Jang 7

Yàng Jesu ơm tòm Jerusalem ngai pơjum sa Sàl Ing

1Tơnơ̆ mơ broă hơ̆, Yàng Jesu lòt làm jơh Galile. Kơnràñ ò bài lòt tòm Jude, tài bơh cau Juda jòi nàng tơnchơt Kơnràñ.

2 # Leb 23:34; Yalw 16:13. Bơta pơjum Sa Sàl Ing làng bol Juda dê neh mòr di. 3Behơ̆, ală oh mi Yàng Jesu đơs mơ Kơnràñ lah: “Lik lòt tĕ bơh do, tus tòm Jude nàng ală cau bơtê bi dê kung geh sền gŏ broă bi lơh. 4Bơh ò gơs cau lơi kòñ geh tiơng pơnro mơ lơh broă dô bă ndơp ndơr. Dilah bi lơh ală bơta hơ̆, gen yal loh tĕ să he dunnia in.” 5Bơh să tòm ală oh mi Kơnràñ dê kung ò dòn Kơnràñ. 6Yàng Jesu đơs mơ bol khai lah: “Tŭ tơngai Añ òhềt di, mơya tŭ tơngai bol mê neh gơs sùm rau. 7Dunnia ò rgơi gơjrañ kơuềng di bol mê, mơya gơjrañ kơuềng di Añ, tài bơh Añ lơh cơng dunnia in git lah ală broă bol khai dê la iơh bơsak. 8Bol mê guh tĕ pơjum tòm bơta pơjum sa hơ̆, ai Añ ò guh tềng hơ̆ bơh tŭ tơngai Añ òhềt tơl.” 9Neh sir Kơnràñ đơs, gen kư̆ ơm wơl tòm Galile.

10Mơya tòm tŭ oh mi Kơnràñ neh guh lòt pơjum tòm bơta pơjum sa rau, gen Kơnràñ kung guh sơl, mơya lòt dô bă ndơp ndơr, ò tơlik mat. 11Behơ̆ ală cau Juda jòi Kơnràñ tòm bơta pơjum sa mơ đơs lah: “Ntềng đah khai ơm taih?” 12Tòm mpồl làng bol gơs oă jơnau đơs òm bơh Kơnràñ. Cau ƀà đơs lah: “Hơ̆ la cau lơbơn niam.” Ai cau ƀà tai đơs lah: “Ò di. Khai la cau pơrlồm mpồl làng bol.” 13Mơya ò gơs cau lơi khin đơs loh làng bơh Kơnràñ tài bơh rngòt di cau Juda.

Yàng Jesu bơto sồr tòm hìu duh khoai

14Tòm gùl bơta pơjum sa, Yàng Jesu guh hơ hìu duh khoai mơ bơto sồr. 15Ală cau Juda ai lơh krơi mơ đơs lah: “Cau do òhềt bơtê, mbe rgơi git oă ngan taih?” 16Yàng Jesu ho lah: “Gùng jơnau song Añ bơto ò di bơh Añ, mơya bơh Bơtau neh sồr Añ lòt tus. 17Dilah cau lơi kòñ lơh jat nùs kòñ Kơnràñ dê, gen rơp git gùng jơnau song hơ̆ la bơh Yàng Tom Trồ hala bơh Añ đơs is Añ jê. 18Cau lơi đơs is jat nùs he, gen jòi jat bơta gơklŏ is he in, mơya cau lơi jòi jat bơta gơklŏ Bơtau neh sồr he lòt tus, gen la Cau song ngan, mơ tòm khai ò gơs bơta ma blac. 19Ò di Môise neh ai bơta boh lam bol mê in ò ơ? Mơya tòm bol mê ò gơs dô nă cau lơi prap gàr bơta boh lam hơ̆. Ñchi bơh tài bol mê jòi nàng tơnchơt Añ taih?” 20Mpồl làng bol ho lah: “Mê kòl cà lơh rau, ñcau jòi tơnchơt mê taih?” 21Yàng Jesu ho lah: “Añ neh lơh dô nơm broă mơ jơh ală bol mê ai lơh krơi. 22#Leb 12:3; Sơnròp 17:10.Môise neh ai bơta siat gơltau bol mê in, (bơta boh lam hơ̆ ò di bơh Môise, mơya bơh ồng pàng gơ dê), mơ bol mê siat gơltau cau klau in tòm ngai Saƀat. 23#Jang 5:9.Dilah cau klau kong siat gơltau tòm ngai Saƀat tồ ò tìs mơ bơta boh lam Môise dê, gen ñchi bơh tài bol mê gơjrañ di Añ, bơh Añ sơmbòi wil tơl dô nă cau tòm ngai Saƀat taih? 24Bañ cahrña jat đah bơdìh, mơya cahrña tĕ jat bơta di ngan.”

Jơnau pơnro tòm làng bol Juda bơh Yàng Jesu

25Gơs dô êt làng bol tòm Jerusalem đơs lah: “Hơ̆ ò di la cau mơ cau jòi nàng tơnchơt ơ? 26Ne, Khai ơm đơs khat gơboh, mơ cau ò đơs bơta lơi bơh Khai. Ngan sơl ală cau kwang neh git Khai ngan la Bơtau Krist ơ? 27Bulah behơ̆ bol he git cau do bơh lơi mơ tus, mơya tŭ Bơtau Krist tus gen ò gơs cau lơi git Kơnràñ bơh lơi mơ tus.”

