لُکَ 6
6
پَمٛلْ دٛوْ ݧَلْندٜ سِوْتَارٜ
1وٛنْدٜ ݧَلْندٜ سِوْتَارٜ يٜىٰسُ اٜ يَحَ ندٜرْ نغٜسَ اَلْکَمَارِ، سٜيْ تٛکُّٻٜمٛ نغَطِ کَ ٻٛرُکِ شَمّٜىٰجٜ مَيْرِ اٜ مٛلْمَطٜ ندٜرْ جُوطٜ مَٻّٜ، اٜ ٻٜ ݧَامَ؞ 2اَمَّا وٛٻّٜ فَارِسَنْکٛعٜنْ مبِعِٻٜ، «کٛ وَطِ نغَطٛتٛنْ کٛ اَتَّوْرَ حَطِ طُمْ وَطَ ݧَلْندٜ سِوْتَارٜ؟»
3يٜىٰسُ وِعِٻٜ، «اٛنْ مٜىٰطَايِ جَنْغُکِ کٛ دَوْدَ وَطِ ندٜ نَنِ وٜىٰلٛ، کَنْکٛ اٜ غٛنْدُٻٜ اٜ مَاکٛ؟ 4اٛ نَتِّ لُکُرُ سٜنِيطُمْ، اٛ حٛشِّ بُرٛودِ شٜنِيطُمْ، اٛ ݧَامِطُمْ؞ اَتَّوْرَ بٛو وِعِي اَرْدِيٻٜ دِينَ تَنْ حَانِ ݧَامُکِ بُرٛودِ طُمْ، اَمَّا دَوْدَ ݧَامِطُمْ حَا مَا اٛ حٛکّٛرِ جَادٛوٻٜ اٜ مَاکٛ؞»
5سٜيْ يٜىٰسُ وِعِٻٜ، «ٻِي نٜطّٛ وٛنِ جٛومُ ݧَلْندٜ سِوْتَارٜ؞»
يٜىٰسُ يَمْطِتِنِي مٛ جُنْغٛ جَرَانغٛ
6وٛنْدٜ ݧَلْندٜ سِوْتَارٜ اٛ نَتِّ ندٜرْ سُودُ دٛعَارٜ، اٜ مٛ اٜکِّتِنَ؞ غٛطّٛ مٛ جُنْغٛ جَرَانغٛ اٜ ندٜرْ مَيْرُ؞ 7مٛودِٻّٜ اَتَّوْرَ اٜ فَارِسَنْکٛعٜنْ شُتِي يٜىٰسُ کٛو اٛ يَمْطِتِنَيْ غٛطّٛ ندٜرْ ݧَلْندٜ سِوْتَارٜ، نغَمْ ٻٜ کٜٻَ کٛ ٻٜ نغُلِّرٛيْتٛومٛ؞ 8اَمَّا، يٜىٰسُ اٜ اَنْدِ کٛ وٛنِ ندٜرْ ٻٜرْطٜ مَٻّٜ، سٜيْ اٛ وِعِ نٜطّٛ مٛ جُنْغٛ جَرَانغٛ اٛنْ، «وٛرٛيْ، ندَرٛطَا شَکَ مَٻّٜ؞» اٛ اُمِّي، اٛ دَرِي طٛنْ؞ 9سٜيْ يٜىٰسُ وِعِٻٜ، «اٜ مِ پَمَعٛنْ، کٛ اَتَّوْرَ وِعِ طُمْ وَطَ ندٜرْ ݧَلْندٜ سِوْتَارٜ، وَطَ کٛ وٛوطِ کٛو وَطَ کٛ وٛوطَا، حِسْنَ يٛنْکِ کٛو حَلْکَکِ؟» 10غَطَ اٛ رَارِيٻٜ ٻٜ فُو، سٜيْ اٛ وِعِ نٜطّٛ اٛنْ، «فٛرْتُ جُنْغٛ مَاطَ؞» اٛ فٛرْتِنغٛ، سٜيْ نغٛ يَمْطِتِ؞
11اَمَّا ٻٜرْطٜ مَٻّٜ مٜتِّ نَاع سٜطَّ، ٻٜ مٜتِ حَکُّندٜ مَٻّٜ دٛوْ کٛ ٻٜ نغَطَنْتَ يٜىٰسُ؞
يٜىٰسُ سُٻِي لِلَاٻٜ سَڤّٛ اٜ طِطٛ
