Matayi 23

U Yesu akubasoka abantu nizya bamanyisi aba Ndaghilo naba Falisayi

(Mlko. 12.38-39; Luk. 11.43, 46, 20.45-46)

1Po u Yesu akachibuzya ichilundilo icha bantu na bamanyili bache akati, 2“Abamanyisi aba Ndaghilo naba Falisayi bapeghiwa ubulaghili ubwakung'anamula Indaghilo izya Mozesi. 3Po mwivwilaye nukubomba vyosi vivyo bakubabuzya. Loli mutakeghelelaye imbombo zyabo pakuti batakubomba zizyo bakulumbilila. 4Bakubapinyilila ukatundu umung'wamu pavipunko ivya bantu, loli abene batakulondagha pakubombezya akafingwi ukubavwa pakunyamula ukatundu yula. 5#Mat. 6.1; Ukb. 15.38; Ukk. 6.8Bakubomba zyosi izi ukuti abantu babennye. Ennya Amasimbo pankigha zizyo bakupinya kumutu na panyobe, sona ennya ubukulu mumo zibeleye! Ennya amabuzi amatalitali munkazo zyabo.#23.5 amabuzi amatalitali munkazo zyabo: Imibuzi yiniyi yikalanjizya ukuti bakaba bantu abanyiputo. 6Bakwighana ubuzilo ubwa buchindamu palusekelo nukwikala pa vitengo ivya pamwanya munyumba izyakwiputilamo. 7Bakwighana ukuti abantu babalamukaye nu muchizi muminalo nukwitiziwa ukuti, ‘Bamanyisi.’ 8Uleke ukwitiziwa ukuti, Mumanyisi, Pakuti mwebosi mwe ba nyumba yoka, sona muli nu Mumanyisi weka. 9Po mutakamwitizyanje umuntu yumo pachisu ichapasi pano ukuti Tata, pakuti muli nu Ghuso weka uwakumwanya. 10Pamo pakwitiziwa ukuti Mulongozi, pakuti muli nu mulongozi weka yuyo we Kilisitu. 11#Mat. 20.26-27; Mlko. 9.35, 10.43-44; Luk. 22.26Usongo mumwinyu abanje wambombo winyu. 12#Luk. 14.11, 18.14Umuntu wesi yuyo akwikwezya mwene akwiza pakwisiwa, sona umuntu wesi yuyo akwiyisya mwene akwiza pakukweziwa.

U Yesu akubususya ubuzimbuli bwabo

(Mlko. 12.40; Luk. 11.39-42, 44, 52; Luk. 20.47)

13“Chighune nkani kukwinyu, amwe mwe bamanyisi aba Ndaghilo naba Falisayi! Mwe bazimbuli mwee! Mukwighalila umulyango uwa Bumwene ubwa Kumwanya pamaso pabantu, po amwe mwebene mutakwinjilamo, pamo ukwitikizya babo bakuyezya ukwinjilamo.#23.13: Amasimbo ghamo aghakale ghonjelezya: 14 Chighune nkani na bamanyisi aba Ndaghilo naba Falisayi, mwe bazimbuli! Mukwiba vivyo vya bakolo abafwilwe nukufyula inyumba zyabo, sona mukwiputa inyiputo intali ukuti abantu babennye. Pachifukwa chinichi mukwiza pakufundiwa nkani! (Ennya mwa Mlko. 12.40).

15“Chighune nkani kukwinyu, mwe bamanyisi aba Ndaghilo naba Falisayi! Mwe bazimbuli mwee! Mukuba na mabulendo agha panyanja nukwenda amabulendo amatali nukusikula umuntu yumo ukuti abanje mumanyili winyu, po nanti mwamwagha weka mukumupela pakuba wakubaghila ku Gehena ukuchila mwebene kabili.

16“Chighune nkani kukwinyu, mwe balongozi abafwamaso! Mukumanyisya ukuti, ‘Nanti umuntu akulapila Inyumba iya Chala pate ichifukwa. Loli nanti akulapila ugolide uwamu Nyumba iya Chala, po akwipinya ni chilapo chache.’ 17Mwe bafwamaso abapunganu! Chili ko kwiyi chicho chapamwanya nkani, ugolide pamo Inyumba iya Chala chicho chikupanga ugolide pakuba muzelu? 18Sona mukumanyisya ukuti, ‘Nanti umuntu akulapila ichighemo pate ichifukwa. Loli nanti akulapila ichabupi, po akwipinya ni chilapo chache.’ 19Mwe bafwamaso amwe! Chili ko kwiyi chicho chapamwanya nkani, ichabupi pamo ichighemo chicho chikupanga ichabupi pakuba chizelu? 20Po nanti umuntu akulapila ichighemo, akulapila pachinichi ni chabupi chosi chicho chili panapo. 21Sona nanti akulapila Inyumba iya Chala, akulapila chinicho nu Chala yuyo akwikala mulamula. 22#Yes. 66.1; Mat. 5.34Po nanti umuntu akulapila kumwanya, panapo akulapila ichitengo icha Chala na yuyo ikayepo palapala.