28Tòm tŭ Yàng Jesu bơto tòm hìu duh khoai, gen đơs loh làng lah: “Bol mê git Añ mơ kung git Añ tus bơh lơi. Añ ò tus is Añ jê, mơya Bơtau neh sồr Añ lòt tus la song ngan mơ bol mê ò git Kơnràñ. 29Ai Añ gen git Kơnràñ, tài bơh Añ bơh Kơnràñ mơ tus, mơ Kơnràñ la Bơtau neh sồr Añ lòt tus.” 30Behơ̆ bol khai jòi bơta nàng kup Kơnràñ, mơya ò gơs cau lơi ai tê sơmbat di Kơnràñ, tài bơh jơ Kơnràñ òhềt tus. 31Mơya tòm làng bol gơs oă cau dòn Kơnràñ, mơ đơs lah: “Tŭ Bơtau Krist tus, rơp lơh oă tềl krơi rlau mơ cau do neh lơh sơl ơ?” 32Cau Pharisi kơno mpồl làng bol đơs òm ală bơta hơ̆ bơh Yàng Jesu, gen bol khai mơ ală cau gơnoar lam bồ ơn phan duh khoai sồr cau ling sền gàr lòt kup Kơnràñ.

33Behơ̆, Yàng Jesu đơs lah: “Añ gam ơm mơ bol mê dô êt jŏ tai; lồc behơ̆ Añ rê wơl hơ Bơtau neh sồr Añ lòt tus. 34Bol mê rơp jòi Añ mơya ò bàn, tiah Añ ơm bol mê ò rgơi lòt tus.” 35Behơ̆ ală cau Juda đơs bal lah: “Ntềng đah Khai rơp lòt mơ he jòi ò bàn taih? Khai rơp lòt tus hơ ală cau Juda nrah nring tòm ƀòn cau Grek mơ bơto làng bol Grek sơl ơ? 36Ñchi jơnau Khai kòñ đơs tòm tŭ đơs lah: ‘Bol mê rơp jòi Añ mơya ò bàn,’ mơ ‘tiah Añ ơm bol mê ò rgơi lòt tus’?”

37 # Leb 23:36. Ngai lồi dut, la ngai dờng màng tòm ală ngai pơjum sa, Yàng Jesu ntào, hòi dờng lah: “Dilah cau lơi tơhìr, tus tĕ hơ Añ mơ hùc. 38#Ejek 47:1; Sac 14:8.Cau lơi dòn Añ, gen ‘ală hiòng dà bơta kis rơp hòr lìu bơh tòm nùs khai dê,’ be Sră Goh neh đơs.” 39Kơnràñ đơs bơta hơ̆ la sơnio bơh Yàng Hwềng mơ ală cau dòn Kơnràñ rơp dòp geh; bơh Yàng Hwềng òhềt mù, tài bơh Yàng Jesu òhềt geh gơklŏ. 40Tòm tŭ mpồl làng bol kơno ală jơnau hơ̆, gơs cau ƀà đơs lah: “Cau do ngan la cau gơnoar hwơr.”#7:40 Sền jơnau cih kah tòm 1:21. 41Cau ƀà đơs: “Hơ̆ la Bơtau Krist.” Cau ƀà tai đơs: “Bơtau Krist ò di tus bơh Galile ò! 42#II Sam 7:12; Mice 5:1.Sră Goh neh đơs lah Bơtau Krist tus bơh jơi bơtiàn Dabit mơ bơh Betlehem, la ƀòn Dabit dê.” 43Behơ̆, tài bơh Kơnràñ mơ mpồl làng bol tòmcah is. 44Gơs ală cau ƀà tòm mpồl làng bol kòñ kup Kơnràñ, mơya ò gơs cau lơi ai tê sơmbat di Kơnràñ.

45Behơ̆ ală cau ling sền gàr hìu duh khoai rê wơl hơ ală cau gơnoar lam bồ ơn phan duh khoai mơ ală cau Pharisi. Ală cau do lùp mơ bol khai lah: “Ñchi bơh tài bol mê ò tề khai tus hơ do taih?” 46Ală cau ling ho lah: “Òhềt tŭ lơi gơs dô nă cau đơs be cau hơ̆!” 47Ală cau Pharisi đơs mơ bol khai lah: “Bol mê kung kòl pơrlồm sơl ơ? 48Gơs cau lơi tòm ală cau kwang hala tòm ală cau Pharisi neh dòn Khai sơl ơ? 49Ai mpồl làng bol do ò git bơta boh lam do, ngan pal kòl srat rma!” 50#Jang 3:1-2.Nikôđem la cau lài neh lòt tus hơ Yàng Jesu mơ la dô nă cau tòm mpồl hơ̆ đơs lah: 51“Bơta boh lam bol he dê cahrña cau lơi, dilah òhềt kơno jơnau khai yal mơ òhềt bàn broă khai neh lơh sơl ơ?” 52Bol khai ho lah: “Mê kung la cau Galile sơl? Mê sơwì tĕ nền, gen rơp git lah ò gơs cau gơnoar hwơr lơi lik bơh Galile ò.” [ 53Gen kòp nă cau hơ̆ rê wơl hơ hìu tòm he.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Jang 7: KPM2018

Highlight

ಶೇರ್

ಕಾಪಿ