Marcos 12
12
Dayakapabu mekenika besumakiri Jesusũ hatu yusĩnikiaki, na hãtxarã
(Mt 21.33-46; Lc 20.9-19)
1habianushũri miyuiwẽ Jesusũ shanẽ ibubu hatu yusĩkĩ:
—Huni betsã bai washũ uva bimi batapa banatã mixkiwẽ dakẽbaũkĩ keyutã hanua haki uva tsiniti watã hanushũ dasibi uĩbaũti hiwe pixta keyatapa watã hanushũ hau bimi dabukũ ea inãshanũbũ, iwanã, huni betsa dayakapabube habube yubakatã ibu keska wakĩ yunuyubaini txai kaimakẽ 2hanu ma kani tsekatitiã ikaya bai ibuã hawena dabukũ hau yukatã ea bishũtanũ, iwanã, hawẽ tsuma betsa yunua ka 3habũ hawena inãkatsi ikama uva bimi mekeabũ atxishũ kuxa kuxa ashũ hawa inãma mais kaya 4hanushũ bai ibuã ana hawẽ tsuma betsa yunuria ka kũyã ashũ makuxkĩ mapeshtã nitxĩriabu kariakẽ 5hanushũ bai ibuã ana hawẽ tsuma betsa yunua ka tenãbũ hanushũ betsa betsapari yunua buabu hatu kuxa kuxa akĩ hatiri tenãbũ
6hatu haska tibi wabia habũ inãbumakẽ hawẽ bake bestitxai abuhairai ha besti niti itanaya hakiri xinãkĩ: “Ẽ bake ẽ yunua kaya haki mesekĩ ẽ bimi ea ha inãshũtirubumẽkaĩ”, iwanã, yunua ka 7hawẽ bake hatuki kemai kai betxitã yuinamei: “Bai ibu mawaxĩkẽ na hawẽ bakẽ hawẽ bai tibi inũ hawẽ hiwe tibi dasibi hawenawayuikiki. Na bai nukunas nũ wanũ tenãnãkãwẽ”, ishũ 8atxishũ tenãtã bai tsisumẽ putanibuki— iwanã,
9—Haskakenã, ha bai ibuã haskara hatu washanimẽkaĩ? Matu yuinũ nĩkakãwẽ. Bai ibu hawenabube hushũ bai anu dayamisbu hatu tenãtã hanushũ huni betsabu hawẽ bai anu hau dayashunũbũ hatu yunushanikiki— iwanã
10—Deusũ hãtxa kenenibu uĩkĩ mã yuismamẽ? Matu ana xinãmanũ nĩkakãwẽ:
‘Hiwe wanikabũ mixki danãbiaibũ habias mixki Deusũ bishũ
deshũ makeresh wakĩ hawẽ kene mestẽwã keska wakĩ
11nuku uĩmakĩ “habaa”! imakĩ nuku harakiri xinãtima washanikiki’,
hatu waya 12na miyuiwẽ hatu ha akĩ txiteai unãkĩ shanẽ ibubũ Jesus atxikatsis ibiai yurã kaiãki mesekĩ hawa meama heneyunibukiaki.
Ha governo dayashũmisbu pei pakatimẽ? ikaibu Jesusũ hatu yununikiaki, na hãtxarã
(Mt 22.15-22; Lc 20.20-26)
13Hanushũ Jesus haska washũ tenãtima hawẽ parãtã Romano shanẽ ibu ha amakatsi ikĩ judeu shanẽ ibubũ fariseubu inũ Herodeski txiti ika betsabu Jesus anu hatu yunuabu 14haki beparamebaĩ yuikĩ:
—Yusĩnaã, yura betsabu miki sinatabiaya hawa hatuki dateama ikũ hãtxa besti yusĩkĩ haska wakĩ Deus txibãtirubu besti mĩ hatu shabakabi yusĩkubainairã, nũ unaiĩ. Haskawẽ taeshunã, haskara mĩ xinaĩmẽkaĩ mia yukapa? Ha Romano shanẽ ibu Césarn nuku pei yukamisrã, haska wanãshãpa? Pakanãshãpa? Pakatimaraka?— akaibu
15Jesus hawẽ beparãkĩ hamakiri yuimatã itxakawatirubu unãkĩ hatu yuikĩ:
—Haskarawẽ mã ea unãti wakĩ beparanũ ika ikanai? Hawẽ governo imposto pakati pei heshe betsa ea uĩmakãwẽ— hatu wa
16betsa beshũ inãbu uĩkĩ Jesusũ hatu yukakĩ:
—Narã, tsuã besu inũ tsuã kena neamẽ? Ea yuikãwẽ— hatu wa habũ yuikĩ:
—Romano shanẽ ibu Césarnaki— akabu
17Jesusũri hatu yuikĩ:
