Luka 23

Yeesɔ ka tĩng Gɔmna Bilatu

(Mat 27:1-2, 11-14; Mar 15:1-5; Yɔh 18:28-38)

1Zang ɓɔɔ ri kpalɛ yuu, ri yupaa nandon, ri atɛ Yeesɔ ka bii Gɔmna Bilatu. 2Ri kãa gbalang ɓɔɔ ri kɔɔrɔ wu ruu ka yuu ɓiɓɛ nɛɛ, “Ruu ĩi zang keɓe nwãarɛ zang ɓuru, nɛɛ zang wu shù Kayisa kpanti tipi Rooma saka tipi kpang. Nɛɛ wukɔ ti Kirisi, nɛɛ wu doo kpanti kɔ.”

3A Bilatu hɛ̃ɛ wu nɛɛ, “Mɔkɔ kpanti zang Yahudi ya?” A Yeesɔ kasɛ wu nyaa tɔɔ, “Nn, naa ɓɔɔ mɔɔ kɔɔ ɓɛɛ.”

4A Bilatu kɔɔ zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang dɔɔli ɓɔɔ ri dũng ri ɓɛɛ, tɔɔ, “N zi vuu shi kpang ɓɔɔ yɔɔ keɓe palɛ ɓɛɛ kpang.”

5A ri yì wu tĩng ka bii nɛɛ, “Yɔɔ keɓe palɛ zang nɛɛ zang ri haa nyaa nɛɛ vuu ɓɔɔ wu tusu zang ɓɛɛ ka tipi Yahudi. Gaayu ka tipi Galili sasak, a nɔng ka nihn.”

Yeesɔ ka tĩng Hiridu

6Ɓɔɔ Bilatu tãa naa weɓe, hɛ̃ɛ zang nɛɛ Yeesɔ zang tipi Galili ya? 7A ɓɔɔ wu tãayi nɛɛ, Yeesɔ zang tipi Galili ɓɔɔ Hiridu roo kpanti kagn ɓɛɛ, a dɔ̃ wu ka bìí kpanti Hiridu ɓɔɔ bɛ̀ɛ́ ka Urushalima ka diki kaɓa ɓɛɛ. 8Ɓɔɔ Hiridu zi Yeesɔ hn, tãa tĩnang dɔɔli, ka ruu ɓɔɔ, tãa nyaa ɓiɓɛ tɔ. A kasɛ ka yeti ɓiɓɛ nɛɛ wu zi Yeesɔ katɔ, nɛɛ tɔ̀ɔ, wu zi vuu ɓɔɔ zang zirɛ zang mã naa ka danggn ɓɔɔ Yeesɔ palɛ ɓɛɛ. 9Ka ruu nɔngkɔ, hɛ̃ɛlɛ wu ruu sasak, a Yeesɔ kasɛ wu nyaa kpang. 10Rɛɛ zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang ɓɔɔ ri tusu zang labeenang Laa, ri shi paa ri kɔɔrɔ vuu shi kpang ɓɔɔ ri tɔɔ Yeesɔ palɛ kaa gbãng gbãng. 11A kpanti Hiridu nɛɛ zang sɔɔja ɓiɓɛ, ri palɛ wu vuu yusɛ̃ɛ, a ri kpaa wu. A ri hãa wu fɔ̃ɔrɔ ɓɔɔ kpanti ri hãlɛ ɓɛɛ ka bii. A kpanti Hiridu sɔɔrɔ wu ka bii kpanti Bilatu. 12Hiridu nɛɛ Bilatu ri gaayu wusang yinang ka diki keɓe. Bɛɛ ri shing jĩng nɛɛ zɔɔ kpang.

Bilatu kɔɔ nɛɛ zang nyɔ Yeesɔ vɔrɔ ta

(Mat 27:15-26; Mar 15:6-15; Yɔh 18:39—19:16)

