Mataio 5
5
Maḡano Haramiro
(Luka 6:20-23)
1Iesuꞌa vaze ḡuḡuvaḡa horozirotene, ani maḡa ꞌahoga itadu eꞌea ehoriro. Ebu ane tahiꞌatahiꞌaniꞌa ane vaḡe onairo. 2Onairotene Iesuꞌa ihoziro, raenaꞌa,
3“Zamaze zaharaḡa azaḡaꞌe Badiꞌa manohugazeta,
mazaḡa Badiꞌaꞌa ibitoziniꞌohe.
4Zamaze areꞌenaꞌa, niauꞌeteꞌe azaḡaꞌe Badiꞌa manohugazeta,
mazaḡa zeꞌe Badiꞌaꞌa namiziꞌuma.
5Zamaze roḡeḡa azaḡaꞌe Badiꞌa manohugazeta,
mazaḡa zeḡe ꞌevorao haba riꞌiniꞌuma.
6Badiꞌaꞌa urateꞌetaꞌaꞌe haḡaihi rae inareꞌeteꞌe azaḡaꞌe Badiꞌa manohugazeta,
mazaḡa Badiꞌaꞌa danazadu zeꞌa ꞌouge haḡaiꞌuma.
7Vaze vetuḡaziꞌeteꞌe azaḡaꞌe Badiꞌa manohugazeta,
mazaḡa Badiꞌaꞌa ze vetuḡaziꞌuma.
8Zamaze deheḡa azaḡaꞌe Badiꞌa manohugazeta,
mazaḡa zeꞌe Badiꞌa horoniꞌuma.
9Vazevaze uniho mae manofeꞌeteꞌe azaḡaꞌe Badiꞌa manohugazeta,
mazaḡa Badiꞌaꞌa zeꞌe ane ubuga rae huziꞌuma.
10Badiꞌa ura haḡaeꞌeteꞌe uꞌano, vazeꞌa sausauziꞌeteꞌe azaḡaꞌe Badiꞌa manohugazeta,
mazaḡa zeꞌe Badiꞌaꞌa ibitoziniꞌohe.
11Zaꞌe eḡe hegoteꞌeteꞌe uꞌano, vazeꞌa rae sausauzine, agirezinine ga ḡurireꞌenaꞌa ḡoere sauꞌa nunu niduꞌa zae rana tine, Badiꞌa manohuga hideꞌohe. 12Za, matuꞌe rudanoꞌi, mazaḡa Badiꞌaꞌa adureo naeḡaꞌe boro bagaḡa ziniꞌuma. Vouḡazeꞌa peroveta ibiꞌa azaḡa zuni deꞌuge sausauzido.
Dama zu Ihure Agaḡa
(Mareko 9:50, Luka 14:34-35)
13Damaꞌe ḡau manoḡa raꞌeteꞌe teige, zaꞌe, eḡe hegoteꞌeteꞌe azaḡa, raha ꞌadao dama heuḡa. Rehano dama iniganiꞌa dauḡine, iniga bare furenoga mene idaḡa. Ḡau ꞌahoga veize mene manoḡa. Aꞌe mae modadu vazeꞌa edene oname onaeꞌohe.
14Zaꞌe, eḡe hegoteꞌeteꞌe azaḡa, raha ꞌada aganeꞌeteꞌe ihure agaḡa heuḡa. Maḡa hitagano radiuꞌeteꞌe neḡa boroꞌe ꞌuꞌuranoga mene idaḡa. 15Vazeꞌa ihure hofadu siuva ꞌuꞌuḡano mene teꞌohe, rehano ihure tiꞌeteꞌe habaꞌano teadu ne zamaḡano radiuꞌeteꞌe azaḡa niduꞌa agazeꞌohe. 16Ihure agaḡaniꞌa vaze niduꞌa agazeꞌeteꞌe teige, zae haḡai manoḡa vaze mazao ago uꞌure toꞌi, rehano furenoꞌi. ꞌOugine, vazeꞌa zae haḡai manoḡa horonadu Moze adureo niguniꞌuma.
Mose Goro Ḡoeꞌa
17Zaꞌe, eḡeꞌa Mose goro ḡoeꞌa zu peroveta azaḡa ḡoere fahoga radu onairo rae ago zamaroꞌi. Eꞌe zeḡe ḡoereꞌa hudanoga veize onairo. 18E hube hune ziꞌohe, adure zu raha izema dauḡogano Mose goro ḡoeꞌa mirihoḡa komeꞌa fase zuni mene dauḡiꞌuma, rehano goro ḡoeꞌa niduꞌaꞌe hudaꞌuma. 19Eꞌanoꞌo iniuꞌa Mose goro ḡoeꞌa komeꞌa ꞌahoga zuni variꞌine ebu vaze ꞌouge ihozine, aniꞌe Badiꞌaꞌa ibitoziniꞌeteꞌe azaḡa boꞌaḡano niḡa mae ovoiꞌuma. U iniuꞌa goro ḡoeꞌa tihitihinine ebu vaze ꞌouge ihozine, aniꞌe Badiꞌaꞌa ibitoziniꞌeteꞌe azaḡa boꞌaḡano niḡa mae itiꞌuma. 20E ziꞌohe, zaꞌa Badiꞌa ḡoere hegoteꞌetaꞌaꞌe, Mose goro ḡoeꞌa ihozeꞌeteꞌe azaḡa zu Farisea azaḡa haḡaiḡa mene vitizine, Badiꞌaꞌa za mene ibitoziniꞌuma.