23 # Lev. 27.30 “Chighune nkani kukwinyu, amwe mwe bamanyisi aba Ndaghilo naba Falisayi! Mwe bazimbuli mwee! Mukubika kwa Chala ichigaba choka pa vigaba 10 ivya vilungo vyinyu ngati bo busambya nu kale nu kanyezi, loli mukukana ukwivwila ichimanyisyo ichapamwanya nkani icha Ndaghilo, pakuba bwanaloli, ni chisa nu busubiliwa. Ivi vyo vintu vivyo mubombaye ukusita pakuvilekapo vimo. 24Mwe balongozi abafwamaso amwe! Mukwefyamo akabwele muvyakung'wela vyinyu, loli mukumila bulo ingamila!

25“Chighune nkani kukwinyu, amwe mwe bamanyisi aba Ndaghilo naba Falisayi! Mwe bazimbuli mwee! Mukusuka kuzi ukwa lubako ni mbale zyinyu, loli mukasi mwizuye nu bupafu nu buvyondongo. 26Mwe ba Falisayi abafwamaso amwe! Efyamo tasi vivyo vili mukasi mulubako, po kope kuzi kukwiza pakuswepa!

27 # Imbo. 23.3 “Chighune nkani kukwinyu, amwe mwe bamanyisi aba Ndaghilo naba Falisayi! Mwe bazimbuli mwee! Pakuti muyanite bulo na mapumpa ghagho ghapakaziwe ni banya ghagho ghakuboneka akiza kuzi, loli mukasi mwizuye na mafupa ni vintu ivibozu ivinji. 28Momumo, kuzi ukwa mubili mukuboneka akiza, loli mukasi mwizuye nu buzimbuli ni mbibi.

U Yesu akunenela zila nizya lufundo lwabo

(Luk. 11.47-51)

29“Chighune nkani kukwinyu, mwe bamanyisi aba Ndaghilo naba Falisayi! Mwe bazimbuli mwee! Mukuzenga amapumpa amiza agha balaghuzi nukuyannya akiza amapumpa agha bantu abagholosu. 30Po mukunena ukuti, ‘Nanti aswe tukikala pakabalilo aka abanyenya bitu ngali tutakabomba zizyo bakabomba nukughogha nabo abalaghuzi.’ 31Po mukwitika ukuti mwe luko ulwa bantu babo bakaghogha abalaghuzi! 32Po mwendelele nukumalizya zizyo abanyenya binyu bakanda!”

33 # Mat. 3.7, 12.34; Luk. 3.7 “Mwe njoka, abana aba chipili! Nkimba po mungapona bulibuli ukufundiwa mu Gehena? 34Po nkubabuzya ukuti nkwiza pakutuma abalaghuzi na bantu abamahala na bamanyisi. Bamo mukwiza pakubaghogha. Bamo ukubakomela pachipinjika nukubasyempa abamwabo munyumba izyakwiputilamo nukubachimbizyamo mukaya ukubuka mukaya akanji. 35#Yel. 22.5Pachifukwa icha kughogha abantu abiza bosi, ulufundo lukwiza pakuba papinyu, ukwandila pakughoghiwa ukwa Abeli mupaka pakughoghiwa ukwa Zekaliya umwana uwa Belakayi, yuyo mukamughogha pakasi pa Nyumba iya Chala ni chighemo. 36Naloli nkubabuzya ukuti ulufundo ulwa baghoghi aba lukwiza pakuwila pabantu abankulilo iyi!”

Ulughano ulwa Yesu pa Yelusalemu

(Luk. 13.34-35)

37“Wee Yelusalemu, wee Yelusalemu! Ukughogha abalaghuzi nukuzitiza na mabwe intumi zizyo u Chala akutumiye! Akabalilo akinji nalondagha pakubabungannya abana bako ukuyana namumo inkuku yikufukatilila utwana twache muvipapande, loli utakanyitikizya. 38Ennya, ilelo Inyumba yinyu iya Chala yikwiza pakuba chisami. 39#Mas. 118.26Nkubabuzya ukuti ukwandila pakabalilo aka, mute mukanyennyepo nalumolumo mupaka munene ukuti, ‘U Chala amusaye yuyo akwiza mwitabwa ilya Mwene.’ ”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matayi 23: LMBNT2016

Highlight

ಶೇರ್

ಕಾಪಿ