Luka 22

Oporo kop me neko Yecu

(Neŋ daŋ Matayo 26.1-5, 14-16; Marako 14.1-2, 10-11; Lakana 11.45-53)

1 # Yaa 12.1-27 Ecuban me Ogati a Tobi Mom iye, ame olwoŋo ni Kato, onwoŋo onoko ceggi. 2Olamdog adoŋo kede opwony-cik oyenyo yo a myero gin neke kede, pien onwoŋo gin olworo lwak.

3Catan odonyo i cuny Juda ame olwoŋo me Keriot, ame okwane i wei olub Yecu apar wie aryo. 4En owoto, oporo kop kede olamdog adoŋo kede odoŋe cirikale, kite a myero emie kede baŋgi. 5Cunygi obedo yom, ote ciko miye lim. 6En daŋ te ye, te yenyo kare aber me miye baŋgi ame nwoŋo lwak mom iye.

Yecu oyikere me camo Kato

(Neŋ daŋ Matayo 26.17-25; Marako 14.12-21; Lakana 13.21-30)

7Nino me Ogati a Tobi Mom iye otuno, ame myero oŋol iye atin romo me Kato. 8Yecu ooro Petero kede Lakana kun cikogi ni, “Ape wunu, yiku cam me Kato pirwa me ocamu.” 9Gin openye ni, “Imito ni owot oyik tuŋ kwene?” 10Okobbigi ni, “Nen ba, ka idonyo wunu i Jerucalem, lonnoro bino romere kedwu ame oyeo gulu pii. Lube wunu anaka i ot ame ebino donyo iye. 11Kobbi wunu won ot ni, ‘Apwony okobo ni, Ane ot welo kan ame abino camo iye Kato karacel kede jo mera a luba?’ 12En bino nyuttiwu icika alac i malo ame opeto; yik wunu kuno.” 13Gin owoto, ote nwoŋo tye acalo en oporrigi, ote yiko cam me Kato.

Acakki me Cam a Rwotwa

(Neŋ daŋ Matayo 26.26-30; Marako 14.22-26; 1 Korinti 11.23-25)

14Ka caa oromo, Yecu obedo piny i dog cem karacel kede okwena. 15Okobbigi ni, “Onwoŋo ceŋ aparo meicel pi camo Kato man kedwu, kum mom ru akanyo can; 16pien akobbiwu ni mano, mom dok abino camo, ituno ka bino cobere kakare i loc Obaŋa.” 17Ogamo ikopo; ka doŋ opwoo, okobo ni, “Maku man, ipok wunu i akinawu; 18pien attitiwu ni mano, cakere amanni, mom dok abino mato pig olok, ituno ka loc Obaŋa bino tuno.” 19Omako ogati; ka doŋ opwoo, onyinyilo, omiogi kun kobo ni, “Man en koma ame omio pirwu. Tim wunu man me poyo an,” 20#Jer. 31.31-34Amannono ka gin ocamo otum, otiŋo ikopo kun kobo ni, “Ikopo man en cikere anyen i remona ame oony pirwu. 21#Jab. 41.9Cite nen ba, ciŋ dano a keto erupe i koma tye i wi meja kan karacel keda. 22Pien Wot a dano awot gire i kite a nwaŋ oyiko; ento dano a keto erupe i kome, kite ame ebino neno can kede!” 23Gin ote penyere kengi kengi ni, ŋa i akinagi ame bino timo man.

Pyem i kom dit

24 # Mat. 18.1; Mar. 9.34; Luk. 9.46 Pyem dok te erre i akinagi ni mano, ŋa i akinagi myero otam ni dit a loogi? 25#Mat. 20.25-27; Mar. 10.42-44Yecu okobbigi ni, “Rwode Orok bwoo jo megi kede teko; jo ame tye kede twer i akinagi olwoŋogi ni otim aber. 26#Mat. 23.11; Mar. 9.35Cite i baŋwu mom myero bed amannono; ento ŋat ame adit i akinawu myero lokere dok acalo ŋat atidi, kede atelwic myero bed acalo dano ame tio pi jo. 27#Lak. 13.12-15Ŋa ce ame loo kede dit, ŋat ame bedo i dog cem, ya onyo ŋat ame kelo cam? Pe ŋat ame bedo i dog cem? Cite an abedo i akinawu acalo ŋat ame tio pi jo.

