LUK 11
11
Kumsunamem Jisuke Poyilname
(Mt 6:9-13; 7:11)
1Longe konem Jisu bí amongkolo kumsula duuto. Bíkke kumyin rodem, bíkkíng luyilsuna akone bíkkíng aala pokai, “Ruutume, Joan bí bíkkelo luyilsuna kídíem poyilnam kísape ngolumkom kumnamem pobitoyika.”
2Bí bulum pokai, “Noluke kumyém sikepe potoka:
“ ‘Yaie,#11:2a: Ayokon agome “Ngoluke teyotelo duuna Yayie” emdo. nokke amíne duuyar kalangka,
nokke amonge aadak langka.#11:2b: Ayokon agome, “Teyong amonge kape kísa idudí tani amosote nokke míngkampe idak langka.”.
3Loodí mipíem ngoluke dopenamem ngolum bika.
4Ngoluke paab kídíem maab bilangka;
kapeila ngolukom ngolum atímape ina miyongem maab bidung.#11:4a: Griklo “Ngoluke ajéng genem” emdo.
Delokke ngolum darkaa penalo gímo mapeka.’ ”#11:4b: Ayokon agome “Paab aidlokke mopít langka” emdo.
5Delokrongem bí bulum poto, “Noluke akone angongko kala, bí yoh raajangem bíkkíng aala poyé, ‘Angonge, ngom lub roti angumko bisu pootola, 6kapeila mibolo enna ngokke angonge ngokkíng aadung, delokke ngo bím atíyang bisu penam kamang.’
7“Delo aralo duunade poyansuto, ‘Ngom ebínpe manbom mapeka. Eyabem íkkar tobong, delokke ngokke ome-oo kídíe bisonalo ngokkíng keddung. Ngo gerepla nom atí bilamang.’ 8Ngo nolum podung, bíkke angonge emla bí gerepla bím donam bilang madokom, ami delokke mantí bomkolok bí gerepla angodem bíkke míínamko biyérung.
9“Dekepe ila nolum ngo podung; kolangka delo nom biyé; mata langka delo no paayé; piga langka delo nom eyabem siyyabiyé. 10Kapeila séko kodudí bí paadung; delokke piga nadem eyabem siyya bidung. 11Abu kídí nolu séko agí uem engoko#11:11: Ayokon agome “Rotiko koyém elíngko biladdun?” emdo. koyém, tabíko bidun? 12Demangkom rokpíko koyém képkongko bidun? 13Nolu atí madokom agí ome-uem aina amanem binamem kénsudung, demílo edítko bojéyape noluke teyolo duuna Abue bím kona kídílo Deena Aidem biyéne?”
Jisulang Biljebub
(Mt 12:22-30; Mk 3:20-27)
14Jisu bí agom pokénmana uyukonem monpaktoku. Uyude lenrongkuem, agom poyimana amide polenkaku, delo ami kídíe irisinyope mííto. 15Idakkom bulu ayokone pokai, “Uyu ruutum Biljebub#11:15: Griklo “Biljeboul demangkom Bijeboul” emdo. kelokmin bí uyudem monpak nadungkune.”
16Abíde bím taleng telok iyod ibidope poka darkaato. 17Jisu bí buluke mííyi míísangem kénla bulum poto, “Doolung miyode agí agí; arasulo mirupe yésumílo nyokyé, delokke erade raabyak byakmílo nyokyé. 18Soitane agí agíe mirupe bíkke doolulo ibosumílo, kape kísa atelpe tolbo sulayén? Nolu uyuem Biljebub kelokmin ngo monpak dungkune emkolo ngo sim podung. 19Supak ngo uyuem Biljebub kelok monpak dungkumílo, nolukíng yémín gena kídíe ingkolok uyuem monpak dungkune? Dekemílo, bulu nom bisarna kídíe. 20Idakkom ngo uyuem Shédíke lakkénglok mondung kumílo, demílo Shédíke amonge nolukelo aadung.
21“Tolna ralna amie, iyan sunana bomla, agí ekumem kaabom sula ekurangem mosiido. 22Idola bím pemílo ralyana akone aala bím ikumyém, bí ami delokke míídasunam iyan sunana atí siriem laabínla bomlangkula orsudoku.
23“Séko ngokkíng imadudí bí ngom mirupe ine, delokke séko ngom lekope idum sumayédí de nyokpan sudung.
Uyu Lokke Aalat Kuname
(Mt 12:43-45)
24“Edílo paab aide tanilok lendungkudi, de mooruk amolo gígoola, duuno supeko matala delokke dem mapang madung. Delo bí podungku, ‘Ngo ngokke gírong kuko ekumdelo angkupe.’ 25Edílo aadung kudí, bí ekumdem deenampe delokke kampope metupe kaapadung. 26Delokrongem bí gílangkula bím agíemte atí mayana uyu kínít konko aabo langkula bulu aralo gíla delo duudung. Delok ami delokke akore kerang kempemílo pakyape atímangkai.”
Ashéng Arue
27Jisu bí sim agom kídar sim podungem, mibam delok mimeko, “Nom olenna delokke usaana anede gérne” emla gokto.