13Bilatu ɓaa nyaa tɔkn ka zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang ɓɔɔ ri doo zang bang zang kɔ, nɛɛ rɛɛ zang ɓɔɔ kpalɛ zɔɔ ka nɔng ɓɛɛ. 14A kɔɔ ri nɛɛ, “Nɔɔ atɛ m yɔɔ keɓe, nɔɔ tɔɔ palɛ zang, nɛɛ zang haa nyaa. Ɓɔɔ n hɛ̃ɛlɛ wu ka tĩng manɛ, n ĩi wu nɛɛ vuu shi kpang ɓɔɔ nɔɔ kɔɔrɔ ka yuu ɓiɓɛ gbete kpang. 15Kpanti Hiridu ti ĩi wu nɛɛ mani kpang jong. Ka ruu nɔngkɔ, gbãa ruu yuu nɛɛ wu tɔkn. Vuu ɓɔɔ wu palɛ ɓɔɔ daa naa ɓɔɔ zang nyɔ wu vɔrɔ kagn kpang. 16Ka ruu nɔngkɔ, n nyɔ wu nɛɛ gbãa kɔ shɛ̃ɛning, n yaa wu naa.” 17[Diki nyaalaa Pasika nɛɛ a tɔ, Bilatu yàarɛ́ zang Yahudi zang gbete naa ka teteng zang ɓɔɔ zang mã ka sãa ɓɛɛ.]

18Ri goo nyaa ka lapa dɔ̃ɔ, gbete nɛɛ, “Nyɔ yɔɔ keɓe vɔrɔ, mɔɔ yàa ruu Baraba naa.” 19(Zang loo Baraba ka sãa, ka ruu ɓɔɔ, ka teteng zang ɓɔɔ haa nyaa ka gari, a zang nyɔ zang vɔrɔ ɓɛɛ.) 20Bilatu kasɛ nɛɛ wu yaa Yeesɔ naa katɔ, ka ruu nɔngkɔ, rang yee tɔkn nɛɛ zang, a gaa ri.

21A ri goo nyaa tɔkn nabm nɛɛ, “Ɓaa wu naa ka laa, ɓaa wu naa ka laa.”

22Bilatu hɛ̃ɛ ri tɔkn, daa kaa nyaa taati nɛɛ, “Vuu shi kpang ɓɔɔ wu palɛ viya? N ĩi vuu shi kpang ɓɔɔ wu palɛ ɓɔɔ daa naa ɓɔɔ zang nyɔ wu vɔrɔ kpang. N nyɔ wu nɛɛ gbãa kɔ shɛ̃ɛning, n yaa wu naa.”

23A ri yi tĩng kana, ri haa nyaa nabm nɛɛ, zang ɓaa wu naa ka laa. Nyaa ɓɔɔ ri hàa ɓɛɛ naa sha tĩng. 24A Bilatu kɔɔ zang nɛɛ zang pàlɛ̀ ri vuu ɓɔɔ ri kasɛ ɓɛɛ ta. 25A yaa ri zang ɓɔɔ zang loo ka sãa ɓɔɔ shing zang, zang haa nyaa ka gari, a zang nyɔ zang vɔrɔ ɓɛɛ, naa. A á ri Yeesɔ nɛɛ ri palɛ wu vuu ɓɔɔ ri kasɛ ɓɛɛ.

Naa ɓɔɔ zang ɓaa Yeesɔ naa ka laa ɓɛɛ

(Mat 27:32-44; Mar 15:21-32; Yɔh 19:17-27)

26Ka ɓɔɔ ri daa kaa nɛɛ Yeesɔ, ka nɔng ɓɔɔ ri daa nyɔ wu vɔrɔ ɓɛɛ, ri kpisi yuu nɛɛ yɔɔ ɓɔɔ zang ɓaa wu nɛɛ Siman, yɔɔ gari Kiranɛ, nɛɛ wu daa kaa gari. Ri yi wu, ri shing wu, nɛɛ wu tuu laa ɓɔɔ zang daa ɓaa Yeesɔ naa kagn ɓɛɛ, wu dũng Yeesɔ ka knti. 27Ka teteng zang dɔɔli ɓɔɔ ri dũng Yeesɔ ka knti, zang soro kagn ɓɔɔ ri kaa nyavɔ ri ti ɓaarɛ nyaavaa.