28“Wun giwu jo ame obedo i laŋeta i kare luŋ ame obedo tema. 29Acalo Pappa oyikka loc, an daŋ ayiko pirwu ni, 30#Mat. 19.28ibino camo, ibino mato wunu i dog mejana i locca, dok ibino bedo wunu i wi kome me kwogo kun iŋolo wunu kop i kom atekere apar wie aryo a jo Icrael.

Yecu otito ni Petero bino kwere

(Neŋ daŋ Matayo 26.31-35; Marako 14.27-31; Lakana 13.36-38)

31“Cimon, Cimon we, Catan otyeko kwayo ni omiwu baŋe me apyeta acalo kal, 32cite atyeko kwayo Obaŋa piri atek ni, iyee meri kur dok cen. Yin daŋ, ka doŋ ilokere, myero ijiŋ cuny omegoni.” 33En te kobbe ni, “Rwot, doŋ ayikere me wot kedi i buc, anaka kede i to daŋ.” 34En odok iye ni, “Petero, akobbi ni mano, twon gweno mom bino koko tin, ituno ka koŋ ikwera tyen adek, ni mom iŋea.”

Cao lim, ocoe, pala bat

35 # Mat. 10.9-10; Mar. 6.8-9; Luk. 9.3; 10.4 Openyogi ni, “Ka cwany aorowu boŋo cao me lim, kadi ocoe, kadi war, ginnoro rik tye ame oremowu?” Gin ogamo ni “Mom gire.” 36Te cikogi ni, “Ento koni, ŋat ame tye kede cao lim, ber teri; kede me ocoe daŋ amannono. Ŋat a mom tye kede pala bat cat kanyi mere me wil kede. 37#Ica. 53.12Pien akobbiwu ni, coc man a nwaŋ ocoo myero cobere kakare i koma, ni, ‘Okwane karacel kede obalo’; pien kop ame ocoo i koma tye a cobere kakare.” 38Gin okobbe ni, “Rwot, neno, pala bat aryo en, tye kan-ni.” Ogamo ni, “Mano romo.”

Yecu okwao Obaŋa i poto me Gececemane

(Neŋ daŋ Matayo 26.36-46; Marako 14.32-42)

39Yecu okato oko, owoto i wi kidi me Jeituni, acalo kite mere tye; jo a lube owapo yore. 40Ka otuno i kabedono-no, okobbigi ni, “Kwa wunu Obaŋa, me kur idony wunu i abita.” 41Opokere kedgi, owoto teŋe a rom i kan a dano twero yuyo iye gweŋ, orumo piny, te kwayo ni, 42“Pappa, ka imito, kwany ikopo man i koma oko; cite kur bed acalo an amito, ento gin ame yin imito myero timere.” [43Amalaika ame oya i polo te nen baŋe, omie teko. 44Ame en tye akumo atek meicel, daŋ te medde i kwac atek; omio kwok i kome ocwer adwoŋ, oony piny acalo remo.] 45Ka doŋ oya i ka kwac me bino baŋ jo a lube, onwoŋogi doŋ onino oko pi wancunygi. 46Openyogi ni, “Inino wunu pino? Ya wunu, ikwau Obaŋa, me kur idony wunu i abita.”

