LUKA 5

Koguurei `Jeso kasubik che po tai

(Mat 4:18-22; Mar 1:16-20)

1 # Mat 13.1-2; Mar 3.9-10; 4.1 Ak ye kingo ta kogiichi tuiyet ineendet, ak kogasei ng'olyootap Kamuktaindet, kotonon ineendet eng' ngeguutap araraita ne po Genesaret; 2ak ki keer moingonik aeng' che po peek kotonondos eng' ngeguutap araraita: ago kiga kochoorgei ramik koba komwet regereiywekwak che kiname njireenik. 3Ak ki laany moinget age, ne ki po Simion, kosoom kole, konaktae kolooit kitigin eng' ngeguut. Ak ki tep ng'wony anyun ak koneet tuiyosyek komi moinget.

4Ak ye kingo kagogees ng'alaalennyi, koleenji Simion, “Ta ikweri moinget kwo ole chaang' peek, ak ochoorte regereiywekwok oramisye.” 5#Jhn 21.3 Ak ki wol Simion kole, “Kiptaiyat, ko ki poisye kemout komugul, ama kinyooru kiy. Ago achoortoi regereiywot amu ng'olyoondeng'ung'.” 6#Jhn 21.6 Ak ye kingo kagoyai ko uu nooto, konam njireenik ng'iisyat; kot kotoi kong'etyo regereiywekwak; 7ak king'wech piik che kiboisyei tugul che ki mi moinget age, kole kobwa kotoret. Kobwa anyun, ak konyiit moingonik tuwai, kot kotoi moingonik kosu.

8Ago ye kingo keer Simion Petero, kobutyi kotung'oigap Jeso, ak kole, “Istoenage, amu aa chii ne po tengek, ee Kiptaiyat!” 9Amu ki kwong', ak tugul che ki mi kobooto ineendet, agobo njireenik che kiga nam; 10ki kwong'yo ak icheek Jakobo ak Johana weeriigap Zebedayo, che kiboisyei tugul kobooto Simion. Ak ki leenji `Jeso Simion, “Ameiyweisye; kobooch nguno iegu ne irame piik.” 11Ak ye kingo kagoget moingonikwak kobwa ngeguut, kobagaakta tugul, ak koosup ineendet.

Kisoobi chii ne amei mogondosaik

(Mat 8:1-4; Mar 1:40-45)

12Ak kingo ta komiitei nganaseet age, ogeero, chiito ne ki nyiitaat mogondosaik: ak ye kingo keer ineendet Jeso, kobut kogutuny, ak kosaisai kole, “Kiptaiyat, ngot icham, imuuchi itiliilo.”

13Ak ki iyogoito Jeso anyun eunnyi, ak kotwa ak kole, “Kaacham. Tiliiliitu.” Ak koma tyanit, kobagaakta mogondosaik ineendet. 14#A.La 14.1-32 Ak ki ng'at anyun koleenji, amat imwachi chii. Kileenji, “Ui ak iboorchigei tisiindet, ak igoite che po katiliileng'ung', ko uu ye ki ng'at Musa, koek paornateet eng' icheeget.”

15Ak kitesak miising' koiyesta logoiywekyik: ak ki iyumgei tuiyosyek che chaang' kobwa si kogas ng'aleekyik ak kisoop eng' myanwekwak. 16Ago kiitabaangei ineegei kwo surkwen kosa.

Kosoobi `Jeso chii ne meat poorto

(Mat 9:1-8; Mar 2:1-12)

17Ak ki ineetisyei eng' peetuut age eng' peetuusyechooto; ak ki mi Pharisaik ak kaneetik che po ng'atuutik kotebyei eng' olooto, che ki punu nganaseet age tugul ne po Galilaya ak ne po Judea ak ne po Jerusalem: ak ki mi kamuktaetap Kiptaiyat kobooto ineendet kosaabe piik. 18Ak ogeero, kilau `piik chiito eng' itoogut ne ki meat poorto. Ki cheeng' ooreet ne imute kwo ko, ak konde ineendet tainnyi. 19Ak ye ki mata konyoor ole imute kwo ko amu chaang'indap piik, kolaany koot parak, ak kochoortae ineendet itogunnyi kobun ole ki kisyep, agoi kwenut eng' taitap Jeso. 20Ak kingo keer Jeso kayanennywa, koleenji, “Chiichi, kagenyoun kaat tengekwogiguk.”

