Lukà 24
24
Yesù fɔ̃ so èku
(Màt 28.1-10; Mrk 16.1-8; Yòh 20.1-10)
1Lè kuasiɖa be ŋùkèkè cucugbã gbèa, lè ŋùdekɛ̃nyɛ fùtùa, nyɔ̃nùawo sɔ àmìsìsi huɛ̃ titi, kèwo wo jràɖo ɖɛa ɖo àsi, va èyɔ̀doa to. 2Vɔ̀a, wo kpɔ be wo mlì èkpea jo lè èyɔ̀doa nu#24.2 Lè Yudàviwo dea, wo kùnà èyɔ̀doa sìgbè èxɔ̀ mè nène, eye wo teŋu ɖona e mè. 3Wo ɖo e mè vɔ̀a, wo mu kpɔ Yesù be àmètia ò. 4Ekèa na be wo titɔ, eye woabe àyè gbãdo. Wàlɛbɛ ŋua ye wo kpɔ ŋusù èvè ɖewo lè àwù dàzòwo mè, va tɔtè lè woa gbɔ.
5Nyɔ̃nùawo vɔ̃, cɔ̃ ŋùmè ànyi. Vɔ̀a, ŋusùawo gblɔ̃ na wo be: “Nukɛ ŋuti ye mì le ji àmè kè lè àgbè a lè àmè kukuwo dòmè ɖo ò? 6Mu lè fikèa ò, e fɔ̃ so èku. Mì ɖoŋù ènyà kè be gblɔ̃ na mì, wàlɛbɛ kè be nɔ̀ Galilea! 7E gblɔ̃ be: 'Wo ɖo la do *Àgbètɔ be Èvia àsi na ènuvuɛ̃wɔ̀tɔwo, ne woa ka ɛ̀ ɖo àtisòga ŋuti, eye lè ŋùkèkè ètɔ̃gɔ̃a gbèa, Mawu la fɔ̃ ɛ̀ so èku.'”
8Nyɔ̃nùawo ɖo ŋùkuvi Yesù be ènyà kèa ji, 9eye, ekè wo trɔ so èyɔ̀doa toa, wo gblɔ̃ ènu kèawo keŋu na *nukplavi woeɖèkaawo kudo àmè kpɔ̀tɛawo keŋu. 10Nyɔ̃nùawo ye nyi: Mari, Magdalà tɔ̀a ku Joanà kudo Mari Yakobò be ènɔa gbàkudo nyɔ̃nù bu kèwo bɔ̀ ɖo woa ŋutiawo. 11Vɔ̀a, ènyà ŋuawo ɖì èdrũ toto be ènyà lè *àmèdɔ̃dɔ̃awo gbɔ, eye wo mu xɔ̀ nyɔ̃nùawo ji sè ò. 12Gãkea, Petrò sitè, pu dù yì èyɔ̀doa to. E ɖèkɔ̀ kpɔ e mè, vɔ̀a, àmèɖìvɔa#24.12 Àmèɖìvɔ: èyɔ̀vɔ; àvɔ kè wo sɔ trɔdo ŋutilã kukua. kpò ye be kpɔ. Ènu kè jɔ̀a, kpaca ɛ̀, eye e trɔ yì àxomè.
