WƖAA DƖ-SUOMUŊ 1
1
Wɩaa dɩ-suomuŋ
1Dɩ-suomuŋ Wɩa ŋaa wɩa-nyuŋ arɩ tinteeŋ nɛ. 2Dʋnɩa fa bɩ kʋŋkala naga, ʋ fa pɩŋ hoi nɛ. Leriŋ kala fa bire nɛ, ka Wɩa Dɩma zɩzaarɛ lɩɩŋ nyuŋ.
3Ŋɩɩ nɛ Wɩa bʋl, “Leŋ dɩ pʋlʋmʋŋ chaanɛ,” ŋɩɩ nɛ ʋ chaanɛ. 4Wɩa na pʋlʋmʋŋ zɔmɔ, ʋ kɛŋ pʋlʋmʋŋ arɩ birimiŋ kaa pɔrɛ dɔŋɔ lɛ. 5Ŋɩɩ nɛ Wɩa kɛŋ pʋlʋmʋŋ kaa yɩyɩrɛ wɩɩhɛyɛ aŋ kɛŋ birimiŋ ma yɩyɩrɛ tɩtaŋɩŋ. Wɩa jʋʋ dɩdaanɩŋ, taŋ pʋl chʋchʋɔŋ, chɛ-bumbuŋ nɛ ŋɩɩ.
6Ŋɩɩ nɛ Wɩa bʋl, “Leŋ dɩ lɩɩŋ kpaa balɩa aŋ ka wuoluŋ pɩŋ.” 7Ŋɩɩ nɛ ʋ kpaa, aŋ ka wuoluŋ, dɔŋɔ hɛ nyuŋ, dɔŋɔ ma hɛ bʋbʋɔŋ. 8Wɩa kɛŋ wuol-la sɩ hɛ ba pɛgɛ kaa yɩyɩrɛ wɩa-nyuŋ. Wɩa jʋʋ dɩdaanɩŋ, taŋ pʋl chʋchʋɔŋ, chɛ-lɩamɩŋ nɛ ŋɩɩ.
9Ŋɩɩ nɛ Wɩa bʋl, “Leŋ dɩ lɩɩŋ kala sɩ hɛ bʋbʋɔŋ kʋ hɛ dɔŋɔ lɛ aŋ ka tintee-hɩlɩŋ,” ŋɩɩ nɛ ʋ ŋaa. 10Ŋɩɩ nɛ Wɩa kɛŋ dɩ-hɩlɩɩ-la kaa yɩyɩrɛ tinteeŋ aŋ kɛŋ lɩɩ-la sɩ hɛ bʋbʋɔŋ ma yɩyɩrɛ mʋgʋ-balɩŋ. Wɩa na dɩ ʋ zɔmɔ.
11Ŋɩɩ nɛ Wɩa bʋl, “Leŋ dɩ kʋŋkala sɩɩ nɛŋ, yaŋ arɩ tɩɩsɩŋ, nyʋ.” Ŋɩɩ sɛnɛ ŋaa. 12Ŋɩɩ nɛ yaŋ arɩ tɩɩsɩ-la nyʋ a kɛŋ doho. Ʋ na dɩ ba kala zɔmɔ. 13Wɩa jʋʋ dɩdaanɩŋ, taŋ pʋl chʋchʋɔŋ, chɛ-torimuŋ chɛɛŋ nɛ ŋɩɩ.
14Ŋɩɩ nɛ Wɩa bɩra bʋl, “Leŋ dɩ pʋlʋmʋŋ chaanɛ wɩa-nyuŋ a kɛŋ wɩɩhɛyɛ arɩ tɩtaŋɩŋ pɔrɛ dɔŋɔ lɛ, a magɩlɛ tapʋlaa, chɛnsɩŋ arɩ jɩsɩŋ dɩ-suomuŋ, 15dɩ ba chaanɛ wɩa-nyuŋ dɩ tinteeŋ kɛŋ pʋlʋmʋŋ.” Ŋɩɩ sɛnɛ ŋaa. 16Ŋɩɩ nɛ Wɩa ŋaa pʋlʋŋ balaa balɩa, ba tʋɔŋ kʋbalɩŋ pʋpɔsɛ wɩɩhɛyɛ, ka kʋbie ma pʋpɔsɛ tɩtaŋɩŋ, a ŋaa chɛnwʋlaa ma. 17Wɩa ŋaa pʋlʋŋ bala-la hɛ wɩa-nyuŋ nɛ dɩ ba chɩchaanɛ tinteeŋ, 18dɩ ba pʋpɔsɛ wɩɩhɛyɛ arɩ tɩtaŋɩŋ a kɛŋ pʋlʋmʋŋ arɩ birimiŋ pɔrɛ dɔŋɔ lɛ. Ŋɩɩ nɛ Wɩa na dɩ ba zɔmɔ. 19Wɩa jʋʋ dɩdaanɩŋ, taŋ pʋl chʋchʋɔŋ, chɛ-nɛsɩmɩŋ nɛ ŋɩɩ.
