LUKE 20

Mme Ikpɔ Oku Ye Mme Scribe Ye Mbiowo Ebup Ebaŋa Odudu Jesus

(Mt 21.23-27; Mk 11.27-33)

1EDIKEM ke mme usen oro kiet, nte Enye ekpepde mbio-obio ŋkpɔ ke temple, onyuŋ ɔkwɔrɔde gospel, ikpɔ oku ye mme scribe ye mbiowo etiene Enye; 2enyuŋ edɔhɔ Enye ete, Sian nnyin; ada odudu ewe anam mme ŋkpɔ emi? mme, anie ɔnɔ Fi odudu emi? 3Edi Enye ɔbɔrɔ mmɔ ete, Ami nde nyebup mbufo mbume; ebɔrɔ Mi: 4baptism John, mme oto heaven, mme oto owo? 5Edi mmɔ eneni ke otu idem mmɔ ete, Nnyin ima idɔhɔ ite, Oto heaven, Enye eyedɔhɔ ete, Nsinam mbufo mikonimke enye ke akpanikɔ ndien? 6Edi ima idɔhɔ ite, Oto owo, kpukpru mbio-obio eyetɔŋɔ nnyin ke itiat: koro mmɔ eburede efiɔk ete John ekedi prophet. 7Ntre ke mmɔ ebɔrɔ ete mme imɔ ifiɔkke ɔtɔ nte baptism John otode. 8Ndien Jesus ɔdɔhɔ mmɔ ete, Ami nde nsianke mbufo odudu eke ndade nnam mme ŋkpɔ emi.

Mme Ekpeme-Iŋwaŋ Vine

(Mt 21.33-46; Mk 12.1-12)

9Edi Enye ɔtɔŋɔ nditop ŋke emi nnɔ mbio-obio ete, Owo kiet ɔkɔtɔ iŋwaŋ-vine, onyuŋ ayak enye ɔnɔ mme ekpeme-iŋwaŋ, onyuŋ adaha aka idut efen ekebigi do. 10Ndien ke edikem ini enye ɔdɔŋ isuŋutom ke ɔtɔ mme ekpeme-iŋwaŋ, man mmɔ enɔ enye udeme mfri iŋwaŋ-vine esie: edi mme ekpeme-iŋwaŋ emia enye, enyuŋ ebin enye ɔnyɔŋ ubɔk-ubɔk. 11Ndien enyene-iŋwaŋ-vine osio isuŋutom efen ɔdɔŋ; mmɔ emia enye ŋko, enyuŋ enam enye ido esuene, enyuŋ ebin enye ɔnyɔŋ ubɔk-ubɔk. 12Enye onyuŋ osio ɔyɔhɔ isuŋ-utom ita ɔdɔŋ: ndien mmɔ enɔ enye unan, esio enye ke iŋwaŋ eduɔk. 13Enyene iŋwaŋ-vine ɔdɔhɔ ete, Ndinam didie? nyedɔŋ edima eyen mi; iso ɔfɔn mmɔ eyeteŋe enye. 14Edi ke ini mme ekpeme-iŋwaŋ ekutde enye, mmɔ eneni ye kiet eken ete, Sese, emi edi andidia-ufɔk; ekam eyak iwot enye, man ŋkpɔ-akpa ekpenyene nnyin. Ndien mmɔ ebin enye esio ke iŋwaŋ-vine, ewot. 15Nso ndien ke ete iŋwaŋ-vine edinam ye mmɔ? 16Enye eyedi edisobo mme ekpeme-iŋwaŋ emi, onyuŋ ayak iŋwaŋ-vine ɔnɔ mmɔ eŋwen. Ke ini mmɔ ekopde, mmɔ ete, Idiɔk-ŋkpɔ aka nsan-nsan. 17Edi Enye owuk enyin ese mmɔ, onyuŋ ɔdɔhɔ mmɔ ete, Ikɔ emi ewetde ɔwɔrɔ ndien didie ete,

itiat emi mme ɔbɔp-ufɔk esinde

Amakabare edi etubom inuk?

18 Kpukpru owo eke ediduɔde ke itiat oro eyenuaha mbak-mbak; edi owo ekededi eke itiat emi ediduɔde ɔtɔ, eyekɔk enye nte obu.

19Ndien mme scribe ye ikpɔ oku eyom ndimum Enye ke ini oro; edi mmɔ efehe mbio-obio: koro mmɔ efiɔkde ete Enye okotop ŋke emi otuk mme imɔ.

