BOTHUBO 4
4
Kain eno Abel
1Tithiu Adam no panipu Eva sasu ashi aji kuqhae eno lino mishilu puzu Kain punu, eno pi, “AMPEU kukuphu lono ino anu lakhi lhoqhi luvae.” 2Tipathiu itaghi pa thikuzuu Abel punue. Ike Abel ye bherikhemi ikemu Kain ye alukichimi. 3Tipa tikhau akumllagho lakhi AMPEU tsunike Kain no pawu tuxatini peighi. 4Abel ghi pawu bheri piti tughiu atha kupu peighi. AMPEU no Abel eno pa kumllagho shou amlo kiqishive, 5ikemu Kain eno pa kumllaghoye ikhilutsumove. Kain ye ighono amlo shimove eno pagi pishiqholuve. 6Tile AMPEU no Kain vilo pi, “Noye kushiye amlo shimo ogi pishiqhope ani kya? 7Nono akivi mula puaghi aye no ikhilu moni kesha? Eno nono akivi shipuaghimo napi aye, axine no ahukikha ijepe anie. Tino oshou kaluve nishi anie, ikemu noye ti theqhiluve masae.”
8Tithiu Kain no pa thikuzuu Abel putsa ghi pi, “Nikujo iliwunie.” Ike pama kumtsa aluzalo chekelo Kain no pa thikuzuu Abel tukulu puzu pa heqhi pithive.
9AMPEU no Kain iniju, “Othikuzuu Abel ye khile ani kya?” Pano khochile pi, “Niye mathae, niye ithikuzuu kheu kesha?”
10Tile AMPEU no pi, “Noye kushiye hikithipu shi kya? Ayeghi lono othikuzuu jino amkhu lutsu lepi ighamuku keu sutsano itovae. 11Ayeghino othikuzuu ji ou lono musholuve ketoi ayeghi tipauno oghusho pe qhivae. 12Nono ayeghilo axa yisu namu tino ipeghi pemo nani, eno noye ayeghi shou kupokichemi shiniae.” 13Kain no AMPEU vilo pi, “Ighimepu hiye ino puqhelu kepu nguno alaue! 14Nono ishino ayeghi hipau lono ihapupove ani eno ozu lono ino itshu iqho iqiniae eno niye ayeghilo kupokichemi shiniae eno khuno nithuluni keno ighiqhiniae.” 15Ikemu AMPEU no pa vilo pi, “Tishimlae, khuuno Kain ghiqhini keno, pa shou ghuthu tsuni amkhu lunani.” Khuu khumu Kain sholu kelo pa ghiqhi pemonike AMPEU no pa shou amchi lakhi bevetsue. 16Eno Kain no AMPEU zulono wuve eno Eden kipelau Nod ipikeu chhighalo acheuve.
Kain Lagha
17Kain no panipu sasu ashi aji kuqhae, eno lino mishilu puzu anu Enok punue. Eno pano aphughi lakhi shie eno tipau pesu Enok kutsue, panu Enok jesho shighi. 18Enok nu Irad, Irad nu Mexual, Mexual nu Methusala, Methusala nu Lamek. 19Lamek no anipu kini lue, lakhi jeno Ada eno lakhiu jeno Zila. 20Ike Ada no Jabel punue, paye atsuaqu pighimi eno aphikilo kuamiqo puasu shive. 21Pathikuzuu jeno Jubal, pano akighi lebo eno lilala lebo kughughami puasu shive. 22Eno Zila ghi Tubal Kain punue, ayi ngo tamayi pesu koghekughu shikemi puasu shive. Tubal Kain chepuye Naama. 23Ike Lamek no pa nipu pama vilo pi:
“Ada ngo Zila, itsa inilo; nongu Lamek nipuqo, itsapi chilulo, ino apumi lakhi ghiqhivae, pano ighuza kehu, 24Kain mukhu ghuthu tsuni lunapi aye Lamek mukhuye ghuthu lhotsuni tsuni lu nani.”
Set Lagha
25Adam no pa nipu sasu ashi-aji kuqhae, eno lino anu lakhi punue, eno pa je Set kutsue, lino pi: “Kain no pithive keu Abel zuqhulo Alhou no apiti lakhi itsu anie.” 26Set ghi anu lakhi ithulu ke pa je Enos kutsue. Hipa ghuloki lono timi no AMPEU jeku ghi pa mlla keu huthue.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
BOTHUBO 4: SUMIBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.