20Ŋɩɩ nɛ Wɩa bʋl, “Leŋ dɩ kɩalɩŋ sɩ jaŋ hɛ lɩɩŋ tʋɔŋ a kɛŋ mɩɩsɩŋ kɔ, dɩ wɩa-nyuŋ fillee maa zaarɛ.” 21Ŋɩɩ nɛ Wɩa ŋaa lɩɩ-jʋʋraa arɩ mʋgʋ-balɩŋ tʋɔŋ kɩaa doho doho arɩ fillee kala sɩ hɛ wɩa-nyuŋ. Wɩa na dɩ ba zɔmɔ. 22Wɩa pɛ ba lɛ aŋ bʋl, “Má pʋŋa su lɩɩŋ kala aŋ ka fillee ma pʋŋa su tinteeŋ.” 23Wɩa jʋʋ dɩdaanɩŋ, taŋ pʋl chʋchʋɔŋ, chɛ-nɔmʋŋ nɛ ŋɩɩ.
24Ŋɩɩ nɛ Wɩa bʋl, “Leŋ dɩ bagɩlaa arɩ pʋsʋŋ kala arɩ kɩalɩŋ kala sɩɩ tuuri tinteeŋ kɛŋ doho.” Ba kala hɛ nɩmɛ a kɛŋ doho. Ŋɩɩ sɛnɛ ŋaa. 25Wɩa sɩ ŋaa ba kala, ʋ tʋɔŋ tɔrɛ ba nyuŋ.
26Ŋɩɩ nɛ Wɩa bɩra bʋl, “Leŋ dɩ la ŋaa nuhuobiine dɩ ʋ nagɛla, a leŋ dɩ ʋ tɩɩ chenfile-la sɩ hɛ mʋgʋ-balɩŋ tʋɔŋ arɩ fille-la kala sɩ hɛ wɩa-nyuŋ arɩ pʋsʋ-la kala sɩ hɛ tinteeŋ arɩ tintee-tuuroo kala.”
27Ŋɩɩ nɛ Wɩa ŋaa nuhuobiinee ba nagʋ,
baal arɩ haal.
28Wɩa pɛ ba lɛ aŋ bʋla pɩba, “Má kɛŋ doho a pʋŋa su tinteeŋ, má tɩɩ kʋŋ na-kala sɩ hɛ mʋgʋ-balɩŋ arɩ fille-la kala sɩ hɛ wɩa-nyuŋ arɩ kɩalɩŋ kala sɩɩ tuuri tinteeŋ.”
29Ŋɩɩ nɛ Wɩa bʋl, “Mɩ joŋ kʋnɛnɛɛ arɩ tɩɩnɛnɛɛ kala pɩma nɛ, ba jaŋ ŋaa ma kʋdiilee. 30Mɩ joŋ pɩpaarɩŋ arɩ yaŋ a pɩ bagɩlaa, pʋsʋŋ, tinteeŋ tuuroo arɩ fillee kala sɩ hɛ wɩa-nyuŋ. Kɩalɩŋ kala sɩɩ wiesu, kɩaa deemba nɛ jaŋ ŋaa ba kʋdiilee. Ŋɩɩ sɛnɛ ŋaa.”
31Ŋɩɩ nɛ Wɩa bee na kɩalɩŋ kala ʋ sɩ ŋaa dɩ ba zɔmɔ woruŋ. Ŋɩɩ nɛ wɩa jʋʋ dɩdaanɩŋ, taŋ pʋl chʋchʋɔŋ, chɛ-dʋmʋŋ nɛ ŋɩɩ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
WƖAA DƖ-SUOMUŊ 1: SIS
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014