Matayo 15
15
BaPalusi na Mijɔ miBatata
1Bakina BaPalusi na basɔni baYelusalema badoa ai Yesu a ehole emina, na bamohɔjɔ bo, 2Bacingami bawɛ batasumaka mijɔ mibatata cina eye? Te basosake nongo mɔmɔ mabu a mojɔ mobo yaka. 3Iyo abasɔmbeja bo, Ino bɛnɛ osopakani Mobeko moNjambe a mojɔ mongando jibatata mojɔ moye? 4Mojɔ bo Njambe adumba mobeko bo, Toma suma sangwao na ngwao; na moto akasinga sangwa’nde isa ngwa’nde, abwani oko na bogwa. 5Moto ko akabala na sangwa’nde isa ngwa’nde bo, Mbi nabwani bopa no eka yeye, naedikejai ko ai Njambe; ino obalakani bo moto omina aditi koko na ekina nongo ai sangwa’nde isa ai ngwa’nde. 6Oko boa osɛtojakani Ebaeli eNjambe cina engando jibatata. 7Ino bakosei! Ekenge ebala Yisaya ebwani na nu soti. Iyo abala bo,
8Bato ba basumaka mbi na monɔkɔ.
Milema mibu ko midi na mbi bohali.
9Basakoaka mbi oko esakoasakoa;
Mijɔ mikojaka bo midi oko mibeko mibato pɛ.
10Yesu abea bato banɛnɛ ai yo na abala na bu bo, Hokeani na cingeani mojɔ mu. 11Moto t’abehake a mojɔ moeka yena ekweaka ta monɔkɔ monde. Modi oko mojɔ mua momanaka a monɔkɔ momoto mua momobejaka. 12Bacingami bande badoa ai yo, na babala na nde bo, Ojebaka bo BaPalusi basuboaka a mojɔ mobikenge bimi wɛ bala? 13Iyo abasɔmbeja bo, Mele misusu midi Sangwa’mbi pɛ bona, mîpikoama oko bopikoama. 14Kinani badae. Bagwa miso, na banejaka bato njea baya bagwa koko miso. Moto yona ogwa miso akaneja moto njea yona ogwa koko miso, bo basusu babae badi bokwa a libɛngɛ. 15Petɛlo amosɔmbeja bo, Cingea so monde momina. 16Yesu abala bo, Ino omanakinini a libumi? 17Otacingeakani bo eka ekakwea ta monɔkɔ, enɔkɔ a sɔpɔ na emanaka a njima. 18Mojɔ mua momanaka a monɔkɔ ko modongaka a molema; mua mobejaka moto oko mu. 19Bileli bibe bimanaka a molema, na bowa, na bɔɔli, na lisɔngi, na liba, na bokosea, na minango. 20Ngando jia jibejaka moto oko ji. Moto ko akayaka, pe bopeta sosa mɔmɔ, mojɔ momina motamobejaka nongo mweka.
Mwali oKanana
21Yesu adonga ena na akɛ a makota maTula na Sidona. 22Okina mwali oKanana yona odaka a esika emina, amana na abekoa bo, Kumu, Mwana ’Dawidi, ikeani wa! Mwana’mbi mwali adi na monɔngo monɛnɛ a mojɔ momwembo mobe. 23Yesu ko aisɔmbeja nongo ekenge. Bacingami bande badoa ai yo na bamongɔɔnɔ bo, Moyaneja, mojɔ bo asusaka so na abekoakadea. 24Iyo ko asɔmbeja bo, Mbi nalomami oko ai bata babungake badenga diYisalaele. 25Mwali ko adoa, asumana ai yo, abala bo, Kumu, kɔmejani! 26Yesu amosɔmbeja bo, Ebɔngiti bo batombe milembe raibana bakɛkɛ bo bamidumbe ai bana-mbwa. 27Mwali ko abala bo, Ee, Kumu; bana-mbwa ko bayakaka mbumbu jimolɛmbɛ jia jikwaka a mesa mamoswa’bu. 28Yesu amosɔmbeja bo, Mwali, ejimeli ewe edi enene. Yɛ modae na we o apalaka wɛ, Na mwana’nde ahela oko a ehole emina.
Yesu a Galile
29Yesu adonga ena, ahula koko a libale liGalile, na akɛ akadae a mokina mono. 30Bato badoa ai yo banɛnɛ mɛne. Ibo badoa koko na bato bamitɛngu, bato baya bagwa miso, na bimimi, na babiɛmɛ, na batongo koko banɛnɛ. Babasambea a boso bonde na abaheleja. 31Bato baemumu bakamoa bou yana anɛ bo bimimi bakabale, bo babiɛmɛ bahela, bamitɛngu bakadale, bato baya bama gwa miso basɔ njɛnɛ, na bakumeja Njambe oYisalaele.
Yesu Ayakeja Bato Koto Jinɛi
32Yesu abea bacingami bande na abala na bu bo, Mbi nadi na wa a mojɔ mobato ba banɛne. Bayeyoi na mbi edɛye masu masato, na bapeliti eka eboyaka. Nitapalaka bo nabayanejae boa na nja, basaka kwa limama a njea. 33Bacingami bamohɔjɔ bo, Adi so ya a esika, iso bodi boboloja milɛmbɛ iɔ, mia mibwani na bato ba banɛnɛ? 34Yesu abahɔjɔ bo, Odini na milɛmbɛ meka? Ibo bɛ bo, Sambo, na bakina swi babojio. 35Oko boa Yesu apa monɔkɔ bo bato badae na mbondo. 36Atomba milɛmbɛ sambo na swi. Ajongoa, abuka milɛmbɛ na swi, apa bacingami bande, na bacingami bapa milɛmbɛ na swi ai bato baemumu. 37Ibo basusu bayaka na bagola. Bandoa koko bikenge bia bidika, na balumeja sanga sambo. 38Baya bayaka badaka bato bami koto iinɛi, pɛ bolanga bali na bɛngɛ pongono. 39Ngɔngɔ iimina, Yesu ayaneja bato, atamba a bwato, na akɛ a dɔngɔ diMagadala.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matayo 15: NTNG61
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Alliance Biblique de la R. D. Congo
