मत्तायोस 22
22
बेंजा मंडी ही जोक्खा ख़ीरी
(लूक 14:15-24)
1अउरिम येसुस जोक्खा ख़ीरी गुट्ठी ती तेंगा हेलरस। आस बाचस, 2“मेर्ख़ा राजी ओर्त बॆलस लेक्खा र'ई। आस तंग्दासी बेंजा गे कोहाँ बेंजा मंडी सराजमा नंजस। 3अरा इकला बेंजा मंडी सराजमा मंजका ख़ने, आस तंग्है जॊंख़ारिन एड्डका आलारिन बेंजा नू मॆख़'आ गे तइय्यस। आर बर'आ मल बिद्दियर।
4औंगे आस अउरिम तंग्है नन्ना जॊंख़ारिन एड्डका आलारिन तेंगा गे तइय्यस। ‘ऎरा, ऎन मंडी खटच ख़च्चिकादन, मेक्खो अरा डढरका अड्डो गुट्ठी पिट्रकी र'ई, अरा उर्मी सर्चकी र'ई। बेंजा मंडी ओना गे बरा।’ 5लिकिन आर तुस्सियर अरा तम्है तम्है नलख गे केरर। ओर्तोस ख़ल्ल गे अरा नन्नस ख़ॆंदा पिटा गे किर्रिम बिच्चियर। 6लिकिन नन्नर एंगरका रहचर आर आसी जॊंख़ारिन धरचर ती कांड़चर अरा पिटियर।
7औंगे बॆलस कैरारस ती तंग्है फउदन तइय्यस ती अबड़ा पिटुरिन पिटियस अरा आर ही पद्दन बस्सियस चिच्चस। 8ख़ने आस तंग्है जॊंख़ारिन बाचस, ‘बेंजा मंडी गा सर्चकी र'ई, लिकिन एड्डका आलर जॊगे मल मंजर। 9औंगे दोप्फा डहरे तरा कला ऎ बग्गे आलर ख़क्ख्र'ओर ओर्मारिन बेंजा एड़पा नू एड़'आ ओन्द्र'आ।’ 10औंगे अबड़ा जॊंखर डहरे तरा केरर ती कोड़े मल कोड़े एवंदा आलारिन ख़क्खियर ओर्मारिन ख़ॊंड़चर, बेंजा एड़पा पाहियर ती निंदिया केरा।
11लिकिन एकाबारी बॆलस मदी अड्डा नू ऎरा गे कोर्चस ख़ने, असन आस ओर्त बेंजा किचरी बिगर अत्तका आलासिन ईरयस। 12अरा आस आसिन मेंजस, ‘अना संगी, नीन इसन बिगर बेंजा किचरी अत्तका एकासे भितरी बरचकय?’ लिकिन आसी बई मल चलख़्रा। 13ख़ने बॆलस तंग्है जॊंख़ारिन बाचस, ‘ईसी ख़ेक्खा ख़ेड्डेन हें'आ ती बहरी ता ऊख़ा नू हेबड़ा चि'आ, अइय्या चींख़ना दरा पल्ल चब्रना मनो।’#मत्ता 8:12; 25:30; लूक 13:28 14एन्देरगेका एड्रका बग्गे र'अनर, लिकिन चज्जरका जुक्की र'अनर।”
कैसरस गे मालगुजारी चि'अना
(मर 12:13-17; लूक 20:20-26)
15फेन फरिसीर केरर ती भेंट मंजर ती कछनख्रर का येसुसिन आसी कत्था ती एकासे बझाब'ओत। 16आर जोक्को तम्है चेलारिन अरा हॆरॊदॆरिन#22:16 हॆरॊदॆर यहूदी समाज ता ओन खोंड़हा, नॆ बॆलस हॆरॊदॆस, अरा आसी एड़पातर ही संगे चि'उर। येसुस गुसन ब'आ गे तइय्यर, “अना गुरु! ऎम अख़दम का नीन उजगो आलय अरा नीन धर्मेसी डहरेन मानी गने तेंगदय, नीन आलर एन्देर सोच'ओर अदही पत्त नू गुनन मल नन्दय, अरा नीन तीना मल ख़ाँड़दय। 17औंगे एमन तेंगा नीन इदही पत्त नू एन्देर सोचदय, यहूदी नॆग नमन कैसरस#22:17 रोमी राजी ही कोहाँ बॆलासिन कैसरस ब'अनर। गे मालगुजारी चि'आ गे पॆस'ई का मला?”
