Génesis 11
11
Ja mëjpotsy mëti'ipë xyëëwajtypyën Babel
1Ko jyeky'äjty tu'ukyë ijty ja aaw ayuk mëti'ipë ja naaxwiinyëtë ja'ay kyajpxtëpën. 2Ko ja ja'ayëty tsyo'ontë jamtsow ma ja xëëw pyëtsimyën, ënät ojts tpaatë tu'uk ja joy'it jam ma ja it naaxwiinyëtë txëëwatyën Sinar. Tä jam tsyënaaytyaknpëjktë. 3Tu'kxëëw tu'kjëmëjt ojts tkäjpxy'atë: Tsojk nyajkojëm yë muutsy ets jëënjoty nyajkë'ëwmëty. Muutsy kyë'ëw ojts tyajtuntë ijxtëm jeexyë tsaajën ets tukpojtstë yë mo'onts. 4Ënät nyäy'ënanëtë: Mintë, tsojk nyajkojëm tu'uk yë kajpn ets nyajpëtë'kmëty tu'uk yë potsy mëti'ipë ja'tëpën tsajpwinm. Jëtu'un nyajjëkyajpmëty mëj'äämpy yaa naaxwiiny. Ka'ap nëjkx xity ko'oy n'ijtëmë.
5Ënät ojts ja Wintsën tniku'ijxnaxy ja naax kajpn ets ja mëjpotsy mëti'ipë ënäty ja naaxwiinyëtë ja'ay ëka'any kyojtso'ontaktëpën. 6Tääts myääy tyäjy: Yë naax kajpn tu'ukyë nyäyaj'itëtë ets tu'ukyë yë aaw ayuk mëti'ipë kyajpxtëpën. Paaty të tyajtso'onta'aktë ya'atë tuunk. Tyam nitii jotmay tkamëët'atë ets t'ëxmatstëty mëti'ipë tëë tnipëjktaakëtën. 7Nikë tim oy'atëp yowë ko yë y'ayukëty ntimyajnäyjyo'pëmëty, këtiipë nyäjyä'äkyukëtëty yë'ëjëty.
8Jëtu'un'äämpy ojts yë Tios tyajye'eywya'kxta'ay ja ja'ay naaxwiinyëtë apëtsëmy ets ojts t'ëxmajtsnëtë ja kajpn mëti'ipë ënäty të tkojtsoontën. 9Ma tääpë ja it naaxwiinyëtën ojts ja Tios tyajtëkajtsta'ay ja aaw ayuk mëti'ipë ënäty ja ja'ay naaxwiinyëtë apëtsëmy kyajpxtëpën ets ye'eywya'kxtaaytyë. E paatykyëjxm ojts tampë ja kajpn xyëëpety Babel.
Ja y'u'unk y'ok ja Sem
10Ya'atë y'u'unk'ajt yë Sem. Ko myäjtsk jëmëjtpejty ma ënäty ja komtuu të nyäxyën, ko ënäty ja Sem mëko'px yë jyëmëjt ënät ojts ja y'u'unk myääy myëxu'unk'atë mëti'ipë xyëëwmooytyën Arfaxad. 11Ko yë Sem y'u'unk myääyëty myëxu'unk'ajtë, jä'ä ojts jyaakjuuky'äty mëkoxk mëko'px jëmëjt ets ojts tmëët'atë y'u'unkëty ye'etyëjkpë to'oxytyëjkpë.
12Arfaxad jä'ä ënäty yë jyëmëjt i'px majkmokx, ko ojts yë y'u'unk myëxu'unk'aty mëti'ipë xyëëwajtypyën Sélah. 13Ko ojts ja y'u'unk y'ëkmiiny naaxwiiny mëti'ipë xyëëwajtypyën Sélah, yë Arfaxad jä'ä ojts jyaakjuuky'äty taxk mëko'px ja tëkëëk jëmëjt ets ojts jyaak mëxu'unk'atë y'u'unkëty ye'etyëjkpë to'oxytyëjkpë.
