LUKA, 20
20
O LE MATAUPU XX.
O le faataoto i le tovine; o le taulaga ia Kaisara; o le toe tu o e ua oti.
1O le tasi o ia aso, a o a‘oa‘o ia i le nuu i le malumalu, ma folafola i le tala lelei, ua tutū mai ai ia te ia faitaulaga sili, ma tusiupu, ma toeaina. 2Ona latou fai mai lea ia te ia, ua faapea mai, Fai mai ia ia te i matou, se a le pule e te fai ai na mea; po o ai foi na ia avatu ia te oe lenei pule? 3Ua tali atu ia, ua faapea atu ia te i latou, Ou te fesili atu foi ia te outou se upu e tasi; tou te fai mai ai ia te au. 4Mai le lagi ea le papatisoga a Ioane, pe mai tagata? 5Ona latou felafolafoai lea, ua faapea ane, Afai tatou te fai atu, Mai le lagi; ona fai mai ai lea o ia, Se a foi le mea tou te lei talitonu ai ia te ia? 6A tatou fai atu. Mai tagata; ona fetogi mai ai lea o le nuu uma ia te i tatou i maa; auā o la latou le taofi, o Ioane o le perofeta ia. 7Ona latou tali mai lea. Matou te le iloa pe maifea. 8Ona fetalai atu lea o Iesu ia te i latou, Ou te le ta‘u atu foi ia te outou le pule ou te fai ai nei mea.
9Ona fetalai atu lea o ia i lenei faataoto i le nuu, Na fai e le tasi tagata le tovine, ua tuu atu ai i e galulue i vine, ona alu malaga lea o ia i le nuu ese ua fāi po. 10Ua fai le fuata, ona auina atu lea e ia o le auauna i e galulue i vine, ia latou au mai ia te ia ni fua o le tovine; a o e galulue i vine ua latou sasaina o ia, ma aufuaina mai o ia. 11Ua toe auina atu e ia le tasi auauna; ua latou sasa ma agaleaga ia te ia, ona latou aufuaina mai lea o ia. 12Ua toe auina atu e ia lona toatolu, ua latou fasia o ia ua manua, ma latou tuliesea. 13Ona fai ane ai lea o le alii e ona le tovine, Se a se mea ou te faia? Ou te auina atu lo‘u atalii pele; atonu latou te ava mai ia te ia, pe a iloa mai o ia. 14A ua iloa atu o ia e tagata galulue i vine, ona latou fetautalatala‘i ai lea, ua faapea ane, O le suli lena; o mai ia, ina tatou fasioti ia te ia, e maua ai le fanua mo i tatou. 15Ua latou tuli ia te ia i tua o le tovine, ma latou fasiotia. Se a foi le mea e faia ia te i latou e le alii e ona le tovine? 16E alu atu ia ma faauma ia tagata galulue i vine, e tuu atu foi le tovine i nisi tagata. Ua latou faalogo atu, ona latou fai mai lea, Aua ne‘i faapea. 17Ona silasila lea o ia ia te i latou, ua faapea atu, Se a foi lenei upu ua tusia. O le maa na lafoaiina e tufuga fai fale, ua avea lea ma maa tulimanu aupitoaluga? 18O sē paū i luga o lea maa, e gaugau ai o ia; a o se tasi e paū ifo i ai le maa, e nutipalaina ai o ia. 19Ua fia pue ia te ia le au faitaulaga sili ma le au tusiupu i lea lava itu aso; a ua latou matatau i le nuu, auā ua latou iloa ua faatu e ia lena faataoto ia te i latou.
