Luke 22

Jisua that rang lam an mintuo

(Mat 26:1-5; Mk 14:1-2; Joh 14:10-11)

1 # Jôk 12:1-27 Hanchu, cholboi vâipôl ruolhoi, Kalkânkût ruolhoi an iti hah anâi zoia. 2Ochaisingei le Balam minchupungeiin mipui an chi sikin inrûka Jisua that rang lam an roka.

Judas'n Jisua minsûr rang a masat

(Mat 26:14-16; Mk 14:10-11)

3Ruoisi sômleinik ngei lâia Judas Iscariot an iti ngâi sûnga Soitan a lûta. 4Hanchu Ochaisingei le Inkhomin ulienngei kôm a sea, Jisua an sûr theina rang lam a vân kerengpuia. 5Anni han an râisân oka, sum pêk rangin an inkhâma. 6Hanchu, Judas a nuoma, mipui riet loi kâra minsûr rang chuminrên a rok zoi.

Jisua le a ruoisingei kalkân kût an kâk

(Mat 26:17-25; Mk 14:12-21; Joh 13:21-30)

7Hanchu, cholboivâipôl ruolhoi, Kalkân kût khalâiot, belrite that rang ni a hong tunga. 8Jisua'n hi chong minchôiin Peter le John a tîra. “Se ungla eini sâk rang Kalkân kût va minsûk roi,” a tia 9Hanchu a kôma, “Khonmo kin minsûk rang?” an tia. 10An kôma, “khopuilien nin lût lehan, mi inkhat bêla tui chôi tong nin ta, a lûtna ina jûipat roi. 11Hanchu, in pumapa kôma, ‘Minchupu'n ku ruoisingei leh Kalkân kût kin sâkna rang khâltan khonmo a ti?’ ti roi. 12Hanchu, chunginchuon khâltan inzar tak, neinun nâm omsai, nangni min mûng a ta, mahan minsûk roi,” a tipe ngeia. 13Hanchu an sea, Pumapa'n an kôma a ti lam angin jâtinrêng an mua, mahan kalkân kût an mintuo zoi ani.

Pumapa Jânbu

(Mat 26:26-30; Mk 14:22-26; 1 Kor 11:23-25)

14Hanchu, asâk zora ahong nîn chu a tîrton sômleinik ngei leh khalâi a ota. 15An kôma, “Ku tuong mân, hi Kalkân kût hih nangni sâkpui rang ku nuom sabak ani. 16Nangni ki ril, Pathien Rêngrama a tatakin ani mâka chu sâk khâi no ning,” a tia. 17Male, kilât a lâka, Pathien kôma râisânchong a ril zoiin chu an kôma, “Hihi lâk ungla buong roi. 18Nangni ki ril, Pathien Rêngram a juong tung mâka chu hi uain hih buong khâi no ning,” a tipe ngeia. 19Male, vâipôl a lâka, Pathien kôma râisânchong a ril zoiin chu a khoia, a pêk ngeia an kôma, “Hihi ka taksa, ninta ranga ipêk ani. Mi nin riettitna rangin tho ngâi roi” a tia. 20Ha angin, an sâk zoiin chu, kilât a lâka, “Hi kilât hih Pathien chongtung thar ki thisena sînthona, ninta ranga bun suok ani,” a tipe ngeia.#22:20: miziek senkhata chu Jisua chongbâingei ommak Mahih ka taksa rachang 19, na le rachang 20 na.#Jer 31:31-34

21 # Lap 41:9 Hannisenla, en ta u, ni minsûr rangpu chu ka khalâi otpuipu hih ani. 22Pathien mintuo anghan, Miriem Nâipasal chu thîng a tih, ania, a minsûrpu chung chu ântak bah na! 23Hanchu an lâia tutakin mo, ma anga tho rang ai ni rang ani zoi? tiin an inrekel inlôma.

