YUH 12
12
Mariyamu ka Isa sen mamun tulu sumaduman na
1A tɛrɛ tuunni tele wɔɔrɔ le ma Taminkunna Sali ye se, Isa nara Betani, Lasari ye siini so mɛn dɔ, Isa ka Lasari mɛn lawuli ka bɔ saya rɔ. 2Ii ka a fanda ka a bonya. Marita tɛrɛ ye dɔɔnnin dila ii ma. Lasari siini tɛrɛ mɔɔilu tɛma dɔɔnnin diya. 3Wo rɔ, Mariyamu ka tulu suma duman dagbɛlɛ litiri tala ta, tulu suma duman mɛn tɔɔ ko naridi. A ka Isa sen mamun wo la ka a kunsi ta ka Isa sen mamun toto. Bonkɔndɔla bɛɛ kɛra tulu suma duman suma le ri.
4Kɔni, Judasi Sikariyɔti, mɛn tɛrɛ ye Isa la karanden do ri, mɛn di janfa don Isa ma, wo ka a fɔ ko: 5«Nfenna an ma latikɔlɔn ɲin san ka a sankɔ di bolokolonilu ma? Latikɔlɔn wo sankɔ ye bɛnna baaraden kelen san sara le ma.» 6Ni a kumara ɲa wo ma, wo tɛ ko a haminni bolokolonilu la ko rɔ, kɔni a tɛrɛ ye son de ri. A tɛrɛ ye wodi lamarala le ri, kɔni a tɛrɛ ye wodi wo tala ka a kɛ a jɛrɛ ta ri. 7Kɔni Isa ka a fɔ ko: «A ye a to ye. A ra latikɔlɔn sumaduman ɲin donna ka bɛn n su don lon mɛn na. 8Bolokolonilu ye i fɛ waati bɛɛ rɔ. Kɔni nde, n ti tola ai fɛ waati bɛɛ rɔ.»
9Yahudiya jama ba ka a mɛn tuma mɛn na, a ye ye, ii nara. Ii ma na Isa kelen yen diya, kɔni ii nara mɛn Lasari le yen diya (Lasari mɛn nawulira ka bɔ saya rɔ). 10Sarakalasela kuntiilu ka miriya ko ka Lasari fanan faa, 11ka a masɔrɔn ale ta fan dɔ Yahudiyailu siyaman ba lemɛniyara Isa ma wo rɔ.
Isa donda Jerusalɛmu
12Wo duusa gbɛ, jama siyaman ba mɛn nara Jerusalɛmu sali diya ka a mɛn ko Isa natɔ Jerusalɛmu. 13Ii ka tamaro bolon ta ka wa a labɛn ka ii sɛwa kan nabɔ ko:
«Alla tando!»
«Duwawu ye a yɛ,
Mɛn ye nala Maari tɔɔ rɔ ten!»
«Duwawu ye Isirayɛli Mansa Ba yɛ!»
14Isa ka sofalini bulan do yen ka i sii wo kan ikɔ sɛbɛni ɲa mɛn:
15«I kana silan, Siyonkailu;
A ragbɛ, ai la mansa ye nala,
masiini falini bulan kan.»
16Waati wo la a la karandenilu wo ma a ɲayen ko mɛn ye taminna, kɔni Isa ka a la gbiliya labɔ tuma mɛn na, ii ka lɔn ko wo bɛɛ sɛbɛnni Alla la kitabu kɔndɔ, a ni mɔɔilu tɛrɛ ka wo bɛɛ kɛ Isa yɛ.
17Nba, jama ba tɛrɛ ye Isa fɛ wo lon, a ka Lasari kili ka bɔ kaburu kɔndɔ lon mɛn ko a ye lawuli ka bɔ saya rɔ tuma mɛn na, woilu kɛra a sereya ri. 18Wo rɔ jama ba nara a labɛn diya, ka a masɔrɔn ii ra a mɛn ko a ra kabannako wo kɛ. 19Wo rɔ Farisilu tɛrɛ ye a fɔla i ɲɔɔn tɛma ko: «Ai ma yen ai ti se foyi kɛla. A ragbɛ! Dunuɲa bɛɛ ye bilala a kɔfɛ!»
Kirɛkika doilu ye a fɛ ka kuma Isa yɛ
20Mɛnilu nara Alla bato diya Jerusalɛmu sali lon, Kirɛkika doilu fanan tɛrɛ ye ii tɛma. 21Woilu nara Filipe madon, Filipe mɛn nani ka bɔ Bɛtisayida so kɔndɔ Kalile mara rɔ. Woilu ka a fɔ a yɛ ko: «An fa, an ye a fɛ ka Isa yen.» 22Filipe nara wo fɔ Andere yɛ. Ii fila nara wo fɔ Isa yɛ. 23Isa ka ii jabi: «Mɔɔ Dencɛ gbiliya waati ra se, sisen. 24N ye tuɲa le fɔla ai yɛ: ni suman kisɛ kelen ma be duuma, ka a faa, a kelen pe ri to. Kɔni, ni a faara, a ri wa a den siyaman di a la. 25Mɛn nii duman a yɛ, a ri bɔnɔ; kɔni mɛn nii ma diya a yɛ dunuɲa rɔ wo ri ɲenemaya banbali sɔrɔn. 26Mɛn ye a fɛ ka n na baara kɛ n yɛ, wo ye bila n kɔfɛ. N ye yɔrɔ mɛn na, n na baaraden fanan di tɛrɛn ye. Ni mɔɔ mɔɔ wa n na baara kɛ n yɛ, N Fa ri wo bonya.
