JON 11
11
A mateana noi Lasarus
1A tangaloi gatagale a henana Lasarus, ngehi u toga lolo togagi venue Betani, mo sege. A Betani a togagi venue hi Meri tona tuana i Mata rom toga aie. 2(I Meri ngaha hi u lingi na vurei bonbon talo karui Huqe, ko mo mangire gina vulune; ngehi i haqei Lasarus hi mo sege.) 3I haqena gairue rom hora na leo lawe Jisas vena, “Huqe, a nomu buluana ngehi gu tabea mo sege.” 4I Jisas mo rongo na leora, mo veve vena, “I Lasarus vin he mate tea gena segeana ngaha; nge a segeana ngaha u rovo vanai ve vin vei roroagi God, ko ve i Netui God vin lei na roroa ginie.”
5I Jisas u tabe Mata tona tuana ko i Lasarus. 6Lune ingeie u rongo huri Lasarus mo sege, siu nge mo toga taligu bongi gairue vage. 7Siu, mo veve lawera rorongtagi vena, “Da vano taligu sulo vanue Judia.” 8A rorongtagi ram duvi lawea vena, “Huhui, ira lawua nora duvi Israel rau tarani ve rain bugurigo gina vatu nawahe ?Wa iniko gom tarani ve gon vano taligu aie?” 9I Jisas mo duvi vena: “?Wa beno hatie aoa hangavulu domwagi gairue lo rani gatagale? Siu tare ve a tangaloi mo dige lolo rani ingeie vin he taturegi tea, huri mo leo lai gena leleoi ure ngaha. 10Nge tare ve ingeie mo dige lolo bongi vin teturegi a vevenagi hatie nona leleo.” 11I Jisas mo veve ngaha, siu mo veve lo uli taligu vena, “A noda buluana i Lasarus mo maturu, nge ineu nain vano nain vagaradasie.” 12A rorongtagi ram duvi vena, “Huqe, tare ve nge mo maturu, vin garea taligu.” 13Nge i Jisas u ilo ve i Lasarus u mate; nge ingere ram lado huri ve ingeie u veve ve mo maturu vurugegi. 14Siu i Jisas mo veve vovohoi lawera vena, “I Lasarus u mate; 15nge nam rongarea a vevenagi igimiu huri ineu hatie lobena, siu huri igimiu nein ladohogo. Nge igide da vano lobena.” 16I Tomas (u waregi ve a Malava) mo veve lawera rorongtagi lavasigi vena, “Igide doluegi da vano vage huri ve dain mate bubugi meie!”
I Jisas a maraga taligu ko a mwasoana
17Lune i Jisas mo dadari, mo haqe a huri ve i Lasarus rau tuleginie rani gaivesi beno. 18A vanue Betani he vagahao tea dena Jerusalem bataha lategi kilomita gairue hogosie. 19Siu a tangaloi u sao a duvi Israel rau vanai lobei Mata tona Meri ve ran vai mesuriginire huri na mateana noi haqera.
20Lune i Mata mo rongo huri ve i Jisas mo vanai, ko ingeie mo maraga mo vano vena lehe; nge i Meri mo toga lolo vale. 21I Mata mo veve lawe Jisas vena, “Huqe, ve iniko tangaloi, nase vai i haqeku vin he mate tea! 22Nge ineu nam ilo huri ve siserigi ngaha i God vin bete na hava gineu lawego hi goin nevu denie.” 23I Jisas mo veve lawea vena, “I haqemiru vin maraga sulo mwasoana taligu.” 24I Mata mo duvi lawea vena, “Ineu nam ilo huri ve ingeie vin maraga sulo mwasoana taligu lo Rani vagasigi.” 25I Jisas mo veve lawea vena: “Ineu a maraga taligu ko a mwasoana. Ihine tea mo ladohogogieu, tare ve u mate, ingeie vin maso; 26ko ihine tea mo mwaso ko mo ladohogogieu vin he mate lai tea ?Wa iniko gom ladohogo mwerehi?” 27Ingeie mo duvi vena, “Io, Huqe. Ineu nau ladohogo huri ve iniko I Kraes, i Netui God, ngehi ve vin vanai sulolo ure.”
I Jisas mo ngara
28Lune i Mata u laqa u rovo, mo vano taligu me mo ware beragi tuana Meri mo veve vena, “A Huhui nge tangaha, ingeie mo toga tangaha, mo taranigo.” 29Lune i Meri mo rongo na leo ngaha, mo maraga hage ko mo vano siseri vena lehe. 30(I Jisas he dadari te tau lolo togagi venue, nge mo toga tau lo ute hi Mata u lehe aie.) 31Ira duvi Israel ngerehi rau toga lolo vale mei Meri ko ram tangi meie, ram lehe mo maraga hage ko mo vano siseri. Siu ram hurie, ram lado huri ve mo vano sulo qaru, ve vin ngara aie.
