JON 13
13
I Jisas mo solo na karure nona rorongtagi
1Tomue siu a taroi Hinagai Halegagaliu. I Jisas u ilo huri ve a tarona mo vanai hurie ve vin mwalue dena ure ngaha ko vin vano lobei Mama. Gesegi ingeie u tabe na nona sibona u hi ram toga lolo ure, ko vin tabera vin dadari lo vagasigi.
2I Jisas mena nona rorongtagi ram toga lolo gaganie revirevi. I Vui esi u teu na ladolado beno lolo domi Judas Iskariot, i netui Saemon, ve vin rongo na leoi gai Jisas. 3I Jisas u ilo huri ve i Mama u bete na managi doluegi lawea; nge u ilo huri ve u vanai den God ko ve vin vano lobei God. 4Siu i Jisas mo maraga dena hinaga, mo tugu vohogi na luqana tuegi, ko mo taligi na gai mamangi lo tanoi wesine. 5Mo rovo mo didihi na wai sulolo laha ko mo tauvuigi mo solo na karure nona rorongtagi ko mo mangire gena gaimamangi ngehi u wesiginie. 6Ingeie mo vanai lobei Saemon Bita, ko i Bita mo veve lawea vena, “?Huqe, wa iniko goin solo na karuku vage?” 7I Jisas mo duvi vena, “Siserigi ngaha iniko go he ilo na hava gineu tea hi ineu nam vaie, nge goin iloe lo tagugi.” 8I Bita mo veve lawea vena, Hatie, iniko goin he solo na karuku tea vohogi.” I Jisas mo duvi lawea vena, “Tare ve nain he solo na karumu tea, iniko hatie noku rorongtagi taligu.” 9I Saemon Bita mo duvi vena, “Huqe, iniko gon mese solo na karuku hogosie, nge gon solo na limeku mena qatuku vage.” 10I Jisas mo veve vena: “Ihine u gagaru ingeie u mwasara beno, nge huri na karune hogosie. Igimiu doluegi neu mwasara, nge hatie ve igimiu doluegi” 11(Huri i Jisas u iloe beno huri ve ihine vin rongo na leoi gana; a vevenagi hi ingeie u veve vena, “Igimiu doluegi ne he mwasara tea.”)
12Lo tagugi i Jisas u solo na karure rovo, nge mo luqegi na luqana tuegi taligu ko mo toga taligu. Ingeie mo hui vena, “Wa igimiu nem ilo vurugegi na hava gineu hi nam bei veie lawe gimiu? 13Igimiu nem wareau gi Huhui ko a Huqe, siu u garea huri nem veve mwerehi, huri ineu hogo. 14Ineu a nomiu Huqe ko a nomiu Huhui, ko ineu nau solo na karumiu. Giniehi, mo eno lawe gimiu ve nein solo na karumiu vatahagi gimiu. 15Ineu nau teu na taikeru lawe gimiu, siu huri ve nein vei na hava gineu hi ineu nau vei lawe gimiu. 16A hogo, a hogo, nam veve lawe gimiu vena, a tangaloi tabana he lawua liu na nona ratahigi tea; a gaihora he lawua liu hine tea hi mo huqegi goroe, a tangaloi digegi leo he lawua tea dein hine hi mo horae gaihora he lawua liu na a tangaloi tea ngehi u horae. 17Siserigi ngaha igimiu nem ilo na hogo hi; tare ve igimiu nem huri lune igimiu nein hevuhevu vin liu!
18“Ineu na he laqagi tea huri gimiu doluegi; ineu nau ilo na tangaloi ngerehi neu nau leowahera. Nge ngaha vena vin vagahorongi na Reve reve Gogona ngehi mo veve vena, ‘A tangaloi hi u geni lo gaku hinaga u tudori mo tavului vuro meieu.’ 19Ineu nam veve lawe gimiu siserigi ngaha siu a gineu hi mo bei rovo vanai, huri ve lo tarogi vin rovo vanai gimiu nein ladohogo ve ‘Ineu hi toga.’ 20A hogo, a hogo, nam veve lawe gimiu vena, ihine tea mo lai vurugegi na tangaloi hi neu nam horae, mo lai vurugegieu vage; ko ihine mo lai vurugegieu, mo lai vurugeginie hi u horau vanai.”