18लिकिन येसुस आर ही चतरा आबोन अक्खस ती बाचस, “नीम उतुरमाड़ू आलारो, एंगन एन्देरगे बिढ़दर? 19मालगुजारी चि'अना ही ओन्टा ढिबन ऎद'आ” ख़ने आर ओन रोमी ढिबन आस गुसन ओन्द्रर। 20अरा आस आरिन मेंजस, “ई छपा अरा नामे नॆखअय?” 21आर आसिन बाचर, “कैसरसी।” ख़ने आस आरिन बाचस, “औंगे कैसरस गे एन्देर चि'अना र'ई अदिन कैसरस गे चि'आ, अरा धर्मेस गे एन्देर चि'अना र'ई, अदिन धर्मेस गे चि'आ।” 22ख़ने आर येसुसी ई कत्थन मेंजर ती अनचकरर केरर अरा अम्बियर ती किरिम बिच्चियर।
बेंज्रना अरा उज्जा चो'अना
(मर 12:18-27; लूक 20:27-40)
23अउलम, केचका ख़ॊख़ा उज्जा चो'अना र'अम मलकी ब'ऊ सदुकीर#22:23 सदुकी यहूदी समाज ता ओन यहूदी धरम खोंड़हा हवे। येसुस गुसन बर'अरकी मेंजर,#तइ 23:8 24“अना गुरु! मूसस एमा गे एन्ने पॆसका चिच्चस का, एकअम ओर्तस बिगर ख़द्द-ख़र्रा ही खे'अदस कादस, अरा आसी तंग्आली उज्जाली होले, आसी भइय्योस गे अदिन बेंज्रना ती केचका तंग्है भइय्योस गे ख़द्द कुन्द्रत'अना र'ई।#व्य 25:5 25ओंग्होन एम्है नू सात भइय्योर रहचर। कोहँस बेंज्रस ती बिगर ख़द्द-ख़र्रा केच्चस केरस चड्डे तंग्है आलिन भइय्योस गे अम्बियस केरस। 26मझलस अरा सझलस हूँ एन्नेम नंजर, अरा सातियो भइय्योर गुट्ठी इन्नेम बेंज्रर। 27ओर्मर ती ख़ॊख़ा आ मुक्का हूँ केच्चा केरा। 28अक्कुन एमन तेंगा, उज्जा चो'अना नू आद सतियो भइय्योर ती नॆखअय मनो, एन्देरगेका आद ओर्मर ही मुक्का मंजकीचा।”
29येसुस आरिन आनाकिर्ताचस, “नीम नेम्हा पुथी नू उज्जा चो'अना ही पत्त नू एन्देर लिख्रकी र'ई अदिन बलदर अरा धर्मेस एन्देर नना ओंग्दस अदन हूँ बलदर, ई चड्डे नीम अन्नेम मलदौ सोचदर। 30एन्देरगेका केचका ती उज्जा चो'अना नू आलर अरा आलीर मल बेंज्रनर महले मल बेंजनर। लिकिन आर मेर्ख़ा नू मेर्ख़ा पैकर लेक्खा मनोर। 31लिकिन केचका ती उज्जा चो'अना ही पत्त नू एन्देर नीम धर्मेसी कत्थन मला पढ़चका का धर्मेस मूसस ती एन्देर बाचस? 32‘ऎन अब्राहम अरा इसाक अरा याकॊबसी धर्मे हिकदन।’#निर्ग 3:6 आस केचका आलर ही धर्मे मलदस, लिकिन आस उज्जना आलर ही धर्मेस हिकदस।” 33इदन मेंजर ती आलर आसी तेंगना ती अकबक मंजर केरर।
उर्मी ती कोहाँ पॆसका
(मर 12:28-34; लूक 10:25-28)
34येसुस सदुकीर ही बईन उट्टस ब'अरकी फरिसीर मेंजर ख़ने, आर ख़ॊंड़रर ती भेंट मंजर। 35अबड़र ती ओर्तोस नॆ यहूदी नॆग गुट्ठिन दौले अक्खस, आस आसिन बिढ़'आ गे मेंजस,#लूक 10:25-28 36“अना गुरु! मूसासी नॆग नू उर्मी ती कोहाँ पॆसका एकदा हवे?” 37अरा येसुस आसिन बाचस,#व्य 6:5 “नीन निंग्है धर्मे उर्बासिन निंग्है उर्मी जिया अरा निंग्है उर्मी बॊलता अरा निंग्है उर्मी लूर गने चोन्हा नना। 38कोहाँ अरा मुद्ध पॆसका गा ईदिम हवे। 39अरा ईद लेक्खा दोसरा पॆसका ईद हवे, ‘नीन निंगन एकासे चोन्हा नन्दय अन्ने निंग्है अर्बा-पर्बारिन चोन्हा नना।’#लौव्य 19:18 40इबड़ा ऎंड़ पॆसका दिम सौंसे नॆग अरा धर्मेसी कत्था तिंगुर ही मूली हवे।”
मसीस नॆखअय ख़द्दस
(मर 12:35-37; लूक 20:41-44)
41फरिसीर ख़ॊड्रका रहचर ख़ने, येसुस आरिन मेंजस, 42“मसीसी पत्त नू नीम एन्देर सोचदर? आस नॆखअय बनस ता हिकदस?” अबड़र आसिन बाचर, “मसीस दाऊदसी ख़द्दस हिकदस।” 43आस आरिन मेंजस, “होले दाऊदस नेम्हा बॊलतस नू मन्दस ती आसिन एन्देरगे उर्बस ब'अदस। एकासे का,
44‘धर्मे उर्बस एंग्है उर्बासिन बाचस का,
नीन एंग्है तीना पक्खे ओक्करकी एंग्है गने राजी नना,
ऎन निंग्है बैरीरिन नास नंज ख़च्चोन।’#भज 110:1
45दाऊदस आसिन ‘उर्ब’ मॆख़दस होले आस आसी बनस ता आलस एकासे मना ओंग्दस?” 46अरा नॆ हूँ इदही पत्त नू ओन कत्था हूँ आनाकिर्त'आ पोल्लर। अउला ती नॆका हूँ फिन आसिन मेना गे डिढ मल मंजा।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
मत्तायोस 22: KURUXBSI
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
