MARIKO 7
7
Pitonwegap poisyek
(Mat 15:1-9)
1Ki iyumjigei ineendet Pharisaik ak alak eng' siriik che kiga pun Jerusalem, 2ak ki keer alak eng' kasubikyik koamei magatiinik eng' eunek che murwonen, nooto ko, eunek che ma kiuun. 3Amu ngot koma iun eunekwak komyee Pharisaik ak Yahudik tugul koma amisyei, kosubi piteetap poisyek; 4ak ye punu ye mi ole kiyae mung'aaret, ko ngot koma iungei koma amisyei. Ak miitei pitonwek alak che chaang' che kitaach si koriip komyee, ko uu kaunetap kigombok, tereenik ak tuguuk che po sugunwet.
5ki teebee ineendet `Pharisaik ak `siriik kole, “Lyon si ma pendoti kasubiguk kosubi piteetap poisyek, ago amisye eunek ko murwonen?” 6#Isa 29.13 Ki mwachi icheek koleenji, “Kisip komwa Isaiah iman agobo okweek chombilik, ko uu ye siraat kole,
‘Teecha pichu eng' kutusweekwak,
ago looen mugulelwekwak eng' anee.
7Ilaswo puch;
ng'atuutigap piik kaneetisyosyek che ineetisye.’
8Obagaaktoi ng'atuutyetap Kamuktaindet, ak onamjigei piteetap piik.”
9Ki leenji icheek, “Oeesyoi iman ng'atuutyetap Kamuktaindet si kobiit oriip piteeng'wong'! 10#Kom 20.12; 21.17; A.La 20.9; NKNg'a 5.16 Amu ki le Musa, ‘Teech kwandang'ung' ak kamenng'ung',’ ak, ‘Ineendet ne mwaei yaityet agobo kwanda anan kamet komeei iman.’ 11Ago omwae ole ngo leenji chii kwanda anan kamet, ‘Kiit ne kata atoretenen ko Korban’ ye kiweech ko Kagoochinet, 12ko mata ochamji anyun ineendet kotoret kwanda anan kamet. 13Oyai anyun ng'olyootap Kamuktaindet koek puch eng' piteeng'wong' ne ki ong'at. Ak oyae tuguuk alak che chaang' che uu chooto.”
Tuguuk che ng'emei chii
(Mat 15:10-20)
14Ki kuur tuiyet kogeny kobwa ye mi ineendet ak koleenji, “Ogasa okweek tugul si oguiye: 15Ma mi kiy ne mi chii saang' ne ngwo oriitinnyi komuuchi kong'wanit ineendet, ago tuguuk che mang'une chii ko chooto che ing'waniti chii.” 16Ngo tinyei chii iitiik che kastoe, kogas.
17Ye kingo pagaakta tuiyet kwo ko, koteebe kasubikyik agobo kalewenonooto. 18Ki leenji icheek, “Tos motinye kaguiyet ak okweek? Mogeere ole kiy tugul ne mi saang' ak kwo oriit, koma koi imuuch kong'wanit chii, 19amu ma chut muguleldanyi ago chutei moet, si komanda koba timiin?” (Uu nooto, kiitiliil amitwogik tugul.)
20Ak ki le, “Kiit ne mang'une chii ko nooto ne ing'waniti chii. 21Amu mang'une oriit, eng' muguleldap chii, kabwaatutik che yaach: sokseet, choorsosyek, rumisyosyek, ibeetapkei, 22kasetap myat, yaityet, ng'aalseet, mageet ne ya, kong' ne ya, ng'aleek che yaach, menoteet, ak perberyo. 23Mang'une oriit tuguuchuuto tugul yaacheen ak kong'wanit chii.”
Kayaneetap Kwony ne po Surophoenike
(Mat 15:21-28)
24Ki ng'eet ineendet eng' olooto ak kwo agoi tabanwegap Tyro ak Sidon. Ki wo koot age ak ki ma mach konai chii, nga ki ma imuuch koung'ak. 25Ak eng' sainooto, kingo kas kobogoryot age ne ki tinyei chepto ne ming'in ne kiga nam tamirmiryet ne murwoon agobo ineendet, konyo ak kobutyi keelyekyik. 26Ki po Yunanik kobogoryondonooto, ne kisalu pororyetap Surophoenike. Ak ki soom ineendet kole koon oindet eng' cheptonyi. 27Ak ki leenji ineendet, “Ingebai lagok korook, amu ma nyolu kenam amitwogigap lagok ak kewiirchi sesenik.” 28Ago ki wolji ineendet koleenji, “Wei, Kiptaiyat; nga amei sesenik ak icheek eng' kurereetap meset amitwogik che po lagok che iroroi.” 29Ak ki leenji kobogoryondonooto, “Ui anyun amu mwaoni; kagomang'une oindet cheptong'ung'.” 30Ki wo anyun koonnyi ak konyoor lakweet koruei eng' itook, ko kagomang'une oindet.
Kasoobetap chii ne ming'aat ak ko uui kuut
31Ki manda kogeny eng' tabanwegap Tyro, ak ki iwerta kobun Sidon kot koit araraita ne po Galilaya, eng' tabanwegap Decapolis. 32Ki kimutyi ineendet chii ne miing'at, ak ko uui kuut; ak kosoom kole kogonoor ineendet eunnyi. 33Ki imut chiichooto kwo taban eng' tuiyet, ak ki irooch moriikyik iitiigap chiichooto, yeityo kong'utyi ak kotwa ng'elyeptanyi. 34Ki inyal kipsengwet, kobus ak koleenji, “Epata!” Nooto ko, “Yaatage!” 35Eng' niito anyun koyatagis iitiikyik ak kotyagak ng'elyeptanyi, ak kong'alaal komyee. 36Ak ki ng'at icheek kole mat komwachi chii; ago ye kites kong'at icheek, kotes anyun pichooto komwaitaat. 37Ak ki kwong'yo miising' ne siirei koleen, “Kagoyai tuguuk tugul komyee; igoochin kogasta agot che ming'otin ak kong'alaal che namotin kuut.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MARIKO 7: KAPR
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
