लूका 8
8
येशूया ल्यूल्यू जुइपिं मिसात
1अनं लिपा वय्कलं शहर पतिकं व गांगामय् चाःहुलाः परमेश्वरयागु राज्ययागु भिंगु खँ न्यंकादिल। वय्कः नाप झिंनिम्ह चेलात नं दु। 2वय्कलं ल्वय् लाय्का तःपिं मिसात व भूत आत्मात पितिनाछ्वःपिं मिसातय्सं नं वय्कःयात मत्वःतू। इपिं खः – मरियम मग्दलिनी (थ्व मिसायागु म्हं न्हय्म्ह भूतआत्मातय्त पितिनाछ्वःगु खः) 3अले हेरोदया छम्ह कजी खूजासया कलाः योअन्ना, सुसन्ना व मेपिं यक्व मिसात नं वय्कः नाप जूगु दु। थ्व मिसातय्सं वय्कःयात माक्व धिबा बियाः ग्वाहालि याः।#मत्ती २७:५५-५६; मर्क १५:४०-४१; लूक २३:४९
पुसा ह्वलीम्हय्सिगु उखान
मत्ती १३:१-९; मर्क ४:१-९
4थाय् थासय् च्वंपिं व गांगामय् च्वंपिं यक्व मनूत येशूयाथाय् मुंवल। अले वय्कलं इमित उखान छपु कनादिल। 5“छम्ह मनू बुँइ पुसा ह्वः वन। वं पुसा ह्वःबलय् गुलिं गुलिं पुसा लँय् नं लात, अले अन लाःगु पुसा मनूतय्सं न्हुल। झंगःतय्सं नं वयाः नयाबिल। 6गुलिं पुसा ल्वहंलिं दुथाय् लात। अन लाःगु पुसा बुयावःसां बँ मप्याःगुलिं याकनं हे सिनावन। 7अले हानं गुलिं पुसा कंमा दुथाय् लात। कंमा तःमा जुया वःबलय् अन लाःगु पुसा थाहां वये मफुत। 8अले गुलिं पुसा भिंगु चा दुथाय् लात। थ्व पुसा तःमा जुयाः सछिदुगं अप्वः अन्न सल।” सुयाके न्हाय्पं दु वं न्यना का। थुलि धयाः वय्कलं उखान क्वचाय्कादिल।
थ्व उखानयागु अर्थ
मत्ती १३:१०-१७; मर्क ४:१०-१२
9वय्कःया चेलातय्सं थ्व उखानयागु अर्थ कनाब्यु धकाः धाःगुलिं 10वय्कलं थथे धयादिल – “परमेश्वरयागु राज्ययागु गुप्ति खँ छिमित सीकेबी धुंकूगु दु। मेपिन्त धाःसा जिं उखान छुनाः धया, थुकथं धर्मशास्त्र पूरा जुइमा,
“‘इमिसं स्वयाः नं मखनेमा,
अले न्यनाः नं मथुइमा।’” #यशै ६:९-१०
11 “उखानयागु अर्थ थ्व खः – पुसा परमेश्वरयागु वचन खः। 12लँय् लाःगु पुसा परमेश्वरयागु वचन न्यंसां नुगलय् तयातइमखुपिं मनूत खः। शैतानं वयाः इमिसं न्यंगु वचन फुक्कं इमिगु नुगलं लिकया यंकी, अले विश्वास याये मफयाः इपिं बचय् जुइ नं फइ मखु। 13ल्वहं दुथाय् लाःगु पुसा परमेश्वरयागु वचन न्यनाः लय्लय्तायाः विश्वास याइपिं मनूत खः। अय्नं वचन इमिगु दुनुगलय् थ्यंक दुहां मवंगुलिं इमिसं छुं ई तक जक विश्वास याइ। दुःखकष्ट वयेवं इमिसं विश्वास यायेगु त्वःताछ्वइ। 14कंमाय् लाःगु पुसा इपिं खः सुनां परमेश्वरयागु वचन न्यनाः नं धन सम्पत्तियागु माया कयाजुइ व संसारयागु खँय् च्यूताः तया जुइ। थुकथं इमिसं विश्वास याये फइ मखु। 15अले भिंगु चा दुथाय् लाःगु पुसा इपिं खः – सुनां परमेश्वरयागु वचन भिंगु मतिं न्यनाः नुगलय् दुने थ्यंक स्वथना तइ। अले थुमिसं क्वात्तुक विश्वास यानाः फल सय्की।”
