JON 5
5
I Jisas mo vagamwasoi na tangaloi segesege lolo horoi wei Betsaita
1Lo tagugi ngaha, i Jisas mo hage a Jerusalem huri na Hinagai Halehagaliu. 2A Jerusalem a horoi wei mo eno kakarani lobei Matai Arai Sibsib, rau vutu na vale mo labe goro na horoi wei hi; a malumelu vale hi gailime; lo leo ta Hibru mo waregi na ute ngehi ve Betsaita. 3A buri sinobu lawua ram eno lo vavai malumelui vale hi, ngerehi ram sege, a matara rau dodo, ngerehi rau luku, ko ngerehi a beture rau mate. Ingere ram rarai na wai vena gilu, 4vevenagi gesegi a engsel nona Huqe mo hivo lolo horoi wei mo gilugi na wai. A tangaloi gatagale vin hivo lolo wai lo tagugi hi a wai u gilu vin maso dena hava segeana doluegi hi ram vaie. 5A tangaloi gatagale aiehi nge u sege a higaogi ngavulu gaitolu domwagi gaiwelu. 6I Jisas mo lehe mo eno aiehi, ko mo ilo huri ve a tangaloi hi u sege a tarogi u tuei lawuagi; siu nge mo veve lawea vena, “Wa iniko gom tarani ve gon mwaso?”
7A tangaloi hi mo sege mo duvi vena, “Huqe, hate tangaloi buluieu ve na taueu lolo horoi wei tavohe hi a wai mo gilu; lo taro hi ineu nam vaileo ve nan hivo lolona, a tangaloi wagineu u hivo lolona beno tomue denieu.”
8I Jisas mo veve lawea vena, “Gon maraga, gon wali na niemu, ko gon dige.” 9Siserigi a tangaloi hi u mwaso; nge mo wali na niana ko mo tavuigi mo dige. A rani hi u vei na gineu ngaha lune a Rani Mangaana. 10Siu ira lawua nora duvi Israel ram veve lawe na tangaloi hi u mwaso vena, “He garea tea ve goin weli na niemu lo Rani Mangaana, huri a leohora u gatogoro” 11Ingeie mo duvi lawera vena, “A tangaloi hi u vagamwasoieu u veve laweau vena ‘Gon wali na niemu ko gon dige.’ ” 12Ingere ram huie vena, “Ihine hi u veve lawego ve gon wali na niemu, gon dige.’ ” 13Nge a tangaloi hi u mwaso he iloe tea huri ve ingeie ihine, huri Jisas u siregi na ute hi beno, a vevenagi huri a buri sinobu rau sao ingere aiehi.
14Lo tagugi hi, i Jisas mo haqea lolo Sara Gogona ko mo veve lawea vena, “Leo, gom mwaso taligu. Gon mese galegaleasi taligu, sige hatie a gineu esi liu vin vanai lumu.” 15Mo rovo, a tangaloi hi mo mwalue ko mo veve lawera lawua nora duvi Israel vena, “I Jisas hi ne u vagamwasoieu.” 16A vevenagi ngaha ira lawua nora duvi Israel ram tauvuigi ram vaivei Jisas, huri nge u vagamwasoi lo rani mangaana.
17Siu i Jisas mo duvi lawera vena, “I Tamaku mo tabana tuqaravu, ko ineu vage nam tabana.” 18A leo ngaha mo vaire tangaloi lawua lolo duvi Israel ram tarani garagaragi ve rain wehi Jisas; hate huri ve nge u vei utuhi na Leo hora huri na rani mangaana hogosie, nge huri u veve ve i God i Tamana sibona vage, lo matahala mwerehi ingeie mo vaie sibona vena tatarise mei God.
I Jisas u lei na tanoi lawua huri ingeie i Netui God
19Siu i Jisas mo duvi lawera vena: “A hogo, a hogo, nam veve lawe gimiu vena, i Netui he vai lei na gineu tea lo domine sibona; nge mo vai na gineu ngerehi hogosie mwere nge mo lehi Tamana mo vaire. A hava gineu hi i Mama mo vaie, i Netui vage mo vaie. 20Huri i Mama mo tabe i Netui ko mo haharagi na gineu doluegi lawea ingeie mo vaire sibona. Ko nge vin haharagi na gineu lawea rain lawua dena gineu ingere ngaha, ko igimiu nein awogi huri. 21Lo matahala mwerehi teu, ingere i Mama mo vai ragasire rau mate ko mo vagamwasoire, mwerehi vage i Netui mo vagamwasoi rahine hi mo tarani. 22Huri Mama he vevegi na tangaloi te gatagale. Ingeie u siregi na tanoi vevegi doluegi lawe Netune, 23huri ve a tangaloi doluegi rain ladomavagi i Netui mwere ram ladomavagi i Mama. Ihine he ladomavagi i Netui tea he ladomavagi i Mama tea ngehi u horae vanai.
