LUK 23
23
I Baelat mo vevegi Jisas
1Ira Kansel doluegi ram maraga ko ram lai Jisas vano lawe Baelat. 2Ram tauvuigi ram taweie vena, “Gau haqe na tangaloi ngaha huri u keli na nomai sinobu, mo tugorora ve ran mese voli na nora takis lawe na muei ratahigi ta Rom ko mo veve huri ve ingeie sibona i Kraes, a ratahigi.”
3I Baelat mo huie vena, “?Wa iniko a Ratahigi nora a duvi Israel?”
I Jisas mo duvi vena, “Iniko gom veve.”
4Mo rovo i Baelat mo veve lawera muei rugurugu meire sinobu vena, “Nahe haqe na gineu tea ve nain vevegi vagamate na tangaloi ngaha.”
5Nge ingere ram veve siaga mo vagevage vena, “Gina nona leo nge u huhui na sinobu tau ingere rain vui qalogi. Nge u teuvuigi lolo vanue Kalili ko ngaha mo vomai tangaha.”
I Jisas mo labe lo nagoi Herot
6Lune i Baelat mo rongo na leora, mo hui vena, “?Wa a ngaha ta Kalili?” 7Lune mo iloe ve i Jisas ingeie dena mahoi venue ngehi i Herot mo leogoro, i Baelat mo horae vano lobei Herot, huri ingeie vage a Jerusalem lo taro hi. 8I Herot mo rong garea lune mo lehi Jisas, huri ingeie u rongo na rorona ko u tarani huri ve vin lehe te tuei beno. Nge u lado tare ve vin lehi na gigilegi i Jisas vin veie. 9Siu i Herot mo hui Jisas gena leo u sao, nge i Jisas he duvi na leona tea gatagale. 10Ira muei rugurugu ko ira huhui talo Leo Hora noi Mosis ram dige vano ko ram tawei Jisas gena leo u sao. 11I Herot ko ira nona tangaloi vuro ram vagi sovugi Jisas ko ram leoleo hivo ginie. Ram luqegi Jisas gena luqe garea ko i Herot mo horae vano taligu lawe Baelat. 12Lo rani hi i Herot ko i Baelat rom voragi buluana; huri tomue ingere ru bulu esi.
Ram vevegi Jisas huri mate
13I Baelat mo ware bubuginire muei rugurugu, ira tomtomuegi, ko ira sinobu, 14ko mo veve lawera vena, “Gimiu neu lei na tangaloi ngaha vomai laweau ko neu veve huri ve ingeie u keli na sinobu. Nge nau veilehe tangaha lolo nagomiu, ko nahe haqe na gineu esi tea ngerehi nem taweie ginie. 15Bataha i Herot vage he haqe na gineu esi tea lune, huri ingeie u horae vomai taligu lawe gide. A tangaloi ngaha he vai na gineu esi tea ve vin mate. 16Giniehi, nain telie, siu nam sireginie.” 17Lo vataha hinaga huri Halegagaliu i Baelat vin siregi na tangaloi vauveu gatagale lawera sinobu.
18A sinobu doluegi ram waregi siaga vena, “Gon wehe! Gon siregi Barabas lawe gamai!” 19(I Barabas u toga lolo valei vauveu huri a sinobu lavasigi rau qalo mei kavman a Jerusalem, ko huri u wehi na tangaloi.)
20I Baelat mo tarani vena siregi Jisas, siu mo veve siaga lawera sinobu taligu. 21Nge ingere ram waregi lawea vena, “Toto vehavehaginie! Toto vehavehaginie!”
22I Baelat mo veve vagatoligi vena, “?Huri hava gineu? ?U vei na hava gineu esi? Na he haqe na gineu tea u veie u tatarise ve vin mate. Nain telie, siu nam sireginie.”
23Nge ingere ram waregi siaga den tomue tau mo eno tamwere hi vena toto vehavehagi Jisas, mo dadari lune mo eno lo nora leo. 24Siu i Baelat mo vevegi Jisas mwerehi rau tarani. 25Ingeie u siregi Barabas hi rau taranie, ngehi u toga lolo valei vauveu huri u qalo mei kavman ko u wehi na tangaloi, ko mo siregi Jisas ve vin mate mwere ram tarani.
Ram toto vehavehagi Jisas lo gai saroutu
26Ira soldia ram lai vohogi Jisas. Lune ram vano, ram haqe na tangaloi gatagale a henana i Saemon, dena vanue Saerini, mo vomai dena labute sulo togagi venue. Ram wiri bibi, ram tau na gai saroutu lune ko rau veie mo walie lo tagui Jisas.