त्वाःदेवाय् च्वंगु मत
मर्क ४:२१-२५
16 “मत च्याकाः सुनानं त्वपुया तइ मखु, खाता तःले नं तइ मखु। छेँय् वःपिन्त जः खयेमा धकाः मतयात त्वाःदेवाय् तया तइ। #
मत्ती ५:१५; लूक ११:३३ 17सुचुकातःगु फुक्कं सीदयावइ। त्वपुयातःगु फुक्कं खने दयावइ।#मत्ती १०:२६; १२:२
18 “अय्जूगुलिं बांलाक मन बियाः न्यनेगु या, छाय्धाःसा सुयाके दु वयात अज्जं बी। अले सुयाके मदु, वयाके दुगु नं लाका काइ।” #
मत्ती २५:२९; लूक १९:२६
येशूया मां व किजापिं
मत्ती १२:४६-५०; मर्क ३:३१-३५
19छन्हु वय्कःया मां व किजापिन्सं वय्कःयात नापलाः वल। ग्वाः ग्वाः मनूत मुनाच्वंगुलिं नापलाये मफुत। 20छम्हय्सिनं वनाः वय्कःयात धाल – “छितः नापलायेत छिकपिनि मां व किजापिं वयाच्वंगु दु। इपिं पिने पियाच्वंगु दु।”
21वय्कलं इमित लिसः बियादिल – “परमेश्वरयागु वचन न्यंपिं व मानय् याइपिं हे जि मां व किजापिं खः।”
ग्वःफय्यात दिकादीगु
मत्ती ८:२३-२७; मर्क ४:३५-४१
22छन्हु येशू चेलात नाप नांचाय् च्वनादिल। अले इमित धयादिल – “झीपिं समुद्रया पारिइ वनेनु।” अले इमिसं नांचा न्ह्याकल। 23वँवं हे वय्कः न्ह्यः वय्कादिल। थुबलय् हे समुद्रय् तसकं ग्वःफय् वल। अले नांचाय् लः जाया वयाः इपिं दुबय् जुइन।
24चेलातय्सं वयाः वय्कःयात थथे धयाः थन – “गुरुजु, गुरुजु, झीपिं दुबय् जुइन।”
वय्कलं दनाः ग्वःफय्यात व लःद्वम्बःयात हक्काः दिल। अले ग्वःफय् नं दित, लः नं मसन। 25वय्कलं इमित धयादिल – “छिमिगु विश्वास ग्व?”
इपिं तसकं अजू चायाः ग्या नं ग्यात। अले थःथवय् थथे खँ ल्हात – “थ्व मनू सु खः हं? थ्वं धाःगु खँ फसं व लखं नं न्यं।”
भूत दुब्यूम्ह मनूयात लाय्कादीगु
मत्ती ८:२८-३४; मर्क ५:१-२०
26अले वय्कःपिं गालील समुद्रयागु पारिइ च्वंगु गेरासेनस जिल्लाय् झाल। 27नांचां क्वहां वयेवं वय्कलं अन भूत दुब्यूम्ह छम्ह मनूयात नापलात। वं लं मफ्यूगु ताःई दये धुंकल। व छेँय् मच्वँसे दिपय् जक च्वनाच्वंम्ह खः।
28वय्कःयात खनेवं व पिच्याना हालाः तुतिइ भ्वपू वल। अले तःसलं हालाः थथे धाल – “हे दक्वसिबय् तःधंम्ह परमेश्वरया काय् येशू, छिं जितः छु याये मास्ति वः? जितः दुःख बियादी मते।” 29वय्कलं भूतआत्मायात – “वयाथासं पिहां वा” धकाः धयादीगुलिं वं अथे धाःगु खः। थ्व मनूयाके तःकः मछि हे भूत दुबी धुंकल। नेवलं ल्हाःतुति चिनातःसां वं भूतयागु शक्तिं नेवः चफुनाः मरुभूमिइ बिस्युं वनीगु जुयाच्वन।
30येशूं वयाके न्यनादिल – “छंगु नां छु?”
