LUKA 2

Sigetap Jeso

(Mat 1-18-25)

1Ki pun anyun ng'atuutyet Caesarea Agusto eng' peetuusyechooto kole, kesir kainaigap piik tugul. 2Ne po tai sirisyoni ye ki pounindetap Syria, Kurenio. 3Ki pa anyun tugul si kesir, chii tugul eng' nganasennyi.

4Ki togos agine Joseph eng' Galilaya kobunu nganaseetap Nazareth, agoi Judea, kot koit nganaseetap Daudi, ne kiguure Bethlehem, amu ki po ineendet kootap Daudi, ak ki po ooreennyi; 5si kobiit kesir ineendet kobooto murerennyi Maria, ne ki chii oo. 6Ak kiit sigeetap lakweet, kota komi olooto. 7Ak ki sich weeriinnyi ne po tai; ak kolaakyi ngoroigap lakwandit, ak komogonji kaptugut, amu ki ma komi poroindo eng' kootap toek.

Mwaitaet agobo sigeetap Jeso

8Ak ki mi emonooto mestoweek che kitebyei eng' keeweet koriibei akweennywa ne po keechiirek kemoi. 9Ak ki tonon malaikaiyatap Kiptaiyat eng' ole neegitee icheek, ak ki iluuchi `liilindap Kiptaiyat komoswekwak tugul: koiyweis anyun miising'. 10Ak ki leenji `malaikaiyat icheek, Amoiyweisye; ogeero, aibwok logoiywek che myach che po poiboiyet ne oo ne ityin piik tugul: 11amu kagisikwok Yetindet rani, eng' nganaseet ne po Daudi, nooto Kristo Kiptaiyat. 12Ak ni kaboorunet eng' okweek: Onyooru lakweet ko kagilaakyi ngoroigap lakwandit, korue moinget ne amisye tuuga.

13Ak ki mi eng' sainooto kobooto malaikaiyandanooto chaang'indap lugosyegap kipsengwet che ki ilasu Kamuktaindet koleen,

14Po teegisto Kamuktaindet, eng' ole toroor miising',

Ak kaalyeet eng' ng'wony piik che chamaatiin eng' ineendet.

15Ak kingo kagoweek malaikaisyek koba kipsengwet, koleenjigei mestowechooto, Ongebe nguno agoi Bethlehem, si kobiit kegeer ng'olyoondoniito kagoyaak, ne kagoboorwech Kiptaiyat.

16Ak ki pwa anyun kochook, ak kinyoor Maria ak Joseph, ak lakweet korue moinget ne amisye tuuga. 17Ak ye kingo keer kobarta mwaet ne kagagemwachi agobo lakwanooto. 18Ak ki kwong'yo tugul che ki kas ng'aleechooto ki mwachi mestoweek. 19Ago ki riip Maria ng'aleechooto tugul, kobwaatoti eng' muguleldanyi. 20Ak ki week anyun mestoweek, kotoroori Kamuktaindet ak kolasunoti eng' tuguuk tugul che kagogas ak che kagogeer, ko uu ye kagagemwachi.

Kagoitoetap Jeso eng' Hekaluut

21 # A.La 12.3; Luk 1.31 Ak kingo it peetuusyek sisiit che kiyatitoe ineendet, keguure kainennyi Jeso, ko uu ye kiga kotoochi malaikaiyat kotomo kemanach.

Kemuti Jeso taitap Kiptaiyat

22 # A.La 12.6-8 Ak kingo kagobata peetuusyegap katiliilennywa ko uu Ng'atuutyetap Musa, komut ineendet konyo Jerusalem, si kogoochi Kiptaiyat 23#Kom 13.2,12 (ko uu ye ki kisir eng' Ng'atuutyetap Kiptaiyat, keele, Kiguure ne itabaanat agobo Kiptaiyat weeriit age tugul ne yaatei iyoteet), 24ak kogoito korosyot ko uu ye ki kimwa eng' Ng'atuutyetap Kiptaiyat, keele, Cheptugenik aeng', anan aarek aeng' che po cheptugenik.