I Jisas mo laqagi rarai na leoi gana?
21I Jisas u veve na leo ngaha vunu, a nona domiana mo vonosie, ko mo laqagi luae vena: “A hogo, a hogo, nam veve lawe gimiu vena, gatagale den gimiu vin rongo na leoi gaku.” 22A rorongtagi ram vui lehilehire, ram rongo samwegi huri ve ingeie mo veve huri hine.
23A rorongtagi gatagale aiehi, ngehi i Jisas u tabea, mo toga kakarani lobei Jisas. 24Giniehi, i Saemon Bita mo langlangamata vano lawea ko mo veve vena, “Gon huie ihine hi mo laqagi hurie.” 25Siu a rorongtagi hi mo olo vano lobei Jisas, ko mo huie vena, “?Huqe, ihine hi gom vevea?” 26I Jisas mo duvi vena, “Ineu nain diri na bereti lolo lahai hinaga ko nain betea lawe hine; ineie a tangaloi hi nam vevea.” Siu ingeie mo lai na bereti mo dirie, ko mo betea lawe Judas, i netui Saemon Iskariot. 27Siserigi i Judas mo lai na bereti hi, i Setan mo ahu sulolo lolona. I Jisas mo veve lawea vena, “Iniko gon siseri ve gon vai na gineu hi ve goin veie!” 28(Ngerehi rau toga lo tanoi gaganie ra he ilo tea huri na hava gineu i Jisas mo veve lawea mwerehi. 29A vevenagi i Judas mo leogoro na tangai homu, lavasigi ram lado huri ve i Jisas mo veve lawea ve na vano na voli na hava gineu hi ingere ram tarani huri na gaganie, sige ve na bete te gineu lawera mahoi tangaloi.) 30I Judas mo lai na bereti ko mo mwalue mo vano siserigi. Vohe hi mo bongi.
A Leohora garaqa
31Lo tagugi hi i Judas u vano beno, i Jisas mo veve vena: “Siserigi ngaha mo vai roroagi Netui Tangaloi ko mo vai roroagi God lune. 32Tare ve u vei roroagi God lune, u i God sibona vin vei roroagi Netui Tangaloi, ko ingeie vin veie vin siseri. 33Re netuku, ineu nain he toga tea mei gimiu ve vin qaravu. Igimiu nein hikesieu, nge ineu nam veve lawe gimiu siserigi ngaha mwerehi nau veve lawera duvi Israel beno vena, ‘Igimiu nein he vano lai tea lo ute hi neu nam vano aie.’ 34A Leo hora garaqa ineu nam bete lawe gimiu; igimiu nen vui tabetabe gimiu. Mwerehi ineu nau tabe gimiu, siu igimiu nein vui tabetabe gimiu. 35Tare ve igimiu nem vui tabetabe gimiu, mo rovo a tangaloi doluegi rain ilo huri ve igimiu ira noku rorongtagi.”
I Jisas mo veve rarai ve i Bita vin tahae
36I Saemon Bita mo huie vena, “?Huqe, iniko goin vano logo?” I Jisas mo duvi vena, “Lo ute hi ineu nain vano aie, iniko goin he hurieu lai tea siserigi ngaha, nge goin hurieu lo tagugi.” 37I Bita mo hui vena, “?Huqe, huri hava gineu ineu nain he huri laigo tea siserigi ngaha? Ineu nam rarai huri ve nain mate hurigo!” 38I Jisas mo duvi vena: “?Wa iniko gom rarai hogo huri ve goin mate hurieu? A hogo, a hogo, nam veve lawego vena, a toa vin he tarere te tau, nge iniko goin tahau vagatolu.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JON 13: HNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific, 2013
