YUH 9
9
Isa ka ɲa fuyen do ɲa laka
1Nba, Isa tamintɔla, a ka cɛɛ do yen a ɲa fuyen de sɔrɔnda. 2A la karandenilu ka a maɲininka ko: «Rabi, ni ɲin na sɔrɔnbailu ka hakɛ kɛ wala ni ale jɛrɛ le ka julumun kɛ, a ɲa fuyen sɔrɔnni wa?» 3Isa ka a jabi: «Ɲin ma sɔrɔn ka bɛn a jɛrɛ la hakɛ ma wala a la mɔɔbailu la julumun ma. A ɲa fuyen le sɔrɔnda, sa Alla la sebaya ri yiraka mɔɔilu la ale fɛ. 4Ni a kɛla tele ri, an ka kan ka baara kɛ a yɛ mɛn ka n kelaya. Su ra sudunya. A wa ko: mɔɔ si ti se baarala. 5Ka n to dunuɲa rɔ, n ye dunuɲa kɛnɛbɔlan de ri.» 6A banni kuma wo la, Isa ka daji labɔ duu ma ka bɔɔ lamun wo la, ka bɔɔ wo ta ka a sisa ɲa fuyen ɲa la. 7A ka a fɔ ko: «Wa i ko Silowe jilamaradiya ji la.» Silowe kɔrɔ ye le ko «kela». Ɲa fuyen wo ka a wa a ko ji wo la tuma mɛn na, a nara a ɲa yenna!
8A siiɲɔɔ ni mɛnilu ka a yen taralila kɔrɔman na woilu ka a maɲininka ko: «Cɛɛ ɲin de siini tɛ taralila kanma kɔrɔman na wa?» 9Doilu ka a fɔ ko: «Ale le.» Dogbɛrɛ ka a fɔ ko: «Ale tɛ, kɔni imunuɲani.» Cɛɛ ka a fɔ ko: «Nde le jɔ!» 10Ii ka a maɲininka ko: «I ɲa lakara di?» 11A ka ii jabi: «Cɛɛ mɛn tɔɔ ko Isa ka bɔɔ kɛ ka wo sisa n ɲa la ka a fɔ ko: ‹Wa Silowe ka i ko.› N wara. N banni n kola, n ka yenni kɛ.» 12Ii ka a maɲininka ko: «Cɛɛ wo ye mi?» A ka a jabi: «N ma a lɔn.»
Farisilu ka cɛɛ ɲa lakani fɛsɛfɛsɛ
13Ii ka cɛɛ ɲa lakani wo lana Farisilu ma. 14Awa Isa ka bɔɔ sisa a ɲakɔrɔ da la lon mɛn na a ɲa lakara wo lon de, Ɲɔɲɔ lon de tɛrɛ. 15Wo le rɔ Farisilu ka cɛɛ maɲininka ko mɛn taminni ko a ye yenni kɛla sisen. A ka a fɔ ii yɛ ko: «A ka bɔɔ le sisa n ɲa la, n ka n ko: wo rɔ n ka yenni kɛ.»
16Farisi doilu ka a fɔ ko: «Mɛn ka wo kɛ a ma bɔ Alla rɔ, baa a ti Ɲɔɲɔ lon sariya bonyala.» Kɔni, doilu ka a fɔ ko: «Kojuukɛlailu ri se ko makabani su ɲin kɛla di?» Ii talara. 17Farisilu ka ɲa fuyen mɛn ɲa lakani maɲininka fanan ko: «I ri se nfen fɔla i dandanninna la ko rɔ, ka a masɔrɔn a ka i ɲa laka?» A ka ii jabi: «Nabiɲuma le.»
