LUKA 24
24
1Ma naaleatia vea ni wiik, ragi ni namakotokotoana kiki kakana, eu rumai paki matigo, eu dape tea ni nap̃o wia maga wanogoe umai waina eu marim̃ataki sua e. 2Go eu pap̃ai vatu e pei tea maluluakiana m̃elu dua ki matigo pano. 3Go eu paki ekopu, po da pap̃ai nap̃atoko ni Nawota Yesu mau. 4Go e pakilina, ragi waina eu dodoputuaki asa, kuga leo, naatam̃oli dua ero lawodu pisari ra, ero suni sugoro waina e pilavila: 5go ragi waina eu mataku, po kolo ki naraeda paki natano, ero noa ki da, Ekasana ku laaga tea mauri m̃aleoputo ni tea mate maga? 6E da doko nea mau, ma e po duleana: kuga midoaki dapala waina e pasa ki mu ragi waina e ko doko Calilea doko, 7po noa naga e one naatam̃oli Natuna one naga ega vei tea vituakiana paki nam̃elearu ni naatam̃oli sigisigileo maga, po pei tea turiana nakau valadagoto, po moro duleana naaleatia ketolu. 8Go eu midoaki navasaana aneana maga, 9po liliu pae matigo umai, po dogorogo ki tea maga mamau puti wanogoe paki tea rualima sikai tamate sikai, go paki tea p̃ota maga mamau puti. 10Go eu pei Maria ni Macdala, go Yoanna, go Maria Yakobo p̃ilana: nara ma nagoroi p̃ota maga waina eu sikoti ra eu noa ki apostolo maga tea maga wanogoe. 11Go navasaana maga wanogoe eu dapala navasaana p̃alo namatada, go eu da saralomau ara mau. 12Ma Petero e duleana, po sava paki matigo pano; go e kolo po leo paki ekopu, po punusi nakulukulu ni linen maga eu masikida one; go e paki nasum̃a aneana pano, e do maga tea waina e po pakilina.
13Go kuga leo, tea rua kakada ero surata naaleatia sikai maau wanogoe paki natokoana kiki sikai nagisana Emmaus, waina e pei maile larua go namagovai sikai uvea ki Yerusalem. 14Go ero dum̃ada pusum̃aki paki da nalo ni tea maga mamau puti wanogoe waina eu pakilina. 15Go e pakilina, ragi waina ero do pusum̃aki po pusuusu dum̃ada paki da, naga Yesu nae e umai paki m̃aladigi, po surata sikoti ra. 16Ma namatada eu pei tea marigoroana naga eroga ta leo atae a mau. 17Go e noa ki da, e naga, Navasaana maga waia, waina koro dum̃amu noa ki mu ara po surata, eu pei nasava? Go ero lawodu dorogo, namatada susue. 18Go sikai kakada, nagisana Kleopa, e pasa dara po noa ki nia, e naga, Nigo ku sikim̃a m̃enaki Yerusalem po da atae tea maga waina eu po pakilina asa naaleatia maga waia kite? 19Go e noa ki da, e naga, Tea maga nasava? Go ero noa ki nia, ero naga, Tea maga nalo ni Yesu ni Nasareth, waina e pei profeta sikai, e kasua ki nawosiana go ki navasaana narae ni Sup̃e go ni narei mamau: 20go dapala waina tea viri warua maga go tea maraki anigida maga eu pitua ki nia naga ega vei tea tip̃akotoviana paki namateana, po duri a nakau valadagoto. 21Ma kinami au leogoro naga nae e pei tea waina ega taulua Israel. Ioro tea maga mamau puti wanogoe, go e po pei naaleatia ketolu edaku ki ragi waina tea maga wanogoe eu pakilina sua asa. 22Go nagoroi seara kakagami eu mari gami au saram̃akoto, eu paki matigo malip̃ogi sa; 23go ragi waina eu da pap̃ai nap̃atokona mau, eu rumai po noa naga eu punusi navunusiana sikai ni agelo maga, waina eu noa naga e mauri. 24Go seara ni tea maga waina eu sikoti gami eu paki matigo, po pap̃ai a e dapala waina nagoroi maga eu noa e: ma nae eu da punusi a mau. 25Go e noa ki da, e naga, Ko tea manumatavusa maga, go tea mari daliali nap̃op̃omu naga kuga saralomau tea maga mamau puti waina profeta maga eu noa ra! 26E da one Kristo one naga ega sua navitinuana maga wanogoe, po paki nasamasamaana aneana pano kite? 27Go e atulake pae Moses, go pae profeta maga mamau puti, po pasadoapisei ki da m̃elu navasaana midiriana maga mamau puti naleo maga nalo kakana. 