Khuurakikha 9
9
Wele akhola Indakaano ni Nowa
1 #
Rak 1.28
Nga bino byaweele, kila Umukasya awa Nowa ni basooleli beewe tsikhabi nga aloma ari, “Ni musaalane, mubalaahe, mwitsule khu shibala shoosi. 2Bisolo byoosi bye khu shibala ni binywiinywi byoosi, ni bibyalaamila aasi byoosi, atweela ni tsinyeeni tseene, kane bibaryaatsake inywe babaandu. Bino byoosi ise naabireere aasi eenywe. 3Buli shitweela khu biindu bino byoosi, naabibaweele khuuba she khuulya, khuutubaasa khu bilime byoosi bye mu shibala, khuuba biilyo byeenywe.
4 #
Lev 7.26-27; 17.10-14; 19.26; Maka 12.16,23; 15.23 “Buulamu buli mu mafuki, nashiryo mukhalya inyama nga ishiilimwo kamafuki ta. 5Siinga ibawo umuundu umalawo buulamu bw'owashe, uwiirire uyo kane aweebwe shitaambiso. Ni isolo yoosi ikane imalewo buulamu bw'omuundu, inyene iyo kane injiwe shitaambiso. 6#Luky 20.13; Rak 1.26Umuundu yeesi ukane akhoonye umuundu washeewe, naye aakha khukhwiiribwa n'umuundu ukuundi, lwekhuuba buli muundu yeesi aabuumbibwa mu shifwaani sha Wele.
7 #
Rak 1.28
“Ne ingana iwe usaale babaana baakali, ni nabo basaalane luukali babalaahe, babalaahe khu shibala shoosi.”
8Lwanyuma Wele waalomela Nowa atweela ni basooleli beewe ari, 9“Shaleelo shino, indikhuukhola indakaano yase ni nawe, naluundi indi khuukikhola ni babetsukhulu boowo boosi babaliilawo lwanyuma lwoowo. 10Indakaano yino iyililamwo ni biilamu byoosi bibiili atweela ni nawe, nga nibyo binywiinywi byoosi, ni bibyaayo, ni tsisolo tse mwirome tsoosi, bisolo byoosi bibyarura khukhwaama mwikhoŋolo ni nawe. 11Ari ni biilomo bino, indikhuukhola indakaano yase ni nawe, nga iloma iri: Siilibawo luundi kameetsi kakaaliitsa khu shibala kahese biilamu luundi ta, namwe ndi silibawo luundi kameetsi khuuhesa shibala ta.”
12Indi luundi Wele waaloma ari, “Indikhuurawo khaabonelo khe ndakaano isi ise ndi khuukhola ni nawe, atweela ni biilamu byoosi bibiili ni nawe, khulwe kimiboolo kikiitsa mu moni: 13Indikhuurawo luufutu lwase mu namufweeli. Luufutu luno kane lubatsake khaabonelo khe ndakaano akari aase ni shibala. 14Buli lweesi kane indeeratsakile namufweeli khu shibala, ni luufutu lwaabonekha mu namufweeli uyo, 15ise kane ishebulilatsake indakaano yase akari aase ni nanywe, atweela ni biilamu bya buli saambo yoosi. Kameetsi sikaliilayo keetsule luundi khuuhesa biilamu byoosi ta. 16Buli lweesi kane luufutu lubonekhatsakile mu namufweeli, ikhaalulolatsakekho ishebulile indakaano ikhaliwawo ta akari aase, ni biilamu byoosi bibiili khu shibala.”
17Kila Wele alomela Nowa ari, “Khano khali khaabonelo khe ndakaano isi ise ikholile akari aase ni bibiindu biilamu byoosi bibiili khu shibala.”
Nowa ni basooleli beewe
18Basooleli ba Nowa babaarura khukhwaama mwikhoŋolo baaba nibo Shemu, Hamu, ni Yafesi. (Lwanyuma Hamu niye uwaba paapa wa Kanani.) 19Bano nibo babaaba basooleli bataru ba Nowa, babaasaala lisaaye lye babaandu khu shibala shoosi.
20Nowa aaba umusaani umulimi, niye uwanyoowela ilala khuubyaala kumukuunda kwe kimizabibu. 21Shifukhu shitweela aanywa iviini, waameela waakona mu lisari lyeewe nga ali bukhuna busa. 22Ne Hamu, uwaba paapa wa Kanaani ni enjila mu lisari, waabona paapawe bukhuna, weelayo ibulafu waaboolela babandaaye baabili. 23Ne Shemu ni Yafesi baayila ingubo, baatsya nga baakiwaambiile inyuma khu mabeka khwaabwe. Baakyeenda baatsya mu lisari nga batsiila kumukoongo, baabiimba paapa waabwe, nga baakhubonakho buukhuna bweewe ta.
24Ne Nowa n'asisimukha nga bumeesi bwaamuweelekho, naluundi nga waamanyile sheesi umusooleli weewe umukyeekhe Hamu aamukhola, 25waaloma ari,
“Ari indi khuutsuba Kanaani!
Niye kane abatsake umukulwa uwe aasi mu bakulwa,
abatsake umukulwa uwe babandaaye.”
26Weelayo waaloma luundi ari,
“Inoomba Umukasya Wele wase awe Shemu tsikhabi
ne akhole Kanaani ekyele umukulwa weewe.
27Naluundi inoomba ndi khali Wele abalaayisile liiswa lya Yafesi naabi,
akila babetsukhulu ba Yafesi bamenya mu shisiintsa sha Shemu,
akhola Kanaani khuuba umukulwa waabwe.”
28Lwanyuma lwe kameetsi, Nowa aawangala woolesa kimiiko bitoondo bitaru ni kamakhumi karaano (350). 29Kimiiko kyeewe kyoosi atweela olesa kimiiko bitoondo syeenda ni kamakhumi karaano (950), lwanyuma lwayo waafwa.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Khuurakikha 9: LPE
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.