Luke 24

Jesus Aŋiruq Tuqqunmiñ

(Matthew 28.1-10; Mark 16.1-8; John 20.1-10)

1Tavra Jew-guruat itchaksriġmata savaiññiŋat qaaŋiġman, qauksrauraqsaġataqtuami, aġnat iḷuvviviŋmuŋarut tigumiaqługich tivraġiksautit itqanaiyaatiŋ. 2Tavra iliŋisa tautuŋagaat uyaġak aksraktinŋaniqsuaq paaŋaniñ iḷuvvivium. 3Aasii isiqamiŋ paqinŋaitkaat timaa Atanġum Jesus. 4Qanuqsausiitchaġataviksillugich taavrumuuna, tavraŋŋatchiaq iññuk malġuk makinniqsuk saniġaannun qiŋŋaġnaqtuanik annuġaaqaqtuak. 5Tavra iqsitchakłutiŋ aġnat punŋarut nunamun. Iññuk uqallaŋaruk ilaiññun, Summan ivaqpisiuŋ iñuuruaq akunġanni tuquŋaruat? Uvaniinŋitchuq. Aŋiŋaruq tuqqunmiñ. 6#Mt 16.21; 17.22, 23; 20.18, 19; Mk 8.31; 9.31; 10.33, 34; Lk 9.22; 18.31-33.Itqaqsiuŋ ilaan uqallautaa ilivsiññun Galilee-miinŋaġmi inna, 7Iġñiŋa iñuum aitchuutauniaqtuq piḷuusiqirinun, aasii kikiaktuurrauluni aŋarrauramun, suli uvluk piŋayuaŋni aŋiñiaqtuq. 8Tavra aġnat itqaŋagaich Jesus uqaluŋi, 9aasii utiqłutiŋ iḷuvviviŋmiñ quliaqtuaġiŋagaich tamatkua iluqaisa qulit atautchimun iḷitchitquranun, iluqaiññullu iḷaŋiññun. 10Tavra Mary Magdalene Joanna-lu Mary-ḷu aakaŋa James, allallu aġnat piqatigivlugich quliaqtuaŋarut taavrumiŋa tiliranun iḷitchitquranun. 11Aasii taapkuali tilirat iḷitchitqurat isumaŋarut aġnat asiḷiqinivḷugich, aasii ukpiġiŋaitkaich. 12Aglaan Peter makinŋaruq, aasii aqpamik iḷuvviviŋmukłuni. Itchuaqami, ilaan tautuŋagai ukił̣haaġiksuat iḷuvviuġutit kisiisa. Aisaŋaruq isumaaluutigivlugich tamatkua piruat.

Iññuk Emmaus-muksaqtuak

(Mark 16.12-13)

13Taavrumanivsauq uvlumi malġuk iḷaŋich aullaqsaġmiñiqsuak nunaaqqimun atiqaqtuamun Emmaus-mik, tallimat malġuktun mile-tun uŋasiksigiruamun Jerusalem-miñ. 14Suli uqaqatigiiŋaruk avanmun tamatkunuuna iluqaisigun piruatigun. 15Tavra uqaġataviksillugik avanmun tamatkuniŋa sivuniqsiñialavlutik atautchimi, Jesus ilaa qalliḷaaġutiŋaruq aasii pisuaqasiutivlugik. 16Tavra tautukkaluaġaak, iḷisaqsripkaqtauŋaitchuk. 17Tavra ilaan uqallautiŋagik, Sunaimña uqaaġutigiraqtik avanmun pisuallaptik? Tavra iliŋich nutqaŋarut, qiññaqaŋaruk taapkuak ipiqtusuktuatun. 18Tavra igḷua atiqaqtuaq Cleopas-mik uqallaŋaruq ilaanun, Uvvailivich kisivich iglaaguruatin Jerusalem-mun naluvich sunik piŋaruanik makkunani aqulliġñi uvluni? 19Tavra ilaan apiġiŋagik. Sut piruat? Iliŋiktali kiuŋagaak, Ivrumuuna Jesus-kun Nazareth-miukun, uqaqtaagun God-im sapiġñaqtuakun savaŋniġmiñi uqaluŋmiḷu sivuġaani God-im iluqaġmiglu iñuich. 20Qanuġlu aŋaiyyuliqsiqpaptiŋnun umialiŋnanullu aitchuutigiŋatilaaŋanik tuqutaksraġuqługu, aasii kikiaktuutivlugu aŋarrauramun. 21Uvagulli niġiugigaluaqtaqput ilaagunivḷugu tasuqsairuksraun Israel-guruanik. Aaŋami taapkuatualuuŋiñmiut, paŋmapak uvva uvluk piŋayuak tamatkuaqaŋa pimmata. 22Aasiisuli iḷaŋisa aġnat iḷaptiŋni tupaimmiraatigut. Iḷuvviviŋmugniqsuat uvlaatchaurami 23aasii paqinŋaitkaat ilaan timaa, aasii utiqłutiŋ uqaŋarut niptaġnivḷugich isaġulgich uqaqłutiŋ iñuunivḷugu. 24Iḷavuttauq piqatauruat uvaptiŋnun iḷuvviviŋmuŋarut, aasii paqiłługu tainnatupiaġataq aġnat uqausiatitun, aglaan ilaa tautuŋisiññaqługu.

25Tavra Jesus uqallautiŋagik, Isumatuitchutik ukpikallaitchutiglu iluqaiññik uqaqtiŋisa God-im uqalugiŋaraŋiññik. 26Qanuq uqautigiŋagaat taimani Christ nagliksaaqtuksraunivḷugu aasii God-im kamanaqsipkaġlugu. 27Tavra Jesus kaŋiqsipkaġniaŋagik uqaluŋnik inmigun iluqaiññi Bible-niittuanik, isagutivluni aglaaŋiñiñ Moses aglaaŋiññiglu iluqaiññik uqaqtiŋisa God-im.

