi kaliio kakhali mu siiko muno tawe. Khukhwola ngareere kosi; kalarekeeresia kumumilo kwase mala kalaba lituuli lilala no mwaayi mulala.
17“Paapa asiima ese sikila nafukiilila khuaana bulamu bwase, nio mbunyoole lundi. 18Se aliio omundu obukula bulamu bwase khukhwama khwise tawe. Mbuana mukhufukiilila khwase khwe mu bulekhuule. Ndi ne bunyali bwe khu buaana ne khu bubukula lundi. Kano niko Paapa wase andaka khukhola.”
19Liliabukhana lundi liabao mu baandu sikila kamakhuwa kano. 20Bakali balomanga bali, “Ali ne sisieeno! Alaluukhe! Siina sikila ne mu murekeeresia.”
21Ne kakhali babaandi balomanga bali, “Omundu owe sisieeno se anyala alomaloma ari tawe! Sisieeno sinyala siriena khukhola babofu babone?”
Babaandu baloba Yesu
22Ne naikara eye khukhebulila khurwa alubeka khwe Lukaangu khu Wele yaba mu Yerusalemu mu biise bie kumunaane. 23Yesu aba alikho akeenda mu matooche ka Solomoni mu Lukaangu 24mala babaandu ne bamwibusiao bamureeba bali, “Ewe ola khuayaayisia mu mebaasio khukhwola liina? Khuboolele bung'ali abuwaanga, ewe Kristo?”
25Yesu abakobosia ali, “Namubooleele khale, ne se mwasuubiile tawe. Bibiindu nibio ese khola khulwe bunyali bwa Paapa wase nibio bilomaloma nga abeele samwene ne ndoma; 26ne kakhali enywe se musuubila tawe; sikila se muli kamakheese kase tawe. 27Kamakheese kase karekeeresianga kumumilo kwase, ese ngamanyile, mala kanoondangakho. 28Ngaelesianga bulamu bwa mindali, mala se kalifwa tawe. Se aliio onyala anuula tawe. 29Paapa wase owambelesia kano ali omukali khukhila boosi, ne se aliio onyala akanuula khukhwama khu Paapa tawe. 30Paapa nase khuli mulala.” 31Babaandu lundi bangala kamabaale bali bamupe. 32Yesu ababoolela ali, “Nakholile bikholwa bikali bilayi mu moni chenywe nibio Paapa ambelesia ese khole. Sikholwa siina sikila ne mwenya khu khukhupa ese kamabaale?”
33 #
Bal. 24.16
Bakobosia bali, “Se khwenya khu khupa ewe kamabaale sikila bikholwa bilayi tawe, ne kakhali sikila embelekeu yowo! Ewe oli omundu busa, ne olikho owekhola khuba Wele!”
34 #
Chiny. 82.6
Yesu aabakobosia ali, “Kaandikwa mu Lilaka lienywe kali Wele aboola ali, ‘Enywe bawele,’ 35khumanyile khuli niko liiandiko liboola kali ng'ali khulwa mindali; ne Wele alaanga babaandu nibo aelesia burume bwewe abo ali bawele. 36Ne khwise, Paapa aandobora mala aanduma mu sibala. Munyala nono, khuboola muriena muli ese khola embelekeu sikila nalomile ndi, ese Omwana owa Wele? 37Naaba ne khakhola bibiindu nibio Paapa wase eenya khole tawe, mukhasuubila ese tawe. 38Ne kakhali naaba ne mbikhola, mwakhaba ne mukhasuubila ese tawe, mwenyekha musuubile bikholwa biase, nio mwoole khumanyila elala, muli, Paapa ali mwise ne ese ndi mu Paapa.”
39Bakhaka lundi khuamba Yesu ne kakhali efubarura mu makhono kabwe atiba.
40 #
Yn. 1.28
Nio Yesu akobola lundi engelekha we luluuchi lwa Yoritani abuundu niio Yoana abatiisilianga, mala amenyayo. 41Babaandu bakali bamwichakho baloma bali, “Yoana se akholakho kamayia tawe, ne buli siindu nisio aaloma khuloondekhana no mundu yuno siaba ng'ali.” 42Mala babaandu bakali ebweeneyo basuubila mu Yesu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yn. 10: LUBUKUSU
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