—Imperador Césarnawẽ taeshũ matũ shanẽ ibu duawakĩ hawẽ governo dayashũmisbu pei hatu inãshũkubaĩkãwẽ. Hakia Deusri duawakĩ hawẽ yusĩa txibãkĩ hawara abuai ashũriakubaĩkãwẽ— hatu waya
—Nũ haska washũ parãtirumaki— iki e itã ana hawa yuitima buaibũ
Mawanibu bestẽshanaikiri Jesus yukanibukiaki, na hãtxarã
(Mt 22.23-33; Lc 20.27-40)
18hanua saduceubu judeubu pashka betsa: “Ha mawabu hawẽ yura tsua ana besteĩsmaki”, imisbu Jesus anu haburi beshũ yukakĩ:
19—Yusĩnaã, Moisés yusĩkĩ: “Huni betsa aĩyã huni bakewariama huni mawakẽ hanua hawẽ betsã aĩ hanubi aĩwãtã huni bakewashũtiki, hawẽ betsa mawaimatũ kena dabikinã”, nuku waniki. 20Haskakiri ha hawẽ sete betsabukiri mia yuinũ nĩkawe. Ha dukũ iuwatũ aĩbu betsa aĩwãshũ huni bakewariama mawakẽ 21ha katxukeatũ hawẽ betsã habias aĩbu aĩwãshũ huni bake wariamari mawakẽ ana ha katxukeatũ hawẽ betsã aĩ habiari aĩwãriatã huni bake wariamari mawaniki. 22Hanua ha sete hawẽ henekĩ habias aĩburi bishũ habu tibitũ hawa huni bake bawabuma mawai keyuabũ hanua hawẽ henei aĩbu huni bake biamas mawarianiki. 23Ha haskaniburã, mawabu ana besteaĩbutianã, ha aĩbu bestitxai ha huni setebũ aĩwaniburã, haratutũ kaya ana ha aĩbu bishanimẽkaĩ?— akabu
24Jesusũ hatu kemakĩ:
—Matunã, Deusũ hãtxa kenenibu unãma hawẽ kuxipa mã unãmariki. Haskakĩ mã kanemiski. Shabakabi matu xinãmanũ nĩkakãwẽ. 25Mawanibu ana bestẽshanaibutianã, hawa ana aĩyaĩ inũ ana beneyai ikama ishãkanikiki. Hanua Deusũ nai tsumabu keska beneuma inũ aĩyuma hiweshãkanikiki. 26Mawakubainaibu besteĩ ana hiweshanaibukiri matu yusĩnũ nĩkakãwẽ. Hi mashu kua here hi hi ikai anushũ Deusũ Moisés hãtxa wakĩ: “Earã, natiã ẽ Abraãonẽ mekenikaki. Ẽ Isaquẽ mekenikaki. Ẽ Jacõ mekenikariki”, ikai nĩkayamashũ Moisés kenenirã, mã uĩkĩ yuismamẽ? 27Deusrã, mawabunamaki. Hakia hiweabunaki. Haskakẽ Abraão inũ Isaque inũ Jacó hatũ yushĩ hiweabuki. Txipu ana yura bena Deusũ hatu inãshanai xinãma mã kanehairamiski— hatu wa
Deusũ yununirã, haratu bestitũ binu keyuamẽ? ikaikiri Jesusũ hatu yusĩnikiaki, na hãtxarã
(Mt 22.34-40)
28Jesus saduceubube yuinameai nĩkabaikĩ Jesus haskakiri yukabu hatu yui pewashukiri unaĩ Deusũ hãtxa kenenibu yusĩnanãmis betsa Jesuski kemashũ unãti wanũ ishũ yukakĩ:
—Haratu yunua kuxipa binua Moisés nuku keneshuniwẽ besti nũ txibaĩwẽ taeshũ Deusũ nuku mekekubaĩtirumẽ?— aka
29Jesusũ yuikĩ:
—Na eska yununi betsa betsapa tibi dasibi binuhairarã, eskaki. Nĩkakãwẽ: “Israelbuũ, nukũ Shanẽ Ibu Deus ha besti ikibi ini hiwepakeikiki. 30Haskakẽ nukũ Shanẽ Ibu Deus duahairawakĩ abukĩ hawẽ nuikĩ matũ huĩti inũ, matũ yushĩ dasibiwẽ inũ, matũ xinã dasibiwẽ inũ, dasibi matũ kuxipawẽ heneama akubaĩkãwẽ.” Mĩ haska tibiwẽ xinãkĩ akairã, ha yunua betsa dasibi binuhairaki. 31Ha katxu yunua betsarã, habe ketashnirã, nĩkawe: “Mĩ habube hiweabu duawariakubaĩkãwẽ, ibubis mã nui mekemis keska wakinã”, akĩ yuini ha yunuti dabe txibaĩ mã haki txiti ikaiwẽ taea matuwẽ Deus benimashanikiki— aka
