Methiu 8
8
Koṛhi Ke Changaai
(Maak 1.40-45; Luuk 5.12-16)
1Jab Yeeshu pahaaṛ se nichche aais, tab uske pichchhe ek baṛa bheeṛ hoy lees. 2Wahi lage ek admi jiske koṛhi ke bimaari raha, Yeeshu ke saamne aay ke aur jhuk ke Yeeshu se bolis, “He Prabhu agar tum maañgo to hamme achchha kare sakta hei.”
3Yeeshu aapan haath uspe rakh ke bolis, “Ham mañgta hei ki tum achchha hoy jaao.” aur wahi lage u achchha hoy gay. 4Tab Yeeshu usse bolis, “Dekho, tum koi se iske baare meñ nai bataana, aur jaay ke aapan paadri ke dekhaao. Aur jaao, Maozas ke ruuls ke mutaabik aapan daan chaṛhaao, ki jisse tum sab ke khaatir gawaah ban jaao.”
Aami Ofisa Ke Naukar Ke Changaai
(Luuk 7.1-10; Yuhanna 4.43-54)
5Jab Yeeshu Kafarnahuum ke ṭaaun meñ aais raha, tab ek aami ke ofisa uske lage aay ke binti kare laga, 6“He Prabhu, hamaar naukar ghar meñ bahut kaṛa peeṛa ke maare hile bhi nai sake hei.”
7Yeeshu usse bolis, “Ham aay ke uske ṭheek kar dega.”
8Lekin ofisa bolis, “He Prabhu ham to i laaik bhi nai hei ki tum hamaar ghare aao. Tum muh se khali bol deo to hamaar naukar achchha hoy jaai. 9Ham bhi to koi baṛa ofisa ke nichche hei aur hamaar nichche bhi saulja log hei. Jab ham ek se bolta hei, ‘Jaao!’ to u jaay hei aur dusra se bolta hei, ‘Aao!’ to u aawe hei. Aapan naukar se bolta hei ki, ‘I karo’ to u kar de hei.”
10Jab Yeeshu i baat sunis to chakit hoy gais aur jon sab uske pichchhe aat rahin, ulog se bolis, “Ham sachche bolta hei ki Israayel meñ ham aur koi admi meñ etna biswaas nai dekha! 11Bahut log aiheñ aur Abraham, Aayzak aur Jeims ke sañghe swarag ke raaj meñ beiṭhi. 12Lekin ulog jon ke huañ hoy ke chaahi, ulog ke añdhera meñ feñk dewa jaai, huañ pe ulog roi aur daañt peesi.”
13Tab Yeeshu ofisa se bolis, “Jaao, jeisan tumhaar biswaas hei, weisaiyeñ tumhaar waaste hoi.”
Uske naukar wahi ṭaaim achchha hoy gais.
Yeeshu Bahut Log Ke Achchha Karis
(Maak 1.29-34; Luuk 4.38-41)
14Yeeshu Peeṭa ke ghare gais, to huañ u dekhis ki Peeṭa ke saas bahut bukhaar se bimaar hoy ke leṭi hei. 15Yeeshu uske haath aapan haath meñ lees aur uske bukhaar utar gais. Aur u uṭh ke Yeeshu ke sewa kare lagis.
16Sanjha ke ṭaaim Yeeshu ke lage bahut log laawa gain jon meñ saitaan rahin. Aur Yeeshu saitaan ke aapan vachan se nikaar dees aur sab bimaar log ke achchha kar dees. 17Ki jisse Aayzaaya nabi jon cheej bolis raha, u sab puura hoy,
“U hamlog ke bimaari ṭheek karis
aur hamlog ke achchha banaais.”
Yeeshu Ke Hoy Waala Chela Log
(Luuk 9.57-62)
18Jab Yeeshu aapan chaaro bagal baṛa bheeṛ dekhis, tab chela log ke laik ke u paar jaay ke bolis. 19Tab ek kaanuun ke guru uske lage aay ke bolis, “He guru, tum jahañ bhi jaayga, ham tumhaar pichchhe chalega.”
20Yeeshu jawaab dees, “Lomṛi ke ghar aur chiṛia ke ghosla hoy hei, lekin Manush ke laṛka ke khaatir muuṛ rakkhe ke bhi jagha nai hei.”
21Ek aur chela usse bolis, “He Prabhu, hamme mauka deo ki ham aapan bappa ke pahile jaay ke maṭṭi de dei.”
22Yeeshu bolis, “Tum hamaar pichchhe aao, murda log ke aapan murda gaaṛan deo.”
Tufaan
(Maak 4.35-41; Luuk 8.22-25)
23Yeeshu bauṭ pe chaṛh gais aur uske chela log bhi sañghe hoy leen. 24Wahi lage laik meñ eisan baṛa tufaan aais ki bauṭ ḍuube lagis. Lekin Yeeshu to sowat raha. 25Chela log uske lage aay ke uske jagaain, aur bole lagin, “He Prabhu, ham log ke bachaay leo, ham log ḍubta hei!”
26Yeeshu ulog se bolis, “Tum log kaahe ke ḍarta hei? Tumhaar biswaas kahañ hei?” Tab u uṭh ke paani aur hawa ke ḍaaṭis aur sab saanti hoy gais.
27Aur sab log chakit hoy gain aur bole lagin, “I keisan admi hei ki iske hukum aañdhi aur tufaan bhi maane hei?”
Saitaan Se Bhara Dui Admi
(Maak 5.1-20; Luuk 8.26-39)
28Jab Yeeshu laik ke u paar Gadara ke des meñ gais, to dui admi jisman saitaan rahin, kabar se nikar ke usse milin. I saitaan etna kharaab raha ki u rasta se koi bhi jaay nai sakat raha. 29Ulog chillaay ke bolin, “He Parmeshwar ke laṛka, tumme ham se kaa kaam hei? Kaa tum ṭaaim se pahile hamme saja dewe aaya hei?”
30Thoṛa duur pe ek suar ke jhunḍ charat rahin. 31Saitaan log Yeeshu se binti karin, “Agar tum hamme bahire nikaarega, to i suar ke jhunḍ meñ bhej deo.” 32Yeeshu bolis, “Jaao!” Aur u sab nikar ke suar meñ ghus gain. Wahi lage suar ke jhunḍ uchcha karaar pe se jhapaṭ ke paani meñ ḍuub gain.
33Aur suar ke charaay waala huañ se bhaag ke ṭaaun meñ jaay ke sab kuchh bataain, aur duuno admi ke baare meñ bhi bataain jon ke saitaan pakṛis raha. 34Ṭaaun ke sab log Yeeshu se mile aain. Aur uske dekhte usse binti karin ki u huañ se bahire nikar jaay.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Methiu 8: FRHNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Fiji Romanised Hindi © Bible Society of South Pacific, 2016.