21Ak ki toi siriik ak Pharisaik kobwaat agobo ng'olyoondonooto kole, Ng'oo niito mwaei ng'aleechu yaacheen? Ng'oo ne imuuchi konyochi chii kaat tengekwogik kobatee Kamuktaindet ineegei? 22Ago ye kingo nai Jeso anyun kabwaatutikwak, kowolji koleenji, Obwaati nee eng' mugulelwekwok? 23Nee ne nyumnyum, ngeele, Kaginyoun kaat tengekwogiguk; anan ngeele, Ng'eet ak iwendote? 24Ago si kobiit onai ole tinyei kimnateet Weeriitap chii eng' ng'wony konyochi kaat piik tengekwogik (koleenji chiito ne ki meat poorto), Amwaun ale, Ng'eet, ip itogung'ung' ak iwe koong'ung'. 25Ak king'eet anyun eng' tainnywa, ak ki ip kiit ne karue, ak kwo koonnyi, kolasunoti Kamuktaindet. 26Ak kokwong'yo icheek tugul ak kolas Kamuktaindet; ak ki nyi icheek kaiyweisyet, ak kole, “Kagegeer rani tuguuk che kikwong'ee.”

Keguurei Lawi

(Mat 9:9-13; Mar 2:13-17)

27Ak kingo pata tuguuchu kwo kogeer taagindetap aisuruut, ne kiguure Lawi, kotebyei eng' ole kitaage aisuruut, ak ki leenji, “Isubwo.” 28Ak ki pagaakta tugul, ak kong'eet koosup ineendet. 29Ak kichopchi Lawi ineendet igoorto ne oo eng' koonnyi; ak ki mi tuiyet ne oo ne po taagigap aisuruut ak piik alak che kitebyei eng' amisyet kobooto ineendet. 30#Luk 15.1-2 Ak ki ing'unyng'ung'ji Pharisaik ak siriikwak kasubikyik, kole, Kalya si oamisyei ak oeeisei kobooto taagigap aisuruut ak kiptengeginik? 31Ak ki wolji Jeso koleenji, “Ma mage kiy chepkerichot piik che chamegei; kobatee che myandos. 32Ki ma anyoo aguur che po iman, ago kiptengeginik, si kosik.”

Ng'olyootap karugutetapkei

(Mat 9:14-17; Mar 2:18-22)

33Ak ki leenji ineendet, “Irugutegei konyil che chaang' kasubigap Johana, ak kosaaei, ak yaei ko uu nooto ak icheek che po Pharisaik; ago amisyei cheguuk ak koeisei.” 34Ak ki leenji Jeso icheek, Tos omuuchi ogoochi korugutkei che kogiguurchi katunisyet, kota komi sandet kobooto icheeget? 35Ago pwoonei peetuusyek che tuun ki istoe icheek sandet, korugutkei anyun eng' peetuusyechooto.

36Ak ki mwachi icheek anyun kalewenet kogeny koleenji, “Ma mi chii ne kererei akwot ne po ngoryeet ne leel ak konapchi ngoryeet ne oos; amu ngo yai ko uu nooto ko kereri nooto leel, ak kogeny, ma namegei akwot ne leel ak ne oos. 37Ama mi chii ne indoi divaik che leelach lolotinwek che oosen; ngo yai ko uu nooto ko kereri divaik lolotinwek, ak kotumdagei, ak kong'emogis lolotinwek. 38Ago kanyool kinde divaik che leelach lolotinwek che leelachen. 39Ama mi chii ne ngo kagoee divaik che po keny kota komach che leelach: amu mwaei kole, ‘Myachen che po keny.’ ”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKA 5: KAPR

Highlight

ಶೇರ್

ಕಾಪಿ