32I Meri mo dadari aiehi Jisas mo toga mo lehe ko mo soi hivo lolo karune, mo veve vena, “Huqe, ve iniko hano, nase vai haqeku he mate tea!” 33I Jisas mo lehe mo ngara, ko ira duvi Israel rau vanai meie ram ngara vage; a nona domiana mo vonosie ko mo mabu horagi lolo lolona. 34I Jisas mo huire vena, “?Igimiu neu tuleginie logo?” Ingere ram duvi vena, “Huqe, gon vanai gom leo.” 35I Jisas mo ngara. 36Siu ira duvi Israel ram veve vena, “Nen leo ingeie u tabea garagara ginie!” 37Nge ingere lavasigi ram veve vena, “Ineie u vei na matai tangaloi matadodo rom leleo. ?Wa ingeie vin he tugoro lai Lasarus tea dena mateana?”
I Jisas u ragasi Lasarus mo mwaso taligu.
38Siu a domi Jisas mo vonosie taligu ko mo vano sulo qaru. Ngehi a malanga rau teu na vatu goro na matagi. 39I Jisas mo veve lawera vena, “Nen lai vohogi na vatu!” I Mata i haqei tangaloi hi u mate mo duvi vena, “Huqe, vin gehu esi. Gau tuleginie rani gaivesi beno!” 40I Jisas mo veve lawea vena, “?Wa ineu nahe veve tea lawego ve goin lehi na gineu roroa noi God tare ve gom ladohogogieu.” 41Siu ingere ram lai vohogi na vatu. I Jisas mo dada sueulu, mo veve vena: “Mama, nam vevegarea ginigo, huri iniko gu rong hurieu. 42Ineu nam ilo huri ve iniko gom rorongtagieu tamwere, nge ineu nam veve ngaha huri na sinobu ram labe dalieu ta ngaha, siu huri ve ingere rain ladohogo ve iniko gu horau vanai.” 43Lo tagugi hi u laqa u rovo, mo ware gena dilogi u lawua vena, “Lasarus, gon mwalue!” 44A tangaloi hi u mate mo mwalue, a limana mena karune rau vivire gena luqe, ko rau roroi na qatune gena luqe vage. I Jisas mo veve lawera vena, “Nen teri vohogi na luqe denie, nen sireginie na vano.”
Ram tau leo siaga huri vei rain vagamate Jisas
45Siu a tangaloi u sao a duvi Israel hi rau vanai ve rain siro Meri rau lehi na gineu hi Jisas u veie, ram ladohogo ginie.
46Nge lavasigi denire rau tudori vano lobera Varise ko ram veve lawera huri na hava gineu hi Jisas u vei. 47Siu ira muei rugurugu meire Varise ram ware bubugi na Kansel, ram veve vena: “?Igide dai vei wuraha? Huri a tangaloi ngaha mo vai na vaigivui u sao. 48Tare ve gide dain siregi lawua ve vin na gineu ingere ngaha tamwere, a tangaloi doluegi rain ladohogo ginie, ko ira lawua ta Rom rain vanai rain vei vohogi na noda valei Tataro, ko a sinobu venuada.” 49A tangaloi gatagale denire, a henana i Kaiavas, ngehi a muei rugurugu lo mahoi higao hi, mo veve lawera vena, “?Igimiu a dalo, nehe ilo na gineu tea! 50?Wa igimiu nehe leo hogosie tea ve a tangaloi gatagale vin mate huri na sinobu, u garea taligu denie hi ve vin vei vohogi na sinobu venue doluegi.” 51(Nge ingeie he veve na leo tea ngaha hurie sibona, nge huri ingeie a muei rugurugu lo mahoi higao hi, ingeie mo ligogi na leo ve i Jisas vin mate huri na sinobu a duvi Israel, 52ko hate huri na sinobu a duvi Israel hogosie, nge vage ve vin lei tabulutegi na sinobu noi sulo tarabesigi gatagale, ngerehi rau vano tereteregi lategi.) 53Siu lo rani hi ira lawua nora duvi Israel ram tau na leo ve rain wehi Jisas. 54Huri na gineu hi, i Jisas he dige te lategi lo ute lawua lolo vanue Judia, nge mo siregi na vanue hi, mo vano lo togagi venue gatagale, a henagi Evrem, mo eno kakarani mena vanue vurogi. Aiehi mo toga meire nona rorongtagi.
55A taro mo kakarani huri na Hinagai Halegagaliu nora duvi Israel. A sinobu u sao ram hage dena qatui venue ngerehi sulo togagi venue lawua Jerusalem, ve ran vai mwasaraginire sibora huri na taro i hinaga lawua hi. 56Ingere ram hikesi Jisas, siu lo taro hi ram labe lolo Sara Gogona, ram vui huihui ginire vena, “?Igimiu nem lado wuraha? Bataha ingeie vin vanai lolo gaganie, sige hatie?” 57Ira muei rugurugu meire Varise ram tau na leo ve ihine tea u ilo ve i Jisas mo toga logo vin veve sere, siu huri ve rain wiribibie.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JON 11: HNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific, 2013