20Ua latou lamalama ma aauina atu nisi e vaavaai ia te ia, ua latou faataga amiotonu, ina ia latou maua ai sana upu e tuu atu ai ia te ia i le lima ma le pule a le alii. 21Ua latou fesili mai ia te ia, ua faapea mai. Le a‘oa‘o e, ua matou iloa ua e tautala ma a‘oa‘o mai ma le tonu, e le faailogaina e oe se tagata, a ua e a‘oa‘o i le ala o le Atua ma le faamaoni. 22Pe sa ea ona matou avatu le taulaga ia Kaisara, pe leai? 23A ua silafia e ia la latou togafiti, ona fetalai atu ai lea o ia ia te i latou. Se a le mea tou te tofotofo mai ai ia te au? 24Faaali mai ia ia te au se tenari. O ai ea e ona le faatagata ma le tusi e i ai? Ua latou fai mai ia te ia, E o Kaisara. 25Ona fetalai atu lea o ia ia te i latou, O mea a Kaisara ia outou avatu ia Kaisara; a o mea a le Atua avatu ia i le Atua. 26Latou te le mafaia lava ona maua o ana upu i luma o le nuu; ua latou ofo i lana tali, ua latou faalologo ai.
27Ua o mai ia te ia isi o le au satukaio o e taofi e leai se toe tu; ua latou fesili mai ia te ia, 28ua faapea mai, Le a‘oa‘o e, ua tusi mai Mose ia te i matou, pe afai e oti le uso o le tasi tagata ua fai lana avā, a ua oti ia e leai sana fanau, ia fai avā lona uso i le fafine, ina ia tupu ai se gafa o lona uso. 29Ia, e toafitu le au uso; na fai avā le ulumatua, ua oti e leai sana fanau. 30Ona fai avā lea i le fafine o le aupito ane i ai, ua oti foi o ia e leai sana fanau. 31Ua fai avā foi i ai lona toatolu, ua faapea foi ua oo i lona toafitu, ua latou oti ua leai ni a latou fanau. 32A e muliai oti foi le fafine. 33A oo foi i le toe tu, o ai so latou e ana le avā? auā na fai avā ai le toafitu. 34Ona tali atu lea o Iesu, ua faapea atu ia te i latou, O tagata o le olaga nei, ua fai avā ma nofo tane i latou; 35a o e ta‘uaogaina ia maua e i latou lea olaga, ma le toe tu mai o e ua oti, latou te le fai avā, pe nofo tane; 36e le mafai foi ona toe oti o i latou; auā ua latou tutusa ma agelu; o fanau foi i latou a le Atua, o tagata o le toe tu. 37A o le faatuina o e ua oti, ua faailoa mai lea mea e Mose i le laau talatala i lona ta‘ua o le Alii o le Atua o Aperaamo, o le Atua foi o Isaako, o le Atua foi o Iakopo. 38E le o le Atua ia o e ua oti, a o e ola; auā ua ola uma ia te ia. 39Ona tali mai ai lea isi o le au tusiupu, ua faapea mai, Le a‘oa‘o e, ua tonu lau upu. 40E mulimuli ane latou te lei toe faamalosi ona fesili mai ia te ia se mea e tasi.
41Ona fetalai atu lea o ia ia te i latou, Pe faapefea ona fai mai tagata, o le Keriso o le Atalii ia o Tavita? 42A ua fai mai e Tavita lava i le tusi o salāmo, Na fetalai atu le Alii i lo‘u Alii, Ina nofo ia oe i lo‘u itu taumatau, 43seia ou faia e ua fai oe mo latou fili ma mea e tu ai ou vae. 44O lenei, ua ta‘ua o ia e Tavita o lona Alii, pe faapefea ona fai mona atalii? 45Ona fetalai atu lea o ia i ona soo, a o faalogo mai le nuu uma, 46Ia outou i le au tusiupu e ua fia evaeva ma ofu tatapuvae, ua manao foi ia alofagia i latou i malae, ma nofoa sili i sunako, ma mea sili e taooto ai i faigaai; 47o e faauma fale o fafine ua oti a latou tane, ua faalevaleva foi a latou tatalo e fai ma ufiufi; e atili ai ona faasalaina o i latou.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKA, 20: SOV
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
