Luka 20
20
Openyo Yecu i kom twerrere
(Neŋ daŋ Matayo 21.23-27; Marako 11.27-33)
1I nino moro acel ame Yecu tye apwonyo lwak i ot Obaŋa, kede rabo amut aber, olamdog adoŋo kede opwony-cik anaka odoŋe obino baŋe. 2Ote penye ni, “Kobbiwa, twerrene omio itimo kit man? Onyo ŋa ame omii twer man?” 3En ogamo doggi ni, “An daŋ koŋ abino penyowu kede pennyoro acel, me idokka wunu iye. 4Batija a Lakana oya i baŋ Obaŋa, aŋar onyo oya i baŋ dano?” 5Gin oporo kop kengi kengi, kun okobo ni, “Ka okobo ni, ‘Oya i baŋ Obaŋa,’ en bino penyowa ni, ‘Kara piŋo mom iye wunu en?’ 6Cite dok ka okobo ni, ‘Oya i baŋ dano,’ lwak luŋ bino napowa kede gweŋ, pien gin oye atika ni Lakana obedo adwarpiny.” 7Omio gin ote dokke iye ni, “Kan ame oya iye wan okwia giwa.” 8Yecu daŋ te kobbigi ni, “An daŋ mom abino kobbiwu twerrene omio atimo kite man.”
Carokop i kom poto olok kede opur
(Neŋ daŋ Matayo 21.33-46; Marako 12.1-12)
9 #
Ica. 5.1
Eka te cako kobo carokop man baŋ lwak ni mano, “Nwaŋ tye dano moro ame opito poto olokkere te joko baŋ opur, eka te wot oko i lobo ocele, odikere kuno pi kare alac. 10Ame kare doŋ oromo, en te cwayo amiro baŋ opur me gin mie dul ginnoro ocek i poto. Cite opur opwode, oryeme, odok i ciŋe nono. 11Dok ooro amiro ocele; en daŋ dok opwode, omie lewic, daŋ oryeme, odok i ciŋe nono. 12Dok te oro me adekkere; man daŋ owano, ote bole oko, 13lcennere won poto olok te kobo ni, ‘Kara man doŋ abino timo ŋo? Abino oro woda ame amaro; aŋar onyo obino wore.’ 14Ento ka opur onene, ote kobo kengi kengi ni, ‘Kom man en ale-lim; ber oneke wunu oko, me lim eleyo-nono bed megwa.’ 15Ocore oko teŋe i poto olok, ote neke oko. Kara won poto olok bino timo jonono niŋo? 16En bino bino, te neko opur-ru oko, te miyo poto olok baŋ jo apat.” Ka gin owinyo kop man, okobo ni, “Pe amannono!” 17#Jab. 118.22Cite en onenogi, okobbigi ni, “Kara te kop ame ocooni tere niŋo, ni mano,
‘Kidi ame ogedo okwero
en ame odoko kidi me gwic ot?’
18Dano acel acel ame orette i kom kidi man bino ŋidde oko atitino; ka kidi man orette i kom ŋattoro, bino ŋinyo oko.”
Gelo ocoro baŋ Kaicari
(Neŋ daŋ Matayo 22.15-22; Marako 12.13-17)
19Opwony-cik kede olamdog adoŋo otemo make i caanono, cite ote lworo lwak oko; pien gin oniaŋ aber ni en okobo carokop man i komgi. 20Gin obedo kiye, eka ote oro orot ame poro ni gin jo a kitegi atir, me mak kop ame ya i doge, wek ote miye i ciŋ aloc kede twerrere. 21Gin openye ni, “Apwony, wan oŋeo ni yin ikobo dok ipwonyo kop ame tye atira, mom ipoko akina jo, cite ipwonyo yo Obaŋa i ateni. 22Myero ogelli Kaicari ocoro, onyo mom?” 23Ento en oŋeo ryekogi oko, te kobbigi ni, 24“Koŋ inyutta wunu ciliŋŋoro. Cal kede coc ame ogoro i yie-ni mea ŋa-nono?” Gin ogamo ni, “Mea Kaicari.” 25Eka en te kobbigi ni, “Aco do, dwok wunu baŋ Kaicari jami a Kaicari, jami Obaŋa dwoku baŋ Obaŋa.” 26Mako kop ame oya i doge te loyogi oko i nyim lwak; gin owuro kite ame en odok kede i kop, ote doŋ liŋ aliŋa.
Peny i kom cer a jo oto
(Neŋ daŋ Matayo 22.23-33; Marako 12.18-27)
27 #
Tic 23.8
Ocadukayo mogo obino baŋe; jo-ni gin jo ame kobo ni, jo oto pe cer. 28#Lodo 25.5Gin okelo peny baŋe ni, “Apwony, Muca nwaŋ ocoo pirwa ni, ka omin a ŋattoro oto oko ame etye kede cege cite itino mere mom, ominnere myero lak dako mere me nywal ominnere itino. 29Aco, nwaŋ tye jo abiro ame gin omego. Dano me agege onyomo dako, te to boŋo atinnoro. 30Dano me aryo, 31kede me adekkere daŋ olako dan-nu; kite-nono gin abiro luŋ obedo kede dannu, ote to boŋo atinnoro. 32Icennere dako daŋ te to oko. 33Kara i kare me cer, da-nu bino bedo cik a ŋa? Pien gin abiro luŋ obedo kede.”
34Yecu okobbigi ni, “Awobe kede anyira me lobo man gin nyomere, 35cite jo ame okwanogi ni gin oromo tuno i lobo ca, kede cer iyi akina jo oto, mom obino nyomere, 36pien gin mom dok twero to. Gin rom aroma kede omalaika; daŋ doŋ gin itino Obaŋa, pien gin doŋ jo ocer. 37#Yaa 3.6Ento anaka Muca ikome onyuto ni jo oto ocerogi, i dul i kom yat obuŋere ame olyel, kan ame olwoŋo iye Rwot ni, Obaŋa Iburaim, Obaŋa Icaka, Obaŋa a Yakobo. 38En mom Obaŋa ajo oto, ento meajo akwo; pien jo luŋ bedo kwo pire.” 39Opwony-cikkogo ogamo doge ni, “Apwony, ikobo aber.” 40Pien gin mom dok otiŋere me penye kopporo.
Peny i kom akwar Daudi
(Neŋ daŋ Matayo 22.41-46; Marako 12.35-37)
41Cite en openyogi ni, “Kara okobo niŋo ni Kricito en akwar Daudi? 42#Jab. 110.1Aco kono Daudi ikome okobo i buk me Jabuli ni mano,
‘Rwot okobbi Rwotta ni,
Bed i laŋeta tuŋ cem i kabedo me kwogo,
43ituno ka abino miyo okworri doko aten tyeni.’
44Kite-nono Daudi lwoŋe ni Rwot; en dok bedo akware niŋo?”
Yecu okwenyoro jo i kom opwony-cik
(Neŋ daŋ Matayo 23.1-36; Marako 12.38-40)
45Ka lwak ducu tye a winyo koppere, en okobbi jo mere a lube ni, 46“Gwokere wunu i kom opwony-cik ame maro wot a kun orukere kede boŋŋi abeco, ame omito daŋ ni jo motgi i cuk, kede bedo i kome me dito i kacokere, kede i kabedo me kwogo i dog cem. 47Gin mao udi a mon a coggi oto, dok okwao Obaŋa nakanaka me gobagoba. Kop ame obino ŋolo i wigi bino bedo pek akato.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 20: Lango
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Lango Bible © United Bible Societies, 1978, 2019.