27«Sisen n sɔlɔmɛ ra yɛrɛyɛrɛ. N di nfen fɔ? N di a fɔ ko: ‹Tɔrɔya mɛn kɛtɔ n sɔrɔnna sisen, Fa n kisi wo ma› wa? Wo tɛ, kɔni ka a masɔrɔn tɔrɔya mɛn ye n sɔrɔnna wo waati ra se! 28N Fa, i tɔɔ labɔ i gbiliya rɔ.» Wo rɔ, kumakan do bɔra sankolo rɔ ko: «N da n tɔɔ labɔ gbiliya rɔ, n di n tɔɔ labɔ gbiliya rɔ kokura.» 29Jama ba mɛn tɛrɛ ye ye, mɛn ka mankan wo mɛn, ii ka a fɔ ko sanfɛrɛn kan da bɔ. Doilu fanan ka a fɔ ko mɛlɛka le kumala a yɛ. 30Isa ka a fɔ ko: «Kumakan ɲin ma fɔ nde dɛmɛn kanma, kɔni a fɔni aile ta le. 31Nba, sisen dunuɲa la kiti le; dunuɲa kuntii juu ri gbɛn sisen. 32Kɔni nde, n wa kɔrɔta duukolo ma, n di mɔɔ bɛɛ masɔmɔn ka na n ma.» 33A ka wo fɔ kosa a ri a faa ɲa yiraka ii ma.
34Wo rɔ jama ka a jabi: «An ka a lamɛn sariya le rɔ ko: Ɲenematɔmɔnin ye tola le habadan. I ye nfen fɔla ten ko: ‹Mɔɔ Dencɛ ri kɔrɔta›? Yon ye Mɔɔ Dencɛ ri?» 35Wo rɔ Isa ka a fɔ ko: «Dunuɲa kɛnɛbɔlan ye a tola ai tɔrɔfɛ waatini. Ai ye taama ai ni dunuɲa kɛnɛbɔlan yen waati mɛn, sani dibi ye don ai ma waati mɛn. Baa mɛn ye taamala dibi rɔ wo ma a lɔn a ye wala yɔrɔ mɛn na. 36Ai ni kɛnɛbɔlan yen waati mɛn dɔ, ai ye lemɛniya la kɛnɛbɔlan dɔ, wo wa kɛ ai ri kɛ kɛnɛbɔlan den di.» Isa ban mɛn kɛra wo fɔla, a wara ka a dokon woilu ma.
Mɔɔilu ma lemɛniya Isa ma
37Hali Isa ka kabannako siyaman kɛ ii ɲakɔrɔ, ii ma lemɛniya a ma. 38Wo ko ra a dafa Nabi Esayi ka mɛn fɔ ko: «Maari, yon lemɛniyani an na kuma ma? Maari, i ra i la sebaya yiraka yon na?» 39Wo le kosɔn ii ma se lemɛniyala a ma, baa ikomin Nabi Esayi ka a fɔ fanan ko:
40«A ka ii ɲa lasidi,
ka ii jusu gbɛlɛya,
wo rɔ ii ɲa kana fen yen,
ii jusu kun kana a ɲayen,
ii kana ii kosɛ n ma,
sa n di se ii lakɛndɛyala ɲa mɛn ma.»
41Nabi Esayi ka wo fɔ ka a masɔrɔn a tɛrɛ ye Isa la gbiliya yenna ka a kuma a la ko rɔ.
42Waati wo rɔ, hali mɔɔbakɔrɔilu tɛma mɔɔ siyaman lemɛniyara a ma. Kɔni ka a masɔrɔn Farisilu ta fan dɔ ii ma sɔn ka ii lɔ ko Isa ye Ɲenematɔmɔnin di. Ii tɛrɛ ye silanni ko Farisilu ri gbɛn salibon kɔndɔ, 43baa mɔɔilu la gbiliya duman ii yɛ ka a tamin Alla la gbiliya la.
44Isa ka a kan ba labɔ ka a fɔ ko: «Ni mɔɔ mɛn lemɛniyara n ma, a ma lemɛniya nde kelen ma, kɔni mɛn ka n kelaya a lemɛniyara wo fanan ma. 45Mɛn ka n yen, wo ra n kelayaba fanan yen. 46N nani ka a kɛ dunuɲa kɛnɛbɔlan de ri, wo rɔ mɔɔ mɔɔ wa lemɛniya n ma wo tii ti to dibi rɔ. 47Ni mɔɔ mɔɔ ka n kumakan namɛn, kɔni a ma a mira, nde tɛ a kiti tɛɛla; baa n ma na kiti labe kanma dunuɲa kan, kɔni n nani dunuɲa kisi diya le. 48Ni mɔɔ mɛn ka a ban n dɔ, ka a ban n na kuma mirala, fen ye ye mɛn di kiti labe wo tii kan. Fen wo ye n na kumailu ri. N ka kuma mɛnilu fɔ, woilu le ri kiti labe a kan dunuɲa laban lon. 49Baa n sa kumala n jɛrɛ yɛ, kɔni n Fa mɛn ka n kelaya, wo le jɛrɛ ka n jamari n ka kan ka mɛnilu fɔ a ni n ka kan ka kuma mɛn bɔ ɲa mɛn ma. 50Wo rɔ n ka a lɔn ko a la jamari ye ɲenemaya banbali dila. Sisen n ye kumala wo le rɔ n Fa ka a fɔ ko n ye mɛn fɔ, n ye wo le fɔla.»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
YUH 12: AKS
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
