Matayo 6
6
1LOFONGA loala, nyango lofokele liongi likinyo nda joso j’anto, wae iyo bene; ayaka lokela ngoko, lofoate ndako l’Ise ekinyo ole nda loola.
2Nd’ewela eko, akafa we nganji ya liota, tawulake bolola nda joso likawe, elenge ekela bekakatano nda basunagoga la nda mboka, wete baate imemya lim’el’anto. Nsosolo, nsangel’inyo, iyo baata ndako ikiyo. 3Lolo akafa we nganji ya liota, tolangake wae likata likawe ja waji jea bolemo bokamba likata likawe j’elome: 4wae nganji ikawe ya liota ikaeme la lokuko: ko Ise ekawe ondena nda lokuko Bomongo ifokolakola.
5Ko aond’inyo, taloyalemake elenge ngole bekakatano: iyo balanga wete bemale, ko baonde nda basunagoga ko nd’aatano ba mboka, wae benya el’anto. Nsosolo, nsangel’inyo, iyo baata ndako ikiyo. 6Lolo we, aonda we, yotswa nda itenela ikawe ya lokuko, ko ae w’okomb’ekuke, bonda Ise ekawe ole nda lokuko, ko Ise ekawe ondena nda lokuko ifokolakola. 7Aond’inyo taloondake la baoyi ba njutela la njutela, elenge eonda bafea Nzakomba: iyo bakanela wae bifokana nd’ewela ea bitelelo bikiyo biuke. 8Nd’ewela eko, talosonganake l’iyo: ele Ise ekinyo aolea toma tolel’inyo, ataf’inyo ouol’ende. 9Nd’ewela eko, loonda eleng’ene: Fafa ekiso ole nda loola, kela lina likawe limemyame, 10kela likulaka likawe liye, kela wango bokawe bokelame nd’okili, elenge ekelama boko nda loola. 11Otokaya toma tokiso ta wengi mbile. 12Ko ototungole lima bembale’ekiso, elenge etungol’iso bale l’embale l’iso. 13Tototombake nda lomeko, lolo ototungole lim’ele Ow’obe; (ele likulaka lile likawe, ko mpamba ele ekawe, ko imemya ile ikawe, bikeke la bikeke. O ngoko.) 14Nkin’inyo lotungol’anto lima beseketano bekiyo, Ise ekinyo ea loola ifotungol’inyo. 15Lolonde nkin’inyo lofotungol’anto lima beseketano bekiyo, Ise ekinyo afaotungol’inyo lima beseketano bekinyo.
16Koko akil’inyo toma, talominyake bilongi, elenge ekela bekakatano: iyo bafita bilongi bikiyo wae benya el’anto nga bakila toma. Nsosolo, nsangel’inyo, iyo baata ndako ikiyo. 17Lolo we, akila we toma, bis’otsa bokawe l’auta, ko sol’elongi ekawe; 18wete ofenya el’anto nga okila toma, lolo w’enya el’Ise ekawe ole nda lokuko: koko Ise ekawe ondena nda lokuko ifokolakola.
19Talendolak’inyo mongo liaci nd’okili, efitana liko la towawa la maanga, ko endotswa baiyi oiya liaci. 20Lolo lendolak’inyo mongo liaci nda loola, efa towawa la maanga ofita, ko efa baiyi ootswa oiya liaci. 21Nd’ewela wae efongama liaci likawe, wifila botema’okawe nk’eko. 22Itswa ya jonge ile liso: nd’ewela eko, ayaka liso likawe joyalema senzelele, jonge likawe liuma lifofolala. 23Lolo nkina liso likawe lile bobe, jonge likawe liuma lile wae wilima mongo. Nd’ewela eko, nkina fole ele nd’etei ekawe ele wilima, wilima boko esakaana mongo! 24Nk’onto osaleleya bankolo bafe; nkin’ifoton’emo, ko alang’enkina; nkin’ifofotamel’emo, ko atengwel’enkina. Inyo lofosaleleya Nzakomba la liaci. 25Nd’ewela eko, nsangel’inyo, talokakaanake nd’ewela ea loiko lokinyo, wae toma to iny’ola la emeelo e iny’omela; koko talokakaanake nd’ewela ea jonge wete bito bi iny’olota. Loiko lofolekola toma nde? ko jonge lifolekola bito nde? 26Loala tofulu ta baliko, tofone, ko tofomuke, ko tofotakanya toma nda tolombe ta efongelo: Ise ekinyo ea loola aolaka toma. Inyo lofolekola tofulu la wiko nde? 27Bonto’okinyo oteez’ende mongo botale l’okakaano na? 28Koko lokakaana nd’ewela ea bito lae? Lokanela ndobya ile nda lisala l’elenge emel’iko; ndobya ifosale, ko ifofom’eto: 29lolo nsangel’inyo wae Solomona nd’okombe bokande bouma ntalotsama eleng’ele lobya lone lomoko. 30Lolo nkina Nzakomba aokombya bailo b’asala bamela mbil’ene, ko busame lobi nd’ecumbelo, iny’ale l’imeezo nk’isisi, afolekola lolots’inyo bito nde? 31Nd’ewela eko, talokakaanake, ko talokelake, Tole na? ko tomele na? ko tolote na? 32Ele Bafaya bayase toma tone touma: Ise ekinyo ea loola ea wete lolela toma tone touma. 33Lolo lasa nda joso mongo likulaka likande ko la liongi likande: ko toma tone touma tifokokyama el’inyo. 34Nd’ewela eko, talokakaanake nd’ewela ea mbile ea lobi: mbile ea lobi ifokakaana ekomongo. Bobe wa wengi mbile bokoka la mbil’eko.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matayo 6: NTMN58
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