12ندٜرْ بَلْطٜ طٜنْ، يٜىٰسُ يَحِ دٛوْ حٛشّٜىٰرٜ نغَمْ وَطَ دٛعَارٜ؞ اٛ وَالِ وَطُکِ دٛعَارٜ؞ 13ندٜ وٜىٰتِ، اٛ نٛدِّ تٛکُّٻٜمٛ، اٛ سُٻِ سَڤّٛ اٜ طِطٛ، اٛ حٛکِّٻٜ اِنْدٜ لِلَاٻٜ؞ 14کَمْٻٜ نغٛنِ: سِيمَنْ مٛ اٛ حٛکِّ اِنْدٜ بِيتُرُسْ، اٜ مِݧِرَاوٛ مَاکٛ اَنْدِرَاوُسْ، اٜ يَاکُبُ، اٜ يَحَيَ، اٜ فِلِبُسْ، اٜ بَتِلٛومِ، 15اٜ مَاتِيُ، اٜ تٛومَ، اٜ يَاکُبُ ٻِي حَلْفَ، اٜ سِيمَنْ بِعٜتٜىٰطٛ جَلٛوتِ، 16اٜ يَحُودَ ٻِي يَاکُبُ، اٜ يَحُودَ اِسْکَرِيٛوتِ، غَرْتُطٛ کٛکِّتِرْطٛ يٜىٰسُ؞
يٜىٰسُ اٜکِّتِنِي مٛٻْغَلْ، يَمْطِتِنِي ݧَوْٻٜ
17سٜيْ يٜىٰسُ جِڤّٛدِي اٜ مَٻّٜ اٛ دَرِي اٜ نجَيْرِ؞ تٛکُّٻٜمٛ طُطْٻٜ اٜ طٛنْ اٜ يِمْٻٜ طُطْٻٜ پِوٛيْٻٜ دَغَ لٜيْدِ يَحُودِيَ فُو، اٜ اُرُشَلِيمَ، اٜ لٜيْدِ تَايَ اٜ سِدٛنْ حَادٜ مبٜىٰلَ؞ 18ٻٜ نغَرٛيِ نغَمْ نَنُکِمٛ اٜ يَمْطِنٜىٰکِ دَغَ ݧَوُوجِ مَٻّٜ؞ ٻٜ غِنِّ تٛرَّتَ نجَمْطِنَا؞ 19وٛنْٻٜ طٛنْ فُو اٜ ٻَدّٛو نغَمْ مٜىٰمَ يٜىٰسُ، نغَمْ بَوْطٜ اٜ مبُرْتٛو دَغَ ندٜرْ مَاکٛ، اٜ مٛ يَمْطِتِنَ کٛو مٛيٜ؞
بَرْکِطِنْکِ اٜ لَانُکِ
20يٜىٰسُ رَارِ تٛکُّٻٜمٛ، وِعِ،
«اٛنْ بَرْکِطِنَاٻٜ، اٛنٛنْ ٻٜ نغَلَنَا،
نغَمْ اٛنٛنْ نجٜيِ لَامُ اَللَّه؞
21«اٛنْ بَرْکِطِنَاٻٜ، اٛنٛنْ نَنٛوٻٜ وٜىٰلٛ جٛونِ،
نغَمْ اٛنْ نغَرْتَيْ کَرْنٜتٜىٰٻٜ؞
«اٛنْ بَرْکِطِنَاٻٜ، اٛنٛنْ وٛيٛوٻٜ جٛونِ،
نغَمْ اٛنْ نغَرْتَيْ جَلَيْٻٜ؞
22«اٛنْ بَرْکِطِنَاٻٜ تٛ يِمْٻٜ نغَݧِيعٛنْ، ندِيوِيعٛنْ، کُطِيعٛنْ، مبٛنِّي اِنْطٜ مٛوطٛنْ نغَمْ ٻِي نٜطّٛ؞ 23نَنٜىٰ بٜلْطُمْ ندٜرْ ݧَلْندٜ ندٜنْ، نغَمٜىٰ نغَمْ بٜلْطُمْ، نغَمْ بَرْکَ مٛوطٛنْ طُمْ طُطُّمْ اٜ دٛوْ؞ نٛنْ مَامَعٜنْ مَٻّٜ نغَطَنّٛو اَنَّبٛعٜنْ اَرَنْدٜعٜنْ؞
24«اٛنْ مبٛنِي، اٛنٛنْ رِسْکُٻٜ،
نغَمْ اٛنْ کٜٻِي کٛ طَٻِّتٛتٛنْ؞
25«اٛنْ مبٛنِي، اٛنٛنْ کَرْٻٜ جٛونِ،
نغَمْ اٛنْ نَنَيْ وٜىٰلٛ؞
«اٛنْ مبٛنِي، اٛنٛنْ جَلَيْٻٜ جٛونِ،
نغَمْ اٛنْ نَنَتَا بٜلْطُمْ، اٛنْ مبٛيَيْ بٛجِّ نَوْطِ؞
26«اٛنْ مبٛنِي تٛ يِمْٻٜ فُو مَنِيعٛنْ، نغَمْ نٛنْ مَامَعٜنْ مَٻّٜ نغَطَنّٛو اَنَّبٛعٜنْ فٜوْرٜ؞
نغِطٜىٰ غَݧٛوٻٜ مٛوطٛنْ
