Lk. 14

Yesu aonia omulwale

1Khu Sabato ndala Yesu nga acha khulia munju eyo mukhoongo mulala khu Bafarisayo, babaandu bamuloleelesia lukali. 2Ne omundu owaba ne bulwaale bwe biliinda echa niio Yesu ali. 3Yesu areeba baandiki ne Bafarisayo ali, “Lilaka likhufukiliila khuonia mu Sabato namwe tawe?”

4Basila busa. Nio Yesu aonia omundu oyo mala amulekha acha. 5#Mat. 12.11 Nio abareeba ali, “Naanu khwinywe okhanyala arusia ekhaafu namwe omwana ne akwiile mwiloo khu ndaalo eye Sabato? Se akhweesa arusiamo?” 6Lino liabakhaya khumukobosia.

Lilieboombia ne buaani

7Yesu nga ne abona bakeni balangiilwe ne barobora chindebe che abuundu e lukoosi, ababoolela lukano ali, 8#Chis. 25.6-7 “Omundu nakhulangile mu naikara eye siselelo, okhekhala abuundu e lukoosi tawe. Akhola ario khane alangile omundu omukhongo khu khukhila ewe, 9ne omulangile mwembi echa mala akhuboolela ewe ali, ‘Yinyokhela omwami yuno khu ndebe ng'eneyo.’ Ne abwenao olaambwa chisoni mala olekhala abuundu akhali e lukoosi tawe. 10Ne kakhali nolangilwe, cha mala wikhale abuundu akhali we lukoosi tawe, nio okhulangile oli echa akhuboolele ali, ‘Musaale wase yiicha wikhale abuundu alayi ano.’ Lino lilakhureerera lukoosi ebweeni we bakeni boosi babekhaale khusialwa ne nawe. 11#Mat. 23.12; Lk. 18.14 Sikila buli mundu oweniinia alaboombisibwa, ne owe boombia alaniinisibwa.”

12Nio Yesu aboolela omulangile khu siakhulia ali, “Noana siakhulia sie mwiangilwe, namwe sie ekolooba, okhalanga basaale bowo namwe bawandaayo, namwe balebe, namwe baiinda bamenyile nawe bong'ene tawe, sikila bakhola bario bosi bakhulanga mu ngila eye khu khuruunga niko wabakholela, 13lundi ne oli ne naikara, laanga bataambi, babafwokoya, baleme ne babofu, 14mala olabiitwa chikhabi sikila se banyala khu khuruunga tawe. Wele alikhuruunga ewe mu ndaalo niyo babaandu baluungi balinyokhela mu bafu.”

Lukano lwa naikara emboofu

(Mat. 22.1-10)

15Nga mulala khwaabo ba baaba ne be khaale khu mesa aulila kano, aboolela Yesu ali, “Bali ne khabi abo balilia naikara mu Bwami bwa Wele!”

16Yesu amuboolela ali, “Abao omundu owakhola naikara emboofu, mala alaanga babaandu bakali. 17Nga siise sia naikara ne siola aruma omukholi wewe khuboolela bakeni bewe ali, ‘Khemwiche, buli siindu siarekekhwe!’ 18Ne kakhali boosi barakikha khurusia bifuno bikila balekhe khucha, owe khunyoa aboolela omukholi ali, ‘Nakulile kumukuunda, ne khukhwola nje ngubone, nosiima umbeele.’ 19Ne okundi aboola ali, ‘Nakulile chieeyi ekhumi mala ndikho nja khu chikhaka ne chikhwesa, nosiima umbeele.’ 20Ne okundi aloma ali, ‘Ndi no mwea, khwako se nyala necha tawe.’

21“Nio omukholi akobola engo mala aboolela omukhongo wewe bibiindu bino bioosi. Khwako omwene enju aambwa lirima mala aboolela omukholi wewe ali, ‘Cha khangu khu muyila, ne mu chingila che lukoba, mala mureere bataambi, babafwokoya, babofu ne baleme.’ 22Ne omukholi akobola khangu busa aboolela omukhongo wewe ali, ‘Omwami, niko olakiliisie kakholekhe, mala bubwangu busiilimo.’ 23Nio omwenenju aboolela omukholi oyo ali, ‘Cha khu miyila kimiboofu ne khu ngila chindiiti, mala oboolele babaandu mu ngila endayi beche nio enju yase yichule. 24Khuboolela ewe bung'ali ndi, se aliio na mulala khu baandu babalaangwa olichanjamakho siakhulia siase tawe!’ ”

Kumuruungo kwe khuba omweeka

(Mat. 10.37-38)

25Siise esio babaandu bakali baba balikho bacha ne Yesu, mala Yesu ekhebukha ababoolela ali, 26#Mat. 10.37 “Oyo owicha khwise, se anyala khuba omweeka wase ne akhasiimile ese lukali khukhila raraawe, maawe, omukhasi ne babaana, bawandaaye namwe omwene tawe. 27#Mat. 10.38; 16.24; Mk. 8.34; Lk. 9.23 Omundu yesi yesi okhasuta kumusalaba kwewe mala anondakho se anyala aba omweeka wase tawe.

28“Naanu khwinywe owekoomba khukhwombakha endeleelwa, ookhanyoa ekhala aasi mala abala bukusi bwe khukhwombakha amanya ne ali ne kimiaandu kinyala khumala kimilimo namwe tawe? 29Ne kakhali kario tawe, aba oli ombakha kumusiingi mala akhilwa khumala, mala boosi balasibona balarakikha khumuchekheelela ne khuloma bali, 30‘Omundu yuno arakikha khukhwombakha mala se aba ne kamaani ke khumala tawe!’

31“Namwe mwami siina ooli ne basikaari chielefu ekhumi ocha khupana no okundi owe basikaari chielefu kamakhumi kabili ne akherekekhere tawe? 32Ne kalekha khuba kario tawe enyoela aruma barume bewe bacha basaba kumuleembe omwami okundi oyo nasiili sinao. 33Khwako, omundu yesi yesi ne akhalekhile bioosi nibio ali nabio, se anyala aba omweeka wase tawe.

Kumuunyu kumukhelekha kukhalimo bululu tawe

(Mat. 5.13; Mk. 9.50)

34“Kumuunyu kumukhelekha kuli kumulayi, ne kwaaba ne kuwelemo bululu engila se eliio eye khukukhola kululue lundi tawe. 35Se kuli kumulayi khu liloba namwe khukholwa esiina tawe; khwako babaandu bakufumula eyo. Noyo oli ne kamaru lekha aulile.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Lk. 14: LUBUKUSU

Highlight

ಶೇರ್

ಕಾಪಿ