Yesù ɖè ye ɖokoe fiɔ lè Emaus-mɔ ji
(Mrk 16.12-13)
13Gbè ŋua gbè tututua, Yesù be *nukplavi èvè zɔ̃ èmɔ le yì kɔpe ɖe kè wo yɔna be Emaus-a mè, eye e lè sìgbè kpeti woèvè nène lè Yèruzàlɛm gbɔ. 14Wo le kã àseŋu so ènu kèwo keŋu jɔ̀ va yìawo ŋuti. 15Wàlɛbɛ kè wo le kã àseŋu, eye wo le bù ènu kèawo ŋuti kpɔa, Yesù ŋutɔ va gogo wo, zɔ̃ kudo wo le yì. 16Wo kpɔ ɛ̀ gãke wo mu jèsi ì ò. 17Eye e gblɔ̃ na wo be: “Àseŋu kɛwo ŋùmè ye mì le kã lè mìa nɔ̀nɔwo dòmè, kè mì le zɔ̃a ò?” Eye wo tɔtè, ɖɔ ku ŋuzĩzĩ. 18Woa dòmètɔ ɖèka kè wo yɔna be Kleopas-a, ɖo e ŋuti na ɛ̀ be: “Wò ɖèka kpò ye nyi àmèjro lè Yèruzàlɛm kè mu sè ènu kèwo jɔ̀ lè funu lè àzã kèawo jia òa?” 19Yesù biɔ wo be: “Ènyà kɛ ye jɔ̀ ò?” Wo gblɔ̃ na ɛ̀ be: “Ènu kè jɔ̀ ɖo Yesù Nazarɛttɔ̀a jia. Àmè kèa nyi Mawu be gblɔ̃ɖɛtɔ sɛ̃ŋu ɖe. E wɔ̀ ŋùdãdɔ gãwo, pò nupo ku ŋusɛ̃ lè Mawu ku àgbètɔwo be ŋùmè. 20Vɔ̀a, miabe * mawunɔ gãwo ku èdùmèmègãwo ɖè e do àsi eye wo gblehùɛ do è, ka ɛ̀ ɖo àtisòga ŋuti. 21Miawo ya, mi lè kpɔ èmɔ be e ye la hlùɛ̃ Izràɛl be dùkɔ̃a gã, vɔ̀a, ŋùkèkè ètɔ̃ sɔ̃ŋu ye nyi ekèa kè ènu kèawo jɔ̀. Vɔ̀a, wu ekèawo kpataa, 22nyɔ̃nù ɖewo kèwo lè mia dòmèawo, va gblɔ̃ ènyà wɔ̀ ŋùdã ɖe na mi. Wo yì èyɔ̀doa to ŋùdekɛ̃nyɛ fùtù, 23eye, ekè wo mu kpɔ yebe àmètia òa, wo va gblɔ̃ na mi be yèwo kpɔ Mawu be àtikplɔtɔwo, eye wo gblɔ̃ na yèwo be e lè àgbè. 24Mia dòmètɔ ɖewo cã yì èyɔ̀doa to, eye wo kpɔ ènuawo pɛpɛpɛ sìgbè àlekè nyɔ̃nùawo gblɔ̃ ɛ̀a nène. Vɔ̀a, àmè ɖe mu kpɔ ye ŋutɔ ò.” 25Yesù gblɔ̃ na wo be: “Mìa sùkunɔ̀, susu mà le ènu kaba tɔwo! Nukɛ ŋuti ye mì mu xɔ̀ ènu kèwo keŋu Mawu be gblɔ̃ɖɛtɔwo gblɔ̃ ɖɛawo ji sè ò? 26Mì mu nya be e jè be Mɛ̀siaa bèa ɖù àyà kèawo gbɔ̀xue bèa ɖo yebe gogo mè òa?” 27Eye Yesù ɖè ènu kèwo kù ɖo e ŋuti lè Ŋɔ̀ŋlɔ̃awo kpata mèa gɔ̃mè na wo, so ekèwo Mosè ŋlɔ̀awo ji kaka va ɖo Mawu be gblɔ̃ɖɛtɔwo tɔ̀awo ji.
28Kè wo gogo kɔpe kè mè wo le yìa, Yesù wɔ̀ sìgbè àmè kè la to woa ŋuti yì ŋùkɔ̀a nène. 29Vɔ̀a, wo zĩ e ji, gblɔ̃ na ɛ̀ be: “Nɔ̀ ku mi, ɖo fìɛ̃si#24.29 Fìɛ̃si: èzã be cɔ̃cɔ̃; èzã be dodo mè lɔ̀ge; wètrɔ mè. ɖo vɔ̀, eye xixea mè cã le cɔ̃.” Eye e yì woabe àxomè ne bèa ci woa gbɔ. 30Kè wo le ɖù ènua, Yesù sɔ kpɔ̃nɔ, do àkpe ɖo e ta, kã ɛ̀, sɔ na wo. 31Gà ŋua mè ye woabe ŋùkuviwo hũ zè ɖèka, eye wo kpɔ Yesù jèsi, vɔ̀a, e bu lè woa gbɔ. 32Wo gblɔ̃ na woa nɔ̀nɔwo be: “Miabe èjì mu ɖɔ ku jìjɔɛ, wàlɛbɛ kè be le pò nupo na mi lè èmɔa ji, le ɖè Ŋɔ̀ŋlɔ̃awo gɔ̃mè na mia òa?”
