Mataio 9
9
Ahiꞌa Mene Haganeꞌeteꞌe Vazeḡa Fainiro
(Mareko 2:1-12, Luka 5:17-26)
1Iesuꞌa ḡasio tiradu duꞌura moneafa fariro ebu aneꞌa radiunuteꞌe neḡa boro Kaperanauma bare onamiro. 2Ebu vaze nuꞌa ahiꞌa mene haganeꞌeteꞌe vazeḡa faratao bazune teadu ani vaḡe herate onairo. Zeḡeꞌa Iesu mazao fieꞌeteꞌe Iesuꞌa horonirotene, ahiꞌa mene haganeꞌeteꞌe vazeḡa niro, raenaꞌa, “Ubude, zamaḡo rinedoꞌi. Ḡae sauꞌa ꞌai aḡutu modeha.” 3ꞌOugirotene, Mose goro ḡoeꞌa ihozeꞌeteꞌe azaḡa nuꞌe zeḡeꞌa bare zamariro, raenaꞌa, “Vaze ꞌadiꞌe ane bare Badiꞌa rae rahehe? Badiꞌa ni rae sausauneꞌohe!”
4Iesu ani zeḡeꞌa nagini zamareꞌeteꞌe ederadu ziro, raenaꞌa, “Nougadu za zamarone sauꞌa zamareꞌohe? 5Ani mazao nougenouge nine, ufiḡa? 'Ḡae sauꞌa ꞌai rae modeha' rae niꞌeteꞌe ga 'Iḡunadu onamoꞌi' rae niꞌeteꞌe? 6Rehano e ani manoniꞌuma ebu ani sauꞌa zu rae modiꞌuma, mazaḡa eḡe, Vaze Ubuḡaꞌe raha ꞌadao vaze sauꞌa rae modeꞌeteꞌe gigiꞌaḡa meiroteꞌe zuni za ihoziꞌuma.” Ebu Iesuꞌa ahiꞌa mene haganeꞌeteꞌe vazeḡa eꞌe niro, raenaꞌa, “Eḡeꞌa ḡaꞌohe, iḡunoꞌi ebu farataḡo odohadu neḡo onamoꞌi” 7Ebu vaze ꞌai iḡunadu neḡa onamiro. 8Vaze ḡuḡuvaḡaꞌe eꞌe horonirotene riharo ebu Badiꞌaꞌa ꞌuguḡa gigiꞌaḡa vaze ziniroteꞌe#9:8 Ga, vaze haroteꞌe uꞌano Badiꞌa niguniro.
Mataio Zamaharo
(Mareko 2:13-17, Luka 5:27-32)
9Iesuꞌa eꞌeanoꞌo ibio onamiro. Ebu vaze ꞌahoga niḡa Mataioꞌa takesi habaꞌano ehoreꞌenogano horoniro. Ebu Iesuꞌa niro, raenaꞌa, “Eḡe hegotoꞌi.” ꞌOugirotene ani iḡunadu Iesu hegotiro.
10Iesuꞌa Mataio neo ogaroteꞌe madaḡano, takesi azaḡa zu haḡai sauꞌa azaḡa ḡehaḡaniꞌa Iesu zu ane tahiꞌatahiꞌa teite ogau tiburaro. 11Farisea azaḡaniꞌa eꞌe horonirotene, Iesu tahiꞌatahiꞌa ḡadiziro, raenaꞌa, “Nougadu zae ihore vazeḡaꞌe takesi azaḡa zu haḡai sauꞌa azaḡa teite ogau tiburuꞌohe?”
12Iesuꞌa eꞌe egadu ziro, raenaꞌa, “Ugi oꞌoꞌa azaḡaꞌe gohe vazeḡa mene vaḡeꞌohe, rehano ugi azaḡaniꞌa ani vaḡeꞌohe. 13Eꞌe teige, zeḡe bare haḡai duduḡa rae zamareꞌeteꞌe azaḡa huzoga radu eḡeꞌa mene onairo. Rehano zeḡe bare haḡai sauꞌa rae zamareꞌeteꞌe azaḡa huzoga radu onairo. Badiꞌaꞌa ꞌahige reiro, raenaꞌa, 'Eꞌe zaeꞌa dibuꞌo inoga daꞌo mene urateꞌohe, rehano vaze vetuḡazoga ufeta urateꞌohe.'#9:13 Hosea 6:6 Za onamadu ḡoere huga eꞌe ederoꞌi.”