27A sinobu sao ram huri Jisas. Lolo livugara a vavine lavasigi ram ngara ko ram tangi hurie. 28Nge i Jisas mo tudori hurire mo veve vena, “Ra vavine ta Jerusalem! Nen mese ngara hurieu, nge nen ngara huri gimiu sibomiu ko huri rere netumiu. 29Huri a taro vin vomai a sinobu rain veve vena, ‘Havuhevu meire vavine hi rahe bavabava lai tea, ko meire hi a matavono, ko meire hi rahe bete te huhu lawe na maresu!” 30Lo tarogi hi a sinobu rain veve lawe na vusi lalawua, ‘Nen soi sulumei!’ ko lawe na vusi wuwerigi, ‘Nen vunigi gamai!’ 31?Huri tare ve ram vai na gineu mwere ngaha lune a gai mo qaro, rain vei na hava gineu lune vin koru?”
32Rau lei na tangaloi gairue vage, ingere a tangaloi galegaleasi, ve rain vei vagamatera mei Jisas. 33Lune ram vomai sulo ute u waregi ve “A Tanoi Vurugi Qetu”, ram toto vehavehagi Jisas lo gai saroutu aiehi, ko a tangaloi galegaleasi gairue hi, gatagale mo dule lo matuana, tuegi lo mawirine. 34I Jisas mo veve vena, “Mama, gon ladovohogi na bugure, huri na hava gineu ram vaie rahe ilo tea.”
Ingere ram tuli na tais ve rain leo haqe ve ran wahegi na luqana lawe hine. 35A sinobu ram labe kakarani ram matagi goroe, ko ira tomtomueginire duvi Israel ram sovue, ram veve vena “Nge u vagamwasoire wagineu, nge na vagamwasoie sibona, tare ve ingeie i Kraes, i leowahe noi God!”
36Ira soldia vage ram sovue. Ram vomai lobena ko ram bete na waen gogona lawea, 37ram veve vena, “Gon vagamwasoigo sibomu, tare ve iniko i Ratahigi nora a duvi Israel!”
38Ram tau lo ului qatune na revereve vena, “Nge ngaha i Ratahigi nora a duvi Israel.”
39A tangaloi galegaleasi tuegi mo dule aie mo veve asiesiginie vena, “?Iniko hate Kraes? Gon vagamwasoigo sibomu ko igamaru vage!”
40Nge tuegi mo surie mo veve vena, “?Wa go he matagu tea gi God? Huri gide doluegi dam gagarasi lo vavai leo vevegi leo vevegi gatagale. 41Gideru dorom gagarasi u vovohoi, huri durum lai na gaitawe huri na hava gineu duru veie. Nge ingeie he vai na gineu esi tea.” 42Ko mo veve lawe Jisas vena, “Jisas, goin lado haqeau, lune goin vomai lo tanoi ratahigi!”
43I Jisas mo veve lawea vena, “A hogo, nam veve lawego vena: gaqarigi goin toga meieu a Baradais.”
A mateana noi Jisas
44Lo matainaho tu vovohoi a aho mo qenu ko a dodo mo tango goro na vanue doluegi mo dadari lo aho gaitolu, 45ko a turegi huri mataivale lo Sara Gogona mo madadare. 46Siu i Jisas mo ware gena dilo siaga vena, “Mama! Nam sakatagi na tamateku lo limemu!” Mo veve ngaha ko mo mabusurigi.
47I leogoro soldia vudolue mo leo a hava gineu rau vei, ko mo waregareagi God, mo veve vena, “A hogo, ingeie a tangaloi u vovohoi.”
48Lune a sinobu ngerehi rau sone bubugi aie ve rain matagi goro ram lehi na hava gineu u rovo vomai, ingere doluegi ram mule sulo tanora, ram tutu na mabure gina hahagavi. 49Ira buluana noi Jisas meire vavine hi rau hurie dena vanue Kalili ram labe vagahao ve rain lehi na gineu ngerehi.
Ram tau Jisas lolo malangai mateana
50-51A tangaloi gatagale a henana i Josev, dena togagi venue ta Judia u waregi Arimatia. Ingeie a tangaloi u garea ko u vovohoi, ko mo toga rarai na mwasoana garaqa God mo ratahigi lolona. Ingeie a meba talo Kansel, nge ingeie he masinge tea mena nora leo ko a lalakogi. 52Mo vano lobei Baelat ko mo navuhie huri na betui Jisas. 53Mo rovo mo lai suri na betune, mo luqesie gina gavu mavute, ko mo mabue lolo malangai mateana u tei durue lolo vatu, ngehi rahe tau na tangaloi te lolona tau. 54Lo Rani vai vagatai, ko a rani mangaana mo kakarani vena tauvuigi.
55A vavine ngerehi rau huri Jisas dena vanue Kalili rau vano mei Josev ko ram lehi na malanga ve rau teu na betui Jisas wuraha. 56Mo rovo ram mule sulo tanora ko ram vai rarai na gineu buhoru ko a vurei bonbon huri na betune.
Lo rani mangaana ram manga, mwerehi a Leo hora u veve.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUK 23: HNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific, 2013