24“A hogo, a hogo, nam veve lawe gimiu vena, hine mo rongo na noku leo, ko mo ladohogo lui hine hi u horau vanai, mo hakovi na mwasoana radu. Ingeie vin he veveginie tea, nge ingeie u liliu beno dena mateana sulo mwasoana. 25A hogo, a hogo, nam veve lawe gimiu vena, a taro vin vanai ko u vanai beno, tavohe hi ira tamate rain rongo na diloi Netui God, ko ngerehi ram rongoe rain mwaso. 26Huri mwere i Mama sibona ingeie a vuin mwasoana, mwerehi vage nge mo vai Netune mo voragi na vuin mwasoana. 27Ko nge u siregi na tanoi vevegi lawea huri ingeie i Netui Tangaloi. 28Igimiu nen mese awogi huri ngaha; huri a taro vin vanai tavohe hi irahine doluegi lolo qaru rain rongo na dilona, 29ko ingere rain mwelue dena qaruhire: ngerehi rau vei na tabana garea rain maraga sulo mwasoana, ko ngerehi rau vei na galegaleasi rain maraga sulo vevegi.
Ingere ram laqagi matamwasaragi huri Jisas
30“Ineu nain he vai na gineu tea lo noku huireana siboku; ineu nam vevegi lei hogosie mwere i Mama mo veve laweau, siu a noku vevegi u vovohoi, huri na he vaileo tea ve nan huri na noku taraniana, nge hogosie na taraniana noi hine hi u horau vanai. 31“Tare ve ineu nam laqagi na leo hurieu siboku, a noku leo hate hogo. 32Nge a tangaloi wagineu mo laqagi na leo hurieu, ko ineu nau rau ilo ve a hava gineu hi mo veve hurieu a hogo. 33Igimiu neu hora na nomiu tangaloi ram vano lobei Jon, ko ingeie u laqagi na hogo lawe gimiu. 34Na he veve tea ngaha huri ve nam tarani ve a tangaloi vin laqagi matamwasaragi hurieu; nge nam veve ngaha hogosie huri ve igimiu nein mwaso. 35I Jon u mwere na leleo; mo mui ko mo varavara, ko igimiu neu tarani ve nen havuhevu gina nona leleo lo mahogi qilodo. 36Nge a gineu wagineu mo laqagi hurieu u liu dena leo noi Jon u laqagi hurieu, ngehi a tabana ngerehi nam vaire, a tabana ngerehi i Mama u betera laweau ve nain veire, ram laqagi matamwasaragi hurieu ve i Mama u horau vonai igimiu nehe lehe tea sige nehe rongo na dilona tea. 37Ko i Mama u horau vanai, ingeie vage mo laqagi matamwasaragi hurieu. Igimiu ne he rongo na dilona tea vohogi, igimiu ne he lehi na tarabesine tea vohogi; 38ko igimiu ne he hakovi na nona leo tea lolo lolomiu, huri gimiu ne he ladohogo tea lui hine hi nge u horae vanai. 39Igimiu nem hikehike lo Reve reve Gogona huri nem lado huri ve nein haqe na mwasoana radu lolora. Ko a Reve reve Gogona ngaha nge tauhi mo ram laqagi na gineu hurieu! 40Tau igimiu ne he tarani tea ve nen vanai lobeku huri ve nein hakovi na mwasoana.
41“Ineu na he hikesi na roroa tea dena tangaloi. 42Nge ineu nam ilo gimiu; nam ilo ve a tabeana noi God he toga tea lo lolomiu. 43Ineu nau vanai lo henai Tamaku, nge igimiu ne he lai vurugegieu tea; tare ve a tangaloi wagineu vin vanai lo henana sibona, igimiu nein lai vurugeginie. 44?Igimiu nem tarani ve na roroa den vatavatahagi gimiu gagatalegi, nge igimiu ne he tarani tea ve nein hikesi na roroa mo vanai den God gatagale; tare ve u mwerehi, igimiu nein ladohogo lai wuraha? 45Igimiu nen mese lado ve ineu nain vevegi vovohoi, gimiu lawe Tamaku. Nem lado talui Mosis, nge i Mosis hi vin vevegi vohogi gimiu. 46Tare ve igimiu neu ladohogo lui Mosis, garea, gimiu nen ladohogogieu vage, huri ingeie u reve hurieu. 47?Nge tare ve gimiu ne he lado tea hogo lo nona revereve, gimiu nein ladohogo lo noku leo wuraha?”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JON 5: HNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific, 2013