Ihore Iziga
(Mareko 2:18-22, Luka 5:33-39)
14Ebu Ioane tahiꞌatahiꞌaꞌa Iesu vaḡe onaadu ḡadiniro, raenaꞌa, “Emeḡe zu Farisea azaḡaꞌe ogomu moneo mada ḡehaḡa zaḡozaḡeꞌohe. Rehano ḡae tahiꞌatahiꞌaꞌe nougadu mene zaḡozaḡeꞌohe?” 15Iesuꞌa ziro, raenaꞌa, “Hahureꞌeteꞌe madaḡano, ohoze hahu iziganiꞌa huzeꞌeteꞌe azaḡaꞌe ane teite ogau tiburaune, ze mene zaḡozaḡeꞌohe. Rehano zeḡe mazaonoꞌo ohoze hahu izigaꞌe mae vaḡiniꞌuma madaḡaniꞌa onaine, zeꞌe vetuḡa ranadu zaḡozaḡiꞌuma.
16Vaze ꞌahoganiꞌa dabua iziga variꞌe madu dabua amahiḡa mene baniniꞌohe, mazaḡa dabuꞌaḡa vuzuine, dabua siꞌiga izigaꞌe ḡuanadu amahiḡa hutubadu borofe zigaꞌuma. 17Ebu vaze ꞌahoganiꞌa vaini vuḡa fuse#9:17 Gouti ogaḡa hina haḡairoteꞌe fuseḡa amahiḡa zamaḡano vaini vuḡa iziga mene beꞌune ufiꞌohe. Beꞌune ufine, vaini vuḡa iziga aneꞌa bare busure bororadu fuse amahiḡaꞌe zigaꞌuma. Ebu sore rururanadu fuse amahiḡa sausauniꞌuma. Eꞌanoꞌo vaini vuḡa izigaꞌe fuse izigano beꞌune ufiꞌohe ebu anianineꞌe manoḡa radiuꞌohe.”
Roḡae Tahiꞌaḡa ebu Ugi Roḡaeḡa
(Mareko 5:21-43, Luka 8:40-56)
18Iesuꞌa eꞌe ḡoeꞌa ziniroteꞌe zamaḡano, nuꞌonuꞌo neḡa ḡihiꞌaḡa ꞌahoganiꞌa Iesu vaḡe onairo. Ebu ani zamao ḡuḡuradu niro, raenaꞌa, “Eḡe aboeꞌe iziduꞌu rudaneha. Rehano ḡaeꞌa onaadu ane rana ꞌevoꞌo tine, ani ḡabodiꞌuma.” 19Ebu Iesu zu ane tahiꞌatahiꞌaꞌe iḡunadu ane teite onamiro.
20Onamiroteꞌe zamaḡano roḡae ꞌahoga, roḡae ugi madu muri 12 radiunuteꞌeꞌa, Iesu ḡarunio onairo ebu ani dabua ꞌariḡa oboniro. 21Mazaḡa aniꞌe zamareꞌenaꞌa, 'Eꞌa dabuaḡa tahiḡa obonine manoriꞌuma.' 22Ebu Iesuꞌa tehadu roḡae eꞌe ḡianiro, raenaꞌa, “Aboe, zamaḡo rinedoꞌi! Ḡaeꞌa eḡe mazao fiateꞌe uꞌano ugiḡoꞌa manoreha.” ꞌOuge reiroteꞌe madaḡano roḡae ꞌai manoriro.