28Bí poyansuto, “Idola Shédíke agomem tatla delokke dem igena kídíde gérne.”
Irisinyuem Matana Amie
(Mt 12:38-42)
29Mibamde bojé yayang iyédem Jisu bí pokai, “Siyum siroke ami kídí si atí maneke. Si irisinyo iyod mílílo matadung, idakkom Jonah ke kékonlo iyodyang ibimayé. 30Kapeila Jonah bí Ninebi kídí legape iyodpe itodí, delok kísape Tanike Ue silo meloke ami kídíke iyodpe iyé. 31Sokke legape sokko danlok ranie gerepla silo meloke amiem, bottepe bisar idí longelo ajéng luketyé. Kapeila bí among kéényung lokkekai Solomonke kénnam agomem tatpe emla aato. Idakkom supak Solomon mempemílo botte yanako so dung. 32Bottepe bisardí longelo, Ninebi ami kídíe silo meloke ami kídíem dakbo sudola bulum ajéng luketyé, kapeila bulu Jonahke ngiitom pobinamem tatla míílat sutoku, delokke supak Jonah mempemílo botte yanako si dung.
Amíl Lokke Angune
(Mt 5:15; 6:22-23)
33“Sékote meruem nyotpala, kaamangkolo mesupla, demangkom bayé aralo mena kamang. Dem penem aana takame angunem kaadope umké teyolomin bí dem meyéne. 34Noluke amigde noluke amíllokke merue. Noluke amigde aimílo, noluk amíl tabudete angunrunge iyé. 35Demílo nolukíng angun duunade kaamo madope mínggap langka. 36Delok legape, noluke amíl tabude angun runge imílo, delo kaamona kamang, merue nolum latyém angunnam kísape, de apíípe angune iyé.”
Pharisi Kídíemlang Ukil Kídíem Jisuke Lukaaname
(Mt 23:1-36; Mk 12:38-40)
37Jisu bí bíkke agomem poyinrodem, Pharisi kone bím dotké dobosudope emla tomto; depe iname bí gíla apim dobosuto. 38Depe iduem Phariside kangí toname Jisu bí domang adape, laksuk sumape inamem kaala arí anyope mííto. 39Delokrongem Ruutum bí poto, “Supak demílo, nolu Pharisi kídíe ekung bati luyuem arbíndung, idokom aralo noluke paapu dopupe míínam elang atímana aapíe bíísétdung. 40Nolu loorímana kídía! Luyuem pínade arang emte pímanía? 41Idakkom ekung aralo duuna kídíem#11:41: Demangkom ingkuem no kodudí. opan kídíem ortola, delomin nolukepe takamde deeyéne.
42“Pharisi kídía, nolu ankí kenoyé, kapeila nolu baganlok lenna angu angu oying ogé dohom bagem bidula, aro bedangem delokke Shédíke ayangem míípamang. Kerang kesim mepak mape simmin nolu igepene.
43“Pharisi kídía nolu ankí kenoyé, kapeila nolu kumkeng ekum lokke aiyalumna dungkuem mííbadung delokke dukan bojarlo míngge dola salam binamem matadung. 44Nolu ankí kenoyé, kapeila ingkona ago teyolodí amie kénmape gídung gítok sula idudí, dekena iyod kamana ago kísana amie nolu.”
45Ayon kénna kone bím poyan sukai, “Saare, no dekepe ngolum ponamde, ngolum lukaa luyéé dunamino!”
46Jisu bí poyansuto, “Delokke no ayon kénna no ankí kenoyé, kapeila no ami kídíem buluke gelamanam egedem getí modung delokke no agíedan lakkéngete bulum igultope emla imang. 47Nolu ankí kenoyé, kapeila nolu kaaluna mirikídí kepe ago píbine, delokke noluke buku kídíemin bulum petna kídíde. 48Dekepe iname noluke buku kídí inamem noluke tolík namem nolu lengkan sudung; bulu kaaluna miri kídíem petto, delokke nolu buluke ago kídarem píto. 49Sok legape, Shédíke kénnam sulok pokai, ‘Ngo bulum kaaluna miri kídíem delokke tomlíknam kídíem melíkbiyé; ayokonem bulu petyé delokke abídem bulu irééyé.’ 50Delokke legape tani among lendak delokke ila kaaluna miri kídílo yilíng bítnam legangem silo meloke ami kídíe ajéngem geyé, 51kumko baari lokke ila kumsuko pénsamlo Abel kelokke ilangala Jekariah kelope yilíng bítnam ajéngem geyé. Arue, ngo nolum podung, si yérumsi sok takam sokke ajéngem togeyé!
52“Ayon kénna kídía nolu ankí kenopene, kapeila nolu kénnana sabiem laabínne. Nolu agíe aamape igeyéla, aana kídíem nolu itumdung.”
53Jisuke gírong kudem, Pharisi kídí elang ukil kídíe bím agírupe aklenkai delokke umpe emla agom íítí bomkai. 54Bí atíko poyémílo gaknape emla antíbomkai.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUK 11: adiBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