28A Yeesɔ raa jĩng kɔɔ ri nɛɛ, “Zang soro gari Urushalima, nɔ́ɔ kaa nyavɔ, ka ruu mɛɛ kpang, nɔɔ kaa ka ruu yuu manɛ, nɛɛ wujɛ manɛ. 29Ka ruu ɓɔɔ, diki a kana ɓɔɔ zang naa kɔɔyi nɛɛ tĩnang tãanang ɓi ɓɔɔ zang soro ɓɔɔ ri shii katɔ, nɛɛ ɓɔɔ ri tuu jaa gngn kpang, nɛɛ ɓɔɔ jaa mãa míi ɓarɛ kpang ɓɛɛ. 30Wee diki ɓɔɔ zang naa kɔ̀ɔ́ kɔpɔ kagn nɛɛ, ‘Ji jong ka yuu ɓuru.’ Zang ti kɔ̀ɔ́ jaa kɔpɔ nɛɛ ‘Waasɛ ruu jong’ ɓɛɛ. 31Zang nɛɛ palɛ m vuu keɓe ɓɔɔ n nwang naa laa bɛbɛtɛ, zang naa palɛ nɔɔ ɓi kaa biya, ɓɔɔ nɔɔ nwang naa laa waatɛnang ɓɛɛ?”

32Zang kagn ziti, ɓɔɔ ri palɛ vuu shi kpang ɓɛɛ, zang yi ri jong nɛɛ zang daa nyɔ ri vɔrɔ nɛɛ Yeesɔ. 33A ɓɔɔ ri a ka nɔng ɓɔɔ zang ɓaa nɛɛ zɔ̃pi ɓɛɛ, ri ɓaa wu naa ka laa, ka nɔngkɔ, nɛɛ rɛɛ zang ziti ɓɔɔ ri palɛ vuu shi kpang keɓe. Ɓɔɔ gbete ka nakn, a ɓɔɔ gbete ka nagang ɓiɓɛ.

34A Yeesɔ kɔɔyi nɛɛ, “Daa mɛɛ, yaa ri gbalang vuu keɓe katɔ, ka ruu ɓɔɔ, ri zi vuu ɓɔɔ ri palɛ kpang ɓee.” Ri sháa laa ka naa ɓɔɔ ri basɛ rɛɛ fɔ̃ɔrɔ ɓiɓɛ ɓɛɛ. 35Zang ri shii nɛɛ dalɛ, ri pɛ̃ɛrɛ, a rɛɛ zang bang bang zang Yahudi ri kpaa wu tɔɔ, “Ta yuu zang, wu ta yuu ɓiɓɛ lɛ̀ɛ́ ta jong, wukɔ nɛɛ Kirisi, Jaa Laa ɓɔɔ Laa zɔ̃ng wu katɔ ɓɛɛ.” 36Zang sɔɔja ri kpaa wu, ri arɛ ri a wu mii inabi ɓɔɔ gbang katɔ ɓɛɛ. 37Ri tɔɔ wu nɛɛ, “Ta yuu ɓaaɓɛ ta mɔkɔ nɛɛ Kpanti zang Yahudi ɓɛɛ.” 38Zang bee vuu, zang ɓaa ka yuu laa ɓɔɔ zang ɓaa wu naa kagn, ka yupaa ɓiɓɛ nɛɛ, “Wee kɔ Kpanti zang Yahudi.”

39Zang ɓɔɔ ri palɛ vuu shi kpang ziti ɓɔɔ zang ɓaa ri naa nɛɛ wu ɓɛɛ, ɓɔɔ gbete rang wu yee shi kpang tɔɔ, “Wu mɔkɔ Kirisi kpang ya? Ta yuu ɓaaɓɛ ta mɔɔ ta ruu jong.”

40Ɓɔɔ gbete mangkɛ ɓeesang tɔɔ, “Mɔɔ kaa vɔrɔ Laa kpang ya? Mɔɔ zi kpang mɔɔ vɔ vɔrɔ gbete nɛɛ wu kpang ya? 41Vɔrɔ ɓuru ɓi ti waasɛ̃, ka ruu ɓɔɔ, ruu vɔ ɓuru ka ruu vuu shi kpang ɓɔɔ ruu palɛ ɓɛɛ. Yɔɔ keɓe palɛ vuu shi kpang ɓɔɔ kagn kpang.” 42A raa nyaa kɔɔ Yeesɔ nɛɛ, “Mɔɔ nɛɛ a tɔ ka ɓɔɔ mɔɔ naa roo Kpanti, danggn mɛɛ wu ning mɔɔ kpang.”

43Yeesɔ kasɛ wu nyaa tɔɔ, “Niizang n kɔɔ mɔɔ, lɛɛkɔ mɔɔ nwang nɛɛ n ka Paradayisi, nɔng ɓɔɔ tĩnang waa nyaa kpang ɓɛɛ.”