28Go eu paki m̃aladigi ki natokoana kiki, waina ero surata paki asa pano: go e mari dapala ega surata liu sa pano. 29Go ero pasadie a, po naga, P̃a toko sikoti gami doko: nalakena e m̃aladigi pei ragi m̃elu, go naleatia tega nopu. Go e paki ekopu naga ega toko sikoti ra doko. 30Go e pakilina, ragi waina e kere one sikoti ra naga euga kanikani, e dape bred po pasa p̃ia ki nia, po dova p̃orae, po dua ra. 31Go namatada eu pei tea wolagatiana, go ero leo atae a; go e puoli m̃elu dua ki navunusiana adeada pano. 32Go ero dum̃ada noa ki da, ero naga, Nap̃op̃ogida e da do soro nap̃alaugida, ragi waina e do pasa ki gida napua, ragi waina e do manigida p̃olagati navasaana midiriana maga kite. 33Go ero duleana aura sikai maau wanogoe, po liliu umai paki Yerusalem, po pap̃ai tea rualima sikai tamate sikai eu saisai, nara ma tea maga waina eu sikoti ra doko, 34eu naga, Nawota e po duleana lomau, go e po pakilina ki Simon. 35Go nara ero dogorogo ki tea maga waina eu pakilina napua, go dapala waina e pei tea ataeana paki da, natova‐p̃orae‐bred‐ana.
36Go ragi waina ero do noa tea maga wanogoe, nae e lawodu m̃aleoputo kakada, po noa ki da, Kuga veani natam̃ateana. 37Ma eu p̃ilake po mataku, po midoaki nia naga eu leo punusi naatana sikai. 38Go e noa ki da, Ekasana ku m̃anaunau? Go nadodopusuusuana maga eu pakilina nap̃op̃omu nalakena nasava? 39Kuga vunusi nam̃elearugu maga go nam̃elegu maga, naga e pei kinau: kuga tovidogo au, po punusi; nalakena naatana sikai e da peani nap̃okasi go navatu maga mau, dakiusi waina ku leo punusi au a peani ra. 40Go ragi waina e noa sua tea wanogoe, e piseiki da nam̃elearuna maga go nam̃elena maga. 41Go ragi waina eu ko da saralomau mau nalakena nalaelaeaana, po do maga, e noa ki da, e naga, Ku peani te navatuna kaniana nea kite? 42Go eu dua e matele sikai ni naika veniana sikai. 43Go e dape a, po ganikani naraeda.
44Go e noa ki da, e naga, Tea maga waia eu pei navasaana aginau maga waina a noa ki mu ara, ragi waina a ko sikoti mu doko, naga tea maga mamau puti waina eu pei tea midiriana nawotaeana ki Moses, go profeta maga, go Salamo maga, nalo kakagu, e one ara one naga euga lolomana. 45Ragi wanogoe e polagati nap̃op̃oda naga euga midoaki atae navasaana midiriana maga; 46go e noa ki da, e naga, E dapala waia pei tea midiriana, naga Kristo ega sua navitinuana ni namateana, po moro duleana m̃elu dua ki tea mate maga naaleatia ketolu; 47go naga namidoakidoaana go namidoakikorokoroana ni namarinaleosaana maga eroga vei tea rogorogokiana pae nagisana paki nalauna maga mamau puti, po atulake pae Yerusalem pa pa pa. 48Nimu ku pei tea noasokisoki ni tea maga wanogoe. 49Go kuga leo, kinau a dip̃aki lua paloti nasaiana ki Tamagu ega toko mu doko: ma nimu kuga toko natokoana pa pa kuga wo pei tea sugoroana ki nakasuaana waina e pae elagi umai.
50Go e piragi lua ra pano pa pa eu doko kivea ki Bethania: go e sike nam̃elearuna maga po pasa p̃ia ki da. 51Go ragi waina e do pasa p̃ia ki da, e pa dua ki da pano, po pei tea tapeana sake paki nakoroatelagi pano. 52Go nara eu lotu ki nia, po liliu umai paki Yerusalem pilake nalaelaeaana warua: 53go eu doko roara ni nasum̃a tapu sara ragi, eu do pasa p̃ia ki Sup̃e.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKA 24: NTB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific
