Génesis 15
15
Tios tuny käjpxytyu'unën mëët yë Abram
1Ënät yë Tios ojts tmëkäjpxy yë Abram kuma'ayjoty ets t'ënëmaay:
Këtii mtsë'ëkë Abram, jä'ä ko ëjts mijts nkuwäämpy. Yë mkuma'ayën mëj y'ita'any.
2-3Tääts yë Abram y'ëtsooy:
Wintsën, ¿Tiijës nyajwa'anëty mëti'ipës xytyukkumayaanpën, mijts wa'ats xynyijawë ko ka'apës u'unk ëna'k nmëëtëty? Ka'apës yë u'unk maay nitu'uk të xytyukmëkënu'kxës, tu'kë'ëyë kuma'ayën mëti'ipës nmëët'ajtypyën yë'ë jyä'ä'atäampy yë Eliézer mëti'ipë jam Damaskë ijtpën, tu'uk yë ntuunpës.
4Ënät yë Wintsën y'ëtsooy:
Yë mkuma'ayën yë'ë jyä'ä'atäämpy yë mkë'ëm'u'unk, ka'ap wyiinkja'ayëty.
5Ënät ojts yë Wintsën yë Abram tyajnëjkxy ëpëky ets t'ënëmaay:
Ëk'ix yë mëtsa'a tsajpjotmëpë, ëkmëtyow pën y'ëkjëkyejpy xymyëtyoowëty. Timjëtu'un myäy'ata'any yë m'u'unk m'ok jëtu'un ijxtëm yë mëtsa'a myäyëtyën.
6Abram ojts tmëpëky yë Wintsën. E paaty ojts kyupëkyë ets yajnajxë wa'ats. 7Jëtu'un y'ënëmaayë:
Ëjts jëtu'un Wintsën. Ëjts mijts të nyajpëtsëmy Ur, ma nyaaxjotmën yë Caldeo ja'ayëty ets ya'atë naax kam mijts ntukkumayä'äny.
8Ets Abram y'ëtsooy. E Wintsën ¿wi'ixës jëjp'ixy nmëët'atëty, koos xytyukkumayä'äny ya'atë naax kam?
9Tä yë Tios y'ënëmaayë:
Yajmin tu'uk yë tsajpkaa ayääkë to'oxypyë, tu'uk yë tsajppax ets tu'uk yë kupixyny yä'äy yä'k'apetypë, mëti'ipë tëkëëkëty yë jyëmëjtën; näjyëtu'un xyajminëty tu'uk yë muuxy ets tu'uk yë kuuk.
10Abram ojts tyajmiinta'ay tääpë jëyujk ma Tiosën. Këëkujkmjaty ojts tsujkwä'kxy ets tpëjktäky wiinkuwopëty. E yë joonëty ka'ap ojts tsujkwä'kxy. 11Ja majkwejkxy jëtu'un tjanty nyikä'äk tjantykyukä'äktë ja jëyujk'ooky, ja Abram jä'ä y'ëtsë'këp ënätyë. 12Ko ojts kyootsënë, ënät yë Abram yë mëk ma'ayë myajtsë. Ajotkumonë ojts t'ixy, ko yë kootsajtën të nya'ëwtijta'ayë. Ënät ojts mëk tsyë'ëkë. 13Tääts ja Wintsën y'ënëmaayë:
Mnijawëp ko yë m'u'unk m'ok jëkäm jyuuky'ata'antë wiink naax wiink kajpn. Jam yajtëytyuna'antë ets ëxëëk jyata'antë. Majktaxk mëko'px jëmëjt yajtëytyuna'antë. 14E ëjts ntëytyunäämpyës näjyëtu'un mëti'ipë ënäty ëxëëk tuunëtëpën ja m'u'unk m'ok. Jëtu'un ja m'u'unk m'ok y'ëwaatsëpëtsëmtëty ets jatëkok jyotmëkta'aktëty. 15Mëti'ipë mijts mpatëpën, yë'ë ko m'ooka'any oy yajxon ko mëjja'ayënëty, jëtu'un tyu'ukmuka'any yë m'anëmë mëët yë m'ap m'ok yë y'anëmë. 16Koonëm ënäty të myintë naaxwiiny ja m'u'unk m'ëna'k, taxk'oknipety täänëm jatëkok wyimpitëty ma ya'atë it naaxwiinyëtën. Jä'ä ko ka'anëm ënäty kyukëxënëm ma ja Amor ja'ayëty ja ëxëëkpë tuntën tkajpxtën.
17Ko ënäty të tsyu'ujënë ets koots kyëxë'knë. Ënät ojts t'ixy tu'uk tsijtk, jëënjok jap pëtsëëmp. Ets tu'uk t'ijxy yë jëënyä'änk, jam nyäxy ma ja jëyujk ookyën. 18Jä'ä xëëw ojts ja Tios tuny tu'uk ja käjpxytyu'unën mëët yë Abram, ets t'ënëmaay:
Ya'atë naax kam yë'ëjës nmo'ojäämpy yë m'u'unk m'ok. Jampaatës nmo'oja'any ma ja nëë'aawën Egiptëpë ets jampaat ma ja Éufrates mëjnëë'aawën. 19Yë'ë mëti'ipë nyaax'ajtëpën yë Quenehe ja'ayëty ets Catmón ja'ayëty. 20Näyjyëtu'un ma y'itën yë Hit ja'ayëty, Ferez ja'ayëty, Refa ja'ayëty, 21Amor ja'ayëty, Canaán ja'ayëty, gergeseos ja'ayëty ets Jebús ja'ayëty.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Génesis 15: QUETZMIXE
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process