25Ogeero, ki mi chiito age Jerusalem, ne ki kiguure Simion; ak ki chiito ne po iman ak kigonyiti Kamuktaindet, ne ki igeni kagaigaetap Israel: ak ki tebee `Kabuuset ne Tiliil ineendet. 26Ak kiga kong'aang'ji ineendet Kabuuset ne Tiliil, kole, ma keerei meet, kotom kogeer Kristo ne po Kiptaiyat. 27Ki nyo anyun Hekaluut eng' Kabuuset ne Tiliil: ak ye kingo muut sigiik lakweet Jeso, si kobiit koyachi ineendet ko uu piteetap Ng'atuutyet, 28konam anyun lakweet eng' eunekyik, ak kolas Kamuktaindet kole,

29“Ee, Kiptaiyat, ichamjini nguno otwogindeng'ung' kwo

eng' kaalyeet, ko uu ng'olyoondeng'ung';

30amu kagogeer konyekyuk yetuneng'ung',

31ne ki ichop eng' taitap piik tugul;

32 # Isa 42.6; 49.6; 52.10 lapkeiyet ne po ng'ang'utyet ne king'aang'jin Pororyosyek,

ak toroornatetap piiguk Israel.”

33Ak ki kwong'yo Joseph ak kametap lakweet agobo tuguuchooto kagimwa agobo ineendet; 34ak ki iberuur Simion icheek, ak koleenji Maria kamennyi, “Keero, kaginde lakwani si kobutyo che chaang' ak kong'eetyo che chaang' eng' Israel; asi koek kaboorunet ne tuun kieesyoi; 35(ee agot inyeendet ko tuun torei rotwetap chok muguleldang'ung';) si kobiit kong'ang'agis kabwaatutigap mugulelwegap piik che chaang'.”

36Ak ki miitei agine Anah, che po Phanuel, ne ki maotyo, ne po ooreetap Asher (ne kiga koosit miising'; ki tebi ak manong'otyot kenyiisyek tisap kobooch ngitun. 37Ak ki tebi ko kwony ne ki kosiirtoe manong'otyot kenyiisyek tamanwogik sisiit ak ang'wan), koma mandoi eng' Hekaluut, ak kolasu, kobooto karugutetapkei, ak soomutik, kemoi ak peet. 38Ak ki nyo eng' sainooto ak kogoochi Kamuktaindet kongoi, ak ki ng'alaalji tugul che ki igeni katyaget eng' Jerusalem agobo ineendet.

Koweektogei Nazareth

39 # Mat 2.23 Ak kingo kagogees tugul ko uu Ng'atuutyetap Kiptaiyat, koweektagei koba Galilaya, agoi nganasennywa Nazareth. 40Ak kiner lakweet, ak kotesak kimnateet, ak ki nyi utaatyet: ak ki mi myeeindap Kamuktaindet kobooto ineendet.

Komi Jeso Hekaluut

41 # Kom 12.1-27; NKNg'a 16.1-8 Ki cham kobendi sigiikyik kenyiit age tugul Jerusalem eng' igoorto ne po paska. 42Ak ye ki po kenyiisyek taman ak aeng', kotogosta icheek koba Jerusalem ko uu piteet ne po igoorto; 43ak ye kingo woong' peetuusyek, ye ki weeksei, kong'et lakweet Jeso eng' Jerusalem: ak ki ma nai sigiikyik; 44ago ki leen mi kobooto piik che ki pendi tugul, koba anyun pandap peetuut komugul; ak ki cheeng' ineendet eng' kwenutap piigap ooreennywa ak che ki ingengei: 45ak ye ki ma nyoor ineendet, koweektagei Jerusalem, kocheeng'at.

46Ak ye kingo keskei peetuusyek somogu, konyoorchi ineendet Hekaluut, kotebyei eng' kwenutap kaneetik, koepchin iit ng'aleekwak, ak koteepse icheeget: 47ak ki kwong'yo icheek tugul che ki epchin iit ineendet amu naennyi ak waluunaikyik. 48Ak ye kingo keer ineendet, kokwong'yo: ak ki leenji `kamennyi ineendet, “Lakwani, kalya si iyaiywech ko uu ni? Keero, kogicheeng'in anee ak kwandang'ung' eng' arageneet.” 49Ak ki leenji icheek, “Amu nee si ocheeng'a? Ma onai ole kanyolja atebee poisyetap Abba?” 50Ki ma iguiyo icheek ng'olyoondonooto kamwachi.

51Ki choorgei anyun kobooto icheeget, ak kiit Nazareth; ak kigase iit icheek: ak kigonor kamet ng'aleechooto tugul eng' muguleldanyi. 52#1Sam 2.26; Kale 3.4 Ki tesak utaatyetap Jeso, ak etunateet, ak myeeindo eng' Kamuktaindet ak eng' piik.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKA 2: KAPR

Highlight

ಶೇರ್

ಕಾಪಿ