18Yahudiyailu tɛrɛ ma sɔn lala a la ko a ɲa fuyen le tɛrɛ, a ni a ɲa ra a laka, sani ii ka a la sɔrɔnbailu kili. 19Ii ka ii maɲininka ko: «Ai dencɛ le wa, ai kan mɛn ma ko a ɲa fuyen de sɔrɔnda? Nfen de taminni wa a ye yenni kɛla sisen?» 20A sɔrɔnbailu ka ii jabi: «An ka a lɔn ko an dencɛ ye. A ɲa fuyen le sɔrɔnda. 21Kɔni an ma a lɔn fewu ko mɛn taminni ko mɛn a ye yenni kɛla sisen. An ma a lɔn fanan fewu mɛn ka a ɲa laka. A ye a maɲininka, a ra bonya ka kɛ mɔɔ ri, a ri se a jabila a jɛrɛ yɛ!» 22Cɛɛ sɔrɔnbailu ka jabila kɛ ten, ka a masɔrɔn ii silanni Yahudiyailu la ɲɛmɔɔilu yɛ. Baa woilu tun da bɛn a ma ko ni mɔɔ mɔɔ ka a lɔ a la ko Isa le ye Ɲenematɔmɔnin de ri, ko ii ri wo tii gbɛn ii la salibon na. 23Wo le rɔ a sɔrɔnbailu ka a fɔ ko: «A ye a maɲininka, a ra bonya ka kɛ mɔɔ ri.»
24Farisilu ka cɛɛ wo kili kokura, mɛn tɛrɛ ye ɲa fuyen di, ka fɔ a yɛ ko: «I ye i kali Alla ɲakɔrɔ ko i ri tuɲa fɔ. An ka a lɔn ko cɛɛ wo ye kojuu kɛla le ri.» 25A ka ii jabi: «N ma a lɔn ni julumuntɔ le walama Kojuukɛla tɛ, kɔni n ye ko kelen lɔnna kɔrɔ, n ɲa fuyen de tɛrɛ kɔni n ye yenni kɛla sisen.» 26Ii ka a maɲininka ko: «A ka nfen de kɛ i la? A ka i ɲa laka di?» 27A ka ii jabi: «N tɛrɛ ra a fɔ ai yɛ fɔlɔ, kɔni ai ma a lamɛn. Nfenna ai ye a fɛ ka a lamɛn kokura? Ai fanan ye a fɛ ka a kɛ a la karandenilu le ri wa?» 28Ii ka a manani ka a fɔ a yɛ ko: «Ile le a karanden di. Ande le Musa la karanden de ri. 29Ande ka a lɔn ko Alla kumara Nabi Musa yɛ, kɔni ɲin, an ma a lɔn a ye bɔla yɔrɔ mɛn dɔ.» 30Cɛɛ ka ii jabi: «Hen! Ko makabani ba le ɲin di. Ai ma a lɔn a ye bɔla yɔrɔ mɛn dɔ, kɔni a ra n ɲa laka! 31An ka a lɔn ko Alla ti a tolo malɔla kojuu kɛla la, kɔni a ye a tolo malɔla mɛn ye a bonyala ka a sawo kɛ. 32Habadan mɔɔ si ma a lamɛn ni mɔɔ ra mɔɔ ɲa laka mɛn ɲa fuyen sɔrɔnda. 33Ni cɛɛ ɲin ma bɔ Alla rɔ, a ti se foyi kɛla.» 34Ii ka a jabi: «I ye i la julumun dɔ kɛbi i sɔrɔn waati. I ri an karan wa?» Wo rɔ, ii ka a gbɛn salibon na.
Yon ye ɲa fuyen jɛrɛjɛrɛ di?
35Isa ka a mɛn ko ii ra a gbɛn. A ka cɛɛ wo ɲinin ka a yen, ka a fɔ a yɛ ko: «I ye lemɛniyala Mɔɔ Dencɛ ma wa?» 36Cɛɛ ka a jabi: «Maari, yon ye wo ri? I ye wo fɔ n yɛ, kosa n di lemɛniya a ma?» 37Isa ka a fɔ a yɛ ko: «I ra a yen. A ye kumala i yɛ sisen.» 38Wo rɔ a ka a fɔ a yɛ ko: «N da lemɛniya, n Maari.» A ka a birin Isa kɔrɔ ka a bato. 39Isa ka a fɔ ko: «N nara n nani dunuɲa la kiti la kanma. Ɲa fuyen ɲa ye a laka; mɛnilu ye yenni kɛla, woilu ye kɛ ɲa fuyen di.»
40Farisi doilu tɛrɛ ye a tɔrɔfɛ, woilu ka kuma wo mɛn ka a maɲininka ko: «Ande le fanan ye ɲa fuyen de ri?» 41Isa ka ii jabi: «Ni ɲa fuyen ye ai ri, ai tɛ jatɛla julumuntɔ ri. Kɔni sisen ai ye a fɔla ko ai ye yenni kɛla. Wo le kosɔn, ai la julumun da to ai kan fɔlɔ.»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
YUH 9: AKS
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
