TAUNET 7
7
Maraneet ne Oo
1Ki leenji `Kamuktaindet ne Toroor Noah, “Ochut moinget inyee ak piigap koong'ung' tugul, amu kaagerin ale eng' ibini, ko iboo imanda eng' tainnyu. 2Ketuu tyong'ik alak tugul che tiliileen kobwanune tisap tisap, kiruk ak subeen, ak aeng' aeng' eng' tyong'ik che ma tiliileen, kiruk ak subeen; 3ak che po toriitik che po parak ak icheek, tisap tisap, kipsoiywo ak subeen, si keriip kosapcho iyotennywa eng' ng'wony komugul. 4Amu tomo peetuusyek tisabu si ayookyi ropta ng'wony koroobon peetuusyek artam ak kemousyek artam, ak abar awong'u kiy age tugul ne sabei ne ki ayai eng' ng'wony komugul.” 5Ak ki yai Noah tugul ko uu ye ki ng'at `Kamuktaindet ne Toroor ineendet.
6Kingo po Noah kenyiisyek pogol lo, kobiit maraneet eng' ng'wony. 7#Mat 24.38-39; Luk 17.27 Ki chut anyun Noah moinget ak weeriikyik, ak chebyosennyi ak kwonyiigap weeriikyik, si kochililye peegap maraneet. 8Ki pa moinget anyun tyong'ik che tiliileen ak che ma tiliileen eng' toriitik ak tugul che ichuutegei ng'wony 9aeng' aeng' kobooto Noah ko uu ye ki ng'at Kamuktaindet; ne kiruk ak ne subeen. 10Kingo pata anyun peetuusyek tisabu, kobiit peegap maraneet eng' ng'wony.
11 # 2Pet 3.6 Eng' kenyiit ne ki ite Noah kenyiisyek pogol lo, eng' arawet ne po aeng', ak eng' peetuutap taman ak tisap, eng' peetuunooto anyun koyatagis kong'iik che kutune peek che po rireet ne oo ak koyatagis peek eng' kipsengwet. 12Kirobonji ng'wony peetuusyek artam ak kemousyek artam. 13Ki chut anyun moinget Noah eng' peetuunooto kobooto weeriikyik, Shem, Ham, Japhet, chebyosennyi ak kwonyiik somok che po weeriikyik. 14Kichut ak tyony age tugul ko uu kergeindonyi, kiyagiik tugul ko uu kergeindonywa, alak tugul che ichuutegei ng'wony ko uu kergeindonywa, toriit alak tugul ko uu kergeindonywa ak alak tugul che tinyei kebebaik. 15Kichut moinget ole mi Noah icheek tugul che saptos ak kotinyei kabuusetap saboondo, kobee aeng' aeng'. 16Eng' icheek che kichut, ko ki kiruuk ak subeenwo che po tugul che saptos ko uu ye ki ng'at `Kamuktaindet Noah. Ak kigerchi `Kamuktaindet ne Toroor Noah anyun oriit.
17Kimaranee peek ng'wony peetuusyek artam. Kitesak kot koganap `maraneet moinget kwo parak kot kolooit eng' ng'wony. 18Kichang'a ak kogimegitu miising' peek eng' ng'wony kot koreresan moinget eng' peek parak. 19Ki kimegitu peek miising' eng' ng'wony komugul kot kotuch tuloonook tugul che kooen eng' kurereetap kipsengwet. 20Kichaang'it kot kosiir tuloonook, ak ki tuch tuloonook eng' mitainik tisap ak kebeberyat koba parak. 21Ak ki pek tuguuk tugul che saptos eng' ng'wony; toriitik, kiyagiik, tyong'ik tugul che po timiin, tyong'ik tugul che uoti eng' ng'wony ak kimugulmet age tugul. 22Ki pek tugul che saptos, che tinyei kabuusetap sabeet, che ki mi emet ne yaamaat. 23Ki kibar kiwoong' kiy age tugul ne ki sabei ne ki mi emet komugul; kimugulmet, kiyagiik, che ichuutegei ng'wony ak toriit alak tugul che po parak. Ki kibar kigees eng' ng'wony kobatee Noah ak che ki miitei tugul moinget oriit. 24Kimaran peechooto kotuch emet peetuusyek pogol ak konom.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
TAUNET 7: KAPR
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019