Matayo 6
6
1Boongya lilenda, botongoyila bikambwa binino bina mbongi en’oso bon’ato, lacin’iyo baene; yombo bila nd’oho, bofaate boluko eneyali Bafango’onino onoyali ena loola.
2Lacin’eho, enakaf’e nganji in’isei, tafomake bopate en’oso’one, yok’on’ila besimo ena basunagoga l’ena mboka, lacina baate lokumo eneyali bato. Solosolo, lakosumol’ino, iyo bamosila litamba boluko’oniyo. 3Koko enakaf’e nganji in’isei, talangake likasa line y’ooli yeye ekambwa enakamba likasa line y’ome; 4lacina nganji in’isei ifame ena lokuko; ko Bafango’one on’ena ena lokuko angokolukola.
5Ko en’ond’ino, botayalake l’okotua bon’esimo. Iyo balanga baemale ko baonde ena basunagoga l’en’atanu’a mboka, lacina baenya eneyali bato. Solosolo, lakosumol’ino, iyo bamosila litamba boluko’oniyo. 6Koko e, en’ond’e, tuaka en’etenyi ene ena lokuko, ko komb’otumba; koko meho onda Bafango’one onoyali ena lokuko, ko Bafango’one on’ena ena lokuko angokolukola. 7En’ond’ino, botaondake la baoyi bana njemba njemba, yoka bosamb’on’ond’iy’anafeya Yakomba: iyo bakanel’oka bangokana lacin’ena bitendelo biniyo bike. 8Lacin’eho, botayalake l’okotua’oniyo; lacina Bafango’onino ameya toma tonatoind’ino kum’ino botuufola. 9Lacin’eho, boonda yok’one: Bafango’oniso onoyali ena loola, lina line likumyame, 10lifoka line liye, eango ene eilame ena loko yoka bosamb’on’ilama eho ena loola. 11Otofe toma toniso tona bina l’ina. 12Ko ototungole ena besilo beniso, yoka bosambo bonatungol’iso banayali l’esilo l’iso. 13Tatotolake ena lomeko, ohonde ototungole eneyali On’owe; lacina lifoka liyali line, ko mpamba eyali ene, ko lokumo loyali lone, bisike la bisike. Ndoho. 14Yomb’ino botungol’ato en’akambo’aniyo, Bafango onino onoyali ena loola angokotungol’ino. 15Koko yomb’ino bofatungol’ato en’akambo’aniyo, Bafango’onino afakotungolak’ino en’akambo’anino.
16Koko enakil’ino toma, botacingyake bilongi yoka bosamb’on’ila bato ban’esimo: iyo baehya bilongi biniyo lacina baenya eneyali bato yoka bakila toma. Solosolo, lakosumol’ino, iyo bamosila litamba boluko’oniyo. 17Koko e, enakil’e toma, okya bote’one bauta, ko song’elongi ene; 18lacina ofenya eneyali bato yoka okila toma: oenya nk’eneyali Bafango’one onoyali ena lokuko; koko Bafango’one on’ena ena lokuko angokolukola.
19Botayomonyedyake inoamene lituka ena loko en’eha liho la tocingocingo ko la mbakwako, ko enatua baiya oyiya lituka. 20Boyomonyedyak’inoamene lituka ena loola, enefana tocingocingo la mbakwako oyehya, ko enefatua baiya oyiya lituka. 21Lacina enamonyama lituka line, botem’one bongoyala nkwaho. 22Moinda ena yonge nko liso. Lacin’eho, yombo liso line liyali sengelele, yonge line lihalitu lingofolala. 23Koko yombo liso line liyali nko bowe, yonge line lihalitu lingoyala bilima mene. Lacin’eho, yombo fololo eneyali ena ntoto ene eyali nko bilima, bilima boho boseki bike. 24Efan’oto onokambelisa banyangetuke bafe: yombo angok’emoi bowe, ko angolang’ekina; yombo angundamel’emoi ko atembol’ekina. Ino bofakambelisa Yakomba ko la lituka. 25Lacin’eho, lakosumol’ino, botakandakandake lacin’ena liiko lonino, lacin’ena toma tatong’in’ola la bimeelo bining’in’omela; koko botakandakandake lacin’ena yonge, lacin’ena bisenda bining’in’olota. Liiko lofaleki nde toma? ko yonge lifaleki nde bisenda? 26Bolenda mpulu ina liko: iho ifafuse, ko ifanuke, ko ifasusanya toma ena betumba ben’emonyedyo: Bafango’onino onoyali ena loola amafa toma. Ino bofaleki nde mpulu? 27Boto’onino onokolana lifudya botale’onande la bokandokando oka nai? 28Ko bokandakanda lacin’ena bisenda lanai? Bokanela befusi beneyali ena lisala l’okotua bonamela beho: befusi befasale, ko befafom’isenda; 29koko lakosumol’ino Solomona ena bokombe bonande bohotu atalotsama yoka bosamb’onoyali bofusi’one bomoko. 30Ko yombo Yakomba aolotsa tolenge tona basala yok’osamb’oho, tolenge tonatomela bon’in’one, koko tookama loi en’etumbelo, in’anayali l’imeedyo nk’isisali kei, afaleki nde okolots’ino bisenda? 31Lacin’eho, botakandakandake, ko botilake mbo, Tongola nai? ko tongomela nai? ko tongolota nai? 32Lacina banakemba toma tone tohatotu nko Befenda: Bafango’onino onoyali ena loola amey’oka ino boinda tome tone tohatotu. 33Koko bokemba en’oso mene lifoka linande ko la mbongi enande; ko toma tone tohatotu tongokokokedyama. 34Lacin’eho, botakandakandake lacin’ena loi; bin’ona loi bongokandakanda lacin’ena baoyi banandamene. Bowe bona bina l’ina bokoli la bin’oho.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matayo 6: BBY62
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
