GÉNESIS 4
4
Cainpish, Abelpish
1Evaca paipaj cusa Adán chayarijpimi, chichushpa shuj huahuata huacharca. “Mandaj Dios munashpa cujpimari shuj c'ari huahuata charini” nishpami, chai huahuataca Cainta shutichirca. 2Chai q'uipaca paipaj huauqui Abeltami huacharca. Abelca ovejacunata michijmi carca. Cainca allpapi trabajajmi carca.
3Ña unipimi, Cainca allpapi p'ucushca granocunamantaca, Mandaj Diosman cungapaj apamurca. 4Abelpish punta huacharishca alli huira ovejatami Mandaj Diosman cungapaj apamurca. Mandaj Diosca Abeltapish, pai cushcatapish cushicushpami chasquirca. 5Ashtahuanpish Caintapish, pai cushcatapish Mandaj Diosca mana chasquircachu. Chaimi Cainca yallitaj p'iñarishpa p'iña ñahui tucurca. 6Chaimi Mandaj Diosca, Caintaca:
–¿Ima nishpataj canca yallitaj p'iñarishpa ñahuipish shujtajyaringui? 7Allita rurashpaca jatunyachishcami canguiman. Ashtahuanpish mana allita rurajpica, juchami cantaca mana allita rurachingapaj shuyacun. Shina cajpipish mana allitaca canmari mishana cangui– nircami.
8Cainca, paipaj huauqui Abeltaca: “Chagraman jacu” nishpami pushashpa rirca. Paicuna ña chagrapi cashpami, Cainca paipaj huauquihuan p'iñarishpa Abeltaca huañuchirca. 9Chaimi Mandaj Diosca Caintaca:
–¿Cambaj huauqui Abelca maipitaj?– nishpa tapujpi Cainca:
–Ñucaca imatataj yachashari. Ñucaca huauquita cuidajchari caniyari– nirca.
10Mandaj Diosca, Caintaca:
–¿Imatataj rurarcanguiyari? Cambaj huauquipaj yahuarmi ñucataca allpamanta caparicun. 11Cunanca cambaj huauquita huañuchishpa yahuarta jichachijpi chai yahuarta millpuj allpallatajmi can millai runa cashcataca huillacun. 12Chaimanta allpapi tarpujpipish ña mana alli p'ucungachu. Chai allpapica maipi causanata mana charij, caru llajtamanta shina puricunguillami– nircami.
13Chaimi Cainca, Mandaj Diostaca:
–Ñuca juchamanta llaquita apanaca yallitaj mana apai tucuipajmari. 14Ñucata cai allpamanta llujshichishpa cachajpica, cunanca quiquinpaj ñaupajmanta miticushpa rishallami. Cai allpapica maipi causanata mana charij, caru llajtamanta shina puricushallatajchari. Chaipica ñucataca pipish japishpa huañuchingallatajchari– nirca.
15Shina nijpi Mandaj Diosca:
–Cainta maijanpish huañuchijtaca, paitapish canchis cutinmi llaquichishca canga– nishpaca Cainpica, paihuan tupajcunaca pi mana huañuchinalla cashcata ricuchij señaltami churarca.
16Mandaj Diospaj ñaupajmanta Caín rishpaca, Edén llajtamanta inti llujshin ladoman caj Nod llajtapimi causagrirca.
Cainpaj huahua huahuacunami
17Caín paipaj huarmipi chayarijpimi, chichushpa shuj c'ari huahuata huachashpaca, chai huahuataca Enoc shutita shutichirca. Chai q'uipaca Cainca shuj pueblotami shayachirca. Chai pueblotaca paipaj churipaj shuti Enoc shutitami shutichirca. 18Enocca Irad churitami charirca. Iradca Mehujael churitami charirca. Mehujaelca Metusael churitami charirca. Metusaelca Lamec churitami charirca. 19Lamecca ishqui huarmicunatami paipaj huarmi cachun japirca. Shujca Adami carca, caishujca Zilami carca. 20Ada huarmica Jabal shuti huahuatami huacharca. Jabalpaj huahua huahuacunami carpa huasicunapi causashpa animalcunata mirachijcuna carca. 21Jabalca Jubal shuti huauquitami charirca. Jubalca arpapi tocajcunapaj, flautapi tocajcunapaj yayami carca. 22Shinallataj Zila huarmipish Tubal-caín shuti huahuatami huacharca. Paimi broncetapish fierrotapish tacashpa ima charinacunatapish ruraj carca. Tubal-cainca Naama shuti panitami charirca.
23Shuj punllami Lamecca paipaj huarmicunataca cashna nirca:
“Ada, Zila ñuca huarmicuna.
Ñuca nishcata uyaichij.
Ñuca rimashcata uyaichij.
Shuj runataca ñucata chugrichijpimi huañuchircani.
Q'uipa huiñai shuj huambrataca ñucata huajtajpimi huañuchircani.
24Cainta huañuchijta canchis cutin llaquichishca cana cajpica, Lamecta huañuchijtacarin canchis chunga canchis cutinmi llaquichinga” nircami.
Setpish Enospish huacharishcami
25Adán paipaj huarmipi cutin chayarijpica, shujtaj c'ari huahuatami huacharca. Cai huahuataca: “Abelta Caín huañuchishcamantami, paipaj randi Taita Diosca cuhuan” nishpami, chai huahuataca Set shutita shutichirca.
26Setca shuj c'ari huahuatami charirca. Chai huahuatami Enos shutita shutichirca. Chai punllamantapachami runacunaca, Mandaj Diosta yuyarinata callarirca.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
GÉNESIS 4: QCHI04
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.