32Deusũ hãtxa kenenibu yusĩnanãmistũ Jesus yuikĩ:
—Yusĩnaã, mĩ yusĩanã, peki. Txanima mĩ yui kayabiaii. Nũ abuhairaii. Txanima Epa Deus bestitũ nuku mekekubaĩtiruki, betsã nuku mekeamarã. 33Haska inũ, nukũ huĩti inũ, nukũ yushĩ dasibiwẽ inũ, nukũ xinã dasibiwẽ inũ, dasibi nukũ kuxipawẽ Epa Deus duawai haska nukũmebi nũ nuimis keskai yura betsabu tibiwẽ nũ nuiaiwẽ taeshũ Deusũ nuku abuhairaikiki. Hamẽ haskama hatira yuinaka deteshũ kuakĩ Deus nũ inãkuĩmis inũ hatira inãkuĩti betsa betsapa Deus kẽwãti hiwe anu nũ bumisrã, hawama keska Deusũ xinãmiski— akaya
34Deusũ hãtxa pe nĩkakĩ yuiai Jesusũ yuikĩ:
—Deus shanẽ ibuaiki mĩ ma haki dasi kemaki— aka ana tsuã hawa yukama mapuabũ
Messias Cristorã, tsuã babamẽ? iwanã, Jesusũ hatu yukanikiaki, na hãtxarã
(Mt 22.41-46; Lc 20.41-44)
35habianushũri Templo hemaĩtĩ anushũ Jesusũ hatu bepushumakĩ yukakĩ:
—Deusũ hãtxa kenenibu yusĩnanãmisbũ matu yusĩkĩ: “Cristorã, Davĩ baba ishanikiki”, ikĩ haskakĩ matu haska yusĩmisbumẽ? 36Matu yuinũ nĩkakãwẽ. Deusũ Yushĩ Pepatũ Davi yusĩa kenenitũ matu yuikĩ:
Deus mekenikatũ ẽ Shanẽ Ibu Messias yuikĩ:
“Miki sinataibu ẽ hatu maemariama manai ẽ yusiuri tsauyuwe”, aniki. Haska watã keneniki. 37Hakia: “Messias ẽ shanẽ ibuki”, Davĩ abianikẽ haskatã hawẽ shanẽ ibu hanubi hawẽ baba itirumẽ? Ea yuikãwẽ— akĩ shanẽ ibubu xinãmaya yura mirimabũ Jesusũ hãtxa nĩkai benimai tse ikaibũ
Deusũ hãtxa kenenibu yusĩnanãmisbu Jesusũ hatu txitekĩ dabĩ wanikiaki, na hãtxarã
(Mt 23.1-36; Lc 11.37-54; 20.45-47)
38habianushũs Jesusũ ana hatu yusĩkĩ:
—Deusũ hãtxa kenenibu yusĩnanãmisburã, hatu uĩrakãwẽ. Hatũ tari txaipa hawẽrua sawea mae hemaĩtĩ ewapa praça anu ẽ kawanai ea abukĩ ea kẽwãkĩ hau hãtxa pewẽ ea duawanũbũ ika mapumisbuki. 39Haska inũ, hanu itxati hiwe anu hikikaĩ haki tsauti pepa hanu dasibibũ hatu uĩtirubu anu tsaukatsis imisbuki. Ha inũ, itxatã pinũ, iwanã, hanu shanẽ ibubu dakai bashti ishũ pimisbu benariamisbuki. 40Haska inũ, aĩbũ bene ma mawakĩ shũnunikẽ hawẽ hamapai pepayabi hawẽ hiwe mebinũ itã aĩbu beparãkĩ hakiri pe xinãmanikapai Deusbe hãtxai txaipahairamisbuki. Haskamisbuwẽ taeshũ Deusũ hatu unãti watã kupiarã, yumãhairashãkanikiki— hatu watã
Aĩbu beneuma nuitapaitũ pei pixta inãkuĩnikiaki, na hãtxarã
(Lc 21.1-4)
41Jesusũ hatu yusĩ meneaya nuitapaibu hawẽ merabewati inãkuĩ pei hanu mistumisbu anu bau bebũ tsaushũ Jesusũ uĩayã yura pei mirima hayabũ itxapa mistubirãbiranaibũ 42aĩbu beneumari nuitapai hushũ pei heshe dabe hawa damahaira mistuaya Jesusũ uĩtã 43-44hawẽ tsumabu kenashũ hatu yuikĩ:
—Eskaki, matu shabakabi yuinũ. Ha hunibu pei itxapayabũ hatũ pei pashkashũ teshe besti inãkuĩkãshuki. Hakia ha aĩbu nuitapaitũ dasibi hawẽ hawara biti pei inãkĩ keyushuki— hatu watã
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Marcos 12: cbsBR
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
