LUKE 7

Jesus Ɔkɔk Eyen Ɔnwɔŋ Owo Centurion

(Mt 8.5-13)

1KE Enye ama eketiŋ kpukpru ikɔ Esie ama ɔnɔ mbio-obio ekop, Enye oduk ke Capernaum.

2Centurion kiet enyene owo esie emi enye okponode, owo oro onyuŋ ɔdɔŋɔ, ekpere ndikpa. 3Edi ke ini centurion okopde abaŋa Jesus, enye ɔdɔŋ mbiowo mme Jew eka ekebeŋe Enye, ete, edi edinam udɔŋɔ okure owo esie. 4Edi ke adaŋemi mmɔ esimde Jesus, mmɔ esɔŋɔ ekpe Enye ubɔk, ete, 5Owo oro odot nte Afo akpanamde ŋkpɔ emi ɔnɔ enye; koro enye amade obio nnyin, okonyuŋ ɔbɔpde synagogue ɔnɔ nnyin. 6Jesus asaŋa ye mmɔ aka. Edi ke adaŋemi Enye miyomke usuŋ ke ufɔk, centurion ɔdɔŋ mme ufan ekɔdɔhɔ Enye ete, Ɔbɔŋ, kunɔ Idem Fo afanikɔŋ: koro mmendotke nte Afo okpodukde ke idak ɔkɔm mi: 7mmɔdo nnyuŋ mbatke nte ami ke idem mi ndot ndiwɔrɔ ntiene Fi: kam tiŋ ikɔ, ndien owo mi eyekop nsɔŋidem. 8Koro ami ke idem mi ndu ke idak erikara, mmonyuŋ nnyene mbon-ekɔŋ ke idak mi; nnyuŋ ndɔhɔ owo emi, nte, Ka, ndien enye aka; nnyuŋ ndɔhɔ owo efen, nte, Di, ndien enye edi; nnyuŋ ndɔhɔ owo mi, nte, Nam emi, ndien enye anam. 9Ke adaŋemi Jesus okopde ikɔ emi, enyene Enye ndyɔ; Enye onyuŋ ɔwɔŋɔre ɔdɔhɔ otu owo emi etienede Enye, ete, Ndɔhɔ mbufo nte, akanam ŋkwe mbuɔtidem eke okponde ntem, kpa ke Israel. 10Ndien ke ini mme isuŋ oro efiakde enyoŋ ufɔk mmɔ esobo owo oro ye nsɔŋidem.

11Edikem ke mibigike, Enye aka ke obio emi ekerede Nain, mbet Esie ye akwa otu owo enyuŋ esaŋa ye Enye eka. 12Edi nte Enye ekperede inua-otop obio, sese, ke ebiom okpo owo ewɔrɔ; enye oro edi ikpɔŋ eyen eka esie, emi onyuŋ edide ebe-akpa: ediwak mbio-obio enyuŋ esaŋa ye enye. 13Ndien ke adaŋemi Ɔbɔŋ okutde ŋwan oro, atua enye mbɔm, onyuŋ ɔdɔhɔ enye ete, Kutua. 14Enye onyuŋ asaŋa ekpere otuk ubiom-okpo: ndien mme andibiom etuak eda. Enye ete, Akparawa, ndɔhɔ fi nte Daha ke enyɔŋ. 15Ndien akpa-mkpa adaha etie, ɔtɔŋɔ nditiŋ ikɔ. 16Ekem Jesus ayak enye ɔnɔ eka esie. Edi ndik omum mmɔ kpukpru; mmɔ enyuŋ enɔ Abasi itoro, ete, Akwa prophet amadaha ada ke otu nnyin; enyuŋ ete, Abasi emedi ndise ikɔt Esie. 17Ndien etop Esie asuana ke ofuri Judaea ye ke kpukpru ŋkan-ŋkuk ebiet.

18Mbet John emen kpukpru ŋkpɔ emi ebuk enɔ enye. 19Ndien John okot owo iba ke otu mbet esie, onyuŋ ɔdɔŋ mmɔ etiene Ɔbɔŋ ekebup Enye ete, 20Nte Afo edi Enye emi enyenede ndidi, mme nnyin ikpodori enyin ke owo efen? Edi ke ini mme isuŋutom esimde Jesus, mmɔ ete, John Baptist ɔdɔŋ nnyin utom ke ɔtɔ Fo, ete ibup Fi ite, Mme Afo edi Enye emi enyenede ndidi, mme nnyin ikpodori enyin ke owo efen? 21Ke ini oro Jesus anam udɔŋɔ ye ubiak ye ndiɔi spirit ekure ediwak owo; onyuŋ anam ediwak nnan ekut usuŋ. 22Ndien Enye ɔbɔrɔ mme isuŋutom oro ete, Eka ekobuk enɔ John se mbufo ekekutde enyuŋ ekopde; ete, mme nnan ekut usuŋ, mbon mbuŋɔ esaŋa, enam mbon akpa-mfia esana, mme inan ekop ikɔ, enam mme akpa-mkpa eset, enyuŋ ekwɔrɔ eti mbuk idaresit enɔ mme ubuene. 23Ndien ɔfɔfɔn ye owo ekededi eke midikwe ntak iduɔ ye Ami.

