LUK 10
10
Jisuke Midum Íying Kínít Kolang Annyiko Melen Líkname
1Sok méélampe Ruutum bí Midum íying kínít kolang annyiko#10:1: Ayokon agome, “Íying kínítko”. melíkla, bulu bíkke gípeko taon miyolo delokke rego miyolo annyi annyipe megoolíkto. 2Bí bulum poto, “Aam gatpename deddíko, idola gatpena kídíde anyodung. Delok legape, aríklo agér gérpenem melíkdope arík Ruutumem kumlangka. 3Gílangka! Ngo nolum mérbéno kísape sipyang gooralo melíkdung. 4Murkong poisar, demangkom talí nyogon demangkom leyuk gema bommapeka; delokke bedu bedalo sékomete ashé lupo pomapeka. 5Nolu ekumkolo enayém, kerayalumpe ‘Ekumso ashénge duudak langka’ emla lubéé líklangka. 6Delo ashéngem míínako kayémílo, noluke ashéng lupue bíkkíng duumínyé. Demamílo ashéng lupue nolukíng aalat suyéku. 7Ingkuem ekumdelo bulu biyédí dola tííla duulangka, kapeila agér gérnade irem paabasune. Ekum ekumlo gígoo mapeka. 8Nolu taonkolo aala delokke nolum yamrík yémílo, nolum leebi namem dolangka. 9Delo duuna kina ramna kídíem ipílangka delokke bulum, ‘Shédíke amonge nolukelo anín dubong’ emla polangka. 10Idakkom noluke taonkolo aaduem nolum yamrík mayémílo, delo bedalo gíla sikepe polangka. 11‘Noluke taon lokke ngoluke alelo gyapketna pemugemte ngolu nolum mepak nana kangkepe pibín sudung’ emla polangka. Idola sim berokpe kénlangka: ‘Shédíke amonge anín dubong.’ 12Ngo nolum podung, delo longe delo dem taon dempemílo Sodomme ayang yayé.
Arope Míímana Taonkídí
(Mt 11:20-24)
13“Korajin! Nolu ankí kenoyé, Bethsaida! Nolu ankí kenoyé! Kapeila nolukíng ibinam irisinyo kídarem Tur lolang Sidonlo ibituamílo, bulu muun tuulumsula delokke metbu nyoolíksula kerango pekai míílat suyékuai. 14Idakkom bisardí longelo nolum pemílo Tur delokke Sidonem ayang yayé. 15Delokrongem, E, Kapernaum, nom teyong pía laasang yékune? Ma, no rumkí belokai tokyé.
16“Séko noluke agomem tatgap dudí, ngomkom tatgap bidung; séko nolum tomadudí ngomkom tomang; idakla séko ngom tomadudí ngom melíkna bímkom tomang.”
Íying Kínít Kolang Annyi Lokke Aalat Kuname
17Midum íying kínít kolang annyide ashérupe aalat sudo langkula pokai, “Ruutum, uyu kídíete nokke amínlok ngolum rogedo.”
18Bí poyansuto, “Ngo Soitanem teyong telok yaari kísape olet dakpe kaato. 19Noluke tabí kídíem delokke képkong kídarem tujém nana ralnamem delokke miru kídíke pauarem ikum nana ralnamem ngo bito; ingkuete nolum atí ilamayé. 20Depe idokom, atímana uyue nolum rogekolok ashénge emla míímapeka, idakla noluke amínem teyong amolo atlíkkai emla ashé langka.”
Jisuke Ashéname
(Mt 11:25-27; 13:16-17)
21Dekepe idodem Jisu bí Deena Aidlok ashérunge idola pokai, “Among kelang talengke Ruutum, Abu nom ngo koyitdung kapeila no sim atí kídísim kénna paana kídí lokke mesupto, delokke dekedem koo aména kídílo lengkan bito. Yayie arue, si nokke mííposula iname.
22“Takam atí kídar sim ngokke Abue ngom bilíktung. Sékokom Oode sékodí dem kénmang. Abu petome kénsudung, delokke sékote Abude sékodí dem kénmang, Oo petom elang Ue bím kényépe emla ullennam kídíe kéndung.”
23Delokrongem bí bíkkelo luyilsuna kídídelo ngelat sulangkula pesuppe poto. “Noluke kaanam dem kaanana amig kídarde gérne. 24Legadem ngo nolum pobidung, deddína kaaluna mirikídíe delokke roja kídíe noluke kaanam dem kaape emla míítuai ilate bulu dem kaapa tomang delokke noluke tatnam dem tatpe emla míítuai idakkom bulu dem tatpa tomang.”
Aina Samari Amikolo Luyiisuname
25Leko ayon kénna amikone Jisume aapí aang ikaape emla dakrepto. Bí pokai, “Saare, turyar namem paadope ngo ingkokoi iperung aidon?”
26“Ayonlo ingkuem attune?” emla bí poyansuto. “Kape kísa no dem poridune?” emla íngkíto.
27Amide pobikai, “Nokke Shédí Ruutumme nokke aapí aang takamlok delokke nok tolnam ralnam loklang aapí tabunglok ayalangka.” delokke “Nokke kumríem agí kísape ayalangka.”#Lebi 19:18
28“No pojido” emla Jisu bí poyansuto. “Depe ilangka demílo turyé.” emto.
29Idakkom bí agíem aro menamem kénsupe míídola Jisume íngkíto, “Delo sékoi ngokke kumríe?”
30Dem poyan sudola Jisu bí pobito, “Amikone Jirusalem lokke Jerikolo endungem dokaide bím umbomkai. Bulu bíkke ege galugem pítbínla, dempala bím sita simang idope igeyéla gínyok kaku. 31Miriko delok bedadelok ento, delo bí amidem kaapala, angu konlok bilgeto. 32Dekepe Lebikone ennade bím kaasu pala bedang konlok bilgekai. 33Idakkom Samari amikone enkane, ami dongkodelo aala, amidem kaayédem, bí kaarésue ito. 34Bí bíkkíng gíla amidelokke taríem gayinlok yéngkapla, tél loklang delokke onggur alanglok pílíkto. Delokrongem bí amidem agí gadodelo joolíkla, hutelkolo aala delo ankípe bím kaabomsuto. 35Longe kondem bí balnyiko laasula hutel duubom nadem bito. ‘Bím kaasu bomlangka delokke ngokke aayékuem nokke itemnam abalem ngo biyéku’ emla bí poto.
36“Sok midum angum arasokke dokait alaglo olíkna ami sokkepe nokke mííname sékoda kumrípe idun?”
37Ayon kénna amide poyansukai, “Bím yaasamna amide.”
Jisu bí “Gílangkula dekepe itolangku” emto.
Martha Melang Marime Jisuke Kangaaname
38Jisulang bíkkíng luyilsuna kídíde bedalo endakkuem bí doolung kolo pííto. Delo Martha emnam mimeko agí ekumlo bím tomato. 39Bíkke Mari emnam bírmeko Ruutumke alelo duula bíkke ponamem tatgap nako kadungai. 40Idokom Martha bí bíkke iruu saarula agér ipenamem ikolok dekepe ila mínmato. Bí Jisukíng aala poto, “Ruutume, no kaasu manía, ngokke bírme ngom petom agér ipenamem melíktung. Ngom iguldope bím pobika!”
41Ruutum bí poyansuto, “Martha, Martha, no deddíko míídírsula delokke míngasula idung, 42idokom no agom atelko pííramdung. Mari bí aiyanem ultung, delokke dem bíkke lokke laabín kumayé.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUK 10: adiBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