27«اَمَّا اٜ مِ وِعَعٛنْ اٛنٛنْ نَنٛوٻٜ کٛ مبِعَيْمِ: نغِطٜىٰ غَݧٛوٻٜ مٛوطٛنْ، نغَطَنٜىٰ وَݧُٻٜعٛنْ کٛ وٛوطِ، 28مبَرْکِطِنٜىٰ لَانٛوٻٜعٛنْ، نغَطَنٜىٰ تٛرّٛوٻٜعٛنْ دٛعَارٜ؞ 29تٛ غٛطّٛ فِيِيمَ تٛ وٛلٛ، وَيْلِتَنْمٛ وٛعٛتٛ نغٛنْ مَا؞ تٛ غٛطّٛ جَٻِي شُدَّارِ مَاطَ، تَاع حَطُمٛ تٛغّٛورٜ مَاطَ؞ 30تٛرِيطٛمَ غٛطُّمْ فُو، حٛکُّمٛ؞ تٜىٰتَنْطٛمَ غٛطُّمْ، تَاع وِعِمٛ اٛ حٛکُّتُمَا؞ 31نغَطَنٜىٰ وٛٻّٜ کٛ نغِطّٛنْ ٻٜ نغَطَنَعٛنْ؞
32«تٛ يِطُٻٜعٛنْ تَنْ نغِطّٛنْ، طُمٜ بَرْکَ کٜٻٛتٛنْ؟ کٛو کَلُّٻٜ مَا اٜ نغِطِ يِطُٻٜٻٜ؞ 33تٛ غَطَنٛوٻٜعٛنْ بٛطُّمْ تَنْ نغَطَنْتٛنْ بٛطُّمْ، طُمٜ بَرْکَ کٜٻٛتٛنْ؟ اَيْ، کَلُّٻٜ مَا اٜ نغَطَ نٛنْ؞ 34تٛ ٻٜ کَمِّيطٛنْ نجٛٻَيْعٛنْ تَنْ کٛکّٛتٛنْ ݧَمَاندٜ، طُمٜ بَرْکَ کٜٻٛتٛنْ؟ اَيْ، کَلُّٻٜ مَا اٜ کٛکَّ کَلُّٻٜ ݧَمَاندٜ، اٜ ٻٜ کَمّٛو حٛکِّتٜىٰکِ ݧَمَاندٜ مَٻّٜ؞ 35اَمَّا نغِطٜىٰ غَݧٛوٻٜ مٛوطٛنْ، نغَطَنٜىٰٻٜ بٛطُّمْ، کٛکّٜىٰٻٜ ݧَمَاندٜ، تٛع اٛنْ کَمّٛو حٛکِّتٜىٰکِ؞ تٛ اٛنْ نغَطِي نٛنْ، اٛنْ کٜٻَيْ بَرْکَ طُطُّمْ، اٛنْ نغَرْتَيْ ٻِٻّٜ اَللَّه جٛومُ مَنْغُ؞ نغَمْ اَللَّه اٜ يُرْمِنَنَ ٻٜ نغٜتَّتَا اٜ کَلُّٻٜ؞ 36نجُرْمِنَنٜىٰ يِمْٻٜ نٛنْ نٛ ݧَاکٛ مٛوطٛنْ مٛ دٛوْ يُرْمِرْتَ؞
تٛع اٛنْ کِيتٛ وٛٻّٜ
37«تٛع اٛنْ کِيتٛ وٛٻّٜ، اٛنْ کِيتَتَاکٜ؞ تٛع اٛنْ مٜتُ کَلُّکَ دٛوْ غٛطّٛ، طُمْ مٜتَتَا کَلُّکَ دٛوْ مٛوطٛنْ؞ نجَافٜىٰ، طُمْ يَافَنْتٛعٛنْ؞ 38کٛکّٜىٰ، طُمْ حٛکَّيْعٛنْ اٜ ڤٛوندِرْغٜلْ کٜوْنغٜلْ تِطَّانغٜلْ دِمْبَانغٜلْ بٛطُّمْ، طُمْ وَيْلَنَيْعٛنْ ندٜرْ تُمُّطٜ مٛوطٛنْ، نغَمْ ڤٛوندِرْغٜلْ نغٜلْ ڤٛوندِرْطٛنْ، اٜ مَاغٜلْ طُمْ فٛوندِرَنْتَعٛنْ؞»
39طٛنْمَا اٛ حٛکِّٻٜ مِسَالُ طُعُمْ، اٛ وِعِ، «اٛنْ نغِعَ بُمْطٛ وَاوَيْ اَرْدَاکِ بُمْطٛ؟ ٻٜ فُو طِطٛ نَاع سٜيْ ٻٜ نجَنَ ندٜرْ نغَيْکَ؟ 40اٜکِّتٛتٛوطٛ ٻُرَتَا مٛودِبّٛ مُوطُمْ، اَمَّا کٛو مٛيٜ اٜکِّتِنَاطٛ بٛطُّمْ وَرْتَيْ بٛ مٛودِبّٛ مُوطُمْ؞
