Lk. 17
17
Bubwoni
(Mat. 18.6-7,21-22; Mk. 9.42)
1Yesu aboolela babeeka bewe ali, “Kamakhako ke khukhola bubwoni khukhwola kabeo, ne sili silaamo khuyo okareerera! 2Bwakhabeele bulayi khu niye abanga aboyiilwe lususi mwikosi mala amwaatwa mu nyanja khukhila nakila mulala khu batiiti bano akhole bubwoni. 3#Mat. 18.15 Khwako mwiyaye mu niko mukhola!
“Wandaayo aaba nakhola bubwoni, murafwire. Ne aaba ne ekanila, mubeele. 4Ne aaba nakhukoseele kamakhabi saba khu ndaalo ndala mala akobola kamakhabi koosi saba naloma ali, ‘Mbeele,’ Khukhwola omubeele.”
Lisuubila
5Barumwa baboolela Omwami bali, “Khutase lisuubila.” 6Ne Omwami abakobosia ali, “Mwaaba ne lisuubila nga khamiicho khe kumupeeli, onyala waboolela kumurongooro kumuboofu kuno oli, ‘Siukha oche wibiaale mu nyanja;’ mala kulakhola kurio.
Kimilimo kio mukholi
7“Mulala khwinywe aaba nali no mukholi omulimilanga namwe omwayilanga kamakheese, omukholi oyo naloota khukhwama e mukuunda owamuandika anyala amuboolela ali, ‘Yiicha khangu ano wikhale khu sialwa olie ku?’ 8Se anyala amuboolela ario tawe, ne kakhali amuboolela ali, ‘Ng'onele siakhulia sie ekolooba mala umbe ndie ne khunywa, ne malile nio nawe olie.’ 9Omukholi oyo se anyala apilwa orio sikila khuria kamalaka tawe. 10Khwako kali kario khwinywe mwesi, ne mumalile khukhola niko mulakilwe, loma muli, ‘Efwe khuli bakholi bakhali ne bukhala tawe, khwakholile busa kimilimo nikio khwenyibwa khukhole.’ ”
Yesu aonia babaandu ekhumi
11Nga Yesu aba khu lukeendo lwe khucha Yerusalemu abirira khu lwakha lwa Samaria ne Kalilaya. 12Yesu ne alikho engila mu sirekere akaanana ne babaandu ekhumi balwala bulwaale bwe kamakele. Bema sinao, 13baboolela Yesu mu mumilo kwe angaaki bali, “Omwami Yesu khukholele siisa!”
14 #
Bal. 14.1-32
Nga Yesu ne ababona ababoolela ali, “Khemuche mwiyekesie khu basaayi.” Ne nga baba ne balikho bacha baona. 15Nga mulala khu nibo abona ali aonile, akobola ne alikho afumia Wele ne kumumilo kumuboofu. 16Akwa mu bikele bia Yesu amupila orio. Omundu oyo aba Omusamaria. 17Yesu areeba ali, “Babaandu baonisibwe se babeele ekhumi? Ne tisa bali waena? 18Se aliio omundu okundi okoboole khu khupila Wele ali orio tawe nakhali omusamaria yuno yeng'ene?” 19Nio Yesu amuboolela ali, “Yinyokha oche, lisuubila liowo liakhuoniisie.”
Liliicha lie Bubwami bwa Wele
(Mat. 24.23-28,37-41)
20Bafarisayo balala bareeba Yesu bali, “Bubwami bwa Wele buliicha liina?” Abakobosia ali, “Bubwami bwa Wele se bwiicha ne bimanyisio nibio mubona tawe. 21Namwe se baloma bali, ‘Lola buli ano!’ Namwe ‘Eyo tawe!’ Sikila Bubwami bwa Wele buli akari wenywe.”
22Nio aboolela babeeka ali, “Chindaalo chilikho chiicha nicho muliekoomba khubona endaalo ndala khu ndaalo cho Mwana wo Mundu ne se mukhakibone tawe. 23Balibao balimuboolela enywe bali, ‘Lola, oyosi eyo,’ namwe ‘Lola, oyusiina ano!’ Mukha chayo namwe mwabaloondakho tawe. 24Sikila nga lueni ne lumeniuukha lukhosia mu ngaaki chimbeka chombi, nio akhaba Omwana wo Mundu alikhola ario khu ndaalo yewe. 25Ne kakhali khukhwola apisibwe siibi mu biindu bikali, mala eselukho yino emulobe. 26#Lir. 6.5-8 Nga kaba mu ndaalo cha Noa, kaliba kario akhaba mu ndaalo cho Mwana wo Mundu. 27#Lir. 7.6-24 Buli mundu aachiililila khulia ne khunywa, ne khuyila bakhasi, khukhwola khu ndaalo niyo Noa engilila mu liaaro mala kameechi kechula keera boosi. 28#Lir. 18.20—19.25 Bulayi bwene nga kaba mu ndaalo cha Luti, babaandu bachiililila khulia ne khunywa, khukula ne khukusia, khumiicha ne khukhwombakha. 29Khu ndaalo niyo Luti arurira mu Sodomu, kumulilo kumurafu lukali kwecha aasi khukhwama mwikulu mala kwababunia boosi. 30Nono kaliba kario mu ndaalo niyo Omwana owo Mundu aliichilakho.
31 #
Mat. 24.17-18; Mk. 13.15-16 “Khu ndaalo eyo omundu oli khu nju khu ngaaki sakhekhe engile munju yewe abukule bibiewe tawe; ne akhaba oli e mukuunda se alikobola engo tawe. 32#Lir. 19.26 Khebulila mukha Luti! 33#Mat. 10.39; 16.25; Mk. 8.35; Lk. 9.24; Yn. 12.25 Omundu yesi yesi okhaka khuonia bulamu bwewe akhabutibie; ne oyo otibia bulamu bwewe akhabuonie! 34Ng'ali ese muboolela enywe ndi, siilo esio babaandu babili baliba bakonile khu sitanda, mulala alibukulwa nokundi arame. 35Bakhasi babili baliba basiela alala, mulala alibukulwa ne okundi arame. 36[Babaandu be siseecha babili baliba ne bakhola mu mukuunda, mulala alibukulwa, ne okundi alilekhwa enyuma.]”#17.36 Chibibilia chindala se chili ne lunyilili luno tawe.
37Babeeka bamureeba bali, “Waena, Omwami?”
Yesu abakobosia ali, “Chingosia chibuusiananga niio sifwiile sili.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lk. 17: LUBUKUSU
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