23Iesuꞌa nuꞌonuꞌo neḡa ḡihiꞌaḡa neo feurirotene, rune badaḡa haḡaeꞌeteꞌe azaḡa zu vaze ḡuḡuvaḡaniꞌa haraeꞌeteꞌe horoziro. 24Ebu aniꞌa ziro, raenaꞌa, “Zae niduꞌa buanoꞌi! Roḡae tahiꞌaḡaꞌe mene rudaneha. Aniꞌe bazeꞌohe.” Rehano zeꞌe Iesu eḡofoharo. 25Vaze ḡuḡuvaḡa enoneo tuḡuze buziroteꞌe ḡarugano, Iesuꞌa ne zamaḡa diuḡadu roḡae tahiꞌaḡa ꞌevore oboniro. ꞌOugadu aneꞌa iḡuniro! 26Ebu eꞌe hariḡaꞌe eꞌe habaꞌa niduꞌa zamaḡano ḡehararo.
Ubuma Kuru zu Mumutafa Vazeḡa Faiziro
27Iesuꞌe deꞌea mode onamiroteꞌe madaḡano, ubuma kuru vazeḡa ꞌaheuꞌa ani hegotiro. Zeꞌa ḡihau huaro, raenaꞌa, “Davida mariga, eme vetuḡafoꞌi!” 28Iesuꞌa ne diuḡirotene, ubuma kuru azaḡaniꞌa ane vaḡe onairo. Iesuꞌa ḡadiziro, raenaꞌa, “Za eḡeꞌa faiziꞌuma rae fieꞌehe?” Zeꞌa naenaeninaꞌa, “Oꞌe, Zuhiꞌa Boro.” 29Ebu aniꞌa ubumaze obonadu ziro, raenaꞌa, “Zaeꞌa eḡe mazao fieꞌeteꞌe idunaḡano ubumazeꞌa manoriꞌuma.” 30Ebu ubumazeꞌa raꞌaro. ꞌOugadu Iesuꞌa riḡa hune ziro, raenaꞌa, “Zae mazao fureranateꞌe ḡauḡa vaze ꞌahoga ago noꞌi.” 31Rehano ze onamadu eꞌe habaꞌa niduꞌa zamaḡano ani hari rae ḡehaniro.
32Ebu ze neonoꞌo buau onamirotene, vaze nuꞌa vaze ꞌahoga Iesu vaḡe tutune onairo. Vine sauꞌaniꞌa vaze eꞌe ragano radu aniꞌe ḡoeroga mene idararo. 33Ebu Iesuꞌa vine sauꞌa ane mazaonoꞌo hegone bunadu mumutafa vazeḡaniꞌa ḡoeriro. Vaze ḡuḡuvaḡaniꞌa eꞌe horonadu zaguzagaro, ebu raenaꞌa, “Ibite Isaraela habaꞌano ꞌahiguḡa mene fureraro.” 34Rehano Farisea azaḡaniꞌa raenaꞌa, “Aniꞌe vine sauꞌa zuhiꞌaḡa gigiꞌaḡano vine sauꞌa hegone buneha.”
Gau Azaḡaꞌe Tahiḡa
35Iesuꞌa habaꞌahabaꞌa zu ne niduꞌa ragaveꞌenaꞌa, zeḡe nuꞌonuꞌo neḡano ihozinu zu Badiꞌaꞌa ibitoziniꞌeteꞌe hariḡa manoḡa haraminu ebu ugi nunu niduꞌa faizinu. 36Iesuꞌa vaze ḡuḡuvaḡa horozirotene, vetuḡaziro, mazaḡa zamazeꞌe adudaro zu zeꞌe dana mene hidiro. Zeꞌe vazeꞌa mene taufeꞌeteꞌe mamoeḡa heuḡa. 37Ebu ani ane tahiꞌatahiꞌa ziro, raenaꞌa, “Hiriveꞌeteꞌe ḡauḡaꞌe ḡehaḡa, rehano gau azaḡaꞌe tahiḡa. 38Eꞌanoꞌo hiriveꞌeteꞌe Zuhiꞌaḡa, Badiꞌa mazao gau azaḡa ane mebao tuḡuzoga veize uminoꞌi.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mataio 9: KSJ
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Wycliffe Bible Translators, INC.