24Edi ke adaŋemi mme isuŋutom John enyɔŋɔde, Jesus ɔtɔŋɔ ndidɔhɔ ye mme otu owo mbaŋa John ete, Mbufo ekewɔŋɔ eka ke desert ndise nso? ndi nyanyaŋa eke ofim enyeŋede? 25Edi ekewɔŋɔ eka ndise nso? ndi owo eke esinede eti ɔfɔŋiden? Sese, mmɔ emi esinede ɔfɔŋidem ubɔŋ, enyuŋ ediade edinem udia, edu ke ufɔk mbɔŋ. 26Edi ekewɔŋɔ ndise nso? ndi prophet? Ke akpanikɔ ke ndɔhɔ mbufo nte, enye onyuŋ ɔsɔŋɔ okpon akan prophet. 27Emi edi enye emi ewetde ebaŋa enye, ete,

Sese, mmɔdɔŋ isuŋ Mi ebem Fi iso,

Emi edidiɔŋde usuŋ onim ɔnɔ Fi.

28 Ndɔhɔ mbufo nte, Ke otu mmɔ eke iban emande, owo emi okponde akan John iduhe: edi owo emi ekpride akan ke obio ubɔŋ Abasi okpon akan enye. 29Ekem ke adaŋemi kpukpru mbio-obio ye mme publican ekopde ikɔ Esie, mmɔ edɔhɔ ete, Abasi enen, sia mmɔ ekanade baptism ke ubɔk John. 30Edi mme Pharisee ye mme ɔfiɔk-ibet, emi mikanaŋa baptism esie, enam uduak Abasi ke idem mmɔ okpu. 31Ndida mbon emana emi ndien ndomo ye nso? mmɔ enyuŋ ebiet nso? 32Mmɔ ebiet nditɔwɔŋ emi etiede ke aŋwa-urua, ekot kiet eken, ete,

Imefri ifiom inɔ mbufo, edi mbufo inekke unek;

Imoyorore eyet, edi mbufo ibɔhɔ eyet.

33 Koro John Baptist ekedi, idiaha uyo inyuŋ iŋwɔŋke wine; ndien mbufo edɔhɔ ete, Enye enyene demon. 34Eyen Owo emedi, adia ŋkpɔ onyuŋ ɔŋwɔŋ; ndien mbufo ete, Sese, owo udia ye ama mmin, ufan mme publican ye mme idiɔk owo. 35Edi kpukpru nditɔ Eti Ibuot ewut ete Eti Ibuot enen.

36Ndien owo kiet ke otu mme Pharisee okot Enye ete edidia udia ye imɔ, Enye onyuŋ oduk ke ufɔk Pharisee oro ɔsuhɔre etetie ke itie-udia. 37Ndien sese, ŋwan kiet emi odude ke obio, emi edide anam-idiɔk-ŋkpɔ, ke ini enye ɔfiɔkde ete Jesus ke etie ke itie-udia ke ufɔk Pharisee oro, 38ada ufuɔŋkpɔ ke otu alabaster edi, onyuŋ ada Enye ke edem-edem ke ukot, atua eyet, ndien mmɔŋ-eyet esie ebit Jesus ukot; enye onyuŋ ada idet ibuot esie ɔkwɔhɔre Enye ukot, otim ukot Esie inua, onyuŋ ada ufuɔŋkpɔ eyet Enye ke ukot. 39Edi ke adaŋemi Pharisee oro okokotde Enye udia okutde ŋkpɔ emi, enye ɔdɔhɔ ke esit esie ete, Edieke owo emi ekpedide prophet, Enye ɔkpɔdiɔŋɔ ŋwan emi otukde Enye, okponyuŋ ɔfiɔk oruk ŋwan eke enye edide, ete enye edi anam-idiɔk-ŋkpɔ. 40Ndien Jesus ɔbɔrɔ enye ete, Simon, mmenyene ŋkpɔ nditiŋ nnɔ fi. 41Enye ete, Andikpep, tiŋ. Jesus ete, Ɔbuɔt ebuɔt ekenyene owo isɔn iba: kiet akama enye pound aba ye duop, enye eken akama pound ition. 42Sia mmɔ minyeneke se edade esio isɔn, enye efen mmɔ mbiba. Ke otu mmɔ mbiba anie edima enye akan? 43Simon ɔbɔrɔ ete, Nse nte edi owo emi efende enye se ikponde ikan. Jesus ete enye, Omotim ekere. 44Ekem Enye ɔwɔŋɔre ese ŋwan, onyuŋ ɔdɔhɔ Simon ete, Omokut ŋwan emi? Ŋkodukde ke ufɔk fo, afo unɔŋɔ Mi mmɔŋ ndida nyet ukot: edi enye ada mmɔŋ-eyet esie eyet Mi ukot, onyuŋ ada idet esie ɔkwɔhɔre Mi ukot. 45Afo utimke Mi inua, edi, tɔŋɔ enye okoduk edi, enye itreke nditim Mi inua ke ukot. 46Afo uyetke Mi aran ke ibuot: edi enye ada ufuɔŋkpɔ eyet Mi ke ukot. 47Mmɔdo ndɔhɔ fi nte, Emefen enye ediwak idiɔk ŋkpɔ, koro ima esie okpon: edi owo eke efende enye esisit inyeneke akpan ima. 48Edi Enye ɔdɔhɔ; nwan oro, ete, Emefen mme idiɔk ŋkpɔ fo. 49Edi mmɔ emi etiede ye Enye ke itie-udia etɔŋɔ ndidɔhɔ ke esit mmɔ ete, Anie edi emi efende mme idiɔk ŋkpɔ? 50Edi Jesus ɔdɔhɔ ŋwan oro ete, Mbuɔtidem fo ama anyaŋa fi; nyɔŋ, koduk ke emem.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKE 7: ENA

Highlight

ಶೇರ್

ಕಾಪಿ