Alientak rang chungroia inkhalna

24 # Mat 18:1; Mk 9:34; Luk 9:46 Hanchu, ruoisingei lâia a tutak mo alientaka be rang tiin inkhalna a oma. 25Jisua'n an kôma, “Jentail rêngngei chu an mingei chunga racham an neia, racham a nei ngei chu ‘mipui ngei mal’ an ti ngâia. 26#Mat 23:11; Mk 9:35 #Mat 20:25-27; Mk 10:42-44 Ania, nangni chu ha anghan nino tunui, nin lâia alientak chu nâipang uolin om senla, ruoipu rang chu tîrlâm angin om rese. 27#Joh 13:12-15Tumo alien uol, bu nêk ranga insungpu mo, bukhalâi dôpu mo? Bu nêkpu nîng a tih. Ania, kei chu nin lâia tîrlâm angin ko oma.”

28“Huong ranga methêmna ko tong kâra ni ompui ngei nin ni. 29Ka Pa'n racham ni pêk anghan, racham nangni pêk ki tih. 30#Mat 19:28Ke Rêngrama ko dosânga sâk nan ta, nêk nan ta, Rêngsukmuna insungin Isreal jât sômleinik ngei chunga roijêk nin tih.”

Peter'n a ipdel rang a rilmasâna

(Mat 26:31-35; Mk 14:27-31; Joh 13:36-38)

31“Simon, Simon, rangâi ta! Butak le arishi an jâp ngâi anga nangni minsîna asa le sie nangni kidik rangin Soitanin phalna a man zoi. 32Hannisenla, na taksônna ânsam loina rangin nangni ku chubai pe, ki tieng ni kîr tikin na lâibungngei ni mindet rang ani,” a tia. 33Peter'n a thuona, “Pumapa, no kôma intâng ina intâng rang le athi rang khomin kên phal,” a tia. 34Jisua'n, “Peter, nang ki ril, avienjân hin, voithum riet ngâi mu-ung ni ti mâka chu âr khuong no nih,” a tipea.

Sumkok, choli, le khandai

35 # Mat 10:9,10; Mk 6:8,9; Luk 9:3; 10:4 Hanchu, Jisua'n an kôma, “Sumkok, choli, kekok, boia nangni ki tîr lâia han imo nin insama?” tiin a rekela, “Ite insam mak me” an tia. 36Jisua'n atûn chu, sumkok, choli, anei khomin chôi ta roi, khandai nei loi khomin a kâncholi zuor senla rochôk rese. 37#Isa 53:12Nangni ki ril, Lekhabu'n, “Ama chu mi nunsiengei lâia telsa ani zoi” itia ku chung roi miziek hah, ku chunga ai tung indik rang ani. 38Ruoisingeiin a kôma, “Pumapa, en ta, hin khandai inik a om” an tia. Ahun a tipe ngeia.

Olive muola Jisua chubai tho

(Mat 26:36-46; Mk 14:32-42)

39Hanchu, a tho ngâi lam angin, khopuilien a mâka, Olive muola a sea, ruoisingei khomin an jûia. 40Amun an tungin chu an kôma, “Huongna nin lût loina rangin chubai roi” a tipe ngeia.

41Hanchu, an kôm renga lunga dêngphâkna tena a vân thîna, khûkinbilin chubai a thoa. 42“O Pa, nu nuomin chu hi dengtheina kilât hih ko kôm renga khâi roh. Nikhomrese, keima racham ni loiin, na racham tak ni rese” a tia. 43Hanchu, vântîrton invân renga a kôma a juong inlâra, râtna a juong pêka. 44Ngâisiet inrikin, ningsiet uolin a chubaia, a rathan khom thisen angin pila a masara.#22:44: Miziek senkhat ngei chu rachâng 43-44 dôn mak ngei.

45Hanchu, chubai thona renga inthoiin ruoisingei kôma a sea, sabeidonga a inin a va mu ngeia. 46An kôma, “Ithomo nin in? Inthoi ungla, huongna nin tâk loina rangin chubai roi,” a tipe ngeia.