Omio Yecu baŋ okworrere, omake

(Neŋ daŋ Matayo 26.47-56; Marako 14.43-50; Lakana 18.2-11)

47Ame en pwod tye ka kop, lwak jo te pello; ŋat ame olwoŋo ni Juda, ŋat acel i akina jo apar wie aryo ca, en otelo yo. Onoko laŋet Yecu aceggi me emote kun enoto Ieme. 48Yecu te penye ni, “Juda, iketo erupe i kom Wot a dano kun inoto leme?” 49Jo ame onwoŋo ceggi kede, ka oneno gin ame amito timere, te penyo ni, “Rwot, otongi oko kede pala bat?” 50Ŋat acel i akinagi te toŋo opii alamdog adwoŋ, te mworo yite tun cem oko. 51Yecu te kobo ni, “Wek oko. Kur dok imedi!” Yecu te mulo yite, caŋo oko. 52Icennere Yecu te kobo baŋ olamdog adoŋo, kede odoŋe cirikale me ot Obaŋa, kede odoŋe ame obino i kome ni, “Ibino wunu i koma i pale romo kede abiriŋ, bala ibino wunu i kom ayak? 53#Luk. 19.47; 21.37Nino luŋ rik atye kedwu i ot Obaŋa, mom imaka wunu. Ento amanni en karewu, kede twer me piny acol.”

Petero okwero Yecu

(Neŋ daŋ Matayo 26.57-58, 69-75; Marako 14.53-54, 66-72; Lakana 18.12-18, 25-27)

54Gin omake, ote tere oko naka i ot alamdog adwoŋ. Petero olubo yore icecen. 55Ka gin okuto mac i dyekal, gin te bedo piny, ŋinne iye karacel; Petero daŋ obedo i akinagi. 56Aŋeca moro te nene kun eganakino kan a mac ocaro; te bedo niye atek, te kobo ni, “Jal-li daŋ woki tye karacel kede.” 57Ento en okwero oko, kun kobo ni, “Dako, an mom aŋeo gira lonnono.” 58Kare te kato kom anok keken, ŋat ocele te dok nene oko, te kobbe ni, “Yin daŋ i ŋat acel i akinagi.” Petero te gamo ni, “Lo-nie, mom an gira.” 59A doŋ caa acel okato, dano ocele okobo kun moko atek ni, “Ateni, kom lo-ni woki tye karacel kede; kom en Agalilaya ikome.” 60Ento Petero ogamo ni, “Loni we, an mom aŋeo kop ame ikobo.” Cuto ame pwod ekobo kop man, twon gweno te mwoco koko. 61Rwot te lokere neno Petero, Petero te cako po i kom kop a ceŋ Rwot okobbe, ni mano, “Ame mom ru twon gweno okok tin, ibino kwera tyen adek.” 62Okato oko, okok kun cunye waŋ meicel.

Oŋalo Yecu, opwode

(Neŋ daŋ Matayo 26.67-68; Marako 14.65)

63Jo ame omako Yecu oŋale, opwode. 64Otweo waŋe kede itambara, ote penye ni, “Yin adwarpiny do, tuci! Kara ŋa ojwati?” 65Gin okobo kop ocele apol i kome, kun oyete kede-gu.

Yecu i nyim okiko

(Neŋ daŋ Matayo 26.59-66; Marako 14.55-64; Lakana 18.19-24)

66Ka piny oru, odoŋe me ot Obaŋa ocokere karacel, olamdog adoŋo karacel kede opwony-cik. Gin otere i nyim okiko megi, ote kobo ni, 67“Ka yin i Kricito, tittiwa.” Cite en okobbigi ni, “Ka atittiwu, mom ibino ye wunu; 68daŋ ka apenyowu, wun pe ibino wunu dokka iye. 69Ento cakere amanni, Wot a dano bino bedo piny i kabedo me kwogo i laŋet Twer Obaŋa tuŋ cem.” 70Gin ducu ogamo ni, “Doŋ yin Wot Obaŋa bo?” En ogamo ni, “Wun ikobo wunu ni an a en.” 71Gin okobo ni, “Kara dok omito caden me ŋo? Wan doŋ owinyo giwa kede yitwa gin ame en okobo kede doge.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 22: Lango

Highlight

ಶೇರ್

ಕಾಪಿ