41«نغَمْ طُمٜ ندَارَتَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ، اَمَّا اَ وَنَّايِ اٜ لٜغَّ وٛنْغَ ندٜرْ حِتٜرٜ مَاطَ؟ 42نٛ وَطَتَ مبِعَا بَنْدِرَاوٛ مَاطَ، ‹بَنْدِرَاوٛ، اَلْ مِ اِتَّنْمَا غٜىٰنٜلْ ندٜرْ حِتٜرٜ مَاطَ،› ندٜنْ اَنْ اٜ حٛورٜ مَاطَ اَ يِعَايِ لٜغَّ وٛنْغَ ندٜرْ حِتٜرٜ مَاطَ؟ اَنْ مُنَافُکِيجٛ، اَرْتُ اِتُّکِ لٜغَّ وٛنْغَ ندٜرْ حِتٜرٜ مَاطَ، ندٜنْ نغِعَا بٛطُّمْ کٜٻَا نٛ اِتِّرَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ؞
لٜکِّ اٜ اَنْدِرٜىٰ ٻِکّٛيْ مَاکِ
43«لٜکِّ بٛطْکِ رِمَتَا ٻِکّٛيْ کٛيْ مبٛوطَا، نٛنْ مَا لٜکِّ کِ وٛوطَا رِمَتَا ٻِکّٛيْ مبٛطْکٛيْ؞ 44نغَمْ کٛو کِيٜ لٜکِّ اٜ اَنْدِرٜىٰ ٻِکّٛيْ مَاکِ؞ طُمْ تٜٻِّتَتَا اِبّٜ تٛ لٜکِّ کٛورَاجٜ، نٛنْ تٛ غِعٜحِ طُمْ تٜٻِّتَتَا ٻِکّٛيْ بُمّٜىٰجٜ؞ 45نٜطّٛ مٛ نغِکُّ بٛطُّمْ اٜ وُرْتِنَ فِي بٛطُّمْ دَغَ ندٜرْ کٛ وٛنِ ندٜرْ ٻٜرْندٜ مُوطُمْ؞ نٛنْ مَا نٜطّٛ کَلُّطٛ اٜ وُرْتِنَ حَلّٜىٰندٜ دَغَ ندٜرْ ٻٜرْندٜ مُوطُمْ، نغَمْ حٛنْدُکٛ نٜطّٛ اٜ مٜتَ کٛ وٛنِ ندٜرْ ٻٜرْندٜ مُوطُمْ؞»
ٻٛلِيطٜ يٜىٰسُ اَلْمَسِيحُ اٜ شٜمْبِطِ بٛ تَفَارٜ
46اٛ وِعِٻٜ، «نغَمْ طُمٜ نٛدِّرْتٛيْيَمْ، ‹مٛودِبّٛ، مٛودِبّٛ،› اَمَّا اٛنْ نغَطَتَا کٛ مبِيمِعٛنْ؟ 47نٜطّٛ فُو غَرْطٛ تٛ اَمْ نَنِ بٛلِيطٜ اَمْ وَطِ کٛ مبِيمِ، مِ حٛلَّيْعٛنْ کٛ اٛ نَنْدِ؞ 48اٜ مٛ نَنْدِ اٜ نٜطّٛ مَحٛووٛ وُرٛ غَسُطٛ لٜيْدِ لُغُّطُمْ حَا اٛ حٜوْتِ تَفَارٜ، اٛ مَحِ وُرٛ دٛوْ مَيْرٜ؞ شَانغٛلْ حٜىٰوِ فَلْپِ فِيِ وُرٛ نغٛنْ، اَمَّا نغٛ دِمْبَاکِ، نغَمْ نغٛ مَحَامَ دٛوْ تَفَارٜ؞ 49اَمَّا نَنْطٛ بٛلِيطٜ اَمْ، ندٜنْ وَطَايِ کٛ مبِيمِ اٜ نَنْدِ اٜ نٜطّٛ مَحُطٛ وُرٛ دٛوْ نجَارٜىٰندِ؞ ندٜ شَانغٛلْ فَلْپِ فِيِنغٛ، طٛنْ اٜ طٛنْ نغٛ يَنِ نغٛ فُو!»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
لُکَ 6: fuv
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
© 2011, Bible League, All rights reserved.