Jisua an sûr

(Mat 26:47-56; Mk 14:43-50; Joh 18:3-11)

47Jisua a la chong lâiin ruoisi sômleinik ngei lâia Judas hong tuong mipui an hong tunga, Jisua tum rangin a kôma a honga. 48Jisua'n a kôma, “Judas, Miriem Nâipasal hi atumin minsûr rang ni ti mo?” a tia. 49Hanchu, a kôma ruoisi om ngei han, neinun omtie an mûn chu a kôma, “Pumapa, kin khandai mang ni ung mo?” tiin an rekela. 50Hanchu an lâia inkhatin Ochai Inlaltak tîrlâm a chang tienga kuor a leng pea. 51Ania, Jisua'n “Ahun zoi” a tia. Ha mi kuor hah a tôna a mindam pe zoi.

52Hanchu, a kôma hong Ochaisingei, Biekin ulienngei, upangei, a sûr ranga hong ngei kôma Jisua'n, “Khandaingei, tôkmolngei ichôiin, puoloi sûr rang leh in-ang bangin nin hong na? 53#Luk 19:47; 21:37Nîngtin Biekina nin kôm ko oma, ni sûr rang ti mak cheia. Ania, ijîng rachamneinân roi ajêk lâi hih nin sin tho zora ani,” a tipe ngeia.

Peter'n Jisua a ipdel

(Mat 26:57-58,69-75; Mk 14:53-54,66-72; Joh 18:12-18,25-27)

54Hanchu, Jisua an sûra, Ochai Inlaltak ina an tuonga, Peter'n alazanin a jûia. 55In khalâidung alâitak han mei an thoa, mei rihila insungruma mei uot ngei lâia han Peter khom a vân sunga. 56Nupang tîrlâm inkhatin mei kunga ânsung a mua, a mitjuoka, “Hi mi khom hih Jisua kôma om ngâi mi ani,” a tia 57Peter'n, “Nupang, ama hah riet luo riet ngâi mu-ung” tiin a minlêma. 58Anangkan uola chu mi inkhatin Peter kôma, “Nang khom an lâia mi ni ni” a tia. Peter'n, “Miriem, kei chu ni mu-ung” tiin a thuona. 59Hanchu dârkârkhat suole chu midangin, “Ite okchâna boi riekin hi mi khom hih Jisua kôma om ngâi ani, Galilee mi ani sikin” ati ngita. 60Ania Peter'n, “Miriempa, ni ti ngei hah riet mu-ung” tiin a thuona. Harenghan a la chong lâi takin âr akhuong zoia. 61Hanchu Pumapa hah ânheia, Peter a en ngita. Hanchu, Peter'n Pumapa'n a kôma, “Avien jân âr akhuong mân voithum ni ipdel ni tih,” ai tipe hah a rietsuoka. 62Hanchu, Peter a jôkpaia, a chap ngungui zoi.

Jisua an esêla an jêm

(Mat 26:67-68; Mk 14:65)

63Hanchu, a sûrngei han Jisua tusiem thonân an manga, an jêma. 64A mâi an hîp pea, “Ti roh, tumo nang a jêm?” tiin an rekela. 65A chunga demna chong tamtak an thoa.

Roijêkna makunga an tuong

(Mat 26:59-66; Mk 14:55-64; Joh 18:19-24)

66Hanchu, khuo avâr lehan, upangei, Ochaisingei, Balam minchupungei an intûpa, an roijêkna Jisua an hong tuonga, 67a kôma, “Ni ril roh, Messiah nini mo?” an tia. Jisua'n, “Nangni ril khom inlang iem no tunui,” tiin a thuona. 68“Chong nangni rekel khom inlang ni thuon no tunui. 69Ania, atûn renga Miriem Nâipasal hih Râtinchung Pathien chang tieng insung a tih zoi” a tia. 70An rêngin, “Nônte Pathien Nâipasal mo na ni,” an tia. An kôma, “Ani mi nin ti zoi hate” tiin a thuona. 71Hanchu, “Ite rietpuipu dang nâng khâi mak me, eini rengin a ti ei riet zoi,” an tia.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luke 22: SAKNT

Highlight

ಶೇರ್

ಕಾಪಿ