14Sélah jä'ä ënäty yë jyëmëjt i'px majk ko myëxu'unk'ajty ëka'any ja y'u'unkëty mëti'ipë xyëëwmooytyën Éber. 15Ko ja y'u'unkëty jëtu'un y'ëkmëxu'unk'ajty yë Sélah, jä'ä ojts jyaakjuuky'äty taxk mëko'px ja tëkëëk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.
16Yë Éber jä'ä ënäty yë jyëmëjt i'px majkmajkts ko myëxu'unk'ajty yë y'u'unk mëti'ipë xyëëwajtypyën Péleg. 17Ko jëtu'un y'ëkmëxu'unk'ajty yë Péleg, yë Éber jä'ä ojts jyaakjuuky'äty taxk mëko'px ja i'px majk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.
18Péleg jä'ä ënäty yë jyëmëjt i'px majk ko myëxu'unk'ajty y'u'unkëty, mëti'ipë xyëëwmooytyë Reu. 19Ko yë Reu jëtu'un y'ëkmiiny naaxwiiny yë Péleg jä'ä ojts jyaakjuuky'äty mäjtsk mëko'px ja taxtujk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.
20Reu jä'ä ënäty yë jyëmëjt i'px majkmäjtsk ko myëxu'unk'ajty ja y'u'unk, mëti'ipë xyëëwmooytyën Serug. 21Ko yë Serug jëtu'un y'ëkmëxu'unk'ajty yë Reu jä'ä ojts jyaakjuuky'äty mäjtsk mëko'px ja wëxtujk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.
22Serug jä'ä ënäty yë jyëmëjt i'px majk ko myëxu'unk'ajty yë y'u'unk mëti'ipë xyëëwmooytyën Nahor. 23Ko yë Nahor jëtu'un y'ëkmëxu'unk'ajty, yë Serug jä'ä ojts jyaakjuuky'äty mäjtsk mëko'px jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.
24Nahor jä'ä ënäty yë jyëmëjt i'pxtaxtujk ko myëxu'unk'ajty yë y'u'unk mëti'ipë xyëëwmooytyën Taré. 25Ko yë Taré jëtu'un y'ëkmëxu'unk'ajty yë Nahor jä'ä ojts jyaakjuuky'äty mëko'px ja majkmokx majktaxk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.
26Taré jä'ä ënäty yë jyëmëjnë tëkë'px majk ko myëxu'unk'ajtë yë y'u'unkëty mëti'ipë xyëëwmooytyën Abram, Nahor ets Harán.
Ja y'u'unk y'ok ja Taré
27Ya'atë jëtu'un ja y'u'unk y'ok yë Taré mëti'ipë tyeety'ajtën yë Abram, Nahor ets Harán. Harán, yë tyeety yë Lot, 28jam ojts y'ooky Ur, ma ja Caldeo ja'ayëty ja nyaaxjotmën. Ka'anëm ënäty yë tyeety Taré y'ookynyëm ko ojts yë'ë y'ooky. Jam y'o'ky ma myiinyën naaxwiiny.
29Abram yë'ë ojts mëët pyiky tu'uk yë to'oxytyëjk mëti'ipë xyëëwajtypyën Sarai. E yë Nahor yë'ë ojts mëët pyiky ja to'oxytyëjk mëti'ipë xyëëwajtypyën Milcá, yë'ë nyëëx yë Harán, yë'ë y'uty yë Iscá. 30Sarai ka'ap ijty tjëkyäp y'u'unk'ixëty, jä'ä ko jëtu'un ënäty jyä'äy'äty.
31Taré ojts jam tsyo'onë Ur ma ja Caldeo ja'ayëty ja nyaaxjotmën ets ojts nyijkxy ma ja it naaxwiinyëtë txëëwatyën Canaán. Ojts twoownëjkxy ja y'u'unk mëti'ipë xyëëwajtypyën Abram ets ja y'ok'u'unk mëti'ipë xyëëwajtypyën Lot ets ja tsyë'ë Sarai. E ko jya'ajtë ma ja kajpn txëëwatyën Harán, jam ojts wyë'ëmtë tsënääpyë. 32Ets Taré jam ojts y'o'knë Harán, jä'ä ënäty yë jyëmëjt mäjtsk mëko'px ja mëkoxk ko y'o'ky.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Génesis 11: QUETZMIXE
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process