अले वं लिसः बिल – “जिगु नां पल्टन खः।” यक्व भूत आत्मात दुबिना च्वंगुलिं वं अथे धाःगु खः। 31अले भूत आत्मातय्सं “जिमित तःजाःगु गालय् छ्वयादी मते” धकाः वय्कःयात बिन्ति यात।
32अबलय् हे पाःचाय् छगू बथां फा त्वःतातःगु दु। भूत आत्मातय्सं फातय्गु म्हय् वनेब्यु धकाः वय्कःयात बिन्ति यात।
वय्कलं इमित वनेबिल। 33अले भूत आत्मात व मनूया म्हं पिहां वयाः फातय्के दुबित। अले फात फुक्कं ब्वाँय् वनाः भीरं क्वब्वां वनाः समुद्रय् दुबय् जुयाः सित।
34थ्व खनाः फा जवाःत अनं बिस्युं वन। अले इमिसं थ्व खँ शहर व गांगामय् बय्बय् याः जुल। 35अले मनूत छु जूगु स्वयेत अन वल। इपिं अन थ्यंबलय् भूत दुब्यूम्ह मनू जियाः लं फिनाः येशूया लिक्क च्वनाच्वंगु खन। थ्व खनाः इपिं ग्यात। 36अले खंपिन्सं इमित गुकथं भूत दुब्यूम्ह मनूयात लाय्कल धयागु फुक्क कनाबिल। 37अले गेरासेनस जिल्लाय् च्वंपिं मनूतय्सं ग्यानाः वय्कःयात अनं पिहां झासँ धकाः बिन्ति यात।
उकिं वय्कः नांचाय् च्वनाः लिहां झाल। 38व लाःम्ह मनुखं वय्कः नाप वनेत स्वल, तर वय्कलं वयात थथे धयाः छेँय् छ्वयाबिल – 39“थःगु छेँय् वनाः परमेश्वरं छन्त गुलि तःधंगु ज्या यानाबिल धकाः न्यंकि।” अले वं वनाः शहर पतिकं वयात येशूं यानादीगु तःधंगु ज्या बय्बय् याः जुल।
सीम्ह मचा व मफुम्ह मिसा
मत्ती ९:१८-२६; मर्क ५:२१-४३
40येशू लिहां झाःबलय् वय्कःयात पियाच्वंपिं मनूत फुक्कं लय्लय्ताल। 41धर्मशास्त्र स्यनीगु छेँयाम्ह कजी याइरसं वयाः वय्कःया तुतिइ भ्वपुयाः “जिगु छेँय् झासँ” धकाः बिन्ति यात, 42छाय्धाःसा वया झिंनिदँ दुम्ह याकः म्ह्याय् सी थें च्वंक उसाँय् मदयाच्वन।
वयागु खँ न्यनाः वय्कः व नाप झाल। वय्कः थथे झायेत्यंगुलिं मनूतय्सं वय्कःयात घ्वात्तु घ्वात। 43हुलय् झिंनिदंनिसें हि क्वहां वइगु ल्वचं कयाच्वंम्ह छम्ह मिसा नं दु। वयागु ल्वय् सुनानं हे लाय्के मफु। 44ल्यूनें वयाः वं वय्कःयागु गाच्वः थिल। उघ्रिमय् हे वयागु हि क्वहां वइगु ल्वय् लन।
45वय्कलं धयादिल – “जितः सुनां थिल हं?”
सुनानं थिया धकाः मधाः। अले पत्रुसं धाल – “गुरुजु, उलिमछि मनूतय्सं छितः घ्वात्तु घ्वानाच्वंगु दु।”
46अय्नं वय्कलं धयादिल – “जितः सुनानं थ्यूगु हे खः। जिगु म्हं शक्ति पिहां वंगु जिं चाः।” 47व मिसां वय्कःयात थ्यूगु खँ वय्कलं सी धुंकल धकाः ताय्काः ग्याग्यां वय्कःयागु तुतिइ भ्वपू वल। अले वं वय्कःयात थियाः थःगु ल्वय् लाःगु खँ फुक्कसिगु न्ह्यःने धयाबिल। 48अले वय्कलं धाल – “केहेँ मय्जु, छं विश्वास याःगुलिं छंगु ल्वय् लन। आः याउँक हुँ।”
49उबलय् हे कजीया छेँनं छम्ह मनू वयाः वयात थथे धाल – “छिम्ह म्ह्याय् सी धुंकल, अय्जूगुलिं गुरुजुयात दुःख बियादी म्वाःल।”
50थ्व न्यनाः वय्कलं याइरसयात थथे धयादिल – “ग्यानादी म्वाः, छिं विश्वास जक यानादिसँ। छिकपिनि म्ह्याय् म्वाइ।”
51छेँय् थ्यंकाः वय्कलं पत्रुस, यूहन्ना, याकूब व सीम्ह मचाया मां बौयात जक मचा दुथाय् दुत यंकादिल। मेपिं सुयातं दुकयामदी। 52अन च्वंपिं फुक्कं मचा सीगुलिं नुगःपा दादां ख्वयाच्वन। वय्कलं इमित धयादिल – “ख्वये मते। मचा सीगु मखु, न्ह्यः वय्काच्वंगु खः।”
53थ्व न्यनाः इमिसं वय्कःयात गिजय् यात, छाय्धाःसा इमिसं मचा सीगु हे खः धकाः बांलाक सी धुंकल। 54मचायागु ल्हाः ज्वनाः वय्कलं थथे धकाः थनादिल – “नानी, दँ।” 55अले वयागु आत्मा लिहां वल, उघ्रिमय् व जुरुक्क दन। अले वयात छुं नकेत बियादिसँ धकाः वय्कलं धयादिल। 56वया मांबौ ला तसकं अजू चाल। वय्कलं थ्व खँ सुयातं कने मते धकाः इमित उजं बियादिल।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
लूका 8: NEW
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