20Ekem mmɔ etiŋ enyin ekpeme Enye, enyuŋ edɔŋ mbon-uyep, emi ewutde idem ete idi ndinen owo, man mmɔ emum Enye ikɔ inua, man oto do eyak Enye esin ke ubɔk andikara ndikpe ikpe ye Enye. 21Mmɔ oro enyuŋ ebup Enye ete, Andikpep, nnyin imɔfiɔk ite Afo etiŋ onyuŋ ekpep owo ŋkpɔ ke ido eke enende, unyuŋ uteŋeke owo enyin, edi eteme owo usuŋ Abasi ke akpanikɔ; 22me enen ndinɔ Caesar utomo, mme inenke? 23Edi Enye okut ŋkari mmɔ, onyuŋ ɔdɔhɔ mmɔ ete, 24Ewut Mi okuk kiet. Mbiet ye ŋwed emi enyene anie? Mmɔ ete, Enyene Caesar. 25Edi Enye ɔdɔhɔ mmɔ ete, Enɔ Caesar ndien se inyenede Caesar, enyuŋ enɔ Abasi se inyenede Abasi. 26Ndien mmɔ ikemeke ndimum Enye uyo ke iso mbio-obio: idem akpa mmɔ ke ibɔrɔ Esie, mmɔ enyuŋ edop uyo.

27Edi ndusuk mme Sadducee enyuŋ etiene Enye, kpa mmɔ emi ekaŋde ete eriset ke mkpa iduhe; 28ndien mmɔ ebup Enye ete, Andikpep, Moses ekewet ɔnɔ nnyin ete, Edieke eyen-ete owo ɔdɔde ŋwan onyuŋ akpade, ndien minyeneke eyen, owo oro eyeda ŋwan eyenete ɔdɔ, onyuŋ asiak ubon ɔnɔ eyen-ete esie. 29Nditɔ-ete itiaba ekedu; akpa ɔdɔ ŋwaŋ, ndien akpa, ibonke eyen; 30udiana ye ɔyɔhɔ ita enyuŋ eda ŋwan oro edɔ; 31kpasuk ntre ke mmɔ mbitiaba eda enye edɔ, enyuŋ ekpaŋa ikpɔŋke eyen. 32Ke akpatre ŋwan oro nde akpa. 33Mmɔdo ke ini eriset enye eyedi ŋwan anie ke otu mmɔ? koro mmɔ mbitiaba ekadade enye nte ŋwan. 34Ndien Jesus ɔdɔhɔ mmɔ ete, Nditɔ eyo emi edɔ ndɔ, enyuŋ eda mmɔ enɔ ke ndɔ: 35edi ama edi mmɔ emi edibatde ete mmɔ edot ndinyene eyo oko ye eriset ke mkpa, mmɔ idɔhɔ ndɔ, inyuŋ idaha mmɔ inɔ ke ndɔ: koro mmɔ mikemeke ndikpa aba; 36koro mmɔ edi ukem-ukem ye mme angel; enyuŋ edi nditɔ Abasi, sia mmɔ edide nditɔ eriset. 37Edi kpa Moses etiŋ ke ibuot ŋwed emi otukde eto oro abaŋa ete enanam mme akpa-mkpa eset, Abasi Abraham, ye Abasi Isaac, ye Abasi Jacob. 38Enye idige Abasi mme akpa-mkpa, edi edi eke mme odu-uwem: koro kpukpru owo edu uwem enɔ Enye.

39Ndien ndusuk mme scribe ebɔrɔ ete, Andikpep, Afo omotim ɔdɔhɔ. 40Koro mmɔ midehede ibup Enye aba mbume kiet efen.

41Edi Enye ɔdɔhɔ mmɔ ete, Nsidi ntak eke edɔhɔde ete Christ edi eyen David? 42Koro David ke idem esie ɔdɔhɔ ke ŋwed mme Psalm, ete,

Jehovah ɔdɔhɔ Ɔbɔŋ mi ete,

Tie Mi ke ubɔk nnasia,

43 Tutu nda mme asua Fo nnim Fi ke udorukot.

44 Ntem ke David okot Enye ete, Ɔbɔŋ, didie ndien ke Enye edi eyen esie?

45Ndien Enye ɔdɔhɔ mbet Esie ke utɔŋ kpukpru owo ete, 46Ekpeme idem mbufo ye mme scribe, emi emade ndisaŋa ye nduɔ-nduɔ ɔfɔŋidem, enyuŋ emade ekɔm ke aŋwa-urua, ye ikpɔ itie ke mme synagogue, ye itie ukpono ke udia; 47mmɔ emi ediade ufɔk mme ebe-akpa, enyuŋ ebɔŋde nyan akam ke mbubik: mmɔ eyebɔ ubiom-ikpe emi okponde akan.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKE 20: ENA

Highlight

ಶೇರ್

ಕಾಪಿ