JON 15
15
I Jisas a vaen hogo
1“Ineu a vaen hogo, ko i Tamaku ingeie a tangaloi rivurivu 2Ingeie mo tai utu vovohogi na rangagi doluegi luku ngerehi ra he wai tea, ko mo qero vurugegi na rangagi doluegi ngerehi ram wai, siu huri ve rain wei vin liu den tomue. 3Igimiu neu mwasara beno gina leo huhui hi nau laqagi lawe gimiu. 4Igimiu nen toga luku, ko ineu nain toga lumiu. Tare ve igimiu nein he toga tea luku, igimiu nein he wai mwasigi lei tea, u mwere na rangagi hi he wai mwasigi lei tea tare ve he bulu tea lo vuigi.
5“Ineu a vaen, igimiu a rangagi. Ihine tea mo toga luku, ko ineu nam toga lune, vin wei a mwasigi u sao; huri gimiu nein he vai lei na gineu tea ve ineu hate mei gimiu. 6Ihine hi he toga te luku vin tuli vohoginie, mwere na rangagi, ko vin koru. A rangagi ngerehi vin weli bubuginire ko vin tulire sulolo avi, ko rain gao vohogi. 7Tare ve igimiu nein toga luku, ko a noku leo vin toga lumiu, siu igimiu nein nevu huri na hava gineu tea nem tarani, siu igimiu nein leie. 8Tare ve igimiu nem wai mwasigi u sao ngehi mo haharagi ve igimiu ira noku rorongtagi ko ngehi mo lai na roroa lawe Tamate. 9Ineu nam tabe gimiu mwere i Mama mo tabeau; igimiu nen toga lolo noku tabetabe. 10Tare ve igimiu nem ronghuri na noku Leohora, igimiu nein toga lo noku tabetabe, mwerehi neu nau ronghuri na Leohora noi Tamaku ko nam toga lo nona tabetabe.
11“Ineu nau veve lawe gimiu ngaha huri ve a noku havuhevu vin toga lumiu, ko a nomiu havuhevu vin horo mangadi. 12A noku Leohora: ingeie ngaha, huri ve igimiu nen vui tabetabe gimiu, mwerehi neu nau tabe gimiu. 13“Ihine vin he haharagi lei na tabetabe tea vena liu denie hi vena siregi na mwasoana huri ira nona buluana. 14Ko igimiu ira noku buluana, tare ve nem vai na hava gineu hi nam veve lawe gimiu. 15Ineu nain he ware gimiu te ve a tangaloi tabanagi taligu, huri a tangaloi tabanagi he ilo tea ve a hava gineu hi a nona huqegi mo vai. Nge ineu nau ware gimiu gi buluana, huri neu nau veve na gineu doluegi lawe gimiu ngehi nau rongo dein Tamaku. 16Igimiu ne he leo waheau tea, nge ineu nau leo wahe gimiu, ko nau teu gimiu ve nein vano ko nein wei a mwasigi, ngehi vin eno vin tuei. Ko i Mama vin bete na hava gineu lawe gimiu hi nein nevu huri lo henaku. 17Ngaha a hava gineu hi nau hora gimiu: ve nein vui tabetabe gimiu.”
A tangaloi talo ure ram buluesi meire rorongtagi noi Jisas
18“Tare ve a tangaloi talo ure ram buluesi gimiu, igimiu nein ladobibi huri ve ingere rau buluesi meieu tomue den gimiu. 19Tare ve igimiu a tangaloi talo ure, a tangaloi talo ure rain bulu garea mei gimiu mwere ve a nora buluana. Nge neu nau leowahe gimiu dena ure ngaha, siu igimiu hatie tangaloi talo ure; a vevenagi ngaha a tangaloi talo ure ram buluesi mei gimiu. 20Nen ladobibi na leo nau veve lawe gimiu vena: ‘A tangaloi tabanagi he lawua liu na nona huqegi tea.’ Tare ve ingere rau veiveieu, ingere rain veivei gimiu vage; tare ve ingere rau ronghuri na noku leo, ingere rain ronghuri na nomiu leo vage. 21Nge ingere rain vei na gineu doluegi ngerehi lawe gimiu huri gimiu ira noku tangaloi; huri ingere ra he iloe tea u horau vanai. 22Tare ve ineu na he vanai tea vena laqa meire, a galegaleasi vin he toga lure tea; nge siserigi ngaha ingere rain he kalihegi lei na nora galegaleasi tea. 23Ihine tea mo buluesi meieu Tamaku vage. 24Ingeie nau vei na tabanagi u sao lolo livugara ngehi a tangaloi wagineu he vaie tea mwerehi mosigei ve mwere nahe vai na tabanagi ingere ngaha tea, a bugui galegaleasi vin he eno tea lure. Nge siseri ngaha ingere rau lehi mo hava gineu hi nau vei ko ingere ram buluesi mei gamaru vunu, ineu ko i tamaku ngaha ingere rau lehieu ko rau mei Tamaku. 25Nge a gineu doluegi rain eno mwerehi, huri ve vin vagahorongi na leo u reve lo nora Leo hora vena, ‘Ingere ram buluesi meieu vurogi.’
26“A Buluiana vin vanai, a Vui hi mo serelue na hogo huri God ko ingeie, mo vanai den Mama. Ineu nain horae dein Mama, ko ingeie vin laqagi matamwasaragi hurieu.
27Ko igimiu vage nein laqagi matamwasaragi hurieu, huri gimiu neu toga, meieu lo tauvuigi redu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JON 15: HNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific, 2013
