JUAN 10
10
Jesús: Alli mitseq
1“Tseqeypa, tseqeypam niyaq: Pipis úshakunapa kanchanman punkupa mana yeykoqqa, sinowqa juk ládupa lloqaq, keyqa suwam i ranchadormi. 2Punkupa yeykoqqa, úshakunapa mitseqninmi. 3Keytam kichan punku tápaq, úshakunanam wiyayan bosninta, i úshankunatanam qayan jutinpa i jorqarin. 4I llapan peypa kaqta jaqman jorqaramurnam, peykunapa puntanta eywan; úshakunanam qatiyan, bosninta reqirnin. 5Mana reqishqataqa manam qatiyantsu, eyqikuyanmi peypita, manam reqiyantsu mana reqishqapa bosnintaqa.”
6Key tinkutsikiytam Jesús nerqan; peykuna manam kayiyarqantsu key ima ninan kanqanta. 7Yapeynam Jesús nerqan: “Tseqeypa, tseqeypam niyaq: Noqam úshakunapa punkun ká. 8Noqapita punta shamoqkunaqa, suwakunam i ranchadorkunam kayan; peru manam úshakuna wiyayarqantsu. 9Noqam punku ká; noqapa yeykoqqa, salbáshqam kanqa; yeykonqam, i yarqonqam, tarenqam pastukunata. 10Ladronqa shamun suwanampaq wanutsinampaq ushakátsinampaq; noqaqa shamorqó kawéyoq kayaneykipaqmi, i atska kayápushuneykipaq. 11Noqam alli mitseqqa ká, alli mitseqqa kaweynintam qon úshankunapaq. 12Págashqalla kaqqa mana mitseqnin kar, kikimpa mana úshankuna kaptin, atoq shamoqta rikeykur úshakunata jaqirir eyqikun, i atoqnam úshakunata apar witsiratsin. 13Tseynowmi págullapaq kaqqa eyqikun, pagashqalla kar, manam ima qokuntsu úshakunapaq. 14Noqam alli mitseqqa ká; i úshákunata reqími, i noqapa kaqqa reqiyamanmi, 15imanowmi Teytapis reqiman, i noqa reqiy Teytata; i kaweyníta churá úshákunapaq.
16“Key kanchachow mana keykaq úshakunapis kapamanmi, peykunatapis apamunámi, bosníta wiyayanqam; juk kanchallanam kanqa, i juk mitseqlla. 17Keyreykurmi Teyta kuyaman, noqa kaweyniyta qoptiy, yapey eyllunápaq. 18Manam pipis qochimantsu, noqaqa kikiypitam churá. Poderniy kanmi churanápaq, i poderniy kanmi yapey eyllunápaq. Key mandamyentuta chaskerqá Teytápitam.”
19Yapeynam judyukuna liryakurkuyarqan keykunata parlaptin. 20Atskaqnam peykunapita niyarqan: —Demoniyuyoqmi, manam fisyunchowtsu. ¿Imapaqtaq wiyayanki?
21Wakinnam niyarqan: —Key parlakiyninkunaqa manam demoniyuyoqpanowtsu. ¿Demoniyuyoqqa akasu pwedinmanku wiskukunapa nawinkuna kicheyta?
Jesús willakun Dyospa Tsurin kanqanta
22Jerusalenchow dedikasyon fyesta keykarqan. Alaley tyempum karqan, 23Jesús purerqan templuchow, Salomon punku nishqapa. 24Judyukunanam qenchuchúrir niyarqan: —¿Imeykamataq almákunata turbamunki? Qam rasonpa Kristu karqa niyámey llapankuna wiyey.
25Jesusnam yaskerqan: —Niyarqoqnataq, i mana kreyiyankitsu; Teytapa jutinchow, rureykunata ruranqámi willakun noqapaq; 26qamkunaqa kreyiyankitsu, úshákunapita mana karmi, niyanqaqnow. 27Úshakunaqa wiyayanmi bosníta, i noqaqa reqiymi, i qatiyamanmi, 28noqa wiñey kaweyninkunam qó; manam imeypis ushakayanqatsu, ni pí qochimanqatsu makiypita. 29Qomaqní Teyta, llapampa mayorninmi i manam pipis qochinqatsu Teytápa makinpita. 30Noqa i Teyta juklleyllam kayá.
Judyukuna Jesusta rechasayan
31Tseynam judyukuna rumita yapey tsariyarqan qompayanampaq. 32Jesusnam yaskerqan: —Atska alli rureykunatam rikátsiyarqoq Teytapita. ¿Meyqampitataq qompayamanki?
33Judyukunanam yaskirnin niyarqan: —Alli ruranqeykipitaqa manam qompayaqtsu, sinowqa Dyosta maldisinqeykipeqmi, qam nuna keykar, Dyos tukunki.
34Jesusnam yaskerqan: —¿Manaku leynikikunachow qellqareykan: Noqam nerqá, ¿dyoskunaku kayanki? 35Si, “dyoskuna” nerqan taqeykunaman Dyospa palabran shamushqata (Eskritúra manam jarukushqatsu kanman), 36¿Teyta santifikashqanta i key munduman kachamushqanta, qamkuna niyanki: “Qam maldisinki.” “Dyospa tsurinmi ká,” niptí? 37Si Teytápa rureyninkunata noqa mana ruraptiyqa, ama kreyiyameytsu. 38Si rurapteqa, noqaman mana kreyirpis, kreyiyey ruranqákunaman, reqiyaneykipaq i kreyiyaneykipaq Teyta noqachow kanqanta i noqa Teytachow.
39Yapeynam munayarqan tsarita, peru peyqa safekorqan makinkunapita. 40Yapey ewkorqan Jordan wak tsimpanta, Juan punta bawtisashqan sityuman; i tseychow keydakorqan. 41I atskaq shayámorqan peyman, i niyarqan: “Rasonpam, Juanqa, manam ima señalta rurashqatsu; peru llapan Juan nishqanqa, rasonpam karqan.”
42I atskaqmi kreyiyarqan peyman tseychow.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JUAN 10: QUEAN
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
