Matiye 3

Kazita ki Zaŋ Batis

(Markus 1.2-6; Lik 3.1-6; Zaŋ 1.19-23)

1Saŋ ozzinagi kʼita maŋ, Zaŋ Batis geŋ yʼa tʼiide kʼadda balɗa ki siiɗo Ziide wo yʼa iise kazita, yi dʼeesiyo: 2«Kun ti kama lekkiyaguŋ kono Moziko Raa tʼiina goppoŋ.» 3Zaŋ geŋ yoŋ wede nebi Ezayi yʼa ruute taayadí ti kaaga, yʼede:

«Ɗoŋ an dʼollige golla ki wedusu yi ɗollite adda balɗa, yi dʼeesiyo:

Kun i tʼokkoŋ urzi Galmeega,

erkiyagí kun i tiʼn okkoŋ ki diine ɗelele#3.3 Kun wollo adda mattup ki Ezayi 40.3..»

4Zaŋ geŋ kallayí yʼossiyo an indigo kʼilali ziŋzo, wo ser a tooni ki golmodo. Omɓadí gannoori ti madde. 5Iŋkino maŋ ɗoŋ ɓaadaŋ ti geeger Zeruzalem, ti siiɗo Ziide gette pay, wo ti siiɗo ere a biza kʼooye Zurden gette pay an dʼettiyo tukki Zaŋ. 6An tʼooɗibe addaŋ a urzi kʼolɗikadaŋ a ɗaana ɗuwo pay, wo yoŋ yi-tiʼn suyyiso batem adda kʼooye Zurden.

7Aame Zaŋ yi wulle kane Pariziyeŋ ti Saduseyeŋ ɓaadaŋ anʼtiyo tuddí kono yʼa tiʼn suyye batem maŋ, yʼan di ruute, yʼede: «Kune ɗoŋ ulpi aakede maŋkikagi! Wee wee un gize urzi wede kun tʼalɗa ti booro ki Raa ere ettiyo goppoŋ te? 8Iŋkino maŋ kun iso naabo ere beehiye, geŋ a kize kun ti gime lekkiyaguŋ. 9Wo kun roote ye adda kʼadduguŋ: “Kaye mugiyey Ibirayim me”, kono kun tʼalɗa ti booro Raa te. Wo kun ollo nʼun di rooto: Ti moŋgali eŋ miŋ, Raa yʼaane yi dʼaɗɗe ɗuwo a tʼise ita kʼin̰n̰i kʼIbirayim me. 10Aŋken̰n̰o booro Raa i guute goppoŋ, todʼte aa wede yi tʼumɓe ulpaasi yʼa-dokkiɗa inda ti sondayzaŋ pay: Undumu tuuku yi kʼehiyo in̰n̰i beehiye ye maŋ, an di-ɗekka an di seɗɗa adda kʼuwwo mendí. 11Nuŋ nʼunni suyyiso batem tʼahu kono a kize kun ti gime lekkiyaguŋ, wo ɗe wede ettiyo kʼitadó geŋ yoŋ toogo yi jiire nuŋ, wo nuŋ ni kʼîide nʼa ki tʼoɗɗipe toɓiyagí ye. Yoŋ yʼunni suyya batem tʼUnde Kamilen̰ wo ti uwwo#3.11 Uwwo: I-kaza ise yiʼn diʼn ise kamilen̰, ise booro Raa. . 12Wo yoŋ yʼa ɗekka booro aakede wedusu yi tʼumɓo munɗa ki solɗe a beezí, yʼa silɗa koɗuwo, in̰n̰i yi-tʼoɓa giiƴe, wo oɗɗo yʼa tʼogga mentú adda kʼuwwo ere i kʼunto ye.»

Suyyiso batem kʼIsa

(Markus 1.9-11; Lik 3.21-22; Zaŋ 1.29-34)

13Iŋkino maŋ ti siiɗo Galile Isa yʼa iide ki tukki Zaŋ a biza kʼooye Zurden kono Zaŋ yʼa ti yʼ suyye batem. 14Aame geŋ Zaŋ yʼa dihe yʼa-tooge, wo yi di ruute, yʼede: «Nuŋ miŋ a ni suyye batem kee, ɗe mummino kee ki dʼettiyo ki tukki nuŋ nʼa ki suyye batem me?» 15Wo ɗe Isa yi diʼn gime onamí, yʼede: «Aŋken̰n̰o kee kʼoyyo ki tiʼn suyyi batem, kono tʼurzi en̰n̰o kine in dʼise sulɗi ɗoŋ pay ki diine a-tʼette a naabo ere aa Raa yi dehu.» Iŋkino maŋ Zaŋ yʼa iyye yʼa ti yʼ suyye batem. 16Aame Isa yi ti yʼ zuyye batem wo yʼaɗɗiya tʼadda kʼahu maŋ, a kaamiki kandaane a tʼihina wo yʼa wulle Unde Raa ti ɗeegu ti kandaane aa deere tʼa di guune a tuddí. 17Wo ɗuwo an dʼilliga golla ettiyo ti kandaane tʼa ruute, tʼede: «Eŋ Ulo nuuno ni yʼ giyye ɓaadaŋ, ulbó uŋse ti yode me.»

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 3: moz

Highlight

ಶೇರ್

ಕಾಪಿ