Naa ɓɔɔ Yeesɔ vɔ ɓɛɛ

(Mat 27:45-56; Mar 15:33-41; Yɔh 19:28-30)

44Ɓɔɔ laa kaa dalɛ yuu, nɔng tɔɔ ka tipi kaɓa nandon sasak, saka taati ɓɔɔ laarang palɛ nɛɛ mani. 45A fɔ̃ɔrɔ nyaa Gãa Laa basɛ ziti, gaayu nɛɛ paa daa lɔɔsɔ dii. 46Yeesɔ kaa nyaa ka lapa nɛɛ, “Daa mɛɛ, n a mɔɔ Suru bii mɛɛ tɔ ka naa ɓaaɓɛ.” Kɔɔ naa weɓe, a vɔrɛ. 47Ɓɔɔ zang bang sɔɔja ɓɔɔ daa nɛɛ Yeesɔ zi naa weɓe, dɔɔ Laa tɔɔ, “Niizang yɔɔ keɓe, palɛ vuu shi kpang, kagn kpang.” 48Zang ɓɔɔ ri kpalɛ yuu ka nɔng, nɛɛ ri zi vuu ɓɔɔ zang palɛ, ka ɓɔɔ ri zi vuu pálɛ́ hn, ri gbãayu ka gãa ɓarɛ nɛɛ yeti lasɛnang. Ri waa naa ka danggn. 49Zang ɓɔɔ ri zi Yeesɔ nung tɔ, nɛɛ rɛɛ zang soro ɓɔɔ ri zi Yeesɔ nung tɔ kɔ doori, ɓɔɔ ri dũng wu nɛɛ Galili ɓɛɛ, ri shii nɛɛ dalɛ, ri pɛ̃ɛrɛ vuu ɓɔɔ zang palɛ ɓɛɛ.

Naa ɓɔɔ zang gbãa Yeesɔ ɓɛɛ

(Mat 27:57-61; Mar 15:42-47; Yɔh 19:38-42)

50Zang ɓɔɔgn zang ɓaa wu nɛɛ Yusufu, yɔɔ gari zang Yahudi ɓɔɔ zang ɓaa nɛɛ Arimataya ɓɛɛ. Kagn teteng zang bang ɓɔɔ ri kpalɛ zɔɔ nɛɛ ri jɛ̃ɛ Yeesɔ ruu ɓɛɛ. A ɓi kaa zang ɓɔɔ zang a wu bannang dɔɔli ɓɛɛ. 51Kasɛ nyaa ɓi kagn ka vuu ɓɔɔ ri mã zɔɔ nyaa, ri kasɛ nɛɛ ri palɛ ɓɛɛ kpang. Gã ɓi diki ɓɔɔ Laa naa roo Kpanti ɓɛɛ. 52Daa ka bii Bilatu, a gaa wu nɛɛ, wu a wu vɔrɔ Yeesɔ. 53A witi vɔrɔ Yeesɔ nɛɛ lapa, leng wu nɛɛ fɔ̃ɔrɔ ɓɔɔ zang leng vɔrɔ nɛɛ mani ɓɛɛ. Daa wɔɔ wu ka sàa ɓɔɔ zang ɓee ka yeti tari, ɓɔɔ zang gbãa vɔrɔ gngn doo gbete kpang ɓɛɛ. 54Bɛ̀ɛ́ kaa diki ɓɔɔ zang kpalɛ bii ka ruu Diki Ɔ̃sɔnang ɓɛɛ. 55Zang soro ɓɔɔ ri dũng Yeesɔ nɛɛ tipi Galili ri daa nɛɛ Yusufu, ri daa zi saa bìí kati nɛɛ naa ɓɔɔ zang wɔɔ vɔrɔ Yeesɔ kagn ɓɛɛ. 56Ri gbãayu ka gãa, ri daa palɛ nung, ɓɔɔ a sɛ̃ɛ tɔ̃ɔ nɛɛ nung ɓɔɔ zang tũuru vɔrɔ ka bii ɓɛɛ. Ri ɔ̃sɔ ka Diki Ɔ̃sɔnang naa ɓɔɔ nyaa dannang Laa kɔɔ ɓɛɛ.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 23: mzmNT

Highlight

ಶೇರ್

ಕಾಪಿ