JON 20
20
A malangai mateana mo eno vurogi
1Lolo robongi siaga lo Sande, a muei rani talo wik, lune mo dodo mosigei, i Meri ta Makdala mo vano lo malanga mo leo ve a vatu u telulu beno dena malanga. 2Siu i Meri mo toa ko mo vanai lobei Saemon Bita tona rorongtagi tuegi i Jisas u tabea, ko mo veve lawera vena, “Ingere rau lei vohogi na Huqe dena malanga ko igide dahe ilo tea ve rau teue logo.” 3Siu i Bita ko a rorongtagi tuegi hi rom mwalue ko rom vano lo malanga. 4Ingere vugerue rom toa, nge a rorongtagi tuegi hi mo toa siaga liu den Bita ko mo dadari lo malanga tomue. 5Mo ate sulolona ko mo lehi na luqe mo eno, nge he ahu tea lolona. 6Siu i Saemon Bita mo vanai lo tagune ko mo ahu lolo malanga. Mo lehi na luqe mo eno aie 7ko a gaitalisi qetu rau viviginie dali na qatui Jisas, he eno tea mena luqe, nge u lulu buluteginie mo eno gahea lo tanona gahea. 8Mo rovo a rorongtagi tuegi hi u dadari lo malanga tomue, mo ahu vage lolona; mo leo ko mo ladohogo. 9(Huri ingere rohe ilo na Reve reve Gogona tea mosigei ngehi u veve ve ingeie vin maraga taligu dena mateana) 10Siu ra rorongtagi rom mule taligu sulo valera.
I Jisas mo serelue lawe Meri ta Makdala
11I Meri mo labe mo ngara varea dena lobei malanga. Lune mo ngara tau, mosigei, mo siuolo hivo ko mo leo sulolo malanga, 12ko mo lehi na engsel gairue, ru luqegi na luqe mavute, rom toga aiehi a betui Jisas u eno aie tomue, tuegi lo qatune, tuegi lo karune. 13Ingere ram huie vena, “?Vavine, gom ngara huri hava gineu?” I Meri mo duvi vena, “Rau lei vohogi na noku Huqe, ko na he iloe tea ve rau teue logo.” 14Lune i Meri mo veve mwere ngaha vunu, mo talele dori ko mo lehi Jisas mo labe aie; nge he iloe tea ve i Jisas. 15I Jisas mo huie vena, “?Vavine, gom ngara huri hava gineu? ?Ihine hi gom hikesie?” I Meri mo lado ve a tangaloi leogoro talu, siu mo veve lawea vena, “Tare ve iniko gu lei vohoginie, gon veve laweau ve gu teue logo, ko nain vano nain leie.” 16I Jisas mo veve lawea vena, “Meri!” I Meri mo talele dori vano vovohoie ko mo veve lawea lo leo ta Hibru vena, “!Raboni!” (lo noda leo ve “Huhui.”) 17I Jisas mo veve lawea vena, “Gon mese tango vano luku, huri na he hage tea mosigei lobei Mama. Nge gon vano lobei retueku ko gon veve lawera vena, ‘Nain hage taligu lobei Tamaku ko i Tamamiu, a noku God ko a nomiu God.”’ 18Siu Meri ta Makdala mo vano mo veve lawera rorongtagi ve u lehi na Huqe, ko u veve lawea mwere ngaha.
I Jisas mo serelue lawera nona rorongtagi
19A taro u liliu beno lo Sande hi lolo revirevi, ko ira rorongtagi rau goro siagagi na mataivale hi ram toga bubugi aie, huri rau mataguginire ira lawua nora duvi Israel. Siu i Jisas mo vanai ko mo labe lolo livugara, mo veve vena, “A tamwata lobemiu.” 20Ingeie mo haharagi na limana ko a mwarasana lawera. Lune a rorongtagi ram lehe ram rongarea.
21Siu i Jisas mo veve lawera taligu vena, “A tamwata lobemiu. Mwere i Mama u horau, siu ineu nam hora gimiu.” 22Lo tagugi hi u veve ngaha, nge mo mabuhegi sulure ko mo veve vena, “Nen lai na Vui Gogona. 23Lune nem ladovohogi na galegaleasi nora tangaloi, u ladovoho ginire beno; lune ne he ladovohogi na galegaleasi nora tangaloi tea, he ladovoho ginire tea.”
I Jisas ko i Tomas
24Nge i Tomas, ngehi gatagale denire rorongtagi (u waregi ve a Malava), nge hatie meire rorongtagi lune i Jisas u vanai. 25Siu ira rorongtagi lavasigi ram veve lawea vena, “Gamai gau lehi na Huqe.” I Tomas mo veve lawera vena, “Tare ve nahe lehi na matai duru tea lo limana, ko na he tau na bisuku tea lolo matai duru, ko na he tau na limeku tea lolo mwarasana, nain he ladohogo tea.”
26Lo tagui wik gatagale ira rorongtagi ram toga bubugi lolo vale taligu, ko i Tomas nge meire. Rau goro siagagi na mataivale, nge i Jisas mo vanai ko mo labe lolo livugara, mo veve vena, “A tamwata lobemiu.” 27Mo rovo nge mo veve lawe Tomas vena, “Gon tau na bisumu tangaha, ko gon lehi na limeku; ko gon horagi na limemu, ko gon taue lolo mwarasaku. Gon mese lado gairue, nge gon ladohogo!”
28I Tomas mo duvi lawea vena, “!Noku Huqe a noku God!”
29I Jisas mo veve lawea vena, “?Wa iniko gom ladohogo a vevenagi gom lehieu? Havuhevu mei rahine ram ladohogo nge ra he lehieu tea!”
A leo vagasigi
30I Jisas mo vai na managi wagineu u sao lo nagora rorongtagi rahe reve hivo tea lolo buk ngaha. 31U uli na gineu ingere ngaha huri ve nein ladohogo ve i Jisas nge i Kraes, i Netui God, ko huri ve gina ladohogo hi nein lei na mwasoana lo henana.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JON 20: HNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific, 2013