33Eye wo so jè èmɔ, trɔ yì Yèruzàlɛm. Wo kpɔ nukplavi woeɖèkaawo ku àmè kèwo bɔ̀ ɖo woa ŋutiawo, 34eye wo gblɔ̃ na wo be: “Tɔhonɔ̀ fɔ̃ nyàwo eye, e ɖè ye ɖokoe fiɔ Simɔ̀n!” 35Àmè èvèawo cã gblɔ̃ ènu kèwo jɔ̀ lè èmɔa jiawo, ku àlekè wo kpɔ Yesù jèsi wàlɛbɛ kè be le kã kpɔ̃nɔa ɖoa na wo.
Yesù ɖè ye ɖokoe fiɔ nukplavi woeɖèkaawo
(Màt 28.16-20; Mrk 16.14-18; Yòh 20.19-23; Dɔw 1.6-8)
36Wàlɛbɛ kè wo lè gblɔ̃ ènyà kèawoa, Yesù ŋutɔ to ɖo woa dòmè, gblɔ̃ na wo be: “Fàfa ne nɔ̀ mìa ji.” 37Àdìka sò wo, eye vɔ̃vɔ̃ jè woa ji. Wo bù be ŋùãlì ye, yèwo lè kpɔ. 38Vɔ̀a, Yesù biɔ wo be: “Nukɛ ŋuti ye mì titɔ ɖo ò? Nukɛ ŋuti ye mì le do àɖìkà ɖo ò? 39Mì kpɔ àlɔ̀ nyèwo kudo àfɔ̀ nyèwo ɖa, ne mìa jèsi ì be ènyè ŋutɔ ye. Mì tɔ àsi mù kpɔ ne mìa nya, ɖo ŋùãlì mu ɖona ŋutilã kudo èpu sìgbè àlekè mì kpɔ mù ɖoa nène ò.” 40Kè be gblɔ̃ ènyà kèawoa, e sɔ yebe àlɔ̀ kudo yebe àfɔ̀wo fiɔ wo. 41Vɔ̀a, ekè ènyàa wɔ̀ ŋùdã na wo, eye èjì le jɔ̀ wo ŋutia, wo mu xɔ̀ ɛ̀ sè ò. Yesù biɔ wo be: “Ènuɖùɖu ɖe lè mìa si lè fikèa?” 42Wo sɔ èlãvi mème kãkã na ɛ̀, 43eye be xɔ̀ ɛ̀ ɖù lè woabe ŋùmè. 44Yesù gblɔ̃ na wo be: “Ènyà kèawo tututu ye mù gblɔ̃ na mì wàlɛbɛ kè mù nɔ̀ mìa dòmèa be: e jè be ènu kèwo keŋu wo ŋlɔ̀ so ŋuti nyè lè Mosè be xoma ku Mawu be gblɔ̃ɖɛtɔwo be xomawo kudo Salmɔ̀wo mèawo ne zɔ̃ sù.” 45Eye, e hũ woabe susu mè ne woa ŋɔjè ŋɔ̀ŋlɔ̃awo mè. 46E gblɔ̃ be: “Wo ŋlɔ̀ ɖɛ be Mɛ̀siaa la ɖù àyà eye e la fɔ̃ so àmèkukuwo dòmè lè ŋùkèkè ètɔ̃gɔ̃a gbè, 47eye wo la do àŋɛ̀a lè yebe nyikɔ mè na dùkɔ̃wo keŋu ne woa ɖɔ̀lì èdɛ̃, àleke be Mawu bèa sɔ woabe ènuvuɛ̃wo kè wo. Wo la tɔ àŋɛ̀a dodo so Yèruzàlɛm. 48Mìawo ye nyi ɖàsèfowo na ènu kèawo. 49Eye kpɔɖa, mù la sɔ ènu kè Ètɔ nyè fìãa, ɖoɖa mì. Mìawo yaa, mì nɔ̀ Yèruzàlɛm be èdùa mè, kaka woa sɔ jiŋùkusi be ŋusɛ̃a do na mì.”
Yesù yì jiŋùkusi
(Mrk 16.19-20; Dɔw 1.9-11)
50Lè ekèa yomè a, Yesù kplɔ̀ yebe nukplaviawo yì Betanìa. E kɔ àlɔ̀ yì ji, tusì na wo lè funua. 51Wàlɛbɛ kè be le tusì na woa, e gble wo ɖɛ, eye wo kɔ ɛ̀ yì jiŋùkusi. 52Vɔ̀a, woawo ya jè *èɖɛ̀ na ɛ̀, trɔ yì Yèruzàlɛm ku jìjɔɛ gã ɖe. 53Wo nɔ̀nà mawuxɔa mè gà sia gà mè, kafuna Mawu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lukà 24: GEN
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Mina Bible © Bible Society of Togo, 2014.