28Tavra qalliŋarut nunaaqqimun ullaukkamiŋnun. Jesus qiññaqaŋaruq qaaŋiġñiaqtuatun. 29Tavra iliŋikta arapiaŋagaak uqaqłutik, Nayuqtiguk, qanuq uvva unnugiaqtuq suli uvluq taaqsiaqsiruq. Tavraasii ilaan isiqatigiŋagik. 30Tavra Jesus niġiqatigisaaqsikamigik, tiguŋagaa punniq aasii aŋaiyyuqqaaqłuni aviŋagaa punniq, aasii aitchuutigivlugu iliŋiŋnun. 31Tavra iliŋikta iḷisaġiŋagaak, aasii ilaa qiñiġnaiŋaruq iliŋiŋniñ. 32Tavra iliŋik uqaurrutirraqsiŋaruk avanmun, Qaariŋaitpiñuk iḷuptiŋni ilaan uqautiugaġmatiguk iglaullapta, kaŋiqsipkaġniaqługich Bible uqaluŋich?

33Tavra iliŋik utiqsautigillaan piŋaruk Jerusalem-mun, aasii kasuŋagaich qulit atautchimik iḷitchitqurat kasimaruat atautchimi tamatkualu piqatiŋich. 34Aasii taapkua kasimaruat uqaŋarut, Ataniq iḷumun aŋiŋaruq, aasii niptaqłuni Simon-mun. 35Tavrali iliŋik quliaqtuarraqsiŋaruk sum pisilaaŋanik apqunmi, qanuġlu Jesus iḷisaġipkaqtilaaŋanik inmiŋnun avikamiuŋ punniq.

Jesus Niptaqtuq Iḷitchitquramiñun

(Matthew 28.16-20; Mark 16.14-18; John 20.19-23; Acts 1.6-8)

36Taavrumiŋa uqaġataviksillugik, Jesus ilaa makinŋaruq akunġannun, aasii uqallautivlugich, Tutqiutiqaġitchi. 37Tavra iliŋich tupaŋarut iqsitchakłutiglu, isumavlutik aliuqtuġasugalutiŋ. 38Tavra Jesus uqallautiŋagai, Summan isumaalukpisi? Summallu nalupqisukpisi isumavsiññi? 39Tautuksigik argatka isigatkalu, uvaŋapiaġatauruŋa. Savitchiŋa iḷitchuġiyumausi, qanuq ilitqusiq timaitchuq saunġitchuġlu tautuusivsisun uvamnik timiqaqtuatun. 40Tavra taamna uqallausiġiqqaaqługu, ilaan qiñiqtinŋagai argaŋmiñik isigaŋmiñiglu. 41Tavra ukpiŋaitkaluallaġmiŋ quviasugataviksillugich aliuqłutiglu, ilaan apiġiŋagai, Sumik niġiñaġumiñaqtuamik piqaqpisi? 42Tavra aitchuŋagaat iḷaviñiŋanik uunŋaruam iqaluum. 43Aasii ilaan tiguvlugu niġiŋagaa takkuanni.

44Tavrani ilaan uqallautiŋagai, Tamarra uqalutka uqautigiŋaratka ilivsiññun nayuŋŋavsi, supayaat aglausimaruat uvapkun pitqurani qaisauŋaruani Moses-kun, uqaqtiŋisigullu God-im, Psalms-niḷu nalauttuksraupiaġnivḷugich. 45Tavra Jesus kaŋiqsiyumiñaqsiŋagai Bible uqaluŋiññik, 46aasii uqallautivlugich, Inna aglausimaruq, Christ nagliksaaqtuksraunivḷugu aasii uvluk piŋayuaŋni aŋiluni tuqqunmiñ. 47Aasii pisigilugu ilaan piraŋa, tusaayugaaġiksuat God-im suliqutigiŋaiġutaagun itqaumayumiñaiġḷugich piḷuutit isumalitqiksuanun alġaqsruutigiraksrauvlugu nunapayaanun aullaqilugich Jerusalem-miñ. 48Ilivsi tautuŋaruasii tamatkuniŋa quliaqtuaġiniaġisi. 49#Ac 1.4.Aasiuvva, uvaŋa tiliñiaġiga ilivsiññun unniqsuqłiisaa Aapama. Aglaan utaqqiruksraurusi iniqpaŋmi, God-im suaŋŋataa atqaqsiaġilugu ilivsiññun.

Jesus Mayuurrauruq Qiḷaŋmun

(Mark 16.19-20; Acts 1.9-11)

50 # Ac 1.9-11. Tavra Jesus aullatiŋagai iniqpaŋmiñ Bethany-munaglaan, suli isaaqługich argaŋni aŋaiyyutiŋagai. 51Aŋaiyyutiniallaisa, ilaa mayuurrauŋaruq ilaiññiñ qiḷaŋmun. 52Ilaisa qiksigivlugu nanġaŋagaat, aasii utiqłutiŋ Jerusalem-mun quviasuutiqpaqaqłutiŋ. 53Suli ataramik aŋaiyyuvikpaŋmiinŋarut nanġaqługu quyyavigivlugulu God.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luke 24: INUPIAQ

Highlight

ಶೇರ್

ಕಾಪಿ

Want to have your highlights saved across all your devices? Sign up or sign in

Iñupiatun Mumiksat Uqalugiksuat (North Slope Iñupiaq Bible) © American Bible Society.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Iñupiatun Mumiksat Uqalugiksuat ಬಗ್ಗೆ ಇನ್ನಷ್ಟು ತಿಳಿಯಿರಿ