LALAKOGI 1
1
A muei leo
1Tueku Tiovilas.
Lo noku muei buk nau reve huri na gineu doluegi i Jisas u huhui ko u veire, u tevuigi lo mahogi hi i Jisas u tevuigi na nona tabanagi, 2mo dadari mo mule hage eulu. Tomue siu i God mobei leie hage taligu eulu u bete na leo huhui gina managi noi Vui Gogona lawe na tangaloi u leo wahera gi nona gai hora. 3Bongi ngavulu gaivesi lo tagugi nona mateana nge u serelue sibona vaga sao, mo mata-mwasaraginie hogo huri ve u mwaso taligu, ingere rau lehe, ko ingeie u laqagi lawera huri ve i God vin ratahigi gorora. 4Lune ingere ram vomai tabulutegi lobena, ingeie mo bete na Leo hora lawera vena. “Nei mese mwalue den Jerusalem, nei toga rarai na hogogi i Tamaku u warataugi huri ve vin betea lawe gimiu, ngehi nau laqagi lawe gimiu hurie. 5I Jon u garuhigogonagi gimiu gina wai, nge lo tagui bongi te gaivihe i God vin garuhigogonagi gimiu gina Vui Gogona.”
Jisas mo hage lo eulu
6Lune ira gaihora ram vonai lobei Jisas ram huie vena. “?Huqe, wa goin bete na tanoi ratahigi noi God taligu lawera duvi Israel siseri naha?”
7I Jisas mo veve lawera vena. “A tarogi ko a mahogi u vagatai beno gina managi noi Tamaku ko he eno tea lawe gimiu ve nei ilo ve rai veie tagaha. 8Nge igimiu nei horo gina managi lune a Vui Gogona vin himei lumiu, ko igimiu nei ngasagi na Roro Garea hurieu a Jerusalem, vin deli na vanue Judia ko Samaria ko vin deli na ure.”
9Lo tagugi hi u laqa u rovo, ingeie mo hage taligu eulu, lune ingere ram lehe a dodo mo vuniginie dena matara. 10Lune ingeie u sala dena matara beno, ko ingere ram leo garagara suhage lo dodo, a tangaloi gairue ru luqegi na gavu u mevute rom labe kakarani lobera. 11Rom veve vena, “Igimiu tangaloi ta Kalili. ?Huri havagineu gimiu nem labe nem dada hage sulo dodo? I Jisas ngehi i God mo laie hage taligu eulu, vin himei taligu lo matahala gatagale mwerehi neu lehe mo hage taligu lo eulu.”
Burigi nora gaihora
12Siu ira gai hora ram mule taligu a Jerusalem den vusi Oliv, a mahogi hi u kakarani a Jerusalem, lategi nava vudolue vagavesi. 13Ingere ram dadari Jerusalem ram hage lolo qetu utui vale namawe ngehi ram toga aie gesegi, i Bita, i Jon, i Jemis, koi i Andru, i Vilib koi i Tomas, i Batolomiu koi i Matiu, i Jemis natui Alvius, i Saemon, a tangaloi hi talo burigi hi ram tarani ve ran tuli vohogi na tangaloi ta Rom, koi i Judas netui Jemis. 14Ram sone vatusao ram tataro bubugi meire vavine koi Meri retahi Jisas koi retuei Jisas vage ram bubugi meire.
Gai wonoi Judas
15A bongi u sao goro beno, a tangaloi rau lado hogo gi Jisas, ram sonebubugi rau sao lategi vudolue vagatagale avigi ngavulu gairue doluegi, siu i Bita mo labe mo laqa lawera. 16Ingeie mo veve lawera vena. “Retueku, u tuei beno, a Vui Gogona u laqagi lo singoi Devet, u veve sere huri na lalakogi noi Judas, a tangaloi hi u tomuegi na sinobu a duvi Israel ram wiribibi Jisas. A leo hi u eno lune beno, huri a leo ingere hi lolo Baebol rai teu mwasigi. 17I Judas nge lo burigi gatagale mei gamai, i Jisas u leo wahea ve vin tabana bubugi mei gamai.”
18A tangaloi hi i Judas, u voli na mavusui tano gina homu u leie lo turegi he vovohoi tea hi u veie, ingeie u mate, a taqangine u tawaga a tinaena ram rurungudu. 19A sinobu doluegi hi ram toga Jerusalem ram rongo na rorogi, ko ram ware na tanogi hi lo nora leo sibora ve Akeldama, iloilogi huri ve a, “Tanoi Dei.”
20I Bita mo veve vena, “Huri u reve lo buk Sam ve,
A valena na buebueli
a tangaloi na mese toga lolona.”
U reve vage vena,
Ihine tea na lai na tanona huri na tabanagi.
21-22“Siu ihine tea vin bulu mei gamai huri vin ngasagi na maraga taligu noi Jisas a Huqe. Ingeie gatagale denire hi rau bubugi mei gamai lo tarogi i Jisas a Huqe u dige lategi mei gamai. Lo halagi tuegi vage a domianai leo hi u mwere ngaha vena. Ingeie gatagale denire hi rau huri gamai lo taro hi i Jon u garuhigogonagi Jisas, mo dadari lo rani hi i God mo lai vohoginie dei gide mo hage taligu eulu.”
23Siu ram leo wahe na tangaloi gairue, i Josev a henana tuegi Basabas, a henana vage i Jastas, ko a tangaloi tuegi vage a henana i Mateas. 24Siu ram tataro vena, “Huqe, iniko gu ilo na taqangi tangaloi. Huqe gon tisu wahe lawe gamai ve gatagale denire gairue ngaha gu leo wahera 25vena lai na tanoi tabanagi ngaha nora gai hora, ngehi Judas u sireginie tau mo huri na mawirigi mo sala radu.” 26Siu ingere ram vai na matarongo mo huqe lui Mateas. Siu ram tau Mateas, ram valu bubugi na henana meire gaihora hangavulu domwagi gatagale.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LALAKOGI 1: HNT
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
Bible Society of the South Pacific, 2013