Maḡunu zu Gorugoru
21Ibiꞌa azaḡa mazao reiroteꞌe goro ḡoeꞌa ꞌadi zaeꞌa igiro, raenaꞌa, 'Vaze ago mau runoꞌi.#5:21 Exo 20:13 Iniuꞌa vaze ꞌahoga maune, kotaniꞌuma.' 22Rehano e ziꞌohe, iniuꞌa negoḡa mazao maḡunine, kotaniꞌuma. Iniuꞌa negoḡa ḡoere sauꞌa nine, Iuda azaḡa nuꞌonuꞌo zamaḡano kotaniꞌuma. Ebu iniuꞌa 'Ḡa hahizaḡa,' rae reine, ire roga zamaḡano mae feuniꞌuma.
23Eꞌanoꞌo ḡaeꞌa dibuꞌo fataḡano ḡahunoḡo hauꞌeteꞌe madaḡano negoḡo ꞌahoganiꞌa ḡae mazao maḡuniroteꞌe zamaroꞌidene, 24ḡahunoḡoꞌe fata ḡenaḡano modoꞌi, ebu negoḡo vaḡe onamadu ane teite uniho manofoꞌi. Eꞌe ḡaruganobuꞌu bare onaadu ḡahunoḡo hanoꞌi.
25Ḡaꞌe vaze ꞌahoga moni madu mene bare haune, aniꞌa ḡae kotao ohoꞌihi radu ani teite kota onamiꞌuma. Eꞌe madaḡano ḡanine ge ibio uniho manofoꞌi. Mene ꞌougine, aniꞌa ḡa kota vazeḡa ꞌevorao ohoꞌiꞌuma, ebu ḡuꞌa neḡa taufeꞌeteꞌe vazeḡa ꞌevorao ohoꞌadu ḡuꞌa neḡano ohoꞌiꞌuma. 26E hube hune ḡaꞌohe, ḡa mene buaꞌuma onamo ḡaeꞌa ani moni niduꞌa bare haꞌuma.
Ubuma Ago Ḡezanoꞌi
( Mataio 19:9, Mareko 10:11-12, Luka 16:18)
27Zaꞌe edeḡa, Mose goro ḡoeꞌano ꞌahige reiro, raenaꞌa, 'Ubuma ago ḡezanoꞌi.' 28Rehano e ziꞌohe, iniuꞌa roḡae ḡiaḡianeꞌenaꞌa, ane zamao roḡae omo teite bazihi rae zamarine, ani ꞌai zamao ubuma ḡezaneha. 29Ḡae edaꞌe ubumaḡaniꞌa haḡai sauꞌa haḡaoꞌidene, eꞌe ubumaḡa ḡude modoꞌi. Mazaḡa ahiriḡo tahiḡa modeꞌetaꞌaꞌe aduga komeꞌa, u ahiriḡo niduꞌa ire roga zamaḡano mae feuꞌeꞌetaꞌaꞌe ufeta aduga boro. 30Ebu ḡae edaꞌe ꞌevoꞌaniꞌa haḡai sauꞌa haḡaoꞌidene, eꞌe ꞌevoꞌaꞌe variꞌe modoꞌi. Mazaḡa ahiriḡo tahiḡa modeꞌetaꞌaꞌe aduga komeꞌa, u ahiriḡo niduꞌa ire roga zamaḡano mae feuꞌeꞌetaꞌaꞌe ufeta aduga boro.
Inuga Modeꞌeteꞌe Moneo
31Za edeḡa, Mose goro ḡoeꞌano ꞌahige reiro, raenaꞌa, 'Iniuꞌa inuga modoꞌidene, aniꞌa ihore soꞌaḡa mirihadu inuga hanoꞌi.'#5.31 Deu 24:1 32Rehano e ziꞌohe, iniuꞌa inugaꞌe mene ubuma ḡezaro rehano, inuga modine, iꞌaniꞌa ubuma ḡezo ibiḡano inuga tuḡuneꞌeteꞌe heuḡa. Ebu iniuꞌe iꞌaniꞌa modiroteꞌe roḡaeḡa teite hahurine, ani zuni ubuma ḡezauꞌeteꞌe heuḡa.
Ago Ḡoitoroꞌi
33Ibiꞌa azaḡa mazao reiroteꞌe goro ḡoeꞌa ꞌadi zaeꞌa igiro, raenaꞌa, 'Nagni ḡoitoroꞌidene, ago variꞌoꞌi. Badiꞌa mazao ḡoitoroꞌidene huga haḡaoꞌi!'#5.33 Num 30:2 34Rehano e ziꞌohe, ḡoere nagiga ꞌahoga ago ḡoitoroꞌi. Adure niḡano ago ḡoitoroꞌi, mazaḡa adureꞌe Badiꞌaꞌa ehoreꞌeteꞌe habaꞌa. 35Raha niḡano ago ḡoitoroꞌi, mazaḡa rahaꞌe Badiꞌaꞌa odaḡa tiꞌeteꞌe habaꞌa. Ierusalema niḡano ago ḡoitoroꞌi, mazaḡa Ierusalemaꞌe Kini Boro, Badiꞌa neḡa boro. 36Ḡoitoriroteꞌe mene haḡaine rudaꞌuma rae ago ḡoitoroꞌi, mazaḡa ḡaboneze zu zaeꞌa mene haḡairo. Zaꞌe iguze tiba zuni mae ꞌurunoga zu mae ḡunoga mene idaḡa. 37Zaeꞌa nagini ꞌahoga haḡaiꞌuma roꞌidene, 'Oꞌe, e haḡaiꞌuma', ga 'Mene, e mene haḡaiꞌuma' daꞌo rae roꞌi. Ḡoere ꞌahogaꞌahoga ragatine, aꞌe Sataniꞌonoꞌo fureruꞌohe.
Haḡai Sauꞌano Ago Naenaetitoꞌi
(Luka 6:29-30)
38Zaꞌe edeḡa Mose goro ḡoeꞌano ꞌahige reiro, raenaꞌa, 'Vaze ꞌahoganiꞌa ḡae ubuma sausaunoꞌidene ga ḡae ḡonone vahegoꞌidene, vazeḡa eꞌe ubuma zu sausaunoꞌi ebu ane ḡonone zu vahegoꞌi.'#5.38 Exod 21:24; Lev 24:20; Deut 19:21 39Rehano e ziꞌohe, vaze sauꞌa mazao ago naenaetitoꞌi. Vaze ꞌahoganiꞌa zae edaꞌe ḡaniga faꞌoꞌnoꞌidene, aniꞌa bare faꞌoꞌnoga veize zae kauri ḡaniga zuni notonohanoꞌi. 40Vazeꞌa dabuꞌaze mouga rae kotazihi roꞌidene, raga dabuꞌaḡa zuni hanoꞌi. 41Vaze ꞌahoganiꞌa riḡa tuḡuzenaꞌa, zaeꞌa ane ḡau odohadu kilomita tiba onamoga uratoꞌidene, kilometa ꞌaheu zuni onamoꞌi. 42Iniuꞌa umizoꞌidene hau tauḡoꞌi, zu ḡauze ꞌahoga umizadu vesu baroniꞌuma rae roꞌidene, ago hezahohanoꞌi.
Agire Azaḡa Zamaroꞌi
(Luka 6:27-28, 32-36)
43Zaꞌe edeḡa Mose goro ḡoeꞌano ꞌahige reiro, raenaꞌa, 'Ḡae nabudi zamaroꞌi, ebu ḡae agire vazeḡa heꞌeheꞌenoꞌi'#5.43 Lev 19.18 44Rehano e ziꞌohe, zae agire azaḡa zamaroꞌi, ebu zae sausauziꞌeteꞌe azaḡa veize kuranoꞌi. 45ꞌOugine, zaꞌe Moze adureo ani ubuga rae reꞌuma. Mazaḡa Mozeꞌe vaze manoḡa zu sauꞌa veize idane mada aganoziniꞌohe, ebu vaze haḡai duduḡa zu veꞌoḡa veize idane irugu tuḡunadu ruꞌauꞌohe. 46Zaꞌe zae zamareꞌeteꞌe azaḡa daꞌo zamarine, Badiꞌaꞌa eꞌe naeḡa mene ziniꞌuma. Takesi azaḡaꞌe haḡai sauꞌa azaḡa rehano, zeḡe zuni ze zamareꞌeteꞌe azaḡa zamareꞌohe. 47Zaꞌe zae nabudi mazao daꞌo manoḡa haḡaine, vaze mene vitiziꞌuma. Badiꞌa aḡuꞌa azaḡa zuni ꞌouge haḡaeꞌohe. 48Eꞌanoꞌo agire azaḡa zu zamare hunoꞌi. Badiꞌa mazaoꞌe veꞌoḡa oꞌoꞌa teige, za zu veꞌoḡa ꞌahoga ago haḡaoꞌi.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mataio 5: KSJ
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Wycliffe